¿Kuali timomachtijtok tlen kistok ipan pilamochtsi Tlen Tematiltia? Xikita tlaj uelis tijnankilis ni tlajtlanili:

¿Kenijkatsa Jehová kinita siuamej?

Amo kinchikoita uan kinpatiita sanse kej tlakamej. Kintlakakilia, kinpaleuia kema amo kuali kiyolmatij uan kema kipiaj kuesoli. Nojkia, motemachia kuali kichiuasej nopa tekitl tlen kinmakatok (w24.01, iamayo 15, 16).

¿Kenijkatsa uelis tijchiuasej tlen kiijtoua Efesios 5:7, kampa kiijtoua: “Amo xijchiuakaj tlen inijuantij kichiuaj”?

Apóstol Pablo techiljuik amo ma timouikakaj ininuaya katli amo techpaleuiaj ma tijneltokakaj Jehová iTlanauatiljuaj. Ni nojkia kiijtosneki amo tiitstosej ininuaya yon tikinkamanaljuisej ipan redes sociales (w24.03, iamayo 22, 23).

¿Tlake tlamantli amo kinamiki tijtlakakilisej?

Moneki timomokuitlauisej pampa kemantika touampoyouaj techtitlanilisej ipan tocelular se tlamantli tlen amo melauak o se akajya uelis techtitlanilis ipan correo electrónico. Nojkia, amo kinamiki tikintlakakilisej apóstatas katli kinextiaj kejuak kinekij momachtisej Biblia pero amo nelia (w24.04, iamayo 12).

¿Kenijkatsa Jehová kintlajtolsenkauas tlanauatijketl Salomón, katli mijkej ipan Sodoma uan Gomorra uan katli mijkej kema tlauel uetski atl?

Amo tijmatij tlaj Jehová sampa kinyolkuis, pero kena tijmatij ya tlauel tetlasojtla uan kuali kimati tlake kichiuas (w24.05, iamayo 3, 4).

¿Tlake techmachtia pampa Jehová eli kejuak se “Ueyi tetl”? (Deut. 32:4).

Uelis timomanauisej uan timotemachisej ipan ya pampa nochipa kichiua tlen kitenkaua. Uan amo kipatla tlen kiijtoua, pampa amo kipatla kej eli yon tlen mosentlalijtok kichiuas (w24.06, iamayo 26-28).

¿Tlake techpaleuis ma timomatikaj ipan tlanechikoli kampa tiasitoj?

Timotemachisej Jehová techpaleuis sanse kej kinpaleuik itekipanojkauaj uejkajkia, amo ma timoiljuikaj kampa achtouia tiitstoyaj eliyaya más kuali, ma tijchiuakaj se keski tlamantli ininuaya toikniuaj uan ma tijchiuakaj kampeka tikinpiasej sekinok touampoyouaj (w24.07, iamayo 26-28).

¿Tlake techmachtia nopa eyi tlapoualistli tlen uala ipan Mateo capítulo 25?

Nopa tlapoualistli tlen pilborregojtsitsij uan chivojmej techmachtia moneki amo titetlauelkauasej. Nopa tlapoualistli tlen nopa matlaktli ichpokamej techmachtia moneki timokualchijchijtosej uan kuali titlachixtosej, uan tlen nopa talentos techmachtia moneki chikauak titekitisej (w24.09, iamayo 20-24).

¿Keski iuejkapanka kipiayaya nopa tlamapamitl tlen nopa teokali?

Ipan se keski tlajkuiloli tlen uejkajkia kipantijkej, ipan 2 Crónicas 3:4 kiijtoua eliyaya “120 codos”, nopa kiijtosneki eliyaya 53 metros iuejkapanka. Pero ipan sekinok tlajkuiloli kiijtoua kipiayaya “20 codos” o 9 metros iuejkapanka. Tlen kiijtoua ni sekinok tlajkuiloli más kinamiki ika itilajka nopa tlapepecholi tlen teokali (w24.10, iamayo 31).

¿Tlake kiijtosneki tlapaleuianij “moneki kipiasej san setsi ininsiua”? (1 Tim. 3:12).

Se tlapaleuijketl katli ya mosiuajtijtok san moneki kipias setsi isiua uan amo kikajkayauas. Nojkia amo kinamiki kinextis kinixtoka sekinok siuamej (w24.11, iamayo 19).

¿Kenijkatsa tijmatij Juan 6:53 amo moaxitiskia kema mochiuaskia toTeko iTlakualis?

Ipan Juan 6:53, Jesús kiijtok monekiyaya kejuak kikuasej inakayo uan kiisej ieso. Nopa kiijtok ipan Galilea ipan xiuitl 32 kema mosentilijtoyaj miakej judíos katli ayamo tlaneltokayayaj ipan ya. Pero kema panok se xiuitl, Jesús kichijki toTeko iTlakualis ipan Jerusalén, nopaya kinkamanaljuik katli tlanauatiskiaj iuaya ipan iluikak (w24.12, iamayo 10, 11).