Tlen kiijtoua Deuteronomio 22:25-27 amo kiijtosneki kiitayayaj tlaj nopa tlakatl nelia kichiualtik nopa ichpokatl ma moteka iuaya, pampa ya kimajtoyaj nelia kiampa panotoya. Ika ni tlanauatili kinekiyayaj kinextisej nopa ichpokatl amo tlajtlakolchijtoya. Ma tikitakaj tlake nojua kiijtoua.

Nopa achtoui versículos kiijtoua se tlakatl momekatiyaya iuaya se ichpokatl katli kiijtlantoyaj ipan se altepetl. Se ichpokatl katli kiijtlantoyaj kiitayayaj kej se akajya katli ya monamiktijtoya, yeka nopa tlakatl momekatiyaya tlaj motekayaya iuaya. Uan ¿kenke nopa ichpokatl nojkia tlajtlakolchijtoya? Pampa amo tsajtsik ipan nopa altepetl. Tlaj tsajtsitoskia, kikaktoskiaj uan kimanauijtoskiaj, uan pampa amo tsajtsik, kiijtosneki ya nojkia momekatijtoya. Yeka, nopa tlakatl uan nopa ichpokatl tlajtlakolchijtoyaj (Deut. 22:23, 24).

Nopa Tlanauatili nojkia kiijtouayaya ni: “Intla se tlakatl kipantis se ichpokatl ipan se potrero tlen kiijtlantok seyok tlakatl uan [kichiualtia] ma moteka iuaya, san moneki xijmiktikaj nopa tlakatl tlen kichiualtik iuaya ma moteka. Nopa ichpokatl axtleno xijchiuilikaj pampa axtlajtlakolchijtok para mikis. Se tlakatl tlen [kichiualtia] se ichpokatl ma moteka iuaya moneki mikis san se keja moneki mikis se tlakatl tlen kimiktia seyok tlakatl. Pero xijmiktikaj san nopa tlakatl pampa kipantik nopa ichpokatl iselti kampa potrero, uan yonke tsajtsitoskia chikauak, axaka kikaktoskia para kimanauis” (Deut. 22:25-27).

Kema kiampa panoyaya, tetlajtolsenkauanij kineltokayayaj tlen kiijtouayaya nopa ichpokatl. Moiljuiyayaj nopa ichpokatl tsajtsik uan amo aka kimanauik pampa amo kikajkej. Yeka, ya amo tlajtlakolchijtoya. Uan nopa tlakatl kena tlajtlakolchijtoya pampa kiixpanotoya nopa ichpokatl uan momekatijtoya pampa kichiualtik ma moteka iuaya.

Maske nopa Tlanauatili kiijtouayaya nopa ichpokatl amo tlajtlakolchijtoya, kena kinextiyaya nopa tlakatl tlajtlakolchijtoya pampa kiixpanotoya uan momekatijtoya. Uelis timotemachisej tetlajtolsenkauanij kuali kiitayayaj kenijkatsa kisenkauasej nopa kuesoli uan kichiuayayaj kej Jehová kiniljuijtoya (Éx. 20:14; Deut. 13:14; 17:4).