1. ¿Kenijkatsa techpaleuia kema timoyoliljuiaj ipan tlen Jehová techtenkauilijtok?

 JEHOVÁ kiijtojtok teipa uelis itstosej nochipa nochi katli kineltokaj (Rom. 6:23). Kema timoyoliljuiaj ipan tlen kitenkajtok, techpaleuia nojua tlauel ma tikiknelikaj. Ma timoiljuikaj ipan ni tlamantli: Jehová tlauel techiknelia uan kineki nochipa ma timouampojchijtokaj iuaya, yeka kineki kichiuas nochipa ma tiitstokaj.

2. ¿Kenijkatsa techpaleuia pampa timotemachiaj tiitstosej nochipa?

² Kema timoyoliljuiaj kenijkatsa toTeotsij kichiuas ma tiitstokaj nochipa, techpaleuia ma tikixnamikikaj tlaouijkayotl. Uan maske tokualankaitakauaj kinekisej techmiktisej, amo tijtlauelkauasej Jehová. ¿Kenke? Pampa timotemachiaj techyolkuis tlaj amo tijtlauelkauaj uan uelis ayokmo kema timikisej (Juan 5:28, 29; 1 Cor. 15:55-58; Heb. 2:15). ¿Kenke timotemachiaj uelis tiitstosej nochipa? Ma tikitakaj se keski tlamantli.

3. ¿Kenke timotemachiaj Jehová uelis kichiuas ma tiitstokaj nochipa? (Salmo 102:12, 24, 27).

³ Timotemachiaj Jehová uelis kichiuas ma tiitstokaj nochipa pampa ya temaka nemilistli uan nochipa itstok (Sal. 36:9). Ma tikitakaj se keski textos tlen kinextia Jehová amo kipixki ipejya uan nochipa itstos. Salmo 90:2 kiijtoua: “Ta tiToteko Dios axkema tijpixki mopejya uan axkema tijpias motlamia”. Salmo 102 nojkia kiampa kiijtoua (xijpoua Salmo 102:12, 24, 27). Uan Habacuc kiijtok ni tlamantli tlen Jehová: “¡ToTeko, hasta uejkajkia ta tiitstoya uan nochipa tiitstok! ¡Ta tiToteko Dios tlen tiTlatsejtseloltik!” (Hab. 1:12).

4. ¿Kenke amo kinamiki timotekipachosej tlaj amo tijkuamachiliaj kenke toTeotsij amo kipixki ipejya uan amo kema mikis?

⁴ ¿Ouij tijmati tijneltokas Jehová amo kipixki ipejya? (Is. 40:28). Amo san ta kiampa mitspano, Eliú kiijtok ni  tlamantli tlen toTeotsij: “Axaka ueli kipouas keski xiuitl kipia” (Job 36:26). Ma timoiljuikaj ni tlamantli, maske amo tijkuamachiliaj kenijkatsa mochiua se tlamantli, timotemachiaj kena eltok. Se neskayotl, maske amo tijkuamachiliaj kenijkatsa mochiua tlauili, tijmatij kena onka. Uajka, maske amo tijkuamachiliaj kenke Jehová amo kipixki ipejya, ya nochipa itstos uan amo kema mikis. Tlen Biblia kiijtoua tlen toTeotsij nelnelia melauak maske tojuantij amo nochi tijkuamachiliaj (Rom. 11:33-36). Nojkia, toTeotsij ipa itstoya kema ayamo eltoya Tlaltipaktli, iluikaktli, Tonati uan nochi tlen onka. Biblia kiijtoua: “TOTEKO kichijchijki ni tlaltipaktli ika iueyichikaualis”. Uan nojkia kiijtoua: “Uan kipatlajki iluikaktli” (Jer. 51:15; Hech. 17:24). Ma tikitakaj seyok tlamantli tlen nojkia techpaleuis ma timotemachikaj tiitstosej nochipa.

5. ¿Tlake ueltoskiaj kiselisej Adán uan Eva?

⁵ Maske toTeotsij kinchijchijki nochi katli kipiaj yolistli, san maseualmej ueliskiaj itstosej nochipa. ToTeotsij kiiljuik Adán: “Pero ne kuauitl tlen itoka ‘kuauitl tlen temachiltia tlen kuali uan tlen axkuali’, axtle. Amo xijkua itlajka, pampa ipan nopa tonal kema tijkuas itlajka, melauak timikis” (Gén. 2:17). Tlaj Adán uan Eva kineltokatoskiaj Jehová, amo miktoskiaj. Uan uelis teipa toTeotsij kinkajtoskia ma kikuakaj itlajka nopa kuauitl tlen temaka yolistli. Nopa kichijtoskia ma motemachikaj itstoskiaj nochipa (Gén. 3:22). b

6, 7. 1) ¿Tlake sekinok tlamantli kinextia toTeotsij techchijchijki ma tiitstokaj nochipa? 2) ¿Tlake tijnekiskia tijchiuas kema tiitstos nochipa? (Xikita tlaixkopinkayomej).

⁶ Se keskij ixtlamatinij kiitstokej totsontekuich uelis kiilnamikis nojua tlauel miak tlamantli uan amo san tlen tijtsontekontlaliaj ipan nochi tonemilis. Ipan 2010, se pilamochtsi tlen Estados Unidos kiijtok totsontekuich kipia se 2.5 millones gigabytes. Ni kiijtosneki uelis tikilnamikisej tlen nesi ipan se video tlen uejkaua se 3 millones horas, tlen tijtlachiliskiaj ipan kipano 300 xiuitl. Uan uelis kiajokuis nojua tlauel miak tlamantli. Ni kinextia Jehová kichijchijki totsontekuich ma kiajokui tlauel miak tlamantli, uan amo san tlen tijyekouaj ipan se 70 o 80 xiuitl (Sal. 90:10).

 ⁷ Jehová nojkia kichijtok ma tijnekikaj tiitstosej nochipa. Biblia kiijtoua Jehová kitlalijtok ipan toyolo amo ma tijnekikaj timikisej (Ecl. 3:11). Yeka tikitaj mikilistli kej se tokualankaitaka (1 Cor. 15:26). Ma timoiljuikaj ipan ni tlamantli: kema timokokouaj, nima tijchiuaj kampeka tijtemosej tlen ika timopajtisej o tiauij kampa tepajtijketl pampa amo tijnekij timikisej. Uan kema miki se katli tlauel tikikneliaj uejkaua timoyolkokojtokej (Juan 11:32, 33). Jehová techiknelia, yeka amo kichijtoskia ma tijnekikaj tiitstosej nochipa tlaj amo mosentlalijtoskia kiampa kichiuas. Nojkia, onka sekinok tlamantli tlen techpaleuia ma timotemachikaj uelis tiitstosej nochipa. Ma tikitakaj se keski tlamantli tlen Jehová kichijki uan tlen kichiua ipan ni tonali tlen kinextia ya nojua kineki ma tiitstokaj nochipa.

8. ¿Kenijkatsa Isaías 55:11 kinextia Jehová nelia kichiuas tlen mosentlalijtok?

⁸ Maske Adán uan Eva tlajtlakolchijkej uan yeka timikij, Jehová amo kiilkajtok tlen mosentlalijtoya (xijpoua Isaías 55:11). Ya nojua kineki ma itstokaj nochipa katli amo kitlauelkauaj. ¿Kenijkatsa tijmatij nopa tlamantli? Pampa Jehová kiijtojtok uan kichijtok se keski tlamantli tlen kinextia nelia kineki kichiuas tlen mosentlalijtok.

9. ¿Tlake kiijtok kichiuas toTeotsij? (Daniel 12:2, 13).

⁹ Jehová kiijtok kinyolkuis katli miktokej uan kichiuas ma itstokaj nochipa (Hech. 24:15; Tito 1:1, 2). Job motemachiyaya Jehová nelnelia kineki kinyolkuis katli miktokej (Job 14:14, 15).  Daniel kimatiyaya maseualmej moyolkuiskiaj uan ueliskiaj itstosej nochipa (Sal. 37:29; xijpoua Daniel 12:2, 13). Kema Jesús itstoya, judíos motemachiyayaj toTeotsij ueliskia kichiuas itekipanojkauaj ma itstokaj nochipa (Luc. 10:25; 18:18). Jesús miakpa kiijtok toTeotsij ueliskia kichiuas ma tiitstokaj nochipa, uan Jehová nelia kiampa kichijki pampa kema Jesús mijki ya kiyolkuik (Mat. 19:29; 22:31, 32; Luc. 18:30; Juan 11:25).

10. ¿Tlake techmachtia nopa tlapoualistli kampa kiijtoua moyolkuikej se keskij maseualmej? (Xikita tlaixkopinkayotl).

¹⁰ Jehová eli katli temaka nemilistli, yeka uelis kichiuas ma moyolkuikaj katli miktokej. Ya kichijki Elías ma kiyolkui ikone nopa siuatl tlen Sarepta (1 Rey. 17:21-23). Teipa kichijki Eliseo ma kiyolkui ikone se siuatl tlen Sunem (2 Rey. 4:18-20, 34-37). Ni tlapoualistli kinextia Jehová kipia chikaualistli uan ueli kinyolkui katli miktokej. Uan kema Jesús itstoya ipan Tlaltipaktli, kinextik iTata kimakatoya chikaualistli, pampa ueliyaya kinyolkui katli miktokej (Juan 11:23-25, 43, 44). Nama Jesús itstok iluikak uan kipia nochi tlanauatili, yeka uelis kinyolkuis nochi katli miktokej uan kichiuas ma itstokaj nochipa (Mat. 28:18; Juan 5:25-29).

11. ¿Kenijkatsa techpaleuia Jesús imikilis?

¹¹ ¿Kenke Jehová kikajki tlauel ma kitlaijiyouiltikaj iKone kema kimiktijkej? Jesús kiijtok: “Toteko nelia miak kiniknelia nochi tlakamej ipan ni tlaltipaktli uan yeka kititlanki Ikone iyojtsi para mikis ininpampa. Uan keja nopa nochi tlen kineltokasej, axpoliuisej, pero kipiasej yolistli tlen yankuik para nochipa” (Juan 3:16). Uajka uelis tijpiasej nemilistli tlen axkema tlamis pampa Jehová temaktilik iKone ma techmakixtiki tlen totlajtlakoljuaj (Mat. 20:28). Apóstol Pablo kiijtok tlen toTeotsij mosentlalijtok kichiuas, ya kiijtok: “Ika nopa tlakatl, Adán, mikilistli pejki ipan tlaltipaktli, uan nojkia ika tlen kichijki san se tlakatl, Jesucristo, ama tlakamej uelis moyolkuisej. Pampa Adán tlajtlakolchijki uejkajkia, nochi tlakamej moneki ma timikikaj. Pero nojkia pampa se tlakatl, Jesucristo, moyolkuik, nochi tlakamej uelis moyolkuisej” (1 Cor. 15:21, 22).

12. ¿Kenijkatsa Jehová kichiuas tlen mosentlalijtok?

¹² Jesús kiniljuik itokilijkauaj kema momaijtosej ma kiiljuikaj iTata ma tekichiua iTlanauatijkayo ipan Tlaltipaktli, uan nojkia ma mochiua ipakilis (Mat. 6:9, 10). Kema mochiuas tlen Jehová kineki, maseualmej uelis itstosej nochipa. Yeka, Jehová kitlapejpenik iKone ma tlanauati uan nojkia kintlapejpenia 144 mil katli kichiuasej ipakilis (Apoc. 5:9, 10).

13. ¿Tlake kichiua Jehová ipan ni tonali, uan tlake moneki tijchiuas?

¹³ Ipan ni tonali, Jehová kinsentilia tlauel miakej maseualmej uan kinmachtia kenijkatsa moneki monejnemiltisej, kiampa uelis itstosej kema tekichiuas iTlanauatijkayo (Apoc. 7:9, 10; Sant. 2:8). Maske ipan Tlaltipaktli mochiua tlauilankayotl uan mokualankaitaj, katli motemachiaj itstosej nochipa ipan Tlaltipaktli kichiuaj kampeka amo tekualankaitasej. Kejuak kitejtejtsontokej “inintepos tlen ika tlateuiyayaj para ika kichiuasej azadones” (Miq. 4:3). Inijuantij amo mokalakiaj ipan tlauilankayotl kampa miakej kinmiktiaj. Kichiuaj kampeka kinpaleuisej sekinok ma kiixmatikaj Jehová uan tlen kichiuas, kiampa  uelis kipiasej “yolistli tlen nelnelia kuali” (1 Tim. 6:19). Maske ininchampoyouaj kintlaijiyouiltiaj o amo kipiaj tlen ika mopanoltisej pampa kipaleuiaj toTeotsij iTlanauatijkayo, Jehová kinpaleuis ma kipiakaj tlen moneki (Mat. 6:25, 30-33; Luc. 18:29, 30). Nochi ni tlamantli kinextia toTeotsij iTlanauatijkayo nelnelia tekichijtok, uan kichiuas ma moaxiti tlen toTeotsij mosentlalijtok.

14, 15. ¿Kenijkatsa Jehová kitsontlamiltis mikilistli?

¹⁴ Jesús ya tlanauatijtok ipan toTeotsij iTlanauatijkayo ne iluikak, uan kiaxitis nochi tlen Jehová mosentlalijtok kichiuas (2 Cor. 1:20). Ipan 1914, Jesús pejki kinextia kipia miak chikaualistli uan amo kej ikualankaitakauaj (Sal. 110:1, 2). Nechka ya uan nopa 144 mil, kichiuasej tlen toTeotsij mosentlalijtok kichiuas uan kintsontlamiltisej nochi katli amo kuali monejnemiltiaj (Apoc. 6:2).

¹⁵ Ipan nopa Mil Xiuitl kema Jesús tlanauatijtos, kinyolkuis katli miktokej uan kinpaleuis ma elikaj xitlauakej. Uan kema tlamis nopa Mil Xiuitl, Jehová kiitas ajkia inijuantij kuali monejnemiltijkej uan kinkauas ma itstokaj nochipa ipan Tlaltipaktli (Sal. 37:10, 11, 29). Nojkia kitsontlamiltis  mikilistli (1 Cor. 15:26). ¡Tlauel kuali tlen kichiuas!

16. ¿Tlake kinamiki techyololinis ma tijtekipanokaj Jehová?

¹⁶ Tlen tikitstokej kinextia timotemachiaj nochipa tiitstosej pampa Biblia kiampa kiijtoua. Kema timotemachiaj tiitstosej nochipa, techpaleuia amo ma tijtlauelkauakaj Jehová maske tikixnamikij miak tlaouijkayotl. Tlaj tijnekij tijyolpakiltisej Jehová, moneki amo tijtlauelkauasej ya uan Jesús. Kiampa moneki tijchiuasej pampa tikinikneliaj uan amo san pampa tijnekij timomanauisej (2 Cor. 5:14, 15). Nopa tlaiknelili techyololinia ma tijchiuakaj kej inijuantij uan ma tikiniljuikaj sekinok tlen timotemachiaj tijselisej (Rom. 10:13-15, TNM). Tlaj amo titekualankaitaj uan tijchiuaj kampeka titemakasej tlen tijpiaj, Jehová nojua tlauel kinekis mouampojchiuas touaya (Heb. 13:16).

17. ¿Tlake moneki tijchiuasej sejse tlen tojuantij? (Mateo 7:13, 14).

¹⁷ Uan tojuantij, ¿nojkia tiitstosej nochipa? Maske Jehová kiijtojtok uelis tiitstosej nochipa, tojuantij moneki tijchiuasej kampeka kuali timonejnemiltisej uan kiampa uelis tijselisej nopa tlateochiualistli (xijpoua Mateo 7:13, 14 c). Uan, ¿kenijkatsa tiitstosej kema tijpiasej nemilistli tlen axkema tlamis? Ni tikitasej ipan tlamachtili 50.