1, 2. Kema monekis tijtlapejpenis tlake tijchiuas, ¿kenke moneki tijneltokas tlen Jehová mitsiljuia? (Xikita nopa achtoui tlaixkopinkayotl).

TLAJ titelpokatl, uelis mitstlajtolmakatokej uan mitsiljuijtokej tlake uelis tijchiuas teipa. Uelis tlamachtiyanij, katli tetlajtolmakaj ipan escuela uan sekinok maseualmej mitsiljuijtokej tlauel ximomachti uan kiampa teipa uelis tijtlanis miak tomij. Jehová amo kiampa kineki xijchiua, kineki ximomachti uan kiampa uelis tijpias san tlen ika timopanoltis (Col. 3:23). Maske kiampa kineki, kema tijtlapejpenis tlake tijchiuas, ya mitsiljuia ximoyakana ika itlanauatiljuaj. Nopa mitspaleuis kuali xijtlapejpeni tlake tijchiuas ipan itlamia tonali (Mat. 24:14).

² Xikilnamiki, san Jehová kimati tlake panos teipa uan kimati ayokmo uejkauas nochi tlamantli tlen amo kuali ipan Tlaltipaktli (Is. 46:10; Mat. 24:3, 36). Ya kuali techixmati, kimati tlake tlamantli kichiua ma tipakikaj, kuali ma tijyolmatikaj uan tlake tlamantli kichiua ma timokuesokaj. Yeka, maske kemantika nesi kuali techtlajtolmakaj, tlaj amo uala ipan Biblia amo uelis techpaleuis (Prov. 19:21).

3, 4. ¿Tlake kinpanok Adán, Eva uan nochi ininkoneuaj pampa kitlakakilijkej tlen Satanás kintlajtolmakak?

³ Satanás elki katli achtoui amo kuali kintlajtolmakak maseualmej. Kikajkayajki Eva kema kiiljuik ya uan iueue tlauel yolpakiskiaj tlaj ininselti kitlapejpeniskiaj tlake kichiuasej ipan ininnemilis (Gén. 3:1-6). Tlen kichijki satanás kinextik san moiljuiyaya ipan ya. Kinekiyaya Adán, Eva uan ininkoneuaj san ya ma kiueyichiuakaj uan amo Jehová. Ximotlajtlani ¿tlake kinmakatoya Satanás? Amo tleno. Jehová kinmakatoya nochi tlen kipixtoyaj: kichijtoya sansejko ma itstokaj, kinmakatoyaj se yejyektsi xochimili uan ueliskia itstosej nochipa.

⁴ Adán uan Eva kiixpanokej toTeotsij uan kiampa ayokmo uelkej kuali mouikaj iuaya. Yeka ueuejtixkej uan mijkej, sanse kej se xochitl pilini uan uaki kema kitekij. Pampa tlajtlakolchijkej, ininkoneuaj teipa nojkia tlaijiyouijkej (Rom. 5:12). Maske kiampa panok, maseualmej nojua san kinekij kichiuasej tlen inijuantij kinekij uan amo kitlakakiliaj toTeotsij (Efes. 2:1-3). Ika tlen kichiuaj kinextiaj “niyon se tlakatl ueli motlalis iuaya toTeko. Ax ipati intla tlauel tlalnamiki”, ni kiijtosneki tlen maseualmej tetlajtolmakaj amo tleno ipati (Prov. 21:30).

5. ¿Tlake kimatiyaya toTeotsij kichiuaskiaj maseualmej, uan kenke tijmatij nelia tlen kiijtok?

⁵ Jehová kuali kimatiyaya miakej maseualmej, nojkia telpokamej uan ichpokamej, kinekiskiaj kiixmatisej uan kitekipanosej (Sal. 103:17, 18; 110:3). Ya tlauel kiniknelia nochi telpokamej. Tlaj ta nojkia tieli se telpokatl, uelis timotemachis Jehová tlauel mitsiknelia uan mitsmaka miak tlamantli tlen kichiua tlauel xiyolpaki (1 Tim. 6:17; Prov. 10:22). Ipan ni tlamachtili tikitasej se keski tlamantli tlen Jehová mitsmaka: mitspaleuia kuali xikixmati, mitsmaka kuali mouampoyouaj, mitspaleuia ximosentlali tijtekipanos uan mitspaleuia xiitsto kejuak timajkajtok.

6. ¿Kenke moneki tijchiuas kampeka kuali tikixmatis toTeotsij, uan kenijkatsa mitspaleuia Jehová?

⁶ Tojuantij amo tielij kej tlapialmej pampa tojuantij tijnekij tikixmatisej toTeotsij, uan ya techpaleuia ma tikixmatikaj (Mat. 4:4). Kema tijtlakakiliaj, tijkuamachiliaj miak tlamantli, tijpiaj tlalnamikilistli uan tlauel tiyolpakij. Jesús kiijtok: “Pakij katli kimatij moneki momachtisej toTeotsij iTlajtol, pampa inijuantij itstosej ipan toTeotsij iTlanauatijkayo” (Mat. 5:3, TNM). Jehová mitspaleuia xikixmati ika iTlajtol uan nojkia ika miak amatlajkuiloli tlen mitsmaka ika nopa “tlalnamijkatlatekipanojketl tlen nelia temachtli” (Mat. 24:45; Is. 65:13, 14).

7. ¿Kenijkatsa mitspaleuis nochi amatlajkuiloli tlen toTeotsij mitsmaka?

⁷ Amatlajkuiloli tlen techmaka toTeotsij mitspaleuis xitlalnamiki, uan nopa tlalnamikilistli “mitsmokuitlauis” (xijpoua Proverbios 2:10-14). Tlalnamikilistli mitspaleuis xijmati kema kiijtouaj tlen amo melauak, kej kema kiijtouaj amo itstok toTeotsij uan tiyolpakis tlaj titlatominpias o tijpias miak tlamantli. Nojkia mitspaleuis amo xijchiua tlen mitsyoltilana uan tlen uelis mitstlanauis. Yeka xijchiua kampeka tijpias nopa tlalnamikilistli tlen toTeotsij temaka.  Tlaj kiampa tijchiua tikitas Jehová tlauel mitsiknelia uan kineki xiyolpaki (Sal. 34:8; Is. 48:17, 18).

8. ¿Kenijkatsa mitspaleuis teipa tlaj nama timonechkauis ika toTeotsij?

⁸ Nechka tlamis nochi tlen Satanás kinauatia uan san Jehová uelis techmanauis. Kema asis nopa tonali monekis timotemachisej san ya uelis techmakas tlen ika timopanoltisej (Hab. 3:2, 12-19). Yeka nama tlauel moneki timonechkauis uan timotemachis ipan Jehová (2 Ped. 2:9). Tlaj kiampa tijchiuas, nojkia tijyolmatis kej David, katli kiijtok: “Nochipa nimoiljuia tlen ta, toTeko, uan pampa tiitstok nonechka, axtleno nopantis” (Sal. 16:8).

9. 1) Kej kiijtoua Juan 6:44, ¿tlake kichiua Jehová? 2) ¿Kenke tlauel ipati tikinixmatisej sekinok Jehová itlajtoltemakauaj?

⁹ Kema tikixmatij se akajya katli amo kitekipanoua toTeotsij, maske tijmatij itoka, kenijkatsa eli uan sekinok tlamantli tlen ya, amo kiijtosneki nelia kuali tikixmatij. Amo kiampa pano kema tikixmatij se Jehová itlajtoltemajka. Tijmatij kiiknelia Jehová uan tijmatij toTeotsij kiitak kuali iyolo uan yeka kiyoltilanki ipan itlanechikol (xijpoua Juan 6:44). Maske uala tlen seyok altepetl, amo eli san se kej tojuantij o momajtok kichiuas sekinok tlamantli, tojuantij kuali tikixmatij uan ya nojkia kuali techixmati.

10, 11. ¿Tlake tlamantli sanse tijpiaj Jehová itlajtoltemakauaj, uan kenijkatsa techpaleuia nopa?

¹⁰ Kema tikinixmatij toikniuaj, nima tikitaj kamatij nopa “tlajtoli” tlen tojuantij tijtekiuiaj: nopa “kuali tlajtoli” tlen melauak (Sof. 3:9, TNM). Ni kiijtosneki sanse kineltokaj toTeotsij, itlanauatiljuaj uan motemachiaj kuali itstosej teipa. Ya nopa tlen tlauel moneki tijmatisej tlen se maseuali, pampa ya nopa techpaleuia ma tikiniknelikaj uan ma timouampojchiuakaj ininuaya.

¹¹ Yeka tikijtouaj san Jehová itlajtoltemakauaj kinpiaj kuali ininuampoyouaj.  Maske amo tikinixmati nochi toikniuaj tlen itstokej ipan Tlaltipaktli, nochi elij mouampoyouaj. ¿Uelis sanse kiijtosej katli amo kitekipanouaj Jehová?

12. ¿Kenijkatsa uelis timosentlalis tijtekipanos Jehová?

¹² (Xijpoua Eclesiastés 11:9–12:1). ¿Tijchiua kampeka timosentlalis tijchiuas se keski tlamantli pampa tijneki tijtekipanos Jehová? Uelis tijchiua kampeka mojmostla tijpouas Biblia, kuali titlanankilis ipan tlanechikoli o kuali titlajtolmoyauas. Kema kuali kisa tlen timosentlalia tijchiuas o sekinok mitsiljuiaj kuali tlen tijchiua, ¿kenijkatsa tijyolmati? Uelis tlauel tiyolpaki, pampa sanse kej Jesús kichijki, ta nojkia tikachtouitlalia tlen Jehová kineki uan amo tlen ta tijneki (Sal. 40:8; Prov. 27:11).

13. ¿Kenke tlauel ipati tijtekipanos Jehová uan amo tijnekis titlapijpias?

¹³ Tlaj timosentlalis tijtekipanos Jehová, tlauel kuali tijyolmatis uan tlauel tiyolpakis. Apóstol Pablo kiijkuilok: “Uajka, noikniuaj, tlen niinmechiknelia, xiitstokaj intemachmej ipan toTeko. Amo xijkauakaj niyon se tlamantli ma inmechiyokatlalis tlen ya. Nochipa xijchiuakaj nochi nopa tekitl tlen Toueyiteko inmechmaka xijchiuakaj para ya. Uan xijmatikaj, axsan tlapik nopa tekitl tlen inkichiuaj kema inmotlatskilijtokej ipan Jesús” (1 Cor. 15:58). Katli mosentlaliaj kipiasej miak tomij o pankisasej ipan Tlaltipaktli, amo nelia yolpakij (Luc. 9:25). Ma tikitaj tlen kipanok tlanauatijketl Salomón (Rom. 15:4).

14. ¿Tlake mitsmachtia tlen kichijki Salomón?

¹⁴ Salomón, katli tlauel tlatominpiayaya, mosentlalik kichiuas miak tlamantli tlen ueliskia ika moyolpakiltis (Ecl. 2:1-10). Kichijchijki miak kaltinij, parques uan nochi tlen ya kinekiyaya. ¿Yolpajki ika nochi tlen kichijki? Kema moiljuik ipan nochi tlen kichijtoya, Salomón kiijtok: “Nochi eliyaya san tlapik [...]. Axtleno tlen nijchijtoya ipan ni Tlaltipaktli nelia ipati uan uejkauaskia” (Ecl. 2:11). ¿Tijchiuas kampeka ma mitspaleui tlen Salomón kipanok?

15. ¿Kenke moneki kuali titlaneltokas, uan kenijkatsa mitspaleuis tlen kiijtoua Salmo 32:8?

¹⁵ Se keskij maseualmej motlalnamiktiaj kema tlaijiyouiaj pampa mokuapolojkej. Jehová amo kineki kiampa ma mitspano. Ya kineki xijtlakakili uan xijtlepanita. Tlaj kuali titlaneltokas amo kema titlaijiyouis kema tijtlapejpenis tlen tijchiuas. Jehová amo kema kiilkauas “nopa tekitl tlen inkichijtokej pampa inkiikneliaj” (Heb. 6:10). Yeka xijchiua kampeka kuali titlaneltokas. Kiampa tikitas kenijkatsa tlauel mitspaleuis tlen Jehová mitsiljuia (xijpoua Salmo 32:8).

16. ¿Kenke moneki tijpatiitasej tiitstosej kejuak timajkajtokej?

¹⁶ Pablo kiijtok: “Kema Itonal toueyiteko mokaua ipan iyolo se tlakatl, nopa tlakatl ayok ilpitok ipan tlajtlakoli, ya majkajtok” (2 Cor. 3:17). Jehová, katli ueli kichiua nochi, techchijchijki ma techpakti tiitstosej kejuak timajkajtokej. Maske kiampa techchijchijki, kineki kuali ma tijtlapejpenikaj tlen tijchiuasej uan kiampa kuali tiitstosej. Uelis tikinixmati telpokamej tlen kiitaj pornografía, momekatiaj, kitekiuiaj drogas o tlauel moiuintiaj. Maske nesij nelia kuali kiyolmatij o tlauel yolpakij, teipa tlaijiyouiaj  pampa ayokmo uelij kikauaj, mokokouaj uan kemantika mikij (Gál. 6:7, 8). Maske moiljuiaj uelis kichiuasej nochi tlen kinekij mokajkayauaj (Tito 3:3).

17, 18. 1) ¿Kenke uelis tikijtosej kema tijneltokaj Jehová techpaleuia ma tiitstokaj kejuak timajkajtokej? 2) ¿Kenke maseualmej amo itstokej kejuak majkajtokej sanse kej achtouia itstoyaj Adán uan Eva?

¹⁷ Tlauel techpaleuia kema tijneltokaj Jehová. Kema kiampa tijchiuaj kuali tiitstokej uan nelnelia tiitstokej kejuak timajkajtokej (Sal. 19:7-11). Kema tijkaua ma mitsyakana Jehová itlanauatiljuaj ipan tlen tijchiua, Jehová uan motatauaj motemachisej ipan ta. Biblia kiijtoua toTeotsij kineki nochi itekipanojkauaj ma itstokaj kejuak majkajtokej, kema panos nopa, “itstosej keja tojuantij tlen tiikoneuaj toTeko” (Rom. 8:21).

¹⁸ Kiampa itstoyaj Adán uan Eva. Jehová amo kinmakatoya miak tlanauatili, san kiniljuijtoya amo ma kikuakaj itlajka se kuauitl (Gén. 2:9, 17). ¿Timoiljuia amo xitlauak eliyaya o tlauel ouij nopa tlanauatili? Amo. Maseualmej kena temakaj miak tlanauatili uan kintetsopaj sekinok ma kitlepanitakaj.

19. ¿Kenijkatsa Jehová uan Jesús techmachtiaj ma tiitstokaj kejuak timajkajtokej?

¹⁹ Jehová kinextia tlauel tlalnamiki, yeka amo techmaka miak tlanauatili, san techmachtia ma tijchiuakaj nopa tlanauatili tlen tlauel ipati: nopa tlaiknelili. Jehová kineki ma timoyakanakaj ika itlanauatiljuaj uan ma tijkualankaitakaj tlen amo kuali (Rom. 12:9). Jesús kiampa tlamachtik ipan Sermón del Monte, nopaya kiijtok se keski tlamantli tlen ueliskia kichiuas ma titlajtlakolchiuakaj (Mat. 5:27, 28). Ipan nopa yankuik Tlaltipaktli, Jesús, katli tekichiua ipan toTeotsij iTlanauatijkayo, nojua techmachtis ma tikitakaj kej ya kiita tlen kuali uan tlen amo kuali (Heb. 1:9). Nojkia techpaleuis ma tijpixtokaj kuali totlalnamikilis uan kuali totlakayo, ni kiijtosneki ayokmo mitsyoltilanas tlajtlakoli yon titlaijiyouis pampa titlajtlakole. Ipan nopa tonali moaxitis tlen Jehová mitsiljuijtok: nelnelia tiitstos ‘keja [...] ikoneuaj toTeko’.

20. 1) ¿Tlake kichiua Jehová maske ueli kichiua nochi? 2) ¿Kenijkatsa techpaleuia tlen toTeotsij kichiua?

²⁰ Tijmatij amo kema uelis tijchiuasej nochi tlen tojuantij tijnekisej, pampa nochipa monekis tijnextisej tikikneliaj Jehová uan maseualmej. Maske Jehová ueli kichiua nochi uan amo tleno kitsakuilia, ya nojkia kinextia kiniknelia maseualmej uan iluikaeuanij. Ya kineki ma tikixkopinakaj (1 Juan 4:7, 8). Tlaj tikixkopinaj toTeotsij, nelnelia tiitstosej kejuak timajkajtokej.

21. 1) ¿Tlake kiijtok David? 2) ¿Tlake tikitasej ipan nopa seyok tlamachtili?

²¹ ¿Tijpatiita nochi ni kuajkuali tlamantli tlen Jehová mitsmakatok? Ipan ni tlamachtili tikitakej kenijkatsa Jehová mitspaleuia kuali xikixmati, mitsmaka kuali mouampoyouaj, mitspaleuia ximosentlali tijtekipanos, uan teipa uelis tiitstos kejuak timajkajtok (1 Tim. 6:17). Sanse kej David, uelis ta nojkia tiyolpaki uan tijyolmati tlen kiiljuik Jehová: “Xinechnextilis katlia ojtli kipia yolistli. Nijpias ueyi pakilistli nepa kampa ta tiitstok. Kena, onkas ueyi pakili[stli] para nochipa nepa kampa monejmatl” (Sal. 16:11). Ipan nopa seyok tlamachtili tikitasej sekinok kuali tlamachtili tlen tijpantiaj ipan Salmo 16. Ni mitspaleuis kuali xijkuamachili kenijkatsa uelis tlauel tiyolpakis ipan monemilis.