1. ¿Kenijkatsa kiyolmati se akajya katli kipia nopa tlaseuilistli tlen toTeotsij temaka uan kenijkatsa tlapaleuia? (Filipenses 4:6, 7).

 MASKE maseualmej kipiaj tlaseuilistli, amo kiixmatij nopa tlaseuilistli tlen toTeotsij temaka. Nopa kichiua se akajya kuali ma kiyolmati pampa kuali mouampojchijtok iuaya. Kema tijpiaj nopa tlaseuilistli ipan toyolo, techpaleuia amo ma timajmauikaj (xijpoua Filipenses 4:6, 7). Nojkia, techpaleuia kuali ma timouikakaj ininuaya toikniuaj uan iuaya Jehová, katli temaka tlaseuilistli (1 Tes. 5:23). Kema tikixmatij Jehová, timotemachiaj ipan ya uan tijneltokaj, tijpiaj tlaseuilistli uan nopa techpaleuia amo tlauel ma timokuesokaj kema tikixnamikij tlaouijkayotl.

2. ¿Kenke timotemachiaj nelnelia uelis tijpiasej nopa tlaseuilistli tlen toTeotsij temaka?

² ¿Nelnelia uelis tijpiasej tlaseuilistli kema momoyaua se kokolistli, techpano tlen amo tijchiayayaj, kema mokualaniaj maseualmej o techtlatsakuiltiaj? Maske ni tlaouijkayotl uelis kichiuas miakej ma momajmatikaj, Jesús kiniljuik itokilijkauaj: “Amo ximokuesokaj uan amo ximomajmatikaj” (Juan 14:27). Miakej toikniuaj kichijtokej tlen Jesús kiijtok uan Jehová kinpaleuia ma kipiakaj tlaseuilistli ipan ininyolo maske kiixnamikij miak tlaouijkayotl.

3. ¿Kenijkatsa kema momoyaua se kokolistli uelis kichiuas ayokmo ma tijpiakaj tlaseuilistli?

³ Kema momoyaua se ueyi kokolistli ipan nochi Tlaltipaktli, uelis kichiuas ma mopatla kej tiitstokej. Ma timoiljuikaj  tlake kinpanotok miakej maseualmej pampa momoyajtok COVID-19. Kema kintlajtlanijkej tlake kinpanok pampa momoyajtok nopa kokolistli, miakej kiijtojkej ayokmo ueliyayaj kochij, pejkej tlauel mokuesouaj uan motekipachouaj miak tonali, pejkej tlaij, kitekiuiaj drogas, moteuiaj ininuaya ininchampoyouaj uan kinekiyayaj momiktisej. Tlaj momoyajtok se kokolistli kampa tiitstok, ¿tlake mitspaleuis amo tlauel ximokueso uan tijpias nopa tlaseuilistli tlen toTeotsij temaka?

4. ¿Kenke tlen Jesús kiijtok kichiua ma tijpiakaj tlaseuilistli?

⁴ Jesús kiijtok ipan itlamia tonali momoyauaskia uejueyi kokolistli “kampa ueli” (Luc. 21:11). ¿Kenke ni tlamantli uelis kichiuas ma tijpiakaj tlaseuilistli? Pampa ya tijmatiyayaj kiampa panoskia uan ayokmo timosentlachiliaj. Tikitaj nelnelia moaxitia nochi tlen Jesús kiijtok. Yeka tijchiuaj tlen kiniljuik katli itstoskiaj ipan itlamia tonali. Ya kiijtok: “Amo ximajmauikaj” (Mat. 24:6).

5. 1) Kej kiijtoua Filipenses 4:8, 9, ¿tlake moneki tijtlajtlanisej Jehová kema momoyaua se ueyi kokolistli? 2) ¿Kenijkatsa techpaleuia kema tijkakij Biblia ika audio?

⁵ Kema momoyaua se ueyi kokolistli uelis kichiuas tlauel ma timotekipachokaj uan ma timajmauikaj. Kiampa kipanok se toikni katli itoka Desi. b Kema se itío, se imachikni uan idoctor mijkej ika COVID-19, pejki kimakasi momauas uan kimauas inana, katli ya ueyi eliyaya. Nojkia moiljuiyaya ayokmo kitekimakaskiaj uan ayokmo ueliskia kikouas tlakualistli yon kiixtlauas kampa mokauayayaj. Nochipa moiljuiyaya ipan ni tlamantli uan yeka ayokmo ueliyaya kochi. Maske kiampa kipanoyaya, uelki kipia tlaseuilistli ipan iyolo. ¿Tlake kipaleuik? Kiiljuik Jehová ma kimaka tlaseuilistli uan ma kipaleui moiljuis ipan tlamantli tlen kuali (xijpoua Filipenses 4:8, 9). Ya kitlaliyaya Biblia ika audio uan kiampa kejuak kikakiyaya Jehová. Desi nojua kiijtoua: “Kema nijkakiyaya kuali tlapouaj toikniuaj, kichiuayaya ayokmo tlauel ma nimotekipacho uan ma nikilnamiki Jehová kitekipachoua tlen nechpano” (Sal. 94:19).

6. ¿Kenijkatsa uelis techpaleuis tlaj timomachtiaj toselti uan tiauij tlanechikoli?

⁶ Maske mopatla miak tlamantli ipan tonemilis kema momoyaua se ueyi kokolistli, nojua ma tijchiuakaj kampeka timomachtisej toselti uan tiasej tlanechikoli. Ipan amatlajkuiloli uan videos tikitaj se keskij toikniuaj amo kitlauelkajkej Jehová maske kiixnamijkej kuesoli kej tojuantij (1 Ped. 5:9). Kema tiauij tlanechikoli, kichiua ma timoiljuikaj ipan tlamantli tlen techpaleuia, nojkia ueli tikinyolchikauaj sekinok uan techyolchikauaj (Rom. 1:11, 12).  Tlaj timoiljuiaj kenijkatsa Jehová kinpaleuik itekipanojkauaj kema mokokouayayaj, majmauiyayaj o kiyolmatiyayaj itstoyaj ininselti, techpaleuis nojua kuali ma titlaneltokakaj uan timotemachisej ya nojkia techpaleuis.

7. ¿Kenijkatsa uelis tijchiuasej kej apóstol Juan?

⁷ Ma tijchiuakaj kampeka nojua timonojnotsasej ininuaya toikniuaj pampa kema momoyaua se ueyi kokolistli ayokmo ueli tikinnechkauiaj sekinok. Kema kiampa pano, uelis tijyolmatij kej apóstol Juan kema kinekiyaya kiitas iuampo Gayo (3 Juan 13, 14). Ya kimatiyaya amo kiitaskia se keski tonali, yeka kititlanilik se amatlajkuiloli. Tlaj tojuantij amo ueli tikinitaj toikniuaj, uelis tikinnojnotsasej ika teléfono, ika videollamada o tikintitlanilisej se mensaje. Tlaj tijchiuaj kampeka tikinnojnotsasej, techpaleuis amo ma tijyolmatikaj toselti tiitstokej uan amo tlauel ma timotekipachokaj. Uan tlaj tlauel timotekipachojtokej, ma tikiniljuikaj ueuejtlakamej tlen techpano uan ma tijchiuakaj tlen techiljuiaj (Is. 32:1, 2).

8. ¿Kenijkatsa uelis ayokmo tijpias tlaseuilistli kema pano tlen amo tijchiayaya?

⁸ Tlaj kampa tiitstok tlatemik, mojmolinik tlali o tlalemenki, uelis miak tonali timotekipachojtok. Uan tlaj mijki se akajya katli tlauel tikiknelia o nempolijki tlen achtouia tijpixtoya, uelis tlauel timoyolkokoua, timokuesoua o tikualani. Tlaj kiampa tijyolmati, amo kiijtosneki tijneki titlapijpias o amo kuali titlaneltoka. Tlen mitspanok tlauel ouij uan uelis sekij moiljuiaj tijchiuas tlen amo kuali (Job 1:11). Maske tlauel ouij tlen techpano, uelis tijpiasej tlaseuilistli ipan toyolo. Ma tikitakaj tlake techpaleuis.

9. ¿Kenijkatsa techpaleuia ma timokualchijchijtokaj tlen Jesús kiijtok?

⁹ Maske ipan ni tonali miakej maseualmej moiljuiaj amo kema kinpanos tlen amo kuali, tojuantij nochipa tikilnamikij tlen Jesús kiijtok. Tijmatij nojua tlauel tlasosolos miak tlamantli uan nopa uelis kichiuas ma titlaijiyouikaj. Jesús kiniljuik itokilijkauaj kema nechka tlamiskia tlen amo kuali, kampa ueli mojmoliniskia tlali uan tlasojsoloskia miak tlamantli (Luc. 21:11). Nojkia kiijtok maseualmej nojua tlauel kichiuaskiaj tlen amo kuali, uan nelia kiampa pano pampa ipan ni tonali maseualmej tlauel mosisiniaj uan kintlaijiyouiltiaj sekinok (Mat. 24:12). Jesús kiijtok ni tlamantli kichiuas ma titlaijiyouikaj maske tijtekipanouaj Jehová. Ipan ni tonali miakej toikniuaj tlaijiyouiaj pampa kintlasojsoljuilik se tlenijki (Is. 57:1; 2 Cor. 11:25). Maske uelis Jehová amo techmanauis kema pano se tlamantli tlen amo tijchiayayaj, ya techmakas tlen techpaleuis amo tlauel ma timotekipachokaj uan ma tijpiakaj tlaseuilistli ipan toyolo.

10. ¿Kenke tijnextiaj kuali titlaneltokaj kema timokualchijchiuaj maske ayamo techtlasojsoljuilia se tlenijki? (Proverbios 22:3).

¹⁰ Tlaj timokualchijchiuaj, amo tlauel timotekipachosej kema panos se tlamantli tlen amo tijchiayayaj. ¿Tijnextiaj amo tlauel timotemachiaj ipan Jehová kema kiampa tijchiuaj? Amo. Tlaj timokualchijchiuaj tinextiaj kena timotemachiaj ya techmokuitlauis. ¿Kenke kiampa tikijtouaj? Pampa Biblia kiijtoua ma timoiljuikaj tlake tlamantli tlen amo kuali ueliskia panos uan ma timokualchijchiuakaj (xijpoua Proverbios 22:3). Uan ipan pilamochtsitsij, ipan tlen techmatiltiaj uan ipan tlanechikoli, Jehová itlanechikol nochipa techiljuia ma timokualchijchijtokaj uan kiampa uelis tikixnamikisej kema techtlasosoljuilis  se tlenijki. c ¿Tlake tijchiuasej tlaj timotemachiaj ipan Jehová? Tijchiuasej tlen techiljuijtokej ipan ni tonali, kema ayamo techtlasojsoljuilia se tlenijki.

11. ¿Tlake techmachtia tlen kichijki Margaret?

¹¹ Ma timoiljuikaj tlen kichijki tosiuaikni Margaret. Tekichiuanij kiiljuijkej ma kisteua ichaj pampa nopaya nechka tlatlayaya se kuatitlamitl. Tlauel miakej maseualmej kinekiyayaj kisteuasej, yeka ipan carreteras ayokmo aka ueliyaya pano ika icarro. Tlauel onkayaya poktli uan yeka Margaret monejki mokauas ipan icarro. Ya kuali mokualchijchijtoya, yeka amo tleno kipanok. Ipan ibolsa kipixtoya se mapa kampa nesiyaya seyok ojtli kampa ueliskia yas. Margaret ya panotoya nopaya pampa kinekiyaya kiitas kanke ueliskia yas tlaj se tlamantli tlasojsoloskia. Ya kuali mokualchijchijtoya, yeka momanauik.

12. ¿Kenke tijchiuaj tlen techiljuiaj kema pano se tlamantli tlen amo kuali?

¹² Uelis tekichiuanij techiljuisej ma timokauakaj tochaj, ma tikisteuakaj o ma tijchiuakaj sekinok tlamantli pampa amo kinekij ma techpano tlen amo kuali. Se keskij amo kinneltokaj pampa amo kinekij kikajteuasej ininchaj o tlen kipiaj. ¿Uan tlake tijchiuaj katli tijtekipanouaj Jehová? Biblia kiijtoua: “Xijtlepanitakaj nochi tekitl tlen gobierno uan nojkia xijtlepanitakaj nopa ueyi tekiuejketl” (1 Ped. 2:13, 14). Jehová itlanechikol nojkia techiljuia tlake moneki tijchiuasej uan kiampa amo techpanos tlen amo kuali. Miakpa techiljuia ma tikiniljuikaj ueuejtlakamej kanke tiitstokej uan ma tikinmakakaj tonúmero, kiampa uelis technojnotsasej tlaj panos se tlamantli tlen amo kuali. ¿Tijchijtokej ni tlamantli? Uelis Jehová itlanechikol techiljuis ma timokauakaj tochaj, ma tikisteuakaj, kenijkatsa uelis tijpiasej tlen moneki o kema uan kenijkatsa kinamiki tikinpaleuisej sekinok. Tlaj amo titlaneltokaj, uelis techpanos tlen amo kuali tojuantij o ueuejtlakamej, katli kuali techmokuitlauiaj (Heb. 13:17). Margaret kiijtoua: “Nimomanauik pampa nikinneltokak ueuejtlakamej uan nijchijki tlen Jehová itlanechikol techiljuik”.

13. ¿Tlake kinpaleuia miakej toikniuaj ma yolpakikaj uan ma kipiakaj tlaseuilistli?

¹³ Miakej toikniuaj kistokej tlen ininaltepe pampa kintlasojsoljuilik se tlenijki,  mochijtok uejueyi tlauilankayotl o pampa mokualaniaj maseualmej. Ni toikniuaj kichiuaj kampeka nima momatisej kej nama itstokej uan kiueyichiuasej Jehová kej achtouia. Nojua tlajtolmoyauaj kej kichijkej Cristo itokilijkauaj tlen achtoui siglo kema kistejkej tlen ininaltepe pampa kintlatsakuiltiyayaj (Hech. 8:4). Kema tlajtolmoyauaj kinpaleuia ma moyoliljuikaj ipan toTeotsij iTlanauatijkayo uan amo ipan tlen kinpano, kiampa nojua yolpakij uan kipiaj tlaseuilistli.

14. ¿Kenke kema techtlatsakuiltiaj ueliskia ayokmo tijpiasej tlaseuilistli?

¹⁴ Tlaj techtlatsakuiltiaj uelis ayokmo techkauasej ma tijchiuakaj se keski tlamantli tlen techpaleuia ma tiyolpakikaj uan ma tijpiakaj tlaseuilistli. Uelis ayokmo techkauasej ma timonechikokaj, ma titlajtolmoyauakaj uan mojmostla ma timoiljuikaj ueliskia techtsakuasej. Kema ayokmo techkauaj ma tijchiuakaj ni tlamantli, uelis timotekipachosej pampa timoiljuijtosej tlake panos teipa. Maske amo kenijki tlaj kiampa tijyolmatij, moneki timomokuitlauisej pampa nopa ueliskia kichiuas ayokmo kuali ma titlaneltokakaj, kej Jesús kiniljuik itokilijkauaj (Juan 16:1, 2). Uajka, ¿tlake techpaleuis nojua ma tijpiakaj tlaseuilistli kema techtlatsakuiltiaj?

15. ¿Kenke amo kinamiki timajmauisej kema techtlatsakuiltiaj? (Juan 15:20; 16:33).

¹⁵ Biblia kiijtoua: “Nochi tlaneltokanij tlen kinekij monejnemiltisej keja Cristo Jesús kineki, kinpantisej tlakamej tlen kintlaijiyouiltisej” (2 Tim. 3:12). Toikni Andréi ouij kimatki kineltokas tlen kiijtoua ni texto kema tekichiuanij kiijtojkej ayokmo kinkauaskiaj ma tlaueyichiuakaj kampa itstoya. Ya moiljuiyaya: “Amo uelis kintsakuasej, nochi toikniuaj pampa miakej itstokej”. Maske kiampa moiljuiyaya, nojua motekipachouayaya. Sekinok toikniuaj motemachiyayaj ipan Jehová pampa kimatiyayaj se tonali ueliskia kintsakuasej uan amo tlauel motekipachouayayaj. Yeka Andréi nojkia mosentlalik kichiuas kej toikniuaj uan motemachis ipan Jehová. Nama, maske Andréi kiixnamiki miak tlaouijkayotl, kipia tlaseuilistli uan yolpaki. Tojuantij nojkia uelis kiampa tijyolmatisej. Maske Jesús kiijtok techtlatsakuiltiskiaj, nojkia kiijtok ueliskia amo kema tijtlauelkauasej Jehová (xijpoua Juan 15:20; 16:33).

16. ¿Tlake moneki tijchiuasej kema techtlatsakuiltiaj?

 ¹⁶ Tlaj tekichiuanij ayokmo techkauaj ma tijueyichiuakaj Jehová, toikniuaj tlen kali Betel o ueuejtlakamej techiljuisej tlake techpaleuis ma timomanauikaj, ma tijpiakaj tlamachtili uan ma titlajtolmoyauakaj. Tlaj kiampa techpanoskia, ma titlaneltokakaj maske amo tijkuamachilisej kenke technauatiaj se tlamantli (Sant. 3:17). Uan amo kema ma tikiniljuikaj inintoka toikniuaj o tlen mochiua ipan tlanechikoli katli amo kinamiki kimatisej (Ecl. 3:7).

17. Kej kichijkej apóstoles katli itstoyaj ipan achtoui siglo, ¿tlake timosentlalijtokej tijchiuasej?

¹⁷ Satanás kintlatsakuiltia toikniuaj pampa kimoyauaj tlen Jesús tlamachtik (Apoc. 12:17). Amo ma tijkauakaj ma techmajmati Satanás yon tlen kinauatia. Kema titlajtolmoyauaj uan tikinmachtiaj sekinok tlen melauak, techpaleuia ma tiyolpakikaj uan ma tijpiakaj tlaseuilistli maske techtlatsakuiltiaj. Ipan achtoui siglo kema tekichiuanij kiniljuijkej apóstoles ayokmo ma tlajtolmoyauakaj, inijuantij amo kitlauelkajkej toTeotsij, nojua tlajtolmoyajkej uan tlauel yolpajkej (Hech. 5:27-29, 41, 42). Kema tekichiuanij ayokmo techkauasej ma titlaueyichiuakaj, moneki nojua titlajtolmoyauasej uan tijnextisej titlalnamikij (Mat. 10:16). Tlaj tijchiuaj kampeka kuali titlaueyichiuasej, tijpiasej tlaseuilistli pampa tijyolpakiltisej Jehová uan pampa tikinmachtisej maseualmej tlen kinpaleuis ma momanauikaj.

18. ¿Ajkia kichiua ma tijpiakaj tlaseuilistli?

¹⁸ Uelis tijpiasej tlaseuilistli ipan toyolo maske tikixnamikisej miak tlaouijkayotl. Ma tikilnamikikaj moneki tijpiasej nopa tlaseuilistli tlen toTeotsij temaka. Ma timotemachikaj ipan ya kema momoyaua se ueyi kokolistli, kema se tlenijki techtlasosoljuilia o kema techtlatsakuiltiaj. Amo ma timouejkatlakatlalikaj tlen Jehová itlanechikol uan ma timoyoliljuikaj ipan nopa tlateochiualistli tlen tijselis. Tlaj kiampa tijchiuaj, toTeotsij katli temaka tlaseuilistli itstos touaya (Filip. 4:9). Ipan tlamachtili 52 tikitasej kenijkatsa uelis tikinpaleuisej toikniuaj ma kipiakaj nopa tlaseuilistli tlen toTeotsij temaka kema kiixnamikij tlaouijkayotl.