TLAMACHTILI 48
UIKATL 97 ToTeotsij iTlajtol techmaka nemilistli
¿Tlake techmachtia kema Jesús kimiakilik pantsi uan michimej?
“Na nieli nopa tlakualistli tlen temaka nemilistli. Katli ualas kampa na ayokmo kema sampa mayanas” (JUAN 6:35).
TLEN MOIXTOMAS
¿Tlake techmachtia Juan capítulo 6 kampa kiijtoua Jesús kimiakilik pantsi uan michimej para kintlamakas miakej maseualmej?
1. ¿Kenke tlauel kipatiitayayaj pantsi uejkajkia?
UEJKAJKIA maseualmej tlauel kipatiitayayaj pantsi (Gén. 14:18; Luc. 4:4). Ipan Biblia kemantika motekiuiyaya nopa tlajtoli pantsi kema kamanaltiyaya tlen tlakualistli (Mat. 6:11). Nojkia, Jesús kichijki ome milagros ika pantsi (Mat. 16:9, 10). Ma tikitakaj nopa achtoui milagro ipan Juan capítulo 6, uan kenijkatsa uelis techpaleuis ipan ni tonali.
2. ¿Kema monejki kintlamakasej miakej maseualmej?
2 Se tonali apóstoles ya tlantoyaj tlajtolmoyauaj, yeka Jesús kiixkotonki nopa mar tlen Galilea ininuaya uan kinuikak nechka altepetl Betsaida pampa kinekiyaya ma mosiajketsakaj (Mar. 6:7, 30-32; Luc. 9:10). Pero miakej maseualmej nima monechikokej kampa itstoya Jesús. Kema kinitak, pejki kinkamanaljuia tlen toTeotsij iTlanauatijkayo ika miak tlaiknelili uan kinchikajki katli mokokouayayaj. Kema apóstoles kiitakej ya tiotlakixtoya, kinekiyayaj kimatisej tlake kichiuaskiaj nopa maseualmej para tlakuasej. Maske se keskij uelis kiuikayayaj tlen kikuaskiaj, miakej monekiskia kikouatij ipan sekinok pilaltepetsitsij (Mat. 14:15; Juan 6:4, 5). ¿Tlake kichiuaskia Jesús?
IKA SE MILAGRO KINMAKAK PANTSI
3. ¿Tlake kiniljuik Jesús ma kichiuakaj iapóstoles? (Nojkia xikita tlaixkopinkayotl ).
3 Jesús kiniljuik iapóstoles: “Amo moneki ma yakaj. Inmojuantij xikintlamakakaj” (Mat. 14:16). Ni tlauel ouij eliskia pampa nopaya itstoyaj se 5 mil tlakamej uan tlaj nojkia kinpouaskiaj siuamej uan konemej, uelis eliyayaj se 15 mil maseualmej (Mat. 14:21). Andrés kiijtok: “Nikaj itstok se pilokichpiltsi katli kipia makuili pantsi tlen kichijchijtokej ika cebada uan omej pilmichtsitsij. Pero, ¿timoiljuia kinaxilis ni miakej maseualmej?” (Juan 6:9). Nopa pantsi tlen kichijchijtoyaj ika cebada amo eliyaya patiyo, yeka miakej kiixmatiyayaj uan uelis nopa michimej kinuatstoyaj ika istatl. Pero nopa amo kinaxiliskia para kintlamakasej nochi nopa maseualmej.
Jesús kinmachtik uan kinmakak tlen kinpolouayaya maseualmej. (Xikita párrafo 3).
4. ¿Tlake techmachtia Juan 6:11-13? (Nojkia xikita tlaixkopinkayomej).
4 Jesús kinekiyaya kuali kinselis nopa maseualmej, yeka kiniljuik ma moseuikaj tlalchi ika pamitl (Mar. 6:39, 40; xijpoua Juan 6:11-13). Biblia kiijtoua Jesús kitlaskamatilik iTata pampa kimakatoya pantsi uan nopa michimej. Tlauel kuali tlen kichijki pampa Jehová kinmakak nopa tlakualistli. Ni tlamantli techilnamikilia moneki tijchiuasej kej Jesús uan timomaijtosej kema titlakuasej, maske tiitstosej toselti o ininuaya sekinok. Teipa, Jesús kiniljuik iapóstoles ma kinmajmakakaj maseualmej nopa tlakualistli uan nochi tlakuajkej uan kuali ixuikej. Pero mokajki tlakualistli, yeka Jesús kiijtok ma kinechikokaj, uelis pampa teipa kikuaskiaj. Ika tlen kichijki Jesús, technextilik kenijkatsa moneki tijtekiuisej tlen tijpiaj. Tetajmej uelis momachtisej ni tlapoualistli ininuaya ininkoneuaj para kinmachtisej kenijkatsa moneki momaijtosej, kinselisej sekinok ipan ininchaj uan temakasej tlen kipiaj.
Ximotlatsintoki: “¿Nijchiua kej Jesús uan nimomaijtoua kema peuas nitlakuas?”. (Xikita párrafo 4).
5. ¿Tlake kichijkej maseualmej kema kiitakej nopa milagros tlen Jesús kichijki, uan ya tlake kichijki?
5 Maseualmej tlauel mosentlachilijkej kema kiitakej kenijkatsa Jesús tlamachtiyaya uan kichiuayaya milagros. Kimatiyayaj Moisés kiijtojtoya ualaskia se teokamanalojketl katli tlauel pankisaskia, uan uelis kinekiyayaj kimatisej tlaj Jesús eliyaya nopa tlakatl (Deut. 18:15-18). Uelis moiljuiyayaj ya kuali tlanauatiskia uan kitlamiltiskia mayantli, yeka kinekiyayaj kiuikasej “uan kichiualtisej ma eli tlanauatijketl” (Juan 6:14, 15). Tlaj Jesús kikajtoskia ma kitekitlalikaj, mokalakijtoskia ipan política. Pero amo kiampa kichijki pampa Biblia kiijtoua kintlalkauik uan yajki iselti ipan se tepetl. Maske sekij kitetsopkej, amo mokalakik ipan política. Tlen kichijki techmachtia se tlamantli tlen tlauel ipati.
6. ¿Kenijkatsa uelis tijchiuasej kej Jesús? (Nojkia xikita tlaixkopinkayotl).
6 Maske uelis tojuantij amo techtekitlalisej yon techiljuisej ma tijchiuakaj milagros kej Jesús, uelis maseualmej kena techtetsopasej para ma tijtlapejpenikaj se tekichijketl o ma tijpaleuikaj katli moiljuiaj uelis kinpaleuis. Pero, Jesús technextilik tlake uelis tijchiuasej. Ya amo mokalakik ipan política uan teipa kiijtok: “Na amo nieli kej katli itstokej ipan Tlaltipaktli” (Juan 17:14; 18:36). Tlauel techpaleuis tlaj nojkia tijchiuaj kej Jesús. Tojuantij san tijpaleuiaj toTeotsij iTlanauatijkayo, tikinmatiltiaj sekinok tlen kichiuas uan timomaijtouaj pampa tijnekij nima ma asi (Mat. 6:10). Ma tikitakaj tlake sekinok tlamantli uelis tijyekosej ika tlen Jesús kichijki kema kimiakilik pantsi.
Jesús amo mokalakik ipan política, uan tojuantij nojkia moneki tijchiuasej kej ya. (Xikita párrafo 6).
TLEN KIIJTOSNEKIYAYA KEMA JESÚS KIMIAKILIK PANTSI
7. ¿Tlake seyok milagro kichijki Jesús, uan tlake kiijtojkej iapóstoles? (Juan 6:16-20).
7 Kema ya kintlamakatoya miakej maseualmej, Jesús kiniljuik itokilijkauaj ma yakaj Capernaúm ipan se barco uan ya yajki ipan se tepetl pampa amo kinekiyaya ma kitekitlalikaj kej tlanauatijketl (xijpoua Juan 6:16-20). Kema yauiyayaj ipan barco, pejki tlauel tlaajaka uan nopa atl pejki chikauak mokojkoxonia. Uajka Jesús nejnentiajki aixko kampa inijuantij itstoyaj uan kiiljuik Pedro nojkia kiampa ma kichiua (Mat. 14:22-31). Kema Jesús tlejkok ipan nopa barco, nopa ajakatl moketski. Apóstoles tlauel mosentlachilijkej, yeka kiijtojkej: “Ta nelia tiiKone Dios” (Mat. 14:33). a Maske Jesús kiitakej nejnentiajki aixko uan kimiakilik pantsi, inijuantij amo kikuamachilijtoyaj kenke kichiuayaya nopa tlamantli. Marcos nojkia kiijtoua apóstoles tlauel mosentlachilijkej pampa “ayamo kikuamachilijtoyaj tlake kiijtosnekiyaya kema kimiakilik pantsi, uan nojua yoltetixtoyaj” (Mar. 6:50-52). Ayamo kikuamachilijtoyaj Jehová kimakatoya Jesús miak chikaualistli para kichiuas milagros. Teipa Jesús sampa kamanaltik tlen nopa tonali kema kimiakilik pantsi pampa kinekiyaya techmachtis seyok tlamantli.
8, 9. ¿Kenke miakej maseualmej yajkej kitemotoj Jesús? (Juan 6:26, 27).
8 Nopa maseualmej katli Jesús kintlamakak kinextijkej san kinekiyayaj tlakuasej. Yeka, ualmostla kema kiitakej Jesús uan iapóstoles yajtoyaj sejkanok, tlejkokej ipan se keski barcos tlen ualayayaj Tiberíades uan yajkej Capernaúm para kitemotij Jesús (Juan 6:22-24). Pero inijuantij amo yajkej pampa kinekiyayaj ma kinmachti tlen toTeotsij iTlanauatijkayo, inijuantij san kinekiyayaj ma kintlamaka. ¿Kenke kiampa tikijtouaj?
9 Ma tikitakaj tlake panok kema nopa maseualmej kipantijkej Jesús nechka Capernaúm. Jesús kiniljuik inijuantij kitemouayayaj pampa kinekiyayaj ma kintlamaka. Kiniljuik kikuajtoyaj pantsi hasta ixuikej ika nopa “tlakualistli tlen nempoliui”. Uan kiniljuik más kinpaleuiskia tlaj kikuaskiaj “nopa tlakualistli tlen uejkaua uan temaka nemilistli tlen amo kema tlamis” (xijpoua Juan 6:26, 27). Nojkia kiniljuik Jehová kinmakaskia nopa tlakualistli. Kema inijuantij kikajkej se tlakualistli ueliskia kinmakas nemilistli tlen amo kema tlamis, uelis tlauel mosentlachilijkej. Pero, ¿tlake eliyaya nopa tlakualistli uan kenijkatsa ueliskia kipiasej?
10. ¿Tlake monekiyaya kichiuasej maseualmej uan kiampa ueliskia itstosej nochipa?
10 Uelis nopa judíos moiljuiyayaj monekiyaya kichiuasej se keski tlamantli para kiselisej nopa tlakualistli. Uan uelis inijuantij moiljuiyayaj monekiyaya kichiuasej tlen Moisés kinnauatik. Pero Jesús kiniljuik: “Ya ni tlen Dios kineki: xijneltokakaj katli ya kititlanki” (Juan 6:28, 29). Tlaj kinekiyayaj itstosej nochipa, monekiyaya motemachisej ipan Jesús. Ya ipa kiniljuijtoya nopa tlamantli (Juan 3:16-18, 36). Uan teipa sampa kiijtoskia tlake moneki tijchiuasej para tiitstosej nochipa (Juan 17:3).
11. ¿Kenijkatsa judíos kinextijkej nojua moiljuijtoyaj ipan tlakualistli? (Salmo 78:24, 25).
11 Nopa judíos amo kineltokakej monekiyaya motemachisej ipan Jesús. Yeka, kitlatsintokijkej: “¿Uan tlake milagro tijchiuas para tikitasej uan timitsneltokasej?” (Juan 6:30). Uajka kiiljuijkej kema Moisés itstoya, Jehová kinmakak nopa maná tlen eliyaya kej pantsi (Neh. 9:15; xijpoua Salmo 78:24, 25). Inijuantij nojua kinekiyayaj ma kintlamaka. Uan kema Jesús kamanaltik tlen nopa pantsi tlen temaka nemilistli, amo kiiljuijkej ma kinixtomili tlake kiijtosnekiyaya (Juan 6:32). Inijuantij san moiljuiyayaj ipan tlakualistli, yeka amo kikuamachilijkej tlen Jesús kinekiyaya kinmachtis. ¿Tlake techmachtia ni tlapoualistli?
TLEN MONEKI MÁS TIJPATIITASEJ
12. ¿Kenijkatsa kinextik Jesús tlake moneki más tijpatiitasej?
12 Juan capítulo 6 techmachtia se tlamantli tlen tlauel ipati: moneki timosentlalisej kuali titlaneltokasej. Uan Jesús kiampa kinextik ika tlen kichijki kema Satanás kinekiyaya ma tlajtlakolchiua (Mat. 4:3, 4). Uan kema tlamachtik ipan Sermón del Monte nojkia kiijtok moneki tijkauilisej Dios ma techyakana (Mat. 5:3). Yeka, ma timotlajtlanikaj: Ika tlen nijchiua, “¿nijnextia más nijpatiita nimouampojchiuas iuaya Jehová uan amo sekinok tlamantli?”.
13. 1) ¿Kenke amo kenijki tlaj techpaktia tlakualistli? 2) ¿Tlake tlamantli moneki tikilnamikisej? (1 Corintios 10:6, 7, 11).
13 Amo kenijki tlaj tijtlajtlanisej toTeotsij tlen techpoloua uan teipa tiyolpakisej ika tlen techmaka (Luc. 11:3). Biblia kiijtoua tekitl techpaleuia ma tijpiakaj tlen tijkuasej uan tlen tikisej, nopa kichiua ma tiyolpakikaj pampa nopa “pakilistli uala tlen Toteko” (Ecl. 2:24; 8:15; Sant. 1:17). Maske moneki titekitisej, moneki amo tijnekisej tijpiasej miak tlamantli. Apóstol Pablo ya nopa kinilnamikilik Cristo itokilijkauaj katli itstoyaj kema nechka kitsontlamiltiskiaj altepetl Jerusalén. Kiniljuik tlen kinpanotoya israeleuanij ipan tepetl Sinaí. Nojkia kiniljuik amo ma kinekikaj kichiuasej “tlamantli tlen amo kuali” sanse kej kichijtoyaj israeleuanij (xijpoua 1 Corintios 10:6, 7, 11). Maske Jehová kinmakayaya tlakualistli, inijuantij amo kipatiitakej uan kiitakej kej se tlamantli tlen amo kuali (Núm. 11:4-6, 31-34). Uan nojkia kiampa kichijkej kema pejkej kiueyichiuaj nopa becerro tlen kichijchijtoyaj ika oro (Éx. 32:4-6). Pablo kiniljuik nopa tlamantli pampa kinekiyaya Cristo itokilijkauaj ma mosentlalikaj kuali kitekipanosej Jehová pampa nechka kitsontlamiltiskia Jerusalén, ipan xiuitl 70 y.u.J. Tojuantij nojkia tiitstokej ipan itlamia tonali, yeka moneki tijchiuasej tlen Pablo kiijtok.
14. ¿Kenijkatsa elis tlakualistli ipan yankuik Tlaltipaktli?
14 Kema Jesús tlamachtik kenijkatsa moneki timomaijtosej, kiijtok ma tijtlajtlanikaj toTeotsij tlen tijkuasej, uan nojkia kiijtok tlake panoskia kema mochiuaskia ipakilis Dios “ipan Tlaltipaktli kej mochiua ipan iluikak” (Mat. 6:9-11). ¿Kenijkatsa timoiljuia elis kema mochiuas nopa tlamantli? Biblia kiijtoua toTeotsij kineki ma onka miak tlakualistli ipan Tlaltipaktli. Ipan Isaías 25:6-8 kiijtoua toTeotsij iTlanauatijkayo kichiuas ma onka tlauel miak tlakualistli tlen tlauel kuali. Uan ipan Salmo 72:16 kiijtoua “onkas miak trigo ipan nochi nopa tlali, uan hasta nopa kuatinij tlen onka ipan tepetinij ma temakasej inintlajka”. Ximoiljui, uelis tijchiuas nopa tlakualistli tlen más mitspaktia o tijchiuas seyok tlamantli tlen amo kema tijchijtoya, uan ¡tlauel tiyolpakis kema tijkuas tlen tijtojki! (Is. 65:21, 22). Uan ipan Tlaltipaktli nochi yolpakisej ika nopa tlamantli.
15. ¿Tlake monekis kiyekosej katli moyolkuisej? (Juan 6:35).
15 (Xijpoua Juan 6:35). ¿Tlake kinpanos katli kikuajkej nopa pantsi uan nopa michimej tlen Jesús kimiakilik? Maske miakej tlen inijuantij amo tlaneltokakej ipan Jesús, uelis moyolkuisej uan tikinixmatisej (Juan 5:28, 29). Monekis kiyekosej tlake kinekiyaya kiijtos Jesús kema kiijtok: “Na nieli nopa tlakualistli tlen temaka nemilistli. Katli ualas kampa na ayokmo kema sampa mayanas”. Monekis kineltokasej Jesús techmakixtik ika inemilis. Ipan nopa tonali, katli moyolkuisej uan katli tlakatisej uelis kiixmatisej Jehová uan tlen mosentlalijtok kichiuas. Tlauel tiyolpakisej pampa tijpiasej tlakualistli, pero más tiyolpakisej kema tikinpaleuisej sekinok.
16. ¿Tlake tikitasej ipan tlamachtili 49?
16 Ipan ni tlamachtili tikitakej san se keski tlamantli tlen kiijtoua Juan capítulo 6. Pero Jesús nojkia kinekiyaya kiijtos sekinok tlamantli tlen nopa nemilistli tlen amo kema tlamis. Judíos tlauel kinekiyayaj kimatisej nopa tlamantli uan tojuantij nojkia. Ipan tlamachtili 49 tikitasej sekinok tlamantli tlen Juan capítulo 6.
UIKATL 20 Jehová titechmakak moKone
a Tlaj tijneki tijmatis sekinok tlamantli tlen ni tlapoualistli, xikita nopa amochtli Jesús: el camino, la verdad y la vida, iamayo 131, uan Ejemplos de fe, iamayo 185.
