Apóstol Pablo kitlajkuiljuilik Timoteo, katli nojkia eliyaya ueuejtlakatl, ya kiiljuik: “Nimitsnauatia ininixpa Dios, Cristo Jesús uan ángeles tlen kintlapejpenijtokej, xijtokili ni tlanauatili uan amo xitechikoita yon xijtlapejpeni se tlenijki kema ayamo kuali tijtlachilia ni tlamantli” (1 Tim. 5:21). ¿Ajkia elij nopa “ángeles tlen kintlapejpenijtokej”?

Achtoui ma tikitakaj tlake amo kiijtosneki. Pablo amo kinekiyaya kiijtos eliyayaj nopa 144 mil, pampa kema kitlajkuiljuilik Timoteo tlapejpenilmej ayamo moyolkuiyayaj ipan iluikak. Apóstoles uan nopa sekinok katli nojkia kintlapejpenijtoyaj ayamo itstoyaj iluikak. Yeka, inijuantij amo eliyayaj nopa “ángeles tlen kintlapejpenijtokej” (1 Cor. 15:50-54; 1 Tes. 4:13-17; 1 Juan 3:2).

Nojkia amo elij nopa ángeles katli tlaijixnamijkej kema tlauel uetski atl, pampa inijuantij kipaleuijkej Satanás, mochijkej amo kuali ajakamej uan elkej Jesús ikualankaitakauaj (Gén. 6:2; Luc. 8:30, 31; 2 Ped. 2:4). Uan nechka Jesús kinmajkauas ipan se ostotl tlen tlauel uejkatla, nopaya kinkauas mil xiuitl uan teipa kintsontlamiltis (Jud. 6; Apoc. 20:1-3, 10).

Ipan 1 Timoteo 5:21, Pablo kiijtoua nopa “ángeles tlen kintlapejpenijtokej” kipaleuiaj Dios uan Jesús ipan iluikak.

Itstokej miakej ángeles katli amo kitlauelkauaj Jehová (Heb. 12:22, 23). Ya amo kinmaka sanse tekitl nochi ángeles (Apoc. 14:17, 18). Ma tikilnamikikaj kema kiiljuik se ángel ma kintsontlamilti 185 mil soldados tlen Asiria (2 Rey. 19:35). Jesús nojkia kiijtok eliskiaj san se keskij ángeles katli “kikixtisej tlen iTlanauatijkayo nochi tlamantli tlen kichiua ma tlajtlakolchiuakaj uan katli kichiuaj tlen amo kuali” (Mat. 13:39-41). Uelis sekinok ángeles kinsentilisej katli kintlapejpenijtokej yasej iluikak (Mat. 24:31). Uan sekinok ángeles kinnauatiaj ma techmokuitlauikaj kej kiijtoua Salmo 91:11 (Mat. 18:10; nojkia xikita Mateo 4:11 uan Lucas 22:43).

Uajka nopa “ángeles tlen kintlapejpenijtokej” tlen kiijtoua 1 Timoteo 5:21 tlapaleuiyayaj ika se keski tekitl ipan tlanechikoli. Tlen kiijtoua se keski versículos tlen ni capítulo techpaleuia ma tijkuamachilikaj Pablo kiniljuiyaya toikniuaj ma kintlepanitakaj ueuejtlakamej. Pero ueuejtlakamej nojkia monekiyaya kuali kichiuasej ininteki, amo techikoitasej yon kitlapejpenisej se tlenijki kema ayamo kuali kitlachilia nopa tlamantli. ¿Kenke? Pampa Pablo kiijtok se tlamantli tlen tlauel ipati, kiijtok ueuejtlakamej kinpaleuiaj toikniuaj “ininixpa Dios, Cristo Jesús uan ángeles tlen kintlapejpenijtokej”. Nopa kiijtosneki Jehová, Jesús uan nopa “ángeles tlen kintlapejpenijtokej” kiitaj kenijkatsa ueuejtlakamej kinpaleuiaj toikniuaj. Uajka, Jehová kintekimaka se keskij ángeles ma kinpaleuikaj ueuejtlakamej ipan tlanechikoli, ma kinmokuitlauikaj itekipanojkauaj, ma kinpaleuikaj toikniuaj ipan tlajtolmoyaualistli uan ma kiiljuikaj nochi tlen kiitaj (Mat. 18:10; Apoc. 14:6).