1, 2. ¿Tlake tlamantli uelis kichiuas ma tichokakaj?

 NOCHI timochokilijtokej. Tichokaj kema techpano se tlamantli tlen kuali o kema tlakati se pilkonetsi. Uelis nojkia tiixayotemoj kema tikilnamikij se kuali tlamantli tlen techpanok o kema timopantiaj iuaya se touampox katli miak xiuitl amo tikitstoyaj.

² Pero miakpa tichokaj pampa timokuesouaj o techtlaijiyouiltia se tlamantli. Kiampa uelis techpanos kema se akajya tlauel techyolkokoua, kema titlaijiyouiaj pampa tlauel timokokouaj o kema miki se akajya katli tikikneliaj. Kema techpano ni tlamantli, uelis tijyolmatij kej Jeremías kema babiloniaeuanij kitsontlamiltijkej Jerusalén. Ya kiijtok: “Noixayo temo keja se atlajtli [...]. Nichoka uan axueli nimoyoltlalia” (Lam. 3:48, 49).

3. ¿Kenijkatsa kiyolmati Jehová kema kiita tlaijiyouiaj itekipanojkauaj? (Isaías 63:9).

 ³ Jehová kimati keski imiaka timochokilijtokej. Biblia kiijtoua ya kiita kenijkatsa titlaijiyouiaj uan techtlakakilia kema tikiljuiaj ika nochi toyolo ma techpaleui (Sal. 34:15). Pero ya nojkia tlauel mokuesoua kema techita tichokaj pampa eli toTata uan tlauel techiknelia. Yeka, nima kineki techpaleuis (xijpoua Isaías 63:9).

4. ¿Tlake tikitasej ipan ni tlamachtili, uan tlake tijyekosej tlen Jehová?

⁴ Ipan Biblia tikitaj kenijkatsa Jehová kinyolchikajki itekipanojkauaj kema mochokilijkej. Ma timoiljuikaj ipan Ana, David uan tlanauatijketl Ezequías. ¿Tlake kichijki ma mochokilikaj? ¿Kenijkatsa kinpaleuik Jehová? ¿Uan kenijkatsa techyolchikaua tlen kinpanok kema timokuesouaj, kema se akajya techkajkayaua o kema timoiljuiaj amo kuali tiitstosej teipa?

TIMOCHOKILIAJ KEMA TIMOKUESOUAJ

5. ¿Tlake kiyolmatiyaya Ana?

⁵ Ana kipanok miak tlamantli tlen kichijki ma tlaijiyoui uan ma mochokili. Iueue nojkia mosiuajtijtoya iuaya Peniná, ni siuatl tlauel kikualankaitayaya Ana uan kitlaijiyouiltiyaya. Ana nojkia amo ueliyaya konepia uan Peniná kinpixtoya miakej ikoneuaj (1 Sam. 1:1, 2). Yeka, ni siuatl tlauel kipinajtiyaya Ana. ¿Kenijkatsa tijyolmatiskia tlaj kiampa mitspanoskia? Ana tlauel mokuesouayaya uan chokayaya “hasta axueliyaya tlakua” (1 Sam. 1:6, 7, 10).

6. ¿Tlake kipaleuik Ana ayokmo tlauel ma mokueso?

⁶ Ana kipaleuik ayokmo tlauel ma mokueso pampa yajki kiueyichiuato Jehová ipan tabernáculo. Uan kema itstoya kalmapa, “pejki momaijtoua ika TOTEKO uan nelia mochokiliyaya”. Kiiljuik Jehová ma kiilnamiki uan ma kiita kenijkatsa tlaijiyouiyaya (1 Sam. 1:10, 11). Ana kiijtok nochi tlen kikuesouayaya uan Jehová nojkia kiyolkokok kema kiitak mochokiliyaya.

7. ¿Kenijkatsa kiyolmatki Ana kema kiiljuik Jehová tlen kiyolmatiyaya?

⁷ Kema Ana ya kiiljuijtoya Jehová nochi tlen kiyolmatiyaya uan sumo sacerdote Elí kiyolchikajki, pejki kuali kiyolmati. Biblia kiijtoua: “Kiski ika miak pakilistli, uan tlakuajki uan ayok mokuesok” (1 Sam. 1:17, 18). Maske Ana nojua kipiayaya nopa tlaouijkayotl, pejki kuali kiyolmati pampa kimatiyaya Jehová kikuamachiliyaya tlen kiyolmatiyaya uan kipaleuiskia. Jehová kiitak kenijkatsa tlaijiyouiyaya Ana, kitlakakilik uan teipa kichijki ma kinpia ikoneuaj (1 Sam. 1:19, 20; 2:21).

8, 9. Kej kiijtoua Hebreos 10:24, 25, ¿kenke moneki tijchiuasej kampeka tiasej tlanechikoli? (Nojkia xikita tlaixkopinkayotl).

 ⁸ ¿Tlake techmachtia? ¿Tikixnamiktok se ueyi kuesoli tlen kichiua ximochokili? Uelis tlauel timoyolkokojtok pampa mijki se mouikal o se mouampox. Tlaj kiampa mitspano, uelis amo tijneki tiitstos ininuaya sekinok. Pero xikilnamiki tlen kichijki Ana, ya yajki ipan tabernáculo uan nopaya Jehová kiyolchikajki. Yeka, tlaj tias tlanechikoli maske tlauel tisiajtok uan timokuesoua, Jehová mitsyolchikauas (xijpoua Hebreos 10:24, 25). Nopaya kipouaj textos tlen tlauel techyolchikaua. Jehová kiampa techpaleuia ma tijpatlakaj tlen timoiljuiaj uan ayokmo timosentlalikaj ipan tokuesoljuaj. Uan kej panotias tonali, kuali tijyolmajtias maske nojua tijpias nopa kuesoli.

⁹ Ipan tlanechikoli, toikniuaj techyolchikauaj uan kinextiaj tlauel techikneliaj (1 Tes. 5:11, 14). Ma tikitakaj tlen kiijtok se precursor especial katli mijki isiua: “Nojua nijchokilia nosiua. Kemantika nimoseuia kanajya uan tlauel nimochokilia. . . Pero kema nia tlanechikoli, nechpaleuia amo tlauel ma nimokueso. Kema toikniuaj tlanankiliaj uan nechiljuiaj se keski tlajtoli, kichiua kuali ma nijyolmati. Kemantika niasi ipan tlanechikoli tlauel nimokuesojtok, pero teipa nopaya peua kuali nijyolmati”. Kema tiauij tlanechikoli, Jehová techyolchikaua ika toikniuaj.

10. ¿Kenijkatsa uelis tijchiuasej kej Ana kema tlauel timokuesouaj?

¹⁰ Ana tlauel kuali kiyolmatki kema kiiljuik Jehová tlen kiyolmatiyaya. Ta nojkia uelis tikiljuis Jehová nochi tlen mitskuesoua uan timotemachis ya mitstlakakilis kej kiijtoua 1 Pedro 5:7. Se tosiuaikni kiijtoua tlake kiyolmatki kema tlachtekinij kimiktijkej iueue. Ya kiijtok: “Nijmatki kejuak niyoltlapanki uan nimoiljuik ayokmo kema kuali nijyolmatiskia”. ¿Tlake kipaleuik? Ya kiijtoua: “Kema nikiljuiyaya Jehová tlen nijyolmatiyaya, nechpaleuiyaya ayokmo tlauel ma nimokueso. Maske kemantika amo nijmatiyaya kenijkatsa nikiljuis tlen nijyolmatiyaya, ya nechkuamachiliyaya. Kema tlauel nimokuesouayaya, nikiljuiyaya ma nechpaleui nimoyoltlalis. Nopa kichiuayaya ayokmo ma nimotetsopa uan nojua ma niyolpaki”. Kema tikiljuia Jehová nochi tlen tijyolmati, ya mitskuamachilia uan kiita tlen mitspano. Maske nojua tijpixtos nopa kuesoli, Jehová uelis mitsyoltlalis uan kichiuas xijpia tlaseuilistli (Sal. 94:19; Filip. 4:6, 7). Nojkia, tlauel mitsteochiuas pampa tikijiyouik nopa kuesoli (Heb. 11:6).

TIMOCHOKILIAJ KEMA TECHKAJKAYAUAJ

11. ¿Tlake kiyolmatki David kema sekinok kitlaijiyouiltijkej?

¹¹ David nojkia miakpa kiixnamijki miak tlamantli tlen amo kuali tlen kichijki ma mochokili. Miakej kikualankaitakej, kikajkayajkej uan kinejkej kimiktisej, se keskij tlen inijuantij elkej iuikaljuaj uan iuampoyouaj (1 Sam. 19:10, 11; 2 Sam. 15:10-14, 30). Se tonali David kiijkuilok: “Ya tlanki nofuerza ika chokistli. Sejse youali nichoka miak hasta nijtlamixolonia notsonteto”. ¿Kenke kiampa kiyolmatiyaya? Pampa ikualankaitakauaj kichiuiliyayaj tlen amo kuali (Sal. 6:6, 7). Maseualmej kitlaijiyouiltijkej David, yeka tlauel mochokiliyaya.

12. Kej kiijtoua Salmo 56:8, ¿ipan tlake motemachiyaya David?

 ¹² Maske David kiixnamijki miak kuesoli, kimatiyaya Jehová tlauel kiikneliyaya. Yeka kiijtok: “TOTEKO kikaktok keja nichoka” (Sal. 6:8). Se tonali kiijkuilok tlen kiijtoua Salmo 56:8 (xijpoua). Tlen kiijtok kinextia Jehová tlauel techiknelia uan kitekipachoua tlen tijyolmatij. David kiijtok Jehová kejuak kiajokuiyaya iixayo ipan se frasco o kiijkuilouayaya ipan se amochtli. Motemachiyaya Jehová kiitayaya nochi tlen kitlaijiyouiltiyaya uan nojkia kikuamachiliyaya kenijkatsa kiyolmatiyaya.

13. ¿Tlake uelis techyolchikauas tlaj se akajya techkajkayajki o techyolkokok? (Nojkia xikita tlaixkopinkayotl).

¹³ ¿Tlake techmachtia? ¿Mitsyolkokok o mitskajkayajki se akajya katli tikiknelia? ¿Tlauel timoyolkokojtok pampa mitskajki monamik o katli iuaya timosenkauaskia? ¿Timokuesoua pampa se akajya katli tikiknelia ayokmo kitekipanoua Jehová? Ma tikitakaj tlake kiijtok se toikni kema isiua kikajkayajki uan kikajki, ya kiijtok: “Amo ueliyaya nijneltoka tlen nechpanok. Nimoiljuiyaya amo tleno nopati, nimokuesouayaya uan nikualaniyaya”. ¿Tlake uelis mitsyolchikauas tlaj se akajya mitskajkayajki o mitsyolkokok? Tlauel mitspaleuis tlaj timotemachis Jehová amo kema mitstlauelkauas. Nopa toikni kiijtok: “Maseualmej uelis mitstlauelkauasej pero Jehová amo kiampa kichiuas. Maske techpanos tlen ueli tlamantli, nochipa techpaleuis. Amo kema kintlauelkaua katli motemachiaj ipan ya” (Sal. 37:28). Xikilnamiki san Jehová tlauel mitsiknelia. Tlaj sekinok tlauel mitsyolkokojkej, nochipa xijchiua kampeka tikitas kenijkatsa Jehová tlauel mitspatiita (Rom. 8:38, 39). Maske se akajya mitstlaijiyouiltis, uelis timotemachis Jehová mitsiknelia.

14. ¿Tlake kiijtoua Salmo 34:18?

¹⁴ Tlaj se akajya mitskajkayajki, uelis mitsyolchikauas tlen David kiijkuilok ipan Salmo 34:18 (xijpoua). Se amochtli kiijtoua nopa tlajtoli “tlen mokuesouaj”, nojkia uelis motlajtolkuepas “katli amo motemachiaj kiselisej tlen kuali”. ¿Kenijkatsa kinpaleuia Jehová katli kiampa kiyolmatij? Nopa texto kiijtoua ya “itstok ininnechka” katli tlauel moyolkokojtokej. Kichiua kej se tetaj, kema kiita ipilkone mochokilia nima kinajnaua uan kiseseltia. Jehová nojkia kiyolkokoua tlen techpano uan nima techpaleuia. Kineki techyoltlalis uan kichiuas ayokmo ma titlaijiyouikaj. Nojkia techiljuia  teipa kuali tiitstosej, uan nopa techpalaeuia ma tikijiyouikaj tlen nama techpano (Is. 65:17).

TIMOCHOKILIAJ KEMA AMO TIJMATIJ TLAKE TIJCHIUASEJ

15. ¿Kenke tlanauatijketl Ezequías tlauel mochokilik?

¹⁵ Kema tlanauatijketl Ezequías tlen Judá kipixtoya 39 xiuitl, tlauel mokokok. Uan Jehová kinauatik teokamanalojketl Isaías ma kiiljui Ezequías ayokmo mochikauaskia (2 Rey. 20:1). Ezequías moiljuik mikiskia, yeka tlauel mochokilik uan miakpa kiiljuik Jehová ma kipaleui (2 Rey. 20:2, 3).

16. ¿Tlake kiyolmatki Jehová uan kenijkatsa kipaleuik Ezequías?

¹⁶ Kema Jehová kitlakakilik Ezequías uan kiitak kenijkatsa mochokilik, kiteikneltiitak uan ika teokamanalojketl Isaías kiiljuik: “Na nijkaktok motlamaijtol uan nikitstok moixayo. Nimitschikauas tlen mokokolis”. Jehová kitlasojtlak, kiiljuik kikauaskia nojua ma itsto se keski xiuitl uan kimanauiskia altepetl Jerusalén kema asiriaeuanij kinteuiskiaj (2 Rey. 20:4-6).

17. ¿Kenijkatsa techpaleuia Jehová kema tlauel timokokouaj? (Salmo 41:3; nojkia xikita tlaixkopinkayotl).

¹⁷ ¿Tlake techmachtia? ¿Tlake uelis tijchiuas tlaj tlauel timokokoua uan timoiljuia ayokmo timochikauas? Xikiljui Jehová nochi tlen tijyolmati maske tlauel timochokilis. Biblia kiijtoua Jehová techyolchikauas kema tijpiaj se tlaouijkayotl pampa ya eli “toTata katli tetlasojtla ika nochi iyolo uan Dios katli nochipa teyoltlalia” (2 Cor. 1:3, 4). Maske tijmatij Jehová amo kitlamiltis nochi tlaouijkayotl ipan ni tonali, timotemachiaj nochipa techpaleuis (xijpoua Salmo 41:3). Ika ichikaualis techpaleuia ma tiyolpakikaj, ma tijmatikaj tlake tijchiuasej uan ma tijpiakaj tlaseuilistli (Prov. 18:14; Filip. 4:13). Nojkia techpaleuia ma timotemachikaj teipa kitlamiltis kokolistli (Is. 33:24).

18. ¿Tlake texto mitspaleuijtok kema tijpixki se tlaouijkayotl? (Xikita nopa recuadro “ Jehová techyolchikaua ika se keski tlajtoli”).

¹⁸ Ezequías kiyolchikajki tlen Jehová kiiljuik. Uan tojuantij nojkia uelis techyolchikauas tlen Biblia kiijtoua. Jehová kichijki nopaya ma moijkuilo se keski tlajtoli tlen techyolchikaua kema tikixnamikij tlaouijkayotl (Rom. 15:4). Ma tikitakaj tlen kipanok se tosiuaikni tlen África Occidental katli miakpa mochokiliyaya pampa kiiljuijkej kipixtoya cáncer. Ya kiijtoua: “Tlauel nechyolchikaua tlen kiijtoua Isaías 26:3. Maske kemantika amo ueli tijsenkauaj se kuesoli, ni versículo kiijtoua Jehová techpaleuis kuali ma tijyolmatikaj uan ma tikijiyouikaj tlen ueli tlamantli”. ¿Tikilnamiki se texto  tlen mitsyolchikajki kema tijpixki se tlaouijkayotl uan uelis ayokmo tijmatiyaya tlake tijchiuas?

19. ¿Tlake tlateochiualistli tijselisej?

¹⁹ Tiitstokej ipan itlamia tonali, yeka tikixnamiktiasej miak tlaouijkayotl. Pero kej tikitakej ika tlen kinpanok Ana, David uan tlanauatijketl Ezequías, Jehová kiita tlake kichiua ma timochokilikaj uan kikuamachilia tlen tijyolmatij. Ya techiknelia pampa amo tijtlauelkauaj uan kiita kema timochokiliaj. Yeka kema tikixnamikij se kuesoli, ma tikiljuikaj Jehová nochi tlen tijyolmatij. Amo ma timouejkatlalikaj tlen toikniuaj pampa tlauel techikneliaj. Uan nochipa ma timomachtikaj Biblia pampa kiampa Jehová techyolchikauas. Uelis timotemachisej tlaj tikijiyouisej kuesoli uan amo tijtlauelkauasej Jehová, ya techteochiuas (Apoc. 21:4). ¡Ipan yankuik Tlaltipaktli tlauel tiyolpakisej hasta tichokasej!