“¿NIKIJTOSKIA na nochipa nitetlaskamati?”. Nochi kinamiki timotlajtlanisej ni. Biblia kiijtoua ipan ni tonali miakej maseualmej amo tetlaskamatiliskiaj (2 Tim. 3:2). Uelis tikinixmatij maseualmej katli moiljuiaj moneki kinmakasej nochi o motlanilijtokej tlen kipiaj, uan yeka moiljuiaj amo kinamiki tetlaskamatilisej. Uelis tlauel mitskualankamakaj nopa maseualmej.

Jehová amo kiampa kichiua uan kiniljuia itekipanojkauaj: “Nochipa ximotlaskamatikaj” uan “xijtlaskamatikaj [...] nochi tlamantli” (Col. 3:15; 1 Tes. 5:18). Uan tlauel techpaleuia kema nochipa titetlaskamatij. Ma tikitakaj kenke tikijtouaj ni.

Tlauel kinamiki titetlaskamatilisej pampa techpaleuia kuali ma tijyolmatikaj uan ma timopatiitakaj. Kuali kiyolmati katli tetlaskamati uan nojkia katli kitlaskamatij. Tlaj tijnekij tijkuamachilisej kenijkatsa pano, ma timoiljuikaj ipan ni tlamantli: se akajya kineki kichiuas se tlenijki tlen tojuantij techpaleuis pampa moiljuia timotlanilijtokej uan pampa nelia techpatiita o kitekipachoua tlen techpano. Nopa kichiua nelia tlauel kuali ma tijyolmatikaj. Kiampa kiyolmatki Rut. Kema Booz tlauel kipaleuik, Rut tlauel yolpajki pampa kiitak se akajya kinekiyaya kuali ma itsto (Rut 2:10-13).

Uan tlauel moneki tijtlaskamatilisej toTeotsij. Uelis kemantika timoiljuijtokej kenijkatsa techmakatok miak tlamantli ipan tonemilis uan nojkia miak tlamantli tlen kuali ipan itlanechikol, uan nojua kiampa kichijtok (Deut. 8:17, 18; Hech. 14:17). Amo san kentsi ma timoiljuikaj kenijkatsa Jehová ueyi iyolo. Moneki tijkixtisej tonali uan kiampa timonejneuilisej kenijkatsa techmakatok miak tlamantli tojuantij uan sekinok katli tikinikneliaj. Nopa techyololinis tlauel ma tijtlaskamatilikaj uan ma tikilnamiktokaj ya nelia tlauel techiknelia uan techpatiita (1 Juan 4:9).

Maske timoyoliljuiaj kenijkatsa Jehová techmakatok miak tlamantli uan miak tlateochiualistli, nojkia kinamiki tijtlaskamatilisej pampa kinextia kuali iyolo (Sal. 100:4, 5). Miakej kiijtojtokej “kema titetlaskamatiliaj, nelnelia tlauel techpaleuia ma tiyolpakikaj”.

Nojkia tlauel kinamiki titetlaskamatilisej pampa techpaleuia nojua kuali ma timouikakaj ininuaya touampoyouaj. Nochi tijnekij sekinok ma techpatiitakaj. Kema ika nochi toyolo tijtlaskamatiliaj se akajya katli kichijki se tlamantli tlen techpaleuik, kichiua nojua kuali ma timouikakaj iuaya (Rom. 16:3, 4). Nojkia, uelis katli tetlaskamatij nimantsi kinekij tepaleuisej. Inijuantij kiitaj kenijkatsa sekinok kinpaleuiaj uan nopa kinyololinia nojkia ma kinextikaj kuali ininyolo ininuaya sekinok. Kema tikinpaleuiaj maseualmej, kichiua tlauel ma tiyolpakikaj, pampa kej Jesús kiijtok, “más pakilistli kiselia tlen temaka se tlenijki, uan axkeja tlen kiselia” (Hech. 20:35).

Robert Emmons, katli nojkia tlayakana ipan Universidad de California, kinejki kimatis tlake pano kema sekinok tetlaskamatiliaj. Ya kiijtoua: “Tlaj tijnekij titetlaskamatilisej, achtoui moneki tikitasej kenijkatsa nochi timopaleuiaj: kemantika se akajya kichiua se tlenijki tlen tojuantij techpaleuia, uan kemantika tojuantij tijchiuaj se tlenijki tlen kinpaleuia sekinok”. Nelia tlen kiijtok, tojuantij kuali tiitstokej pampa sekinok techpaleuiaj ipan miak tlamantli, kej kema sekinok techtlamakaj o techpajtiaj (1 Cor. 12:21). Katli nelia tetlaskamatij, nochipa kiitaj kenijkatsa sekinok kinpaleuiaj. Uajka, ¿nojkia timomajtokej titetlaskamatiliaj?

Nojkia moneki ma titetlaskamatilikaj pampa techpaleuia ma tikitakaj se tlenijki kej kinamiki. Totsontekuich kikaua se keski tlamantli ma pano ipan totlalnamikilis uan sekinok tlamantli kitsakuilia. Katli tetlaskamatij mosentlaliaj ipan tlamantli tlen kuali uan amo tlauel ipan kuesoli. Kema nochipa titetlaskamatiliaj, techpaleuia ma tikitakaj san tlen kuali, uan ni techyololinia nojua tlauel ma titetlaskamatilikaj. Kema tijchiuaj ni ipan tonemilis maske tikixnamikij tlaouijkayotl, techpaleuia ma tijchiuakaj tlen apóstol Pablo kiijtok: “Nochipa xipaktokaj ipan toueyiTeko” (Filip. 4:4).

Tlaj titetlaskamatij, tikitasej nochi kej kinamiki uan amo tikitasej tlen axkuali. Kema se akajya tetlaskamati, kimati ouij tekokolis, mokuesos o kualantos iuaya se akajya. Nojkia, katli tetlaskamatiliaj amo mosentlaliaj tlapijpiasej, pampa kipatiitaj tlen kipiaj uan amo kinekij kipiasej sekinok tlamantli (Filip. 4:12).

Cristo itokilijkauaj tijmatij Satanás kipaktiskia ma timokuesokaj uan ma timotekipachokaj pampa tikixnamikij tlaouijkayotl. Kinekiskia ma timosentlalikaj ipan tlen amo kuali uan ma tikualanikaj ika tlen ueli tlamantli tlen techpano. Tlaj kiampa tijchiuaskiaj, ayokmo kuali tijmoyauaskiaj nopa kuali tlamachtili. Kema titetlaskamatij, nojkia tijnextiaj nopa sekinok kuajkuali tlamantli tlen toTeotsij itonal techpaleuia ma tijnextikaj, kej kema tijpiaj pakilistli pampa Jehová techmaka miak tlamantli, uan nojkia kema tijnextiaj totlaneltokilis ipan nochi tlen techtenkauilijtok (Gál. 5:22, 23).

Katli tijtekipanouaj toTeotsij tijmatij nelia melauak nochi tlen tikijtojtokej ipan ni tlamachtili, kampa tikitstokej kenijkatsa techpaleuia kema titetlaskamatij. Uan nojkia tikitstokej moneki tijchiuasej se ueyi kampeka titetlaskamatilisej uan tikitasej se tlenijki kej kinamiki, pampa ni kuajkuali tlamantli amo itekipa tijnextiaj. Amo ma timokuesokaj, pampa kena uelis tijnextisej nelnelia titetlaskamatij uan nojkia uelis nochipa kiampa tijchijtosej. Yeka, mojmostla ma tijkixtikaj tonali uan kiampa timoiljuisej tlake tlamantli uelis tijtlaskamatisej. Uan nopa techpaleuis nojua tlauel ma tiyolpakikaj, se tlamantli tlen amo uelij kichiuaj katli mosentlaliaj san ipan ininkuesoljuaj. Ma timoiljuikaj tlake tlamantli kichiuaj toTeotsij uan sekinok maseualmej pampa kinekij techyolchikauasej, nochi tlamantli tlen kichiua ma tiyolpakikaj. Uan mojmostla ueliskia tikijkuilosej ome o eyi tlamantli tlen ueliskia tijtlaskamatisej sejse tonali.

Ixtlamatinij kiitstokej kema timomatij titetlaskamatiliaj, kipatla kej tekiti totsontekuich, uan yeka amo tlauel ouij tijmatij tikitasej se tlenijki kej kinamiki o timosentlalisej san ipan tlen kuali. Maseualmej katli tetlaskamatiliaj tlauel yolpakij. Uajka, ma timosentlalikaj san ipan kuajkuali tlamantli tlen tijpiaj, ma timopakilismakakaj ika kuajkuali tlamantli tlen techpano ipan tonemilis uan ma tijtlaskamatikaj nochi. Amo kinamiki timoiljuisej amo tleno ipati nochi tlen tijseliaj, kualtiaskia tijchiuasej tlen Biblia kiijtoua: “Xijtlaskamatilikaj toTeko pampa yajaya nelia kuali”. Kena, “xijtlaskamatikaj toTeko ipan nochi tlamantli” (1 Crón. 16:34; 1 Tes. 5:18).