JEHOVÁ techmakatok miak regalos uan tijtlaskamatiliaj pampa techkaua tojuantij ma tijtlapejpenikaj kenijkatsa tijtekiuisej. Se tlen nopa regalos eli nopa vino o tlaili. Biblia kiijtoua: “Xokomeka atl temaka pakilistli” (Ecl. 10:19; Sal. 104:15). Pero uelis tikitstokej miakej maseualmej kiijij miak tlaili. Maseualmej amo sanse tlamantli moiljuiaj kema se akajya kiiji tlaili pampa amo sanse tlamantli momajtokej kichiuaj ipan ininaltepe. Uan, ¿kenijkatsa kinamiki tikitasej tlaili Cristo itokilijkauaj?

Kema tijtlapejpenisej tlaj tikisej tlaili o amo, amo kinamiki timoyakanasej ika tlen kichiuaj kampa tiitstokej o kej techiskaltijkej. Moneki tikitasej tlaili kej toTeotsij kiita. Tlaj kiampa tijchiuasej, más tiyolpakisej.

Uelis tikitstokej, miakej maseualmej tlauel tlaij uan nochipa kiampa kichiuaj. Sekij motlailtiaj pampa kinekij kuali kiyolmatisej, sekij pampa kinekij kiilkauasej ininkuesoljuaj. Uan kanajya maseualmej tlauel tlaij pampa kinekij kinextisej tlauel tetikej o tlauel tlalnamikij.

Pero Cristo itokilijkauaj, tijkauaj ma techyakana toTeotsij. Ipan iTlajtol kiijtoua tlake techpanos tlaj tlauel titlaij. Se neskayotl, Proverbios 23:29-35 kiijtoua se keski tlaouijkayotl tlen kipiaj katli moiuintiaj. a Daniel, se ueuejtlakatl tlen Europa, kiijtok kenijkatsa monejnemiltiyaya kema ayamo kitekipanouayaya Jehová. Ya kiijtok: “Tlauel nitlaiyaya, yeka nijchijki se keski tlamantli tlen tlauel amo kuali uan nopa kichijtok nojua amo kuali ma nijyolmati”.

¿Tlake techpaleuis kuali ma tijtlapejpenikaj tlen tijchiuasej uan kiampa amo tijpiasej kuesoli pampa tlauel titlaij? Moneki tijkauasej Jehová ma techyakana.

Ma tikitakaj tlake kiijtoua Biblia tlen tlaili uan kenke tlaij maseualmej.

Biblia amo kiijtoua amo kuali tlaj tikisej kentsi tlaili. Nojkia kiijtoua tlaj tikij se kentsi, uelis kichiuas ma tiyolpakikaj. Ipan Eclesiastés 9:7 kiijtoua: “Xia xitlakuati uan xikiti moxokomekaatl ika pakilistli”. Biblia nojkia kiijtoua kemantika Jesús uan sekinok toTeotsij itekipanojkauaj kiikej vino (Mat. 26:27-29; Luc. 7:34; 1 Tim. 5:23).

Maske amo kenijki tlaj tikisej se kentsi tlaili, amo kinamiki timoiuintisej. Biblia kiijtoua: “Amo ximoiuintikaj ika tlaili” (Efes. 5:18). Uan nojkia kiijtoua “axuelis kalakisej kampa tlanauatia Toteko” nochi katli “moiuintiaj” (1 Cor. 6:9, 10). Kej tikitaj, Jehová amo kipaktia kema se akajya tlauel tlai uan kema moiuintia. Amo ma tijchiuakaj kej maseualmej uan ma tijchiuakaj kampeka timoiljuisej kej Jehová.

Sekij kiijtouaj: “Na ueli niki miak tlaili uan amo nimoiuintia”. Tlauel amo kuali kema se akajya kiampa moiljuia. Biblia kiijtoua katli kiijij miak tlaili uelis tlajtlakolchiuasej uan nopa kichiuas ma mouejkatlalikaj tlen Jehová (Tito 2:3; Prov. 20:1). Jesús nojkia kiijtok katli tlauel tlaij amo kalakisej ipan iTlanauatijkayo Dios (Luc. 21:34-36). Uajka, ¿tlake techpaleuis amo tlauel ma titlaikaj uan kiampa amo titlaijiyouisej?

Kej tikitstokej, tlaj timoyakanaj ika tlen momajtokej kichiuaj kampa tiitstokej uelis amo kuali tijtlapejpenisej tlen tijchiuasej kema titlaisej. Yeka, katli tijtekipanouaj Jehová nochipa tijchiuaj tlen kipaktia kema tijtlapejpeniaj tlen tikisej o tlen tijkuasej. Biblia kiijtoua: “Ika nochi tlen inkikuaj, o inkiij, o nochi sekinok tlamantli tlen inkichiuaj, moneki xijchiuakaj nochi para iuextilis Toteko” (1 Cor. 10:31). Ma tikitakaj se keski tlatsintokili uan textos tlen uelis techpaleuis.

¿Nitlai pampa nijneki kuali ma nechitakaj sekinok? Éxodo 23:2 kiijtoua: “Kema itstokej miak tlen kichiuasnekij tlen axkuali, amo ximokalakikaj ininuaya”. Ipan ni texto Jehová kiniljuik israeleuanij amo ma kichiuakaj kej maseualmej katli kichiuayayaj tlen amo kuali. Uan tojuantij nojkia moneki kiampa tijchiuasej. Tlaj timoiljuiaj uan tijchiuaj kej sekinok, ueliskia tikixpanosej Jehová uan tijtlauelkauasej (Rom. 12:2).

¿Nitlai pampa nijneki sekinok ma kiitakaj nijpia chikaualistli? Ipan se keski altepemej amo kenijki kiitaj tlaj se akajya tlauel tlai uan miakpa kiampa kichiua (1 Ped. 4:3). Ma tikitakaj tlen kiijtoua 1 Corintios 16:13: “Xitlachixtokaj. Xiitstokaj intemachmej ipan tlen inkineltokaj tlen Toteko. Ximoneltlalikaj keja tlakamej tlen kipiaj fuerza uan ximotetilikaj”. Tlaili amo kipaleuia se akajya ma kipia más chikaualistli. Kema se akajya tlauel tlai amo kuali kitlapejpenia tlen kichiuas uan kichiua ma uiuitia. Isaías 28:7 kiijtoua katli tlauel tlaij mouiuichiuaj uan kichiuaj miak tlamantli tlen amo kuali.

Tlaj tijnekij tijchiuasej tlen kuali, moneki tikiljuisej Jehová ma techpaleui uan moneki tijchiuasej kampeka kuali titlaneltokasej (Sal. 18:32). Yeka moneki kuali titlachixtosej uan kiampa amo tijchiuasej tlen uelis kichiuas ayokmo kuali ma timouikakaj iuaya Jehová. Jesús kiampa kichijki kema itstoya ipan Tlaltipaktli, yeka miakej kiitakej kej se tlakatl katli amo majmauiyaya uan mosentlalijtoya kichiuas tlen xitlauak.

 ¿Nitlai pampa nijneki nikilkauas tlen nechtekipachoua? Katli kiijkuilok se salmo kiiljuik Jehová: “NoTeko, kema san nimoyoliljuia tlen miak kuesoli uan san ya nopa nijmati, ta tinechyoltlalia” (Sal. 94:19). Tlaj mitstekipachoua se tlamantli, ximotemachi ipan Jehová uan amo xitlai pampa tijneki tikilkauas tlen mitstekipachoua. Tlaj nochipa timomaijtos mitspaleuis ayokmo tlauel ximotekipacho. Sekij kinpaleuijtok kema kiniljuiaj toikniuaj katli kuali tlaneltokaj ma kinpaleuikaj. Kema se akajya tlai pampa kineki kiilkauas tlen kitekipachoua, ouij kimati amo kichiuas tlen kiyoltilana uan kichiuas tlen kuali (Os. 4:11). Daniel, katli tikijtojkej achtouia, kiijtoua: “Tlauel nimokuesouayaya pampa achtouia nijchijki tlen tlauel amo kuali. Nitlaiyaya pampa nijnekiyaya nikilkauas tlen nechpanoyaya, pero nopa amo nechpaleuik pampa kichijki ma nijpia sekinok kuesoli, ayokmo nikinpixki nouampoyouaj uan nimoiljuiyaya ayokmo nopati”. ¿Tlake kipaleuik? Ya nojua kiijtoua: “Nikitak san Jehová ueliskia nechpaleuis. Ya nechpaleuik ma nijsenkaua nokuesoljuaj uan sampa kuali ma nijyolmati”. Nochipa ma tikilnamikikaj san Jehová uelis techpaleuis maske kemantika tijmatisej ayokmo tiyajatij ika se kuesoli (Filip. 4:6, 7; 1 Ped. 5:7).

Tlaj kemantika tikiji tlaili, uelis timotlatsintokis: “¿Nechiljuijtok se tlen nochampoyouaj o se nouampox motekipachoua pampa niki miak tlaili?”. Nopa uelis kinextia peua timomati nochipa titlai. “¿Nama más nitlai?”. Nopa uelis kinextis teipa ayokmo uelis tijkauas tlaili. “¿Ouij nijmati amo nitlais se keski tonali?”. Nopa uelis kinextia ya timomatki nochipa titlai uan ayokmo ueli tijkaua uan monekis ma mitspaleuikaj katli kinpaleuiaj katli ayokmo uelij kikauaj tlaili.

Se keskij toikniuaj mosentlalijtokej amo kiisej yon se kentsi tlaili. Uan sekij  amo tlaij pampa amo kinpaktia iajuiyaka. Tlaj tikixmatij se akajya katli kiampa mosentlalijtok kichiuas, moneki tijtlepanitasej uan amo tikiljuisej amo kuali tlen kichiua.

Sekinok mosentlalijtokej san kiisej se kentsi tlaili. Yeka kiijij kentsi san kemantika, kema tlakuaj o sampatsi ipan semana. Uan sekinok kitlapejpeniaj tlake kena uan tlake amo kiisej. Sekij kiijij se kentsi vino o cerveza, pero amo kiijij sekinok tlaili katli más chichik maske kimanelouaj ika sekinok tlamantli. Kema tijmatij keski tlaili uelis tikisej, amo ouij tijmatij ayokmo titlaisej. Se toikni katli kiampa kichiua, kinextia kuali tlaneltoka uan amo kinamiki pinauas.

Nojkia moneki timoiljuisej ipan sekinok. Romanos 14:21 kiijtoua: “Más kuali ma axtijkuakaj nakatl, o ma axtikikaj xokomekaatl tlen chikauak, niyon axtleno ma tijchiuakaj, intla kichiuas ma uetsi se toikni”. Uajka moneki tijnextisej titeikneliaj. Tlaj tikitaj uelis tijyolkokosej se toikni tlaj titlaij, pampa tikikneliaj nopa toikni amo titlaisej nopa tonali. Kiampa tijnextisej tijtlepanitaj tlen sekinok kiyolmatij uan amo san tijnekij tijchiuasej tlen tojuantij techpaktia (1 Cor. 10:24).

Nojkia, nochi katli tijtekipanouaj toTeotsij moneki tijtlepanitasej tlen tekichiuanij kiijtouaj. Uelis amo kinkauaj ma kiikaj tlaili katli ayamo uejueyij o katli kinemiltiaj se carro o se máquina (Rom. 13:1-5).

Jehová kikaua ma tijtlapejpenikaj kenijkatsa tijtekiuisej sejse regalo tlen techmakatok. Yeka nochi tiuelij tijtlapejpeniaj tlen tijkuasej uan tikisej. Kuali ma tijtlapejpenikaj tlen tijchiuasej, kiampa tijnextisej tlauel tikikneliaj Jehová uan tijnekij tijyolpakiltisej.