1, 2. 1) ¿Tlake kiijtok Jehová panoskia ipan ni tonali? 2) ¿Tlake tlajtlanili tijnankilisej ipan ni tlamachtili? (Xikita nopa achtoui tlaixkopinkayotl.)

JEHOVÁ kiijtok ipan ni tonali “matlaktli tlakamej tlen kamanaltij miak tlajtoli uan tlen kampa ueli euaj kiitskilisej iyoyo se judío, uan kiiljuisej: ‘Tijnekij tiasej inmouaya, pampa tijkaktokej toTeotsij itstok inmouaya’” (Zac. 8:23, TNM). Nopa “judío” kinixnextia Cristo itokilijkauaj katli kintlapejpenijtokej ika toTeotsij itonal. Inijuantij nojkia kiniljuiaj ‘israelitajmej tlen nelia itlakauaj toTeko’ (Gál. 6:16). Uan nopa “matlaktli tlakamej” kinixnextia katli itstosej nochipa ipan Tlaltipaktli. ¿Kenke kinekij yasej ininuaya katli kintlapejpenijtokej? Pampa kimatij Jehová kinteochiua, uan nojkia pampa tlauel kuali kiyolmatij sentik kiueyichiuasej Jehová.

² Kej tlajtolpanextijketl Zacarías, Jesús kiijtok toTeotsij itekipanojkauaj itstoskiaj sansejko. Katli motemachiaj yasej iluikak kiniljuik ‘axmiakej’ uan katli motemachiaj itstosej ipan Tlaltipaktli kiniljuik “sekinok tlakamej”. Jesús kiijtok: “Nochi noaxkauaj itstosej sansejko uan nochi san na nikinmokuitlauijtos” (Luc. 12:32; Juan 10:16). Pampa amo nochi tiasej iluikak, uelis timotlajtlaniaj: ¿Moneki tijmatisej kenijkatsa inintoka katli kintlapejpenijtokej? ¿Kenijkatsa kinamiki monejnemiltisej katli kintlapejpenijtokej?  Tlaj se toikni katli monechikoua touaya kikuaskia pantsi uan kiijiskia vino kema moilnamiki Cristo imikilis, ¿kenijkatsa kinamiki tikitasej? ¿Kinamiki timotekipachosej tlaj momiakiliaj katli kikuaj pantsi uan kiijij vino kema moilnamiki Cristo imikilis? Ipan ni tlamachtili tijnankilisej ni tlajtlanili.

3. ¿Kenke amo tijmatij ajkia nelia yasej iluikak uan elisej tlen nopa 144,000?

³ ¿Moneki tijmatisej kenijkatsa inintoka katli kintlapejpenijtokej tlen nojua itstokej ipan Tlaltipaktli? Amo. ¿Kenke? Pampa amo tijmatij tlaj nelia yasej iluikak ^[1] (xikita nopa nota kampa tlami ni tlamachtili). Maske toTeotsij kintlapejpenijtok, inijuantij uelis yasej iluikak tlaj amo kema kitlauelkauasej. Satanás kimajtok nopa, uan yeka kineki kinkuapolos ika “miak tlakajkayauanij” (Mat. 24:24). Katli kintlapejpenijtokej uelis kimatisej tlaj nelia yasej iluikak kema Jehová kejuak kintlalilis nopa sello, uan nopa uelis kichiuas kema nechka mikisej o kema nechka peuas nopa “ueyi tlaijiyouilistli” (Apoc. [Rev.] 2:10; 7:3, 14).

4. Tlaj katli itstosej ipan Tlaltipaktli amo kimatij inintoka katli kintlapejpenijtokej ipan ni tonali, ¿kenijkatsa uelis kiniljuisej “tiasej inmouaya”?

⁴ Tlaj katli itstosej ipan Tlaltipaktli amo kimatij inintoka katli kintlapejpenijtokej ipan ni tonali, ¿kenijkatsa uelis kiniljuisej “tiasej inmouaya”? Biblia kiijtoua “matlaktli tlakamej” “kiitskilisej iyoyo se judío, uan kiiljuisej: ‘Tijnekij tiasej inmouaya, pampa tijkaktokej toTeotsij itstok inmouaya’”. Maske ipan ni versículo kamanalti tlen se “judío”, kema kiijtoua “inmojuantij” kinextia kamanaltitok tlen miakej maseualmej. Uajka nopa “judío” amo san setsi maseuali kiixnextia, kinixnextia nochi katli kintlapejpenijtokej. Katli amo kintlapejpenijtokej kimajtokej ni, yeka kitekipanouaj Jehová ininuaya nopa toikniuaj. Amo moneki kimatisej kenijkatsa inintoka uan kintokilisej, pampa Biblia kiijtoua Jesús yaya techyakana uan san ya kinamiki tijtokilisej (Mat. 23:10).

5. ¿Tlake moneki kineltokasej katli kintlapejpenijtokej, uan kenke tlauel moneki?

⁵ Katli kintlapejpenijtokej moneki kineltokasej tlen kiijtoua 1 Corintios 11:27-29 (xijpoua). Tlaj se toikni katli kitlapejpenijtokej ayokmo kuali mouika iuaya Jehová uan kiixpano uan nojua kikuaskia pantsi uan kiiskia vino, uajka kinextiskia “axkichiua keja kinamiki” o amo tlatlepanita (Heb. 6:4-6; 10:26-29). Tlen kintlajtolmakaj katli kintlapejpenijtokej tlauel ipati, pampa Jehová, katli ‘kinnotski ipan Jesucristo ma yakaj iluikak’, amo kinselis tlaj kiixpanosej (Filip. 3:13-16).

6. ¿Kenijkatsa kinamiki monejnemiltisej katli kintlapejpenijtokej?

⁶ Apóstol Pablo kiniljuik katli kintlapejpenijtokej: “Niinmechtlajtlania xijpiakaj se inmonemilis tlen nelia kuali keja kinamiki kipiasej tlakamej tlen toTeko kinnotski para elisej iaxkauaj”. ¿Kenijkatsa kichiuaskiaj nopa? Ya kiniljuik: “Ximoiknonekikaj uan ximokamauikaj ika kuali keja tlakamej tlen kuali monauatiaj. Xijpiakaj inmoyolo se ika seyok, uan sejse inmojuantij xikijiyouikaj kema seyok inmoikni kichiua o kiijtoua se tlamantli pampa yajaya aya kuali tlamachilia. Kej nopa inkinextilisej inkiikneliaj. Ika itlapaleuil itonal toTeko, xijchiuakaj kampeka inkipiasej sanse inmotlalnamikilis. Uan kej nopa inkipiasej tlaseuilistli” (Efes. 4:1-3). Jehová itonal kinpaleuia itekipanojkauaj  amo ma moueyimatikaj (Col. 3:12). Yeka katli kintlapejpenijtokej amo moiljuiaj inijuantij tlauel ininpati. Amo moiljuiaj Jehová san inijuantij tlauel kinmaka itonal pampa kintlapejpenijtok uan sekinok amo tlauel kinmaka. Nojkia amo moiljuiaj inijuantij kena tlauel kuali kikuamachiliaj tlen Biblia tlamachtia. Uan amo kiiljuiaj seyok toikni ma kikua pantsi o ma kiiji vino san pampa moiljuiaj kitlapejpenijtokej. Pampa amo moueyimatij, kimatij san Jehová kinamiki kiijtos ajkia kitlapejpenis yas iluikak.

7, 8. ¿Tlake amo kichiuaj katli kintlapejpenijtokej, uan kenke amo kichiuaj nopa?

⁷ Maske kimatij kipiaj se ueyi tlateochiualistli pampa kintlapejpenijtokej yasej iluikak, amo moiljuiaj sekinok toikniuaj moneki kinitasej kejuak tlauel ininpati (Efes. 1:18, 19; xijpoua Filipenses 2:2, 3). Inijuantij kimatij kema Jehová kintlapejpenik, ya amo kinmatiltik nochi toikniuaj. Yeka amo moyolkokouaj tlaj se toikni amo kineltoka tlaj Jehová nojkia kintlapejpenijtok. Kimajtokej Biblia techiljuia amo kinamiki nima tijneltokasej se akajya katli techiljuia Jehová kitekimakatok (Apoc. 2:2). Uan kema kinixmati sekinok, amo kiniljuia yaya nojkia kitlapejpenijtokej yas iluikak. Amo kichiua nopa pampa amo kineki ma kiueyimatikaj, yeka uelis amo aka kiiljuia kitlapejpenijtokej. Nojkia amo kiijtojtinemi tlen kichiuati iluikak (1 Cor. 1:28, 29; xijpoua 1 Corintios 4:6-8).

⁸ Inijuantij amo moiljuiaj san kinamiki itstosej ininuaya sekinok katli nojkia kintlapejpenijtokej, kejuak san inijuantij eliskiaj tlauel ininpati. Nojkia amo kintemouaj sekinok katli kintlapejpenijtokej pampa kinekij kamanaltisej ininuaya o momachtisej Biblia (Gál. 1:15-17). Tlaj kiampa kichiuaskiaj, toikniuaj moxeloskiaj ipan tlanechikoli. Kitsakuiliskiaj toTeotsij itonal uan ayokmo itstoskiaj ika tlaseuilistli uan ayokmo kuali mouikaskiaj (xijpoua Romanos 16:17, 18).

9. ¿Kenke amo kinamiki tijueyimatisej se akajya katli kitlapejpenijtokej? (Xikita nopa recuadro “ ‘Se tlen teiknelia’ tlatlepanita”.)

⁹ Jesús kiniljuik itokilijkauaj: “Inmojuantij sansejko initstokej keja iniknimej”. Uan teipa kiniljuik: “Nochi tlen moueyimatij nama, teipa toTeko kinpinaualtis, pero nochi tlen nama moiknonekij, teipa toTeko kinueyimatis” (Mat. 23:8-12). Uajka amo kinamiki tijueyimatisej se akajya katli kitlapejpenijtokej. Maske Biblia kiijtoua ma tijchiuakaj kej ueuejtlakamej pampa kuali tlaneltokaj, amo kiijtosneki moneki tijtokilisej se maseuali kejuak eliskia totlayakanka (Heb. 13:7). Maske Biblia kiijtoua sekij toikniuaj moneki “achi más ma kintlepanitakaj”, tikintlepanitaj pampa tlauel tlajtolmoyauaj uan tlamachtiaj, amo pampa kintlapejpenijtokej (1 Tim. 5:17). Tlaj tikinueyimatij, uelis amo kuali kiyolmatisej, o nojkia tijchiuasej ma moueyimatikaj (Rom. 12:3). ¡Amo tijnekij tijchiuasej yon se tlamantli tlen kichiuaskia toikniuaj katli kintlapejpenijtokej ma tlajtlakolchiuakaj! (Luc. 17:2.)

10. ¿Kenijkatsa tijnextiaj tikintlepanitaj toikniuaj katli kintlapejpenijtokej?

¹⁰ ¿Kenijkatsa tijnextiaj tikintlepanitaj toikniuaj katli Jehová kintlapejpenijtok yasej iluikak? Tijnextiaj kema amo tikintlajtlaniaj tlake kichijkej uan kiampa kintlapejpenijkej. Nopa san inijuantij kimatij uan tojuantij amo kinamiki tijmatisej (1 Tes. 4:11; 2 Tes. 3:11). Nojkia amo timoiljuiaj tlaj ininsiua o ininueue, inintatauaj o sekinok ininuikaljuaj nojkia kintlapejpenijtokej. Se akajya amo kitlapejpenisej san pampa se tlen ichampoyouaj kitlapejpenijtoyaj (1 Tes. 2:12). Uan nojkia amo tijnekij tikinyolkokosej  san pampa tikintlajtlaniaj tlen amo kinamiki. Amo tijtlajtlaniaj isiua kenijkatsa kiyolmati pampa iueue amo itstos iuaya ipan Xochimili. Timotemachiaj ipan Xochimili Jehová techmakas nochi tlen tijnekij (Sal. 145:16).

11. ¿Kenke amo kinamiki ma ‘tikinueyimatikaj sekinok’?

¹¹ Tlauel techpaleuia kema tikinitaj toikniuaj katli kintlapejpenijtokej sanse kej tikinitaj sekinok toikniuaj. ¿Kenke techpaleuia? Pampa Biblia kiijtoua ipan tlanechikoli itstoskiaj “istlakatinij”, katli kiijtoskiaj nojkia kintlapejpenijtokej (Gál. 2:4, 5; 1 Juan 2:19). Nojkia se keskij katli kintlapejpenijtokej uelis kitlauelkauasej Jehová (Mat. 25:10-12; 2 Ped. 2:20, 21). Biblia kiijtoua amo ma ‘tikinueyimatikaj sekinok’. Ni kiijtosneki amo kinamiki tikintokilisej toikniuaj katli itstokej ipan tlanechikoli maske kintlapejpenijtokej, tlauel kinixmatij o kitekipanojtokej Jehová miak xiuitl. Kiampa tlaj inijuantij kitlauelkauaj Jehová, tojuantij nojua tijtekipanojtosej uan nojua titlaneltokatosej (Jud. 16).

12, 13. ¿Kenke amo kinamiki timotekipachosej tlaj momiakiliaj katli kintlapejpenijtokej?

¹² Ipan miak xiuitl tlen panotok, toikniuaj katli kikuakayayaj pantsi uan kiijiyayaj vino kema moilnamiki Cristo imikilis ayokmo miakej eliyayaj. Uan nama tlauel momiakilijtokej. ¿Moneki timotekipachosej? Amo. Ma tikitakaj kenke.

¹³ “ToTeko [Jehová] kinixmati inijuantij tlen nelia iaxkauaj.” (2 Tim. 2:19.) San Jehová kimati ajkia kintlapejpenijtok, uan kema moilnamiki Cristo imikilis, maske toikniuaj kinpouaj keskij kikuaj pantsi uan kiijij vino, amo kimatij tlaj nelia kintlapejpenijtokej. Uajka amo nochi katli kinpouaj kintlapejpenijtokej. Sekij kikuayayaj pantsi uan kiijiyayaj vino, uan teipa ayokmo. Uan sekinok moiljuiaj yasej iluikak pampa tlauel motekipachouaj o pampa kipiaj se kokolistli ipan inintsonteko. Yeka amo tijmatij keskij toikniuaj katli nelia kintlapejpenijtokej nojua itstokej ipan Tlaltipaktli.

14. ¿Kiijtoua Biblia keskij toikniuaj katli kintlapejpenijtokej itstosej kema peuas ueyi tlaijiyouilistli?

¹⁴ Katli kintlapejpenijtokej itstosej kampa ueli ipan Tlaltipaktli kema Jesús kinuikas iluikak. Ipan Biblia Jesús kiijtok: “Nikintitlanis noiluikaejkauaj ika tlapitsali uan yajuantij kinsentilisej tlen toTeko kintlapejpenijtok tlen kampa ueli ipan Tlaltipaktli uan iluikaktli” (Mat. 24:31). Biblia kiijtoua ipan itlamia tonali itstosej ipan Tlaltipaktli san se keskij toikniuaj katli kintlapejpenijtokej (Apoc. 12:17). Maske kiijtoua nopa, amo kiijtoua keskij itstosej kema peuas ueyi tlaijiyouilistli.

15, 16. ¿Tlake ome tlamantli moneki tijmatisej?

¹⁵ Jehová kimati kema kitlapejpenis se toikni (Rom. 8:28-30). Jehová pejki kintlapejpenia ika itonal kema Jesús  ya moyolkuitoya. Ipan nopa tonali nochi toikniuaj kintlapejpenijtoyaj. Uan kema panok miak xiuitl, miakej katli kiijtojkej eliyayaj Cristo itokilijkauaj amo nelia kitokiliyayaj. Yeka ipan nopa tonali Jehová kintlapejpenik san se keskij katli nelia eliyayaj Cristo itokilijkauaj. Eliyayaj kej nopa trigo katli Jesús kiijtok moskaltiskia ika amo kuali xiuitl (Mat. 13:24-30). Ipan itlamia tonali, Jehová nojua kintlapejpenia katli poliuij tlen nopa 144,000 ^[2] (xikita nopa nota kampa tlami ni tlamachtili). Tlaj Jehová kinekis kintlapejpenis se keskij kema nechka kitsontlamiltis nochi, tijmatij ya kichiua tlen kuali (Is. 45:9; Dan. 4:35; xijpoua Romanos 9:11, 16) ^[3] (xikita nopa nota kampa tlami ni tlamachtili). Amo tijnekij tijchiuasej kej kichijkej nopa tlatekipanouanij katli Jesús kiijtok, inijuantij kiijilnamijkej katli kitekipanouayayaj pampa amo kinpaktik kema sanse kintlaxtlauik maske tekitikej san se hora (xijpoua Mateo 20:8-15).

¹⁶ Katli kintlapejpenijtokej amo nochi elij nopa “tlalnamijkatlatekipanojketl tlen nelia temachtli” (Mat. 24:45-47). Kej kema itstoyaj nopa achtoui Cristo itokilijkauaj, Jehová uan Jesús san kintekimakatokej se keskij toikniuaj katli kinmachtiaj sekinok. Uejkajkia, san se keskij katli kintlapejpenijkej kiijkuilojkej nopa Escrituras Griegas Cristianas. Ipan ni tonali, nojkia san se keskij katli kintlapejpenijtokej ‘kintlamakaj kema asi hora’ o kinmachtiaj toTeotsij itekipanojkauaj.

17. ¿Tlake tijyekojtokej ipan ni tlamachtili?

¹⁷ ¿Tlake tijyekojtokej ipan ni tlamachtili? Jehová kiijtojtok miakej itekipanojkauaj nochipa itstosej ipan Tlaltipaktli uan san se keskij tlanauatisej iuaya Jesús ne iluikak. Jehová kinteochiua nopa “matlaktli tlakamej” uan nopa “judío”, ni kiijtosneki nochi itekipanojkauaj. Uan ya kineki nochi ma kineltokakaj itlanauatiljuaj uan amo kema ma kitlauelkauakaj. Nochi moneki amo moueyimatisej, uan sentik moneki kuali mouikasej uan kitekipanosej Jehová. Nojkia nochi moneki itstosej ika tlaseuilistli ipan tlanechikoli. Monechkauijtiuala nopa tonali kema toTeotsij kitlamiltis nochi, yeka “sansejko” ma tijtekipanokaj Jehová uan ma tijtokilikaj Jesús.