1. ¿Kenke Abraham motemachiyaya nelia kiseliskia tlen Jehová kitenkauilijtoya?

 JEHOVÁ kiiljuik iuampox Abraham ika se iteipaixui kinteochiuaskia miakej maseualmej (Gén. 15:5; 22:18). Abraham tlauel tlaneltokayaya ipan toTeotsij, yeka motemachiyaya nelnelia kiseliskia tlen kitenkauilijtoya. Pero kema Abraham ya kipiayaya 100 xiuitl uan Sara 90, ayamo kipiayayaj yon se ininkone (Gén. 21:1-7).Maske amo nima panok tlen Jehová kiiljuik, Biblia kiijtoua “Abraham kineltokak para temachtli panoskia tlen Toteko kiiljuik” (Rom. 4:18). Uan Abraham nelia kiselik tlen kitenkauilijtoyaj, kipixki ikone Isaac. ¿Kenke Abraham motemachik nelia kiseliskia tlen kitenkauilijtoyaj?

2. ¿Kenke Abraham motemachiyaya Jehová nelia kichiuaskia tlen kitenkauilijtoya?

² Abraham kuali kiixmatiyaya Jehová, yeka motemachiyaya nelia kiseliskia tlen kitenkauilijtoya (Rom. 4:21). Abraham kuali tlaneltokayaya, yeka Jehová kiitak xitlauak uan yolpajki ika tlen kichijki (Sant. 2:23). Kej kiijtoua Romanos 4:18, Abraham tlaneltokak uan nojkia motemachik ipan tlen kiseliskia. Ma tikitakaj tlen apóstol Pablo kiijtok ipan Romanos capítulo 5, nopaya kiijtok moneki timotemachisej ipan tlen tijselisej teipa.

3. ¿Tlake tlamantli kiijtok Pablo?

 ³ Pablo kiijtok tlen tijchiaj tijselisej teipa nelnelia panos (Rom. 5:5). Nojkia kiijtok uelis más timotemachisej ipan tlen tijselisej teipa. Kema tikitasej tlen kiijtoua Romanos 5:1-5, ximoiljui kenijkatsa nama más timotemachia ipan tlen Jehová kitenkajtok. Ni tlamachtili mitspaleuis más ximotemachi ipan nopa tlamantli. Achtoui tikitasej se tlamantli tlen Pablo kiijtok temachtli tijselisej.

4. ¿Tlake kiijtoua Romanos 5:1, 2?

⁴ (Xijpoua Romanos 5:1, 2). Pablo kiniljuik ni tlamantli toikniuaj katli itstoyaj Roma. Inijuantij kiyekojtoyaj miak tlamantli tlen Jehová uan Jesús, kinextijtoyaj kuali tlaneltokaj uan mochijtoyaj Cristo itokilijkauaj. Ika tlen kichijkej, toTeotsij kinitak xitlauakej pampa tlaneltokatoyaj, yeka kintlapejpenik ika ichikaualis. Ipan nopa tonali pejkej motemachiaj Jehová kinmakaskia se tlamantli uan nelnelia kiseliskiaj.

5. ¿Tlake motemachiaj kiselisej tlapejpenilmej?

⁵ Teipa, Pablo kinixtomilik Cristo itokilijkauaj katli itstoyaj Éfeso tlake tlateochiualistli kinmakaskia toTeotsij. Kiniljuik Jehová kinitayaya tlatsejtseloltikej, yeka kinmakaskia se tlateochiualistli (Efes. 1:18). Uan Cristo itokilijkauaj katli itstoyaj Colosas kiniljuik kanke kiseliskiaj nopa tlateochiualistli. Kiniljuik: “Inkiselisej nopa tlen yejyektsi tlen Toteko kiajoktok para inmechmakas nepa iluikak” (Col. 1:4, 5). Uajka, Cristo itokilijkauaj tlapejpenilmej motemachiaj moyolkuisej uan itstosej nochipa iluikak, nopaya tlanauatisej iuaya Jesucristo (1 Tes. 4:13-17; Apoc. 20:6).

6. ¿Tlake kiijtok se toikni katli kitlapejpenijtokej yas iluikak?

⁶ Cristo itokilijkauaj katli kintlapejpenijtokej yasej iluikak tlauel kipatiitaj nopa tlateochiualistli tlen kiselisej. Ma tikitakaj tlen kiijtok toikni Frederick Franz ipan 1991. Ya kiijtok: “Timotemachiaj nelia tijselisej nopa tlateochiualistli. Nopa 144 mil tijselisej miak tlateochiualistli hasta tlen  amo timoiljuijtoyaj”. ¿Tlake kiyolmatki toikni kema ya kitekipanojtoya Jehová miak xiuitl? Ya kiijtok: “Nojua tijpatiitaj tlen tijselisej teipa. Maske panos miak xiuitl [ . . . ] nojua tlauel tijpatiitasej. Amo san tlapik tijchiasej ma asi nopa tonali, maske panos miak xiuitl. Nama más nijpatiita tlen teipa nijselis”.

7, 8. ¿Tlake motemachiaj kiselisej teipa miakej toTeotsij itekipanojkauaj? (Romanos 8:20, 21).

⁷ Miakej katli kitekipanouaj Jehová ipan ni tonali, kichiaj kiselisej seyok tlamantli. Sanse kej Abraham, motemachiaj itstosej nochipa ipan Tlaltipaktli kampa kinyakanas iTlanauatijkayo Dios (Heb. 11:8-10, 13). Pablo nojkia kiijtok sekinok tlamantli tlen ni tlateochiualistli (xijpoua Romanos 8:20, 21). ¿Tlake mitspaktik kema tijmatki tlen panos teipa? ¿Mitspaktik pampa tijmatki ayokmo tijpias tlajtlakoli uan tielis xitlauak? ¿Tiyolpajki kema tijmatki moyolkuisej katli tikiniknelia uan nojkia itstosej ipan Xochimili? Timotemachiaj teipa kuali tiitstosej pampa toTeotsij ya nopa kiijtojtok kichiuas.

⁸ Tlauel tiyolpakij pampa sekij timotemachiaj tiitstosej nochipa ipan iluikak o ipan Tlaltipaktli. Uan kej panotias tonali, uelis más timotemachisej ipan tlen tijselisej. ¿Tlake techpaleuis? Ma tikitakaj tlen Pablo kiijkuilok. Tlen kiijtok techpaleuis ma timotemachikaj Jehová nelia kichiuas tlen kitenkajtok.

9, 10. Sanse kej Pablo, ¿tlake tlamantli nojkia tikixnamikisej? (Romanos 5:3; nojkia xikita tlaixkopinkayomej).

⁹ (Xijpoua Romanos 5:3). Pablo kiijtok se tlamantli tlen uelis kichiuas ma timosentlachilikaj. Kiijtok nopa tlaouijkayotl tlen tikixnamikij uelis techpaleuis más ma timotemachikaj ipan tlen tijselisej teipa. Uan tijmatij nochi katli tijtekipanouaj Jehová tikixnamikisej tlaouijkayotl. Ma timoiljuikaj tlen Pablo kiniljuik Cristo itokilijkauaj katli itstoyaj Tesalónica, ya kiiljuik: “Kema noja tiitstoyaj inmouaya, tiinmechiljuiyayaj se tonal  asis tlaijiyouilistli uan ama keja nopa panotok keja inkiitaj” (1 Tes. 3:4). Uan katli itstoyaj Corinto, kiniljuik: “Noikniuaj, nijneki xijmatikaj para tojuantij tipanokej miak trabajojyotl [ . . . ]. Tijmachiliyayaj para timikiskiaj” (2 Cor. 1:8; 11:23-27).

¹⁰ Ipan ni tonali nojkia kiampa techpano. Miakej tikixnamikij tlaouijkayotl (2 Tim. 3:12). ¿Tlake tlaouijkayotl tikixnamiktok pampa pejki titlaneltoka ipan Jesús? Uelis mouampoyouaj o mochampoyouaj mitspinajtiaj o uelis mitstlaijiyouiltiaj. ¿Tikixnamiktok tlaouijkayotl kampa titekiti pampa amo tijneki titlachtekis? (Heb. 13:18). ¿Tekichiuanij amo mitskauaj xikiniljui sekinok tlen Biblia kiijtoua? Maske amo sanse tlaouijkayotl tikixnamikij, Pablo kiijtok moneki tiyolpakisej. ¿Kenke kiampa kiijtok?

11. ¿Kenke timosentlalijtokej tikijiyouisej nochi?

¹¹ Kema tikixnamikij tlaouijkayotl, techpaleuia ma tijnextikaj se kuali tlamantli uan nopa kichiuas ma tiyolpakikaj. Romanos 5:3 kiijtoua: “Tlaouijkayotl techpaleuia para achi más tijpiasej toyolo ika nochi tlamantli tlen techpanotiuala”. Nochi tikixnamikij tlaouijkayotl, yeka moneki timosentlalijtosej tikijiyouisej tlen techpanos. Tlaj tikijiyouisej nochi, uelis tijselisej nopa tlateochiualistli tlen Jehová techtenkauilijtok. Amo tijnekij tielisej kej nopa maseuali katli Jesús kiijtok eli kej xinachtli tlen uetski ipan tetl. Ya kiselia “nopa tlajtoli” ika pakilistli, pero “kema kipia kuesoli uan kitlaijiyouiltiaj pampa kineltoka nopa tlajtoli, motepotlamia” (Mat. 13:5, 6, 20, 21). Maske amo techpaktia ma techtlaijiyouiltikaj, tlaj tikijiyouisej nochi, tlauel techpaleuis. Ma tikitakaj kenke.

12. ¿Kenijkatsa techpaleuis tlaj tikijiyouisej tlen techpano?

¹² Santiago, se itokilijka Jesús, kiijtok kenijkatsa techpaleuia kema tikijiyouiaj tlen techpano. Ya kiijtok: “Xijpiakaj inmoyolo para kuali xikijiyouikaj nochi tlen inmechpanotiuala para inelisej keja tlen moskaltijtokej uan motlakachijtokej ipan Toteko. Uan inkipiasej senkistok kuali inmotlalnamikilis uan keja nopa axtleno inmechpolos” (Sant. 1:2-4). Uajka kema tikijiyouiaj tlen techpano, techpaleuia más ma tijpiakaj toyolo, más ma titlaneltokakaj uan más ma timotemachikaj ipan toTeotsij. Uan nojkia techpaleuia ipan sekinok tlamantli.

13, 14. ¿Kenijkatsa techita Jehová kema tikijiyouiaj tlen techpano, uan kenijkatsa techpaleuia? (Romanos 5:4).

¹³ (Xijpoua Romanos 5:4). b Pablo kiijtok kema tikijiyouiaj tlen techpano, “kichiua Dios kuali ma techita”. Ni amo kiijtosneki Jehová yolpaki pampa titlaijiyouiaj, ya yolpaki kema kiita tikijiyouiaj tlen techpano. Tlauel techyolchikaua pampa tikitaj kema tikijiyouiaj tlen techpano uelis tijyolpakiltisej Jehová (Sal. 5:12).

¹⁴ Ma timoiljuikaj tlen kichijki Abraham. Jehová kuali kiitak pampa kiijiyouik nochi tlen kipanok. ToTeotsij kiitak kej iuampo uan nojkia kiijtok eliyaya xitlauak (Gén. 15:6; Rom. 4:13, 22). Tojuantij nojkia uelis kiampa tijchiuasej. Jehová amo techpatiita san pampa tijpiaj se keski tekitl ipan itlanechikol. Ya kuali techitas tlaj amo tijtlauelkauasej uan tikijiyouisej nochi tlen techpanos. Uan nochi uelis kiampa tijchiuasej maske amo tijpiaj sanse toxiui, maske amo sanse kej tiitstokej o amo ueli tijchiuaj sanse tlamantli. ¿Tikixnamiktok se tlaouijkayotl? Ximotemachi tlaj amo tijtlauelkauas Jehová, ya kuali mitsitas. Uan kema tijmatij Jehová tlauel yolpaki ika  tlen tijchiuaj, techpaleuia más ma timotemachikaj ipan tlen tijselisej teipa.

15. ¿Tlake sekinok tlamantli kiijtok Pablo, uan tlake uelis timotlatsintokisej?

¹⁵ Kej ya tikitstokej, Pablo kiijtok toTeotsij kuali techitas tlaj tikijiyouiaj tlen techpano. Nama ma tikitakaj tlake sekinok tlamantli kiijtok: “Kema Dios kuali techita, tijchiaj tijselisej tlen kuali, uan tlen tijchiaj tijselisej, timotemachiaj nelnelia panos” (Rom. 5:4, 5, TNM). Uan ipan Romanos 5:2, Pablo ya kiijtojtoya Cristo itokilijkauaj katli itstoyaj Roma kichixtoyaj itstosej “ipan tlatlanextli iuaya Toteko”. Yeka, uelis timotlajtlaniaj: “Tlaj nopa Cristo itokilijkauaj ya kichiayayaj nopa tlateochiualistli tlen Jehová kinmakaskia, ¿kenke Pablo sampa kiniljuik ma motemachikaj ipan tlen kiselisej teipa?”.

16. Xikijto kenijkatsa se akajya uelis peuas motemachis ipan tlen Biblia kiijtoua mochiuas teipa (nojkia xikita tlaixkopinkayomej).

¹⁶ Uelis tijkuamachilisej tlen Pablo kinejki kiijtos, tlaj tikilnamikij uelis más timotemachisej ipan tlen tijselisej, kej panotias tonali. Ximoiljui tlake tijyolmatki kema mitsiljuijkej teipa uelis tiitstosej nochipa ipan Xochimili. Uelis timoiljuik nopa amo kema panoskia. Pero kema más kuali tikixmatki Jehová uan tlen Biblia kiijtoua, mitspaleuik más ximotemachi nelia mochiuas tlen techtenkauilijtokej.

17. ¿Tlake mitspaleuijtok más ximotemachi ipan tlen tijselis teipa maske ya timoatsonpoliuiltik?

¹⁷ Maske ya timoatsonpoliuiltik, nojua tijchijtok kampeka tijyekos sekinok tlamantli uan kuali titlaneltokas, nopa mitspaleuijtok más ximotemachi ipan tlen tijselis teipa (Heb. 5:13–6:1). Uelis mitspanotok tlen kiijtoua Romanos 5:2-4, maske tikixnamiktok tlaouijkayotl, tikitstok kenijkatsa Jehová kuali mitsita. Tijmati ya yolpaki ika tlen tijchiua, yeka timotemachia nelia kichiuas tlen kitenkajtok. Nama timotemachia ika nochi moyolo nelia tijselis tlen Jehová kiijtojtok. Uan tijnextia nelia timotemachia ipan nopa  tlamantli pampa tijchiua kampeka kuali timouikas ininuaya mochampoyouaj, kuali tijtlapejpenia tlen tijchiuas uan kuali tijtekiuia tonali.

18. ¿Kenke timotemachiaj toTeotsij nelia kichiuas tlen techtenkauilijtok?

¹⁸ Pablo kiijtok kema toTeotsij kuali techita, techpaleuia ma timotemachikaj ipan tlen tijselisej teipa. Nojkia kiijtok uelis timotemachisej temachtli mochiuas tlen Jehová techtenkauilijtok. ¿Kenke? Pablo kiniljuik Cristo itokilijkauaj toTeotsij nelia kichiuas tlen mosentlalijtok. Kiniljuik: “Tlen tijchiaj tijselisej, timotemachiaj nelnelia panos; pampa Dios kitekiuia ichikaualis tlen techmaka para kinextis tlauel techiknelia” (Rom. 5:5, TNM). Yeka uelis timotemachis nelia tijselis tlen Jehová kitenkajtok.

19. ¿Ipan tlake timotemachiaj?

¹⁹ Tlauel mitspaleuis tlaj timoiljuis tlen kichijki Abraham. Jehová kiiljuik kiteochiuaskia, yolpajki ika tlen kichijki uan kiitak kej iuampo. Biblia kiijtoua: “Abraham kipixki iyolo uan kichixki uan asik tonal kema Toteko kimakak Isaac keja kitenkauilijtoya” (Heb. 6:15; 11:9, 18; Rom. 4:20-22). Tlaj tijchiuaj kej Abraham uan amo tijtlauelkauaj Jehová, tijselisej tlen tijchiaj. Tlauel tiyolpakij pampa timotemachiaj nelia tijselisej tlen Jehová kitenkajtok (Rom. 12:12). Pablo kiijkuilok: “Toteko Dios ipan tlen timochiaj, inmechmakas ueyi pakilistli, uan ueyi tlaseuilistli pampa inkineltokaj. Uan achi más ximotemachikaj ipan ya pampa Itonal Toteko inmechmakatias ichikaualis” (Rom. 15:13).