Kema Jehová kiniljuik maseualmej “xikinpiakaj miakej inmokoneuaj para inijuantij itstosej kampa ueli ipan nochi tlaltipaktli para ma tlanauatikaj”, kinejki kiijtos se tonali Tlaltipaktli eliskia tlauel yejyektsi (Gén. 1:28). Katli itstosej kema tlamis Armagedón monekis sampa kikualtlalisej Tlaltipaktli kej Jehová tlanauatik pampa xochimili Edén uejkajkia ixpolijki. Monekis tlauel titekitisej pampa ipan ni tonali maseualmej tlauel kinempolojtokej Tlaltipaktli.

Kema israeleuanij tlakuepilijkej Jerusalén, nojkia monejki kikualtlalisej nopa altepetl pampa 70 xiuitl kinuikatoyaj Babilonia. Maske kipixkej miak tekitl, kena kikualtlalijkej ininaltepe pampa Jehová kinpaleuik, kej Isaías kiijtok: “Nopa uaktok tlaltinij elisej nelyejyektsitsij keja ixochimil TOTEKO tlen itoka eliyaya Edén” (Is. 51:3). Israeleuanij kichijkej sampa ma nesi yejyektsi ininaltepe.  Sanse kej israeleuanij, Jehová nojkia kinpaleuis maseualmej ma kikualchijchiuakaj Tlaltipaktli. Uan ipan ni tonali nojkia uelis tijchiuasej se keski tlamantli uan kiampa tijnextisej tijnekij titlapaleuisej kema tijkualtlalisej Tlaltipaktli.

Uelis tijchiuas kampeka titlachpanas mochaj uan tijchiuas kuali ma nesi mokalteno. Uelis kiampa tijchiuas maske kampa tiitstok maseualmej amo kiampa kichiuaj. Nojkia, uelis titlapaleuis kema tlachpanaj o kikualtlaliaj kampa timosentiliaj o ipan kali kampa mochiua uejueyi tlanechikolistli. Uan tlaj tiueli, nojkia uelis titlapaleuis kampa kinpaleuiaj toikniuaj kema tetlasojsoljuilia se tlenijki. Kiampa tijnextis nelnelia tijneki tikinpaleuis sekinok. Ximotlajtlani: “¿Ueliskia nijyekos se keski tekitl tlen nechpaleuis tlaj Jehová nechkauas ma niitsto ipan Tlaltipaktli?”.

Kema moyolkuik Jairo isiuapil, Jesús kiijtok nima ma kitlamakakaj (Mar. 5:42, 43). Maske uelis amo tlauel ouij kimatkej kipaleuisej se siuapil katli kipixtoya 12 xiuitl, onkas tlauel miak tekitl kema moaxitis tlen Jesús kiijtok: “Asis se tonali nojkia kema nochi tlakamej tlen miktokej uan tlen kintlalpachojtokej, nechkakisej uan pankisasej” (Juan 5:28, 29). Kema moyolkuisej katli miktokej monekis ma tikinmakakaj tlen kikuasej, kampa mokauasej uan tlen mokentisej. ¿Uelis tijnextis nama nojkia tijneki titlapaleuis ipan nopa tonali? Ximoiljui ipan ni tlajtlanili.

Kema ipan motlanechikol kiijtouaj asis toikni katli tepaxaloua chijchikuasej metstli, ¿tikijtoua nojkia tijneki tijtlamakas? Uelis se toikni katli tlatekipanouayaya Betel o katli tepaxalouayaya chijchikuasej metstli kiiljuiaj ayokmo kiampa tlatekipanos, ¿ueliskia tijpaleuis ma kipanti kampa itstos? Tlaj kampa tiitstok mochiuas se ueyi tlanechikolistli, ¿ueliskia titlapaleuis kema ayamo mochiua,  kema ya tlanki o tikinselis katli ualauij tlen sekinok altepemej?

Tlen kiijtoua Hechos 24:15 kinextia moyolkuisej tlauel miakej maseualmej. Maske miakej tlen inijuantij amo kiixmatkej Jehová, kema toTeotsij kikualtlalis Tlaltipaktli uelis kiixmatisej. a Katli kitekipanojtokej Jehová tlauel miak xiuitl, nojkia kinmachtisej katli moyolkuisej (Is. 11:9). Charlotte, se tosiuaikni katli tlajtolmoyajtok ipan Europa, Sudamérica uan África, tlauel kineki ma asi nopa tonali. Ya kiijtoua ika pakilistli: “Tlauel nijneki nikinmachtis katli moyolkuisej. Kema nijpoua tlen kipanok se akajya katli uejkajkia itstoya, nimoiljuia: ‘Tlaj ni maseuali kiixmajtoskia Jehová, amo kiampa monejnemiltijtoskia’. Ya nijneki nikiniljuis katli moyolkuisej nochi tlen amo kimatij pampa amo kiixmatkej tlen melauak”.

ToTeotsij itekipanojkauaj katli itstoyaj kema Jesús ayamo ualayaya ipan Tlaltipaktli, nojkia monekis kiyekosej miak tlamantli. Tlauel tiyolpakisej kema tikixtomilisej Daniel kenijkatsa moaxitik nopa tlajtolpanextili tlen ya kiijkuilok uan amo kikuamachilik (Dan. 12:8). O ximoiljui kenijkatsa tlauel tiyolpakis kema tikinixtomilis Rut uan Noemí, Mesías elki se ininteipaixui. Tlauel tiyolpakisej kema tikinmachtisej maseualmej ipan nopa tonali, pampa ayokmo timotekipachosej yon timotetsopasej ika tlen panos ipan Tlaltipaktli.

¿Kenijkatsa uelis tijnextis nojkia tijneki tikinmachtis maseualmej kema moyolkuisej? Tlaj tijchiua kampeka nojua kuali titlamachtis uan tlaj nochipa titlajtolmoyaua (Mat. 24:14). Maske tikixnamiki se keski tlaouijkayotl o ayokmo ueli tijchiua miak tlamantli pampa ya tiueyi, xijchiua kampeka tijchiuas tlen tiueli, kiampa tijnextis tijneki tikinmachtis katli moyolkuisej.

Nama ximotlajtlani: ¿nelnelia tijneki tiitstos ipan Tlaltipaktli?, ¿mitspaktiskia tijkualtlalis Tlaltipaktli, tikinpaleuis katli moyolkuisej uan tikinmachtis? Tijnextis nojkia tijneki tijchiuas nopa tekitl tlaj ipan ni tonali titlapaleuia kema mochiua se keski tekitl sanse ika tlen mochiuas kema tijkualtlalisej Tlaltipaktli.