1. ¿Tlake kiiljuik Jesús se tlakatl katli kikuapilojtoyaj inakastla? (Lucas 23:39-43).

 JESÚS uan nopa omej tlakamej katli kinkuapilojkej inakastla, nechka mikiskiaj (Luc. 23:32, 33). Ni omej tlakamej kipinajtijtoyaj Jesús, yeka tijmatij amo eliyayaj itokilijkauaj (Mat. 27:44; Mar. 15:32). Maske kiampa kichijtoyaj, se moyolkuepki uan kiijtok: “Jesús, xinechilnamiki kema titlanauatis”. Uan Jesús kinankilik: “Nelia nimitsiljuia nama: tiitstos nouaya ipan Xochimili” (xijpoua Lucas 23:39-43 b). Amo tleno kinextia tlaj nopa tlakatl tlaneltokak ipan toTeotsij iTlanauatijkayo, kema Jesús tlajtolmoyajki (Mat. 4:17). Kema Jesús kiiljuik nopa tlamantli, kinekiyaya kiijtos tlen toTeotsij kichiuas ipan Tlaltipaktli. ¿Kenijkatsa tijmatij?

2. ¿Tlake tlamantli kinextia eliyaya judío nopa tlakatl katli moyolkuepki?

² Uelis nopa tlakatl katli moyolkuepki eliyaya judío pampa kitlatsintokik nopa seyok tlakatl: “¿Yon kentsi tijmakasi toTeotsij maske nojkia mitstlatsakuiltijtokej kej ya?” (Luc. 23:40, TNM). Judíos kiueyichiuayayaj Jehová, uan sekinok maseualmej kinueyichiuayayaj miakej teotsitsij (Éx. 20:2, 3; 1 Cor. 8:5, 6). Tlaj nopa omej tlakamej amo eliskiaj judíos, uajka nopa tlakatl kiijtojtoskia: “¿Yon kentsi tikinmakasi teotsitsij?”. Jehová kititlantoya Jesús ma kinpaleui israeleuanij, yeka amo kinmachtiyaya maseualmej tlen sekinok altepemej (Mat. 15:24). Uan Jehová kiniljuijtoya israeleuanij ya kinyolkuiskia katli miktokej. Uelis nopa tlakatl kimatiyaya  nopa, yeka tlen kiijtok kinextik kimatiyaya Jehová kiyolkuiskia Jesús uan kitekimakaskia ipan iTlanauatijkayo. Kej tikitaj, nopa tlakatl motemachiyaya toTeotsij nojkia kiyolkuiskia.

3. ¿Tlake uelis moiljuik nopa tlakatl katli moyolkuepki kema Jesús kamanaltik tlen nopa Xochimili? (Génesis 2:15).

³ Nopa tlakatl katli moyolkuepki eliyaya judío uan kimatiyaya Jehová kintlalijtoya Adán uan Eva ipan se yejyektsi xochimili. Yeka, uelis moiljuik nopa xochimili tlen Jesús kiijtouayaya mochiuaskia ipan Tlaltipaktli (xijpoua Génesis 2:15).

4. ¿Tlake moneki kichiuas ma timoiljuikaj tlen Jesús kiiljuik nopa tlakatl katli moyolkuepki?

⁴ Tlen Jesús kiiljuik nopa tlakatl katli moyolkuepki moneki kichiuas ma timoiljuikaj kenijkatsa tiitstosej kema toTeotsij kikualtlalis Tlaltipaktli. Tlauel techpaleuis tlaj timoiljuiaj kenijkatsa itstoyaj maseualmej kema Salomón tlanauatik. Biblia kiijtoua Jesús eli “más ueyi que Salomón”, yeka uelis timotemachisej ya uan nopa 144 mil kichiuasej Tlaltipaktli tlauel yejyektsi (Mat. 12:42). Katli motemachiaj itstosej ipan Tlaltipaktli, moneki kiyekosej tlake kichiuasej uan kiampa kiselisej nopa tlateochiualistli (Juan 10:16).

5. ¿Kenijkatsa timoiljuia tiitstosej ipan Xochimili?

⁵ ¿Kenijkatsa tiitstosej kema Tlaltipaktli elis se xochimili? Uelis timoiljuia tiitstosej kampa tlauel tlayejyektsi, kej eliyaya nopa xochimili Edén (Gén. 2:7-9). O uelis tikilnamiki kema Miqueas kiijtok sejse toTeotsij itekipanojka “mosiyajkauas ika pakili itsala se ikuatlatok uan sejse ixokomekamil” (Miq. 4:3, 4). Nojkia, uelis timoiljuia ipan textos kampa kiijtoua onkas miak tlakualistli (Sal. 72:16; Is. 65:21, 22). Uelis timoiljuia tiitstok kampa tlauel tlayejyektsi uan ipan mesa onka miak tlakualistli tlen tlauel ajuiyak. ¿Timoiljuia kenijkatsa tlauel ajuiyak mijyotia xochitl uan xiuitl? ¿Ueli tikinkaki mouampoyouaj uan mochampoyouaj uetskaj uan yolpakij? Uelis Jehová kinyolkuik se keskij tlen inijuantij. Nochi ni tlamantli nelnelia mochiuas. Uan ipan nopa Xochimili nojkia tijchiuasej tekitl tlen tlauel techpaktis.

6. ¿Tlake tijchiuasej ipan Xochimili? (Xikita tlaixkopinkayotl).

⁶ Jehová kichijtok ma techpakti titekitisej (Ecl. 2:24). Ipan nopa Mil Xiuitl kema Jesucristo tlanauatis, onkas miak tekitl. Monekis tikinmakasej tlen mokentisej, tlen kikuasej uan kampa itstosej nochi katli momanauisej ipan nopa ueyi tlaijiyouilistli uan katli moyolkuisej. Maske tlauel titekitisej, nojkia tlauel tiyolpakisej. Adán uan Eva kimokuitlauiyayaj xochimili Edén uan tojuantij tlauel tiyolpakisej  pampa tijchiuasej Tlaltipaktli se xochimili. Nojkia tlauel tiyolpakisej pampa tikinmachtisej katli mijkej uan amo kiixmatkej Jehová yon tlen mosentlalijtok kichiuas. Uan nojkia monekis tikiniljuisej toTeotsij itekipanojkauaj katli mijkej kema ayamo ualajtoya Jesús, tlake tlamantli mopatlatok.

7. ¿Ipan tlake uelis timotemachisej, uan kenke?

⁷ Kema toTeotsij kikualtlalis Tlaltipaktli tiitstosej ika tlaseuilistli, tijpiasej nochi tlen moneki uan nochi mochiuas kej kinamiki. ¿Kenke kiampa tikijtouaj? Pampa ika nopa tlapoualistli kampa kiijtoua kenijkatsa itstoyaj maseualmej kema Salomón tlanauatiyaya, Jehová techpaleuia ma timoiljuikaj kenijkatsa tiitstosej ipan Tlaltipaktli kema ya tlanauatis.

8. ¿Kenijkatsa moaxitik uejkajkia tlen kiijtoua Salmo 37:10, 11, 29? (Xikita “Tlen maseualmej kinekij kimatisej” ipan ni pilamochtsi).

⁸ Jehová kichijki David ma kiijkuilo kenijkatsa itstoskiaj maseualmej kema tlanauatiskia se akajya katli tlalnamiki uan temachtli (xijpoua Salmo 37:10, 11, 29). Kema tikiniljuiaj maseualmej kenijkatsa tiitstosej ipan Xochimili, miakpa tikinpouiliaj Salmo 37:11. Uan tlauel kuali tlaj kiampa tijchiuaj pampa Jesús kiijtok tlen kiijtoua nopa texto ipan Sermón del Monte. Kiampa kinextik tlen nopaya ijkuilijtok moaxitis teipa (Mat. 5:5). Tlen David kiijkuilok nojkia kinextik kenijkatsa itstoskiaj kema Salomón tlanauatiskia. Ipan nopa tonali israeleuanij itstoyaj ika tlaseuilistli uan kipiayayaj nochi tlen moneki, kampa itstoyaj temakayaya “itlajka hasta mokaua”. ToTeotsij kiijtojtoya: “Intla inkineltokasej notlanauatiljuaj […] niinmechmakas tlaseuilistli. Uan yeka kema inkochisej, axinmajmauisej” (Lev. 20:24; 26:3, 6). Ni tlamantli moaxitik kema Salomón tlanauatiyaya (1 Crón. 22:9; 29:26-28). Uan Jehová nojkia kiijtok maseualmej katli amo kualmej, ayokmo itstoskiaj (Sal. 37:10). Kej tikitstokej, Salmo 37:10, 11, 29 moaxitik uejkajkia uan nojkia moaxitis teipa.

9. ¿Tlake kiijtok nopa siuatlanauatijketl tlen Saba kema kiitak kenijkatsa itstoyaj kema tlanauatiyaya Salomón?

 ⁹ Nopa siuatlanauatijketl tlen Saba kimatki kema Salomón tlanauatiyaya, israeleuanij kuali itstoyaj uan kipiayayaj nochi tlen moneki. Yeka tlauel uejka nejnenki uan kiampa asito Jerusalén pampa kinekiyaya kiitas tlaj nelia tlen kiiljuijtoyaj (1 Rey. 10:1). Kema kiitak kenijkatsa tlanauatiyaya Salomón, kiiljuik: “Tlen nijkaktoya eltok nelkentsi ika tlen nikitstok. Motlakauaj uan motlatekipanojkauaj nochipa yolpaktokej pampa itstokej nochipa moixtla uan kikakij motlalnamijkayo” (1 Rey. 10:6-8). Tlen panok kiixnextik tlen Jehová kichiuas kema ikone Jesús tlanauatis ipan Tlaltipaktli.

10. ¿Kenke tlen Jesús kichiua tlauel kuali uan amo kej tlen kichijki Salomón?

¹⁰ Nochi tlen Jesús kichiua tlauel kuali uan amo kej tlen kichijki Salomón. Ya eliyaya tlajtlakole, yeka tlen kitlapejpenik kichijki ma tlaijiyouikaj toTeotsij itekipanojkauaj. Uan Jesús tlauel kuali tlanauatia uan amo kema mokuapoloua (Luc. 1:32; Heb. 4:14, 15). Nojkia, amo kichijki tlen Satanás kinekiyaya ma kichiua. Cristo kinextijtok amo kema tlajtlakolchiuas uan amo kema kitlapejpenis tlen kichiuas ma tlaijiyouikaj toTeotsij itekipanojkauaj. ¡Tlauel tiyolpakij pampa ya technauatia!

11. ¿Ajkia inijuantij kipaleuisej Jesús?

¹¹ Jesús tlanauatis ininuaya 144 mil tlanauatianij, uan sansejko kinmokuitlauisej maseualmej uan kichiuasej ma moaxiti tlen toTeotsij mosentlalijtok kichiuas ipan Tlaltipaktli (Apoc. 14:1-3). Ni tlanauatianij techkuamachilisej pampa inijuantij nojkia kiixnamijkej miak tlaouijkayotl kej tojuantij. ¿Tlake tekitl kichiuasej ni tlanauatianij?

12. ¿Tlake tekitl kinmakas Jehová nopa 144 mil?

¹² Jesús uan nopa 144 mil katli yasej iluikak, kipiaj miak tekitl. Salomón san kinnauatiyaya maseualmej ipan se altepetl, uan katli tlanauatisej ipan toTeotsij iTlanauatijkayo kinnauatisej tlauel miakej maseualmej ipan nochi Tlaltipaktli. ¡Jehová kinmakatok se ueyi tlateochiualistli nopa 144 mil!

13. ¿Tlake tekitl kichiuasej katli tlanauatisej iuaya Jesús?

¹³ Nopa 144 mil, nojkia elisej tlanauatianij uan sacerdotes kej Jesús (Apoc. 5:10). Nopa Tlanauatili tlen kimakakej Moisés kiijtouayaya nopa sacerdotes monekiyaya kinpaleuisej israeleuanij kuali ma itstokaj uan kuali ma tlaneltokakaj. Nopa tlanauatili san kiixnextik nopa kuali tlamantli tlen teipa tijselisej. Yeka uelis tikijtosej katli tlanauatisej iuaya Jesús nojkia kichiuasej se tekitl tlen tlauel ipati: kinpaleuisej kuali ma itstokaj uan kuali ma tlaneltokakaj toTeotsij itekipanojkauaj (Heb. 10:1). Maske amo tijmatij kenijkatsa ni tlanauatianij uan sacerdotes monojnotsasej ininuaya maseualmej, uelis timotemachisej Jehová nochipa kinyakanas uan kinpaleuis (Apoc. 21:3, 4).

14. ¿Tlake kichiuaj katli tlanauatisej iuaya Jesús uan katli motemachiaj itstosej ipan Tlaltipaktli?

¹⁴ Jesús kiijtok katli tlanauatisej iuaya amo miakej (Luc. 12:32). Uan nojkia kiijtok itstokej sekinok katli motemachiaj itstosej nochipa ipan Tlaltipaktli. Inijuantij mosentikapaleuiaj ininuaya katli kintlapejpenijtokej yasej iluikak (Juan 10:16).  Kema toTeotsij kikualtlalis Tlaltipaktli, inijuantij nojua mopaleuijtosej. Ipan nopa tonali katli tlanauatisej iuaya Jesús itstosej iluikak, uan miakej maseualmej itstosej nochipa ipan Tlaltipaktli. Inijuantij, moneki kichiuasej se keski tlamantli ipan ni tonali tlaj kinekij itstosej nochipa ipan Tlaltipaktli.

15. 1) ¿Kenijkatsa katli motemachiaj nochipa itstosej ipan Tlaltipaktli kinpaleuiaj Jesús iikniuaj? 2) ¿Kenijkatsa uelis tijchiuas kej nopa toikni katli nesi ipan tlaixkopinkayotl?

¹⁵ Nopa tlakatl katli moyolkuepki ayokmo uelki kinextia kipatiita tlen Jesús kichijki. Uan katli timotemachiaj tiitstosej nochipa ipan Tlaltipaktli, kena uelis tijchiuasej miak tlamantli tlen ika tijnextisej tijtlaskamatiliaj. Se neskayotl, tijnextiaj tikikneliaj Jesús kema tikinpaleuiaj iikniuaj katli kintlapejpenijtokej yasej iluikak. Jesús kiijtok kema Jehová techtlajtolsenkauas kiitas tlaj kiampa tijchijkej (Mat. 25:31-40). Tijnextiaj tikinpaleuiaj iikniuaj Jesús kema titlajtolmoyauaj uan tikinmachtiaj maseualmej ika pakilistli (Mat. 28:18-20). Yeka, tijnekij tijtekiuisej nopa amatlajkuiloli tlen inijuantij techmakaj, kej nopa amochtli Nochipa xiitsto. Tlaj ayamo aka tijmachtia, ximosentlali tikiniljuis maseualmej tlaj kinekij momachtisej Biblia mouaya.

16. ¿Tlake uelis tijchiuasej uan kiampa uelis tiitstosej ipan Xochimili?

¹⁶ Maske ayamo tiitstokej ipan Xochimili, uelis timonejnemiltisej kej Jehová kineki. Uelis tijchiuasej kampeka amo tiistlakatisej, timonejnemiltisej kej kinamiki uan amo tikintlauelkauasej Jehová, tonamik yon toikniuaj. Tlaj tijchiuaj kampeka timonejnemiltisej kej toTeotsij kineki, ayokmo ouij tijmatisej kiampa tijchiuasej ipan Xochimili. Nojkia uelis tijchiuasej kampeka tijnextisej kuajkuali tlamantli uan tijyekosej sekinok tekitl tlen techpaleuis ma tijnextikaj tijnekij nopaya tiitstosej. Xikita ipan ni pilamochtsi nopa tlamachtili “¿Tijnextia nojkia tijneki tiitstos ipan Tlaltipaktli?”.

17. ¿Kenke moneki amo tlauel timoyolkokosej ika nopa tlajtlakoli tlen tijchijkej uejkajkia?

¹⁷ Nojkia, moneki tijchiuasej kampeka  ayokmo timotlajtlakoltisej tlaj uejkajkia tijchijkej se ueyi tlajtlakoli. Amo kinamiki timoiljuisej uelis titlajtlakolchiuasej san pampa Jesús ya kiixtlajki totlajtlakoljuaj (Heb. 10:26-31). Maske amo tijnekij kiampa timoiljuisej, tlaj nelnelia timoyolkueptokej, tikiljuijtokej Jehová ma techtlapojpoljui, tikiniljuijtokej ueuejtlakamej ma techpaleuikaj uan tijchijtokej kampeka kuali timonejnemiltisej, uelis timotemachisej Jehová ya techtlapojpoljuik (Is. 55:7; Hech. 3:19). Ma tikilnamikikaj tlen Jesús kiniljuik fariseos: “Niualajtok para nikinnotsas ma moyolpatlakaj tlen kimatij kipiaj inintlajtlakoljuaj” (Mat. 9:13). Kena, Jehová uelis techtlapojpoljuis nochi totlajtlakoljuaj pampa Jesús temaktilik inemilis.

18. ¿Tlake mitspaktiskia tijtlatsintokis nopa tlakatl katli mijki inechka Jesús?

¹⁸ Ximoiljui tiitstok ipan Xochimili uan tikamanalti iuaya nopa tlakatl katli monojnotski iuaya Jesús. Uelis inkiijtouaj tlauel inkitlaskamatiliaj Jesús pampa temaktilik inemilis. Uelis tijtlatsintokia tlake kichijki Jesús kema nechka mikiskia, uan tlake kiyolmatki kema kiiljuik itstoskia iuaya ipan Xochimili. Uan uelis nopa tlakatl mitstlajtlania tlake panok kema nechka kitsontlamiltiskiaj nochi tlen amo kuali. ¡Tlauel tiyolpakisej kema tikinmachtisej tlen kiijtoua toTeotsij iTlajtol maseualmej kej ni tlakatl! (Efes. 4:22-24).

19. ¿Kenke amo tikuesiuisej ipan Xochimili? (Xikita tlaixkopinkayotl ipan ipantsajka).

¹⁹ Ipan Xochimili amo kema tikuesiuisej. Nochipa uelis tikamanaltisej ininuaya sekinok uan tiyolpakisej ika toteki. Tlauel tiyolpakisej pampa mojmostla nojua kuali tikixmajtiasej Jehová uan tiyolpakisej ika nopa tlateochiualistli tlen techmakas. Nochipa timomachtisej sekinok tlamantli tlen Jehová kinextia uan tlen kichijchijtok. Mojmostla nojua tlauel tikiknelijtiasej. ¡Tlauel tiyolpakij pampa Jehová uan Jesús techpaleuiaj ma timotemachikaj tiitstosej nochipa ipan Xochimili!