¿Kuali timomachtijtok tlen kistok ipan pilamochtsi Tlen Tematiltia? Xikita tlaj tiuelis tijnankilis ni tlajtlanili:

¿Tlake moneki tijchiuasej tlaj tijnekij tijpatlasej totlalnamikilis? (Rom. 12:2).

Amo san moneki tijchiuasej se keski kuajkuali tlamantli. Moneki tikitasej tlake eltok ipan toyolo uan tijpatlasej tonemilis kej Jehová kineki (w23.01, iamayo 8, 9).

¿Kenijkatsa kinamiki tikitasej nochi tlen pano?

Amo kenijki tlaj tijnekij tijmatisej nochi tlen pano uan kenijkatsa moaxitia tlen kiijtoua Biblia. Pero amo tijnekij tikijtosej san tlen tojuantij timoiljuiaj tlen uelis kichiuas ma moxelokaj toikniuaj ipan tlanechikoli, tijnekij tikijtosej tlen mokixtijtok ipan amatlajkuiloli tlen techmakatok Jehová itlanechikol (1 Cor. 1:10) (w23.02, iamayo 16).

¿Kenke amo eli sanse kema Jesús moatsonpoliuiltik uan kema moatsonpoliuiltiaj itokilijkauaj?

Jesús amo moatsonpoliuiltik sanse kej tojuantij, pampa ya ayokmo kimaktilik Jehová inemilis uan tlakatki ipan nopa altepetl tlen toTeotsij kitlapejpenijtoya. Amo monejki moyolkuepas yon kiiljuis Jehová ma kimaka se kuali tlalnamikilistli pampa amo eliyaya tlajtlakole (w23.03, iamayo 5).

¿Tlake uelis tijchiuasej uan kiampa tikinkauasej sekinok nojkia ma tlanankilikaj?

Kema titlanankilisej amo kinamiki tiuejkauasej yon tikijtosej miak tlamantli kiampa tijkauasej sekinok toikniuaj nojkia ma tlanankilikaj (w23.04, iamayo 23).

¿Tlake eliyaya nopa “Ojtli tlen Tlatsejtseloltijkayotl” tlen kiijtoua Isaías 35:8?

Kema itstoyaj judíos, nopa “Ojtli tlen Tlatsejtseloltijkayotl” eliyaya kejuak nopa ojtli tlen kisayaya Babilonia uan asiyaya Israel. Uan, ¿tlake kiixnextia ipan ni tonali? Kema ayamo asiyaya xiuitl 1919, Jehová kichijki ma kikualtlalikaj ni ojtli, uan ni panok kema kitlajtolkuepkej uan kichijchijkej Biblia ika amatl. Nopa “Ojtli tlen Tlatsejtseloltijkayotl” techpaleuia ma tijueyichiuakaj Jehová ipan ni tonali uan nojkia teipa ipan nopa yankuik Tlaltipaktli (w23.05, iamayo 15-19).

¿Tlake kiixnextiaj nopa omej siuamej tlen kiijtoua Proverbios capítulo 9?

Proverbios kamanalti tlen nopa “siuatl tlen uiuitik” uan kiijtoua katli kitlakakiliaj yauij “miktla”. Nojkia kamanalti tlen se siuatl katli kiixnextia “tlalnamikilistli” uan kiijtoua tlaj tijtlakakilisej, teipa tiitstosej nochipa (Prov. 9:1, 6, 13, 18) (w23.06, iamayo 22-24).

Kema kamanaltik iuaya Lot, ¿kenijkatsa Jehová kinextik amo moueyimati uan kipatla tlen moiljuia kema kinamiki?

Jehová kiiljuik Lot ma motlatiti kampa onka tepetl, uan kema Lot chikauak tlajtlanki ma kikaua itstoti ipan altepetl Zóar, ya kitlakakilik uan kikajki nopaya ma yaui (w23.07, iamayo 21).

¿Tlake uelis kichiuas se siuatl tlaj iueue kiita pornografía?

Amo kinamiki motlajtlakoltis. Tlauel kipaleuis tlaj mosentlalis kuali mouikas iuaya Jehová uan tlaj kipouas kenijkatsa Jehová kinpaleuik se keksij siuamej kema kiixnamijkej tlaouijkayotl. Uelis kichiuas se keski tlamantli tlen kipaleuis iueue ayokmo ma kiita pornografía (w23.08, iamayo 14-17).

¿Kenijkatsa tlalnamikilistli techpaleuia amo nima ma tikualanikaj kema se akajya techiljuia amo melauak tlen tijneltokaj?

Moneki tikitasej ika nopa tlajtlanili, uelis tijmatisej tlake kitekipachoua nopa maseuali, nopa techpaleuis nochipa kuali ma titlanankilikaj (w23.09, iamayo 17).

¿Tlake tijyekouaj tlen María kichijki pampa kinekiyaya ma kiyolchikauakaj?

Kema María kimatki eliskia inana nopa Mesías, kikajki sekinok ma kipaleuikaj. Gabriel uan Elisabet kiyolchikajkej María ika iTlajtol toTeotsij. Ipan ni tonali toikniuaj nojkia uelis techyolchikauasej (w23.10, iamayo 15).

¿Kenijkatsa technankilia Jehová kema timomaijtouaj?

Jehová kiijtojtok nochipa techtlakakilis, kema tijtlajtlaniaj se tlamantli ya kiita tlaj tlapaleuis ma mochiua tlen mosentlalijtok (Jer. 29:12). Jehová amo sanse technankilia maske tijtlajtlaniaj sanse tlamantli, pero ya nochipa techpaleuia (w23.11, iamayo 21, 22).

Tlaj ipan Romanos 5:2 ya kamanalti tlen tijselisej teipa, ¿kenke sampa kiijtoua nopa tlamantli ipan versículo 4?

Kema se akajya peua kikaki tlen Biblia tlamachtia, uelis motemachia itstos nochipa ipan Xochimili. Pero kema kiixnamiki tlaouijkayotl, kiijiyouia uan motemachia Jehová kuali kiita, ya nojua tlauel motemachia ipan tlen Jehová kitenkauilijtok (w23.12, iamayo 12, 13).