TLAMACHTILI 49
UIKATL 147 Tiitstosej nochipa ipan Xochimili
¿Tlake moneki tijchiuasej para tiitstosej nochipa?
“Nochi katli kiixmatisej iKone uan tlaneltokasej ipan ya, kipiasej nemilistli tlen amo kema tlamis” (JUAN 6:40).
TLEN MOIXTOMAS
¿Kenijkatsa kinpaleuia Cristo imikilis katli kintlapejpenijtokej yasej iluikak uan katli itstosej ipan Tlaltipaktli?
1. ¿Kenke miakej maseualmej moiljuia amo uelis tiitstosej nochipa?
MIAKEJ maseualmej kichiuaj ejercicio uan amo kikuaj tlen ueli tlamantli pampa kinekij kuali itstosej. Maske kiampa kichiuaj, amo moiljuiaj itstosej para nochipa, pampa moiljuiaj kema ueuejtiasej tlauel tlaijiyouisej. Pero ipan Juan 3:16 uan 5:24, Jesús kiijtok kena ueliskia tijpiasej nopa “nemilistli tlen amo kema tlamis” uan amo titlaijiyouiskiaj.
2. ¿Tlake kiijtoua Juan capítulo 6 tlen nopa nemilistli tlen amo kema tlamis? (Juan 6:39, 40).
2 Se tonali, ika se milagro Jesús kimiakilik pantsi uan michimej para kintlamakas miakej maseualmej. a Kema kiampa kichijki uelis mosentlachilijkej, pero tlen kiijtok ualmostla kichijki más ma mosentlachilikaj. Nopa maseualmej kitokilijkej hasta Capernaúm, iteno mar tlen Galilea, uan nopaya Jesús kiniljuik maseualmej uelis moyolkuisej uan kipiasej nemilistli tlen amo kema tlamis (xijpoua Juan 6:39, 40). Ximoiljui ipan mochampoyouaj uan mouampoyouaj katli miktokej. Tlen Jesús kiijtok techmachtia nochi katli miktokej uelis sampa moyolkuisej uan itstosej nochipa. Pero ipan Juan capítulo 6, Jesús kiijtok sekinok tlamantli tlen miakej maseualmej amo kuali kikuamachiliaj. Ma tikitakaj tlake kiijtosneki tlen kiijtok.
3. ¿Tlake kiijtok Jesús ipan Juan 6:51?
3 Kema Jesús kintlamakak nopa maseualmej katli itstoyaj Capernaúm, kiilnamijkej nopa maná tlen achtouia kinmakakej ininuejkapantatauaj. Biblia kitokaxtia nopa maná “tlakualistli tlen iluikak” (Sal. 105:40; Juan 6:31). Yeka, Jesús kinejki kinmachtis sekinok tlamantli. Maske toTeotsij kintitlanilijtoya nopa maná, katli kikuajkej teipa mijkej (Juan 6:49). Pero Jesús kiniljuik ya eliyaya nopa “tlakualistli tlen iluikak”, “tlakualistli tlen Dios temaka” uan “tlakualistli tlen temaka nemilistli” (Juan 6:32, 33, 35). Teipa, Jesús kiijtok amo eliyaya sanse nopa maná uan tlen ya kichiuaskia. Uan kiijtok: “Na nieli nopa tlakualistli tlen yoltok katli temok tlen iluikak. Tlaj se akajya kikua ni tlakualistli, itstos nochipa” (xijpoua Juan 6:51). Nopa maseualmej katli nopaya itstoyaj amo kikuamachilijkej nopa tlajtoli. ¿Kenke Jesús kiijtok ya eliyaya nopa tlakualistli tlen iluikak tlen más ipati que nopa maná? Jesús kiijtok se tlamantli tlen kinpaleuiskia ma kikuamachilikaj, kiijtok: “Nonakayo eli nopa tlakualistli tlen nitemaktilis”. ¿Tlake kinekiyaya kiijtos? Nochi tijnekij tijmatisej pampa techpaleuis tojuantij uan tochampoyouaj ma tikitakaj tlake techpaleuis ma tiitstokaj nochipa. Ma tikitakaj tlake kinekiyaya kiijtos Jesús.
“TLAKUALISTLI TLEN YOLTOK” UAN INAKAYO
4. ¿Kenke se keskij amo kinpaktik tlen Jesús kiijtok?
4 Se keskij tlen inijuantij amo kinpaktik kema Jesús kiijtok temakaskia inakayo para kinmakixtis maseualmej. Uelis moiljuijkej monekiyaya kikuasej inakayo (Juan 6:52). Pero teipa kiijtok seyok tlamantli tlen kichiuaskia más ma mosentlachilikaj: “Tlaj amo inkikuaj inakayo katli eli iKone se Maseuali uan amo inkiij ieso, amo inkipiasej nemilistli” (Juan 6:53).
5. ¿Kenke uelis tikijtosej Jesús amo kiniljuik nopa maseualmej nelnelia ma kiikaj ieso?
5 Uejkajkia kema itstoya Noé, Jehová ya kiniljuijtoya maseualmej amo ma kikuakaj estli (Gén. 9:3, 4). Uan teipa nojkia kinilnamikilik israeleuanij. Yeka, katli kikuaskia estli monekiyaya mikis (Lev. 7:27). Jesús kinilnamikilik monekiyaya kichiuasej tlen kiijtouayaya iTlanauatil Moisés (Mat. 5:17-19). Yeka, ika tlen kiijtok Jesús uelis tikijtosej amo kinekiyaya kiniljuis nelnelia ma kikuakaj inakayo o ma kiikaj ieso. Ya kinekiyaya ma kikuamachilikaj tlake monekiyaya kichiuasej para kipiasej nopa “nemilistli tlen amo kema tlamis” (Juan 6:54).
6. ¿Kenke tikijtouaj Jesús san kinekiyaya kiixnextis se tlamantli ika tlen kiijtok ipan Juan 6:53?
6 Ika tlen Jesús kiijtok, san kinekiyaya kiixnextis se tlamantli, pampa nojkia kiampa kichijki kema kamanaltik iuaya nopa siuatl samariaejketl: “Katli kiis nopa atl tlen na nijmakas, ayokmo kema sampa amikis, pampa nopa atl tlen nijmakas mochiuas ipan iyolo kej se ameli tlen meyas para temakas nemilistli tlen amo kema tlamis” (Juan 4:7, 14). b Jesús amo kinekiyaya kiijtos tlaj nopa siuatl kiiskia nopa atl itstoskia nochipa. Uan kema kamanaltik ininuaya nopa maseualmej tlen Capernaúm nojkia amo kinekiyaya kiijtos tlaj kikuaskiaj inakayo uan kiiskiaj ieso itstoskiaj nochipa.
OME TLAMANTLI TLEN AMO ELI SANSE
7. ¿Tlake kikuamachiliaj se keskij ika tlen ijkuilijtok ipan Juan 6:53?
7 Se keskij maseualmej tlen sekinok religiones kiijtouaj tlen Jesús kiijtok ipan Juan 6:53 kiixnextia tlen moneki kichiuasej kema kiilnamikisej toTeko iTlakualis. Kiampa kiijtouaj pampa kema Jesús tlakuajki ininuaya iapóstoles kema nechka kimiktiskiaj, kamanaltik tlen inakayo uan ieso (Mat. 26:26-28). Inijuantij kiijtouaj nochi katli kiilnamikisej Cristo imikilis moneki kikuasej pantsi uan kiisej vino. ¿Kiampa kinamiki tijchiuasej? Tlauel ipati tijmatisej tlaj nelia kiampa kinamiki tijchiuasej pampa sejse xiuitl ipan nochi Tlaltipaktli tlauel miakej mosentiliaj para kiilnamikisej Cristo imikilis. Tikitasej se keski tlamantli tlen amo eli sanse tlen kiijtoua Juan 6:53 uan tlen Jesús kiijtok kema tlakuajki ininuaya iapóstoles.
8. ¿Kenke uelis tikijtosej amo eli sanse ni ome tlamantli tlen panok? (Nojkia xikita tlaixkopinkayomej).
8 Ma tikitakaj ome tlamantli tlen techpaleuis ma tijkuamachilikaj kenke amo eli sanse tlen kiniljuik katli itstoyaj Galilea uan tlen kiniljuik iapóstoles. Se, ¿kema uan kanke itstoya Jesús kema kiijtok tlen ijkuilijtok ipan Juan 6:53-56? Itstoya ininixpa miakej judíos ipan altepetl Galilea, ipan xiuitl 32 y.u.J., uan kiijtok kema nojua poliuiyaya se xiuitl para kichiuas toTeko iTlakualis. Ome, ¿ajkia inijuantij kiniljuik? Nopa maseualmej tlen Galilea, uan inijuantij más kipatiitayayaj tlakuasej uan amo kinekiyayaj kuali tlaneltokasej (Juan 6:26). Yeka, kema Jesús kiniljuik se tlamantli tlen amo kikuamachilijkej, ayokmo kineltokakej uan se keskij itokilijkauaj nojkia kitlauelkajkej (Juan 6:14, 36, 42, 60, 64, 66). Pero ni tlamantli amo eli sanse ika tlen panok ipan xiuitl 33, kema Jesús kichijki toTeko iTlakualis. Ipan nopa tonali, nopa 11 apóstoles itstoyaj iuaya Jesús maske amo kikuamachiliyayaj nochi tlen kinmachtiyaya. Apóstoles amo eliyayaj sanse kej katli itstoyaj Galilea pampa inijuantij kena motemachiyayaj Jesús eliyaya iKone Dios tlen kititlantoya (Mat. 16:16). Yeka, kiniljuik kuali tlen kichiuayayaj: “Inmojuantij inelij katli nochipa initstokej nouaya kema nikixnamiktok tlaouijkayotl” (Luc. 22:28). Ni ome tlamantli tlen tikitstokej techpaleuia ma tijkuamachilikaj tlen kiijtoua Juan 6:53 amo kiixnextia tlen moneki tijchiuasej kema moilnamiki toTeko iTlakualis. Pero nojua onka sekinok tlamantli tlen techpaleuis.
Ipan Juan capítulo 6, kiijtoua tlen Jesús kiniljuik miakej judíos ipan Galilea (momaopoch). Kema ya panotoya se xiuitl, Jesús kinkamanaljuik iapóstoles ipan Jerusalén (momanejmak). (Xikita párrafo 8).
¿TLAKE MITSMACHTIA TLEN JESÚS KIIJTOK?
9. ¿Ajkia inijuantij kinkamanaljuiyaya Jesús kema kichijki toTeko iTlakualis?
9 Kema Jesús kichijki toTeko iTlakualis, kinmakak iapóstoles pantsi tlen amo kipia levadura uan kiniljuik kiixnextiyaya itlakayo. Teipa, kinmakak se copa ika vino uan kiniljuik kiixnextiyaya “estli tlen ika mochiuas se tlajtolsenkauali” (Mar. 14:22-25; Luc. 22:20; 1 Cor. 11:24). Ni yankuik tlajtolsenkaualistli Jehová kichijki ininuaya katli itstoyaj ipan altepetl Israel uan amo ika nochi maseualmej, san kintlapejpeniskiaj se keskij katli tlanauatisej iuaya Cristo ipan toTeotsij iTlanauatijkayo (Heb. 8:6, 10; 9:15). Ipan nopa tonali, apóstoles amo kikuamachilijkej nochi tlen Jesús kiniljuik. Pero toTeotsij nechka kintlapejpeniskia para ma yakaj iluikak uan kalakiskiaj ipan nopa yankuik tlajtolsenkaualistli para tlanauatisej iuaya Jesús (Juan 14:2, 3).
10. ¿Tlake seyok tlamantli kinextia amo eli sanse tlen Jesús kiijtok ipan Galilea uan kema kichijki toTeko iTlakualis? (Nojkia xikita tlaixkopinkayotl).
10 Tlen kiijtok Jesús kema kichijki toTeko iTlakualis mosentlalik san ipan se keskij. Uan achtoui kintlapejpenijkej apóstoles katli ininuaya tlakuajki kema nechka kimiktiskiaj (Luc. 12:32). Inijuantij uan sekinok katli kintlapejpeniskiaj, monekiyaya kikuasej nopa pantsi uan kiisej nopa vino. Yeka, tlanauatisej iuaya Jesús. Tlen kiniljuik iapóstoles amo eli sanse ika tlen kiijtok ipan Galilea, pampa nopaya itstoyaj tlauel miakej maseualmej. Yeka, tlen kiijtok kinpaleuiskia tlauel miakej.
Katli kikuaj pantsi kema moilnamiki Cristo imikilis, elij san se keskij, pero nochi katli tlaneltokaj ipan Jesús, uelis kiselisej nopa nemilistli tlen amo kema tlamis. (Xikita párrafo 10).
11. ¿Kenke nopa tlateochiualistli tlen Jesús kiijtok ipan Galilea amo kiseliskiaj san se keskij maseualmej?
11 Ipan xiuitl 32, kema Jesús itstoya ipan Galilea kinkamanaljuijtoya miakej judíos katli kinekiyayaj ma kintlamaka. Pero ya kiniljuik onkayaya seyok tlamantli tlen kinpaleuiskia ma kipiakaj nemilistli para nochipa. Nojkia kiniljuik katli mikiskiaj sampa moyolkuiskiaj uan ueliskiaj itstosej nochipa. Ya amo kiniljuik sanse keskij maseualmej kiseliskiaj nopa tlateochiualistli kej kema kichijki toTeko iTlakualis, ya kiijtok nochi ueliskiaj kiselisej. Jesús kiijtok: “Tlaj se akajya kikua ni tlakualistli, itstos nochipa. Nonakayo eli nopa tlakualistli tlen nitemaktilis para ma kipiakaj nemilistli katli itstokej ipan Tlaltipaktli” (Juan 6:51). c
12. ¿Tlake moneki tijchiuasej para tijselisej nopa nemilistli tlen amo kema tlamis tlen Jesús kiijtok ipan Galilea?
12 Ipan Galilea, Jesús kiniljuik judíos amo nochi maseualmej kiseliskiaj nopa tlateochiualistli. San kiselisej katli kikuasej nopa pantsi, ni kiijtosneki katli tlaneltokasej ipan Jesús. Ipan ni tonali, miakej maseualmej kiijtouaj uelis momanauisej tlaj “tlaneltokaj” ipan Jesús uan kiitaj kej inintlamanauijka (Juan 6:29). Uan kiampa panok ipan Galilea, miakej tlaneltokayayaj Jesús, pero teipa kitlauelkajkej. ¿Kenke kiampa kichijkej?
13. ¿Tlake monekiyaya kichiuasej maseualmej tlaj nelnelia kinekiyayaj elisej Cristo itokilijkauaj?
13 Miakej maseualmej katli Jesús kintlamakak, kitokiliyayaj san pampa kinmakayaya tlen kinpolouayaya. Kinekiyayaj ma kinchikaua, ma kintlamaka uan kinpaktiyaya ma kinmachti tlen inijuantij kinekiyayaj kikakisej. Pero Jesús kinnextilik tlaj nelia kinekiyayaj kitokilisej, monekiyaya kichiuasej seyok tlamantli. Ya amo ualajtoya san para kintlamakas uan kinchikauas maseualmej. Inijuantij monekiyaya kinechkauisej Jesús, kineltokasej uan kichiuasej tlen tlamachtiyaya (Juan 5:40; 6:44).
14. ¿Tlake moneki tijchiuasej tlaj tijnekij ma techpaleui tlen Jesús kichijki?
14 Jesús kiijtok ika inakayo uan ieso kinpaleuiskia maseualmej ma itstokaj nochipa. Judíos monekiyaya kineltokasej nopa tlamantli, uan tojuantij nojkia kiampa moneki tijchiuasej (Juan 6:40). Yeka, tlaj tijnekij ma techpaleui tlen Jesús kiijtok ipan Juan 6:53, moneki tijneltokasej ya techmakixtik. Uan nojkia miakej maseualmej uelis kiselisej ni tlateochiualistli (Efes. 1:7).
15, 16. ¿Tlake techmachtia tlen kiijtoua Juan capítulo 6?
15 Tlen kiijtoua Juan capítulo 6, tlauel techpaleuia uan techyolchikaua pampa kinextia Jesús tlauel kiniknelia maseualmej. Ipan Galilea kinchikajki maseualmej, kinkamanaljuik tlen toTeotsij iTlanauatijkayo uan kintlamakak katli mayanayayaj (Luc. 9:11; Juan 6:2, 11, 12). Uan nojkia kinmachtik ya eli “nopa tlakualistli tlen temaka nemilistli” (Juan 6:35, 48).
16 Nopa maseualmej katli Jesús kintokaxtik “sekinok pilborregojtsitsij”, amo kinamiki kikuasej nopa pantsi yon kiisej nopa vino kema moilnamiki toTeko iTlakualis (Juan 10:16). Pero nojkia kiselisej tlateochiualistli tlaj kineltokaj Jesús techmakixtik ika imikilis (Juan 6:53). Uan katli kena kikuaj nopa pantsi uan kiij nopa vino, kinextiaj inijuantij nojkia kiseliaj nopa yankuik tlajtolsenkaualistli uan tlanauatisej iuaya Jesús ipan iTlanauatijkayo Dios. Yeka, maske sekij yasej iluikak o itstosej ipan Tlaltipaktli, tlen kiijtoua Juan capítulo 6 eli tlauel ipati pampa techiljuia moneki kuali titlaneltokasej para tijpiasej nopa nemilistli tlen amo kema tlamis.
UIKATL 150 Jehová mitsmakixtis
a Ipan tlamachtili 48 moixtoma tlen kiijtoua Juan 6:5-35.
b Nopa atl tlen Jesús kiijtok, kiixnextia nochi tlen Jehová kichijtok pampa kineki nochi maseualmej ma kipiakaj nopa nemilistli tlen amo kema tlamis.
c Ipan Juan capítulo 6 kiijtoua nochi maseualmej uelis kiselisej nopa nemilistli tlen amo kema tlamis, kiampa tikijtouaj pampa motekiuia nopa tlajtoli “katli” uan “nochi katli” (Juan 6:35, 40, 47, 54, 56-58).
