David kena ueliskia kichiuas tlen kiijtok.

Ximoiljui tlen David kiijtok ipan ni uan ipan sekinok versículos. Kiijtok: “Nimitspakilismakas mojmostla. Kena, sejse tonal nijtlamichiuas tlen nimitstenkauilijtok”, “TOTEKO Dios, nimitspakilismakas ika nochi noyolo uan nimitsueyitlalis para nochipa” uan “Mojmostla nimitsueyichiuas” (Sal. 61:8; 86:12; 145:1, 2).

Tlen David kiijtok nelnelia ueliskia kichiuas. Ya kimatiyaya se tonali mikiskia pampa eliyaya tlajtlakole (Gén. 3:3, 17-19; Sal. 51:4, 5). Nojkia kimatiyaya maske Abraham, Isaac uan Jacob kuali kitekipanojkej Jehová, nojkia mijkej. Uan ya nojkia mikiskia se tonali (Sal. 37:25; 39:4). Tlen kiijtok ipan Salmo 61:8, kinextik ya mosentlalijtoya nochipa kiueyichiuas Jehová, ni kiijtosneki kema nojua yoltoya (2 Sam. 7:12).

Kemantika David kiijkuilok tlen kipanok, kej nesi kampa peua Salmos 18, 51 uan 52. Ipan Salmo 23, David kiijtok Jehová eli kej se tlapialmokuitlauijketl katli kinyakana ipilborregojuaj, kinuika kampa onka ekauili uan amo kikaua ma kinpano tlen amo kuali. David kiampa kinmokuitlauiyaya ipilborregojuaj uan yeka kinekiyaya nochipa kitekipanos Jehová (Sal. 23:6).

Ma tikilnamikikaj toTeotsij kichijki David ma kiijkuilo se keski tlamantli tlen eltok ipan Biblia. Se keski tlamantli tlen kiijkuilok moaxitis teipa. Ipan Salmo 110, David kiijtok se tonali iTeko moseuiskia ipan imanejmatl toTeotsij uan kiseliskia miak tlanauatili, uan ika nopa tlanauatili kintlaniskia ikualankaitakauaj toTeotsij uan kintlatsakuiltiskia. David elki se iuejkapantata Mesías, katli tlanauatiskia iluikak uan nochipa eliskia sacerdote (Sal. 110:1-6). Jesús kiijtok Salmo 110 kamanalti tlen ya uan tlen kichiuas teipa (Mat. 22:41-45).

Kej ya tikitstokej, Jehová kichijki David ma kiijkuilo tlen panoskia kema itstoya, uan nojkia tlen panos teipa kema moyolkuis uan uelis nochipa kiueyichiuas Jehová. ¿Kenijkatsa ni tlamantli techpaleuia ma tijkuamachilikaj tlen kiijtoua Salmo 37:10, 11, 29? Ni versículos kinextia kenijkatsa itstoyaj israeleuanij uan kenijkatsa tiitstosej teipa kema toTeotsij kichiuas nochi tlen kiijtojtok (xikita ipan ni pilamochtsi párrafo 8 tlen nopa tlamachtili “Tiitstos nouaya ipan Xochimili”).

Uajka, Salmo 61:8 uan sekinok versículos tlen kiijtoua sanse tlamantli, techpaleuia ma tijkuamachilikaj David kinekiyaya nochipa kiueyichiuas Jehová kema yoltoya. Uan ni Salmo nojkia technextilia tlake kichiuas David kema Jehová kiyolkuis.