Amo. Diablo amo kiiljuik Eva tlaj kikuaskia nopa kuatlajkayotl tlen Jehová kiiljuijtoya amo ma kikua, mikiskia uan kisaskia ipan itlakayo se tlamantli tlen amo kema miki (tlen nama kiiljuiaj tonaltsi o alma tlen amo kema miki). Ika nopa kouatl, Satanás kiiljuik amo kema mikiskia. Kejuak kiiljuik nojua itstoskia ipan Tlaltipaktli uan tlauel yolpakiskia tlaj toTeotsij ayokmo kinauatiskia (Gén. 2:17; 3:3-5).

Tlaj ipan Edén maseualmej amo pejkej kineltokaj tijpiaj se tonaltsi tlen amo kema miki, ¿uajka kema pejki? Amo tijmatij kema nelnelia pejki. Tijmatij nopa religión tlen amo melauak polijki kema tlauel uetski miak atl kema Noé itstoya. San Noé uan ichampoyouaj, katli eliyayaj toTeotsij itekipanojkauaj, momanauijkej. Yeka, nochi tlamachtili tlen amo melauak polijki.

Uajka, maseualmej pejki kineltokaj tijpiaj se tonaltsi tlen amo kema miki teipa kema ya uetstoya miak atl. Kema Jehová kichijki ipan Babel ma kamanaltikaj miak tlajtoli uan momoyajkej kampa ueli, inijuantij nojua kineltokakej tijpiaj tonaltsi o se alma tlen amo kema miki maske uejka itstoyaj (Gén. 11:8, 9). Maske amo tijmatij kema nelnelia pejki nopa tlamachtili tlen amo melauak, kena tijmatij “nochi istlakayotl” kipeualtik Satanás, uan tlauel yolpajki kema kichijki ma kineltokakaj nopa tlamachtili uan ma kimoyauakaj ipan nochi Tlaltipaktli (Juan 8:44).