SYLVIANA, se precursora katli kipia 25 xiuitl kiijtoua: “Kema nouampoyouaj kiijtouayayaj tlauel kinpaktiyaya tlajtolmoyauasej kampa monekiyayaj tlajtolmoyauanij, na nojkia nijnekiyaya nijchiuas nopa”. Uan nojkia kiijtok: “Maske nijnekiyaya nias kampa monekij tlajtolmoyauanij, nimoiljuiyaya amo kema niueliskia”.

¿Nojkia timoiljuijtok kej Sylviana? Maske tijneki tias kampa monekij tlajtolmoyauanij, ¿timoiljuia amo tiuelis? Tlaj kiampa timoiljuijtok, amo ximotekipacho uan amo ximoiljui amo uelis tijchiuas tlen tijneki. Jehová kinpaleuijtok miakej toikniuaj ma mosentlalikaj tlauel kitekipanosej maske kinpanotok miak tlaouijkayotl. ¿Kenijkatsa kinpaleuijtok? Tijmatisej tlaj tikitasej tlake panotok ipan se ueyi isla tlen itoka Madagascar.

Ipan matlaktli xiuitl tlen panotok, kipano 70 precursores uan tlajtolmoyauanij katli euaj ipan 11 uejueyi altepemej, * yajtokej ipan Madagascar (África). Nopaya, maseualmej tlauel kipatiitaj Biblia. Ipan nopa isla, onka pilaltepetsitsij katli tlauel uejka mokaua, uan miakej tlajtolmoyauanij katli euaj Madagascar kichijtokej kampeka yasej nopaya uan tlajtolmoyauasej. ¿Tijnekiskia tikinixmatis se keskij?

Louis uan Perrine, kipiaj kipano 30 xiuitl ika mosenkajkej. Inijuantij euaj Francia uan yajkej Madagascar. Maske ipa kinektoyaj yasej tlajtolmoyauatij ipan seyok altepetl, Perrine moiljuiyaya amo ueliskia. Ya kiijtoua: “Nimajmaui nijchiuas tlen amo kema nijchijtok. Amo nijnekiyaya nikinkajteuas tochampoyouaj, totlanechikol, tochaj yon tlen timomajtoyaj tijchiuaj. Achtoui monekiyaya amo nimajmauis”. Ipan xiuitl 2012, Perrine mosentlalik amo majmauis, yeka ya uan iueue yajkej Madagascar. ¿Kenijkatsa itstokej nama? Perrine kiijtoua: “Kema nikilnamiki nochi tlen techpanotok, nikita kuali nitlaneltoka pampa nikitstok kenijkatsa Jehová techpaleuijtok”. Uan iueue kiijtoua: “Ipan  achtoui tlanechikoli kampa tikilnamijkej Cristo imikilis ipan Madagascar, ¡tlauel tiyolpajkej! Matlaktli maseualmej katli tikinmachtiyayaj nojkia mosentilijkej touaya”.

¿Tlake kinpaleuik nojua ma tlatekipanojtokaj maske kiixnamijkej tlaouijkayotl? Kiiljuijkej Jehová ma kinpaleui kiijiyouisej tlen kinpanoyaya (Filip. 4:13). Louis kiijtoua: “Tikitakej kenijkatsa Jehová nelia techpaleuiyaya uan kenijkatsa techpaleuik ma tijpixtokaj tlaseuilistli ipan toyolo” (Filip. 4:6, 7; 2 Cor. 4:7).

Jehová kinteochijki Louis uan Perrine pampa kiijiyouijkej tlen kinpanok. Louis kiijtoua: “Ipan octubre 2014, tiajkej ipan Escuela Bíblica para Matrimonios Cristianos * ipan Francia. Amo kema tikilkauasej nopa tlateochiualistli tlen Jehová techmakak”. Kema tlankej momachtiaj, toikniuaj tlauel yolpakiyayaj pampa sampa kintitlankej Madagascar.

Didier uan isiua Nadine euaj Francia. Inijuantij kipiayayaj kipano 50 xiuitl kema yajkej Madagascar ipan xiuitl 2010. Didier kiijtoua: “Kema tieliyayaj titelpokamej titlatekipanojkej kej precursores, uan teipa tikinpixkej eyij tokoneuaj. Kema moskaltijkej timoiljuijkej kualtiaskia tiasej ipan seyok altepetl”. Nadine kiijtoua: “Maske amo nijnekiyaya nikinkajteuas nokoneuaj, inijuantij techiljuijkej: ‘Tlaj inyasej ipan seyok altepetl, ¡tojuantij tlauel tiyolpakisej!’. Tlen techiljuijkej techyololinik ma tijchiuakaj tlen tijnekiyayaj. Nama, maske uejka tiitstokej, tlauel tiyolpakij pampa ajachika timonojnotsaj ininuaya”.

Didier uan Nadine kimatkej ouij kiyekosej tlajtoli malgache. Nadine kiijtoua ayokmo kipiaj 20 xiuitl, uan yeka kimatij ouij kiyekosej seyok tlajtoli. ¿Tlake kinpaleuik? Achtoui mosentiliyayaj ipan se tlanechikoli kampa motekiuia tlajtoli francés. Teipa, kema kimatkej kena ueliskia kiyekosej seyok tlajtoli, pejkej mosentiliaj ipan se tlanechikoli kampa motekiuia tlajtoli malgache. Nadine kiijtoua: “Tikinpantiaj tlauel miakej maseualmej katli kinpaktia momachtisej Biblia uan techtlaskamatiliaj pampa tikinpaxalouaj. Amo kema kiampa nechpanotoya. Tlauel nechpaktia nielis precursora ipan ni altepetl. Kema nimeua, nimoiljuia: ‘¡Tlauel kuali, nias nitlajtolmoyauati!’”.

Didier kiilnamiki nochi tlen kipanok kema pejki momachtia tlajtoli malgache. Ya kiijtoua: “Se tonali, na nitlamachtiyaya ipan tlanechikoli, uan amo nijkuamachiliyaya tlen toikniuaj kiijtouayayaj. Na san nikiniljuiyaya: ‘¡Tlaskamati!’. Teipa, tlanankilik se tosiuaikni uan na nijtlaskamatilik, uajka katli moseuijtoyaj iika kinekiyayaj nechiljuisej mokuapolok. Nimantsi nikiljuik seyok toikni ma tlanankili, uan nimoiljuia ya kena kuali tlanankilik”.

Ipan se ueyi tlanechikolistli ipan xiuitl 2005, Thierry uan isiua Nadia, kitlachilijkej nopa tlanextilili  Vayamos tras metas que honran a Dios, kampa kamanaltiyaya tlen Timoteo. Tlen kitlachilijkej asik ipan ininyolo uan kinyololinik ma kinekikaj yasej kampa monekij tlajtolmoyauanij. Thierry kiijtoua: “Kema tlanki nopa tlanextilili uan timomatlajtlaxkalouayayaj, nikiljuik nosiua: ‘¿Kanke kualtiaskia tiasej?’. Nosiua nechiljuik ya nojkia moiljuijtoya nopa”. Teipa, kipatlatiajkej se keski tlamantli ipan ininnemilis uan kiampa ueliskiaj tlatekipanotij sejkanok. Nadia kiijtoua: “Yolik tijchijtiajkej kampeka amo tlauel titlapijpiasej. Teipa, nochi tlen tijpixtoyaj kalakiyaya san ipan naui maletas”.

Asitoj Madagascar ipan xiuitl 2006 uan tlauel kinpaktik tlajtolmoyauasej ipan nopa altepetl. Nadia kiijtoua: “Maseualmej katli nikaj euaj kichiuaj tlauel ma tiyolpakikaj”.

Kema panok chikuasej xiuitl, kiixnamijkej se tlaouijkayotl. Inana Nadia, katli itoka Marie-Madeleine, uetski, uan mokuatejtsonki uan nojkia momapostejki. Achtoui Thierry uan Nadia monojnotskej iuaya nopa tepajtijketl, uan teipa kitlajtlanijkej Marie-Madeleine tlaj kinekiskia ininuaya itstoti ipan Madagascar. Maske ya kipixtoya 80 xiuitl, kena kinejki yas ininuaya. ¿Kenijkatsa itstok ipan nopa altepetl? Ya kiijtoua: “Nojua ayamo kuali nimomati, uan maske onka miak tlamantli tlen ayokmo ueli nijchiua, ipan tlanechikoli ueli nikinpaleuia toikniuaj. Uan tlauel niyolpaki pampa noichpoka uan iueue nojua tlajtolmoyajtokej nikaj kampa maseualmej kinekij kiixmatisej Jehová”.

Riana, se telpokatl katli kipia 22 xiuitl, tlakatki ipan Alaotra Mangoro, se pilaltepetsi ipan Madagascar. Ipan escuela kuali momachtiyaya. Maske mosentlalijtoya kipias se kuali tekitl, kema pejki momachtia Biblia, mopatlak itlalnamikilis. Ya kiijtoua: “Nimosentlalik nimantsi nijtlamiltis notlamachtil ipan escuela, uan nikiljuik Jehová: ‘Tlaj kuali nijchiuas noexamen, nimochiuas precursor’”. Kema kiski escuela, Riana kichijki tlen kitenkajtoya. Yajki kampa tlatekipanouayaya se precursor, nopaya kitemok se tekitl kampa san tekitiskia se keski tonali uan mochijki precursor. Ya kiijtoua: “Tlauel kuali tlen nijtlapejpenik nijchiuas”.

Ichampoyouaj Riana amo kikuamachiliyayaj kenke ayokmo kinejki momachtis escuela. Ya kiijtoua: “Maske notata, notío, noaui uan noueyinana kinekiyayaj ma nimomachti ipan universidad, na amo kema nijkauaskia noteki kej precursor”. Teipa, Riana kinejki yas tlajtolmoyauati kampa monekij tlajtolmoyauanij. ¿Kenke kinejki yas? Ya kiijtoua: “Se keskij maseualmej kalajkej nochaj uan nechichtekilijkej miak tlamantli. Nopa kichijki ma nimoiljui tlaj nijpia ‘tlen nelia ipati ipan iluikak’. Yeka nimosentlalik nijchiuas tlen Jehová kipaktia” (Mat. 6:19, 20). Yajki kampa itstokej antandroy tlen mokaua se 1,300 kilómetros tlen ichaj. Nopaya tlauel tlauaktok uan amo miak tlaeli. ¿Kenke tlauel uejka yajki?

Kema ayamo kitlachtekiliyayaj, Riana kinmachtiyaya se keskij maseualmej tlen tribu antandroy. Kiyekok se keski tlajtoli ipan tlajtoli tandroy, uan moiljuik ueliskia kinmachtis tlen Jehová miakej maseualmej katli kamanaltij nopa tlajtoli. Ya kiijtoua: “Nikiljuik Jehová ma nechpaleui uan kiampa ueliskia nias kampa itstokej maseualmej katli kamanaltij tlajtoli tandroy”.

Kema asito ipan nopa altepetl, kiixnamijki se tlaouijkayotl: amo kipantiyaya tekitl. Se tlakatl kiiljuik: “¿Kenke tiualajki nikaj? Maseualmej katli nikaj euaj yauij moaltepe pampa nepa kena onka tekitl”. Ome semanas teipa, Riana yajki ipan ueyi tlanechikolistli tlen eyi tonali. Amo kimatiyaya tlake kichiuas pampa ayokmo kipixtoya tomij. Ipan domingo, se toikni kikalakilik ipan ichamarra se tlamantli. Kimakak tomij. Ika nopa tomij uelki tlakuepilik kampa itstokej antandroy uan pejki kinamaka yogur. Riana kiijtoua: “Nikitak kenijkatsa Jehová nechpaleuik kema tlauel monekiyaya. Nama ueliskia nikinpaleuis maseualmej katli amo kiixmatiyayaj toTeotsij”. Uan nojkia kipixtoya miak tekitl ipan tlanechikoli. Ya kiijtoua: “Ojome semanas nijpanoltiyaya se tlamachtili ipan tlanechikoli. Jehová nechmachtia ika  itlanechikol”. Riana nojua kinmachtia maseualmej katli kamanaltij tandroy uan kinekij kiixmatisej Jehová.

Jehová kinteochiua nochi katli kitlajtlaniaj “se tlateochiualistli” (Is. 65:16). Tlaj tijchiuasej kampeka tikixnamikisej tlen ueli tlaouijkayotl uan nojua tlauel tijtekipanosej Jehová, ya tlauel techteochiuas. Ma timoiljuikaj ipan Sylviana, katli tikijtojkej achtoui. Ya moiljuiyaya amo ueliskia tlatekipanos kampa monekij tlajtolmoyauanij. ¿Kenke moiljuiyaya nopa? Ya kiijtoua: “Nijpia se nomets ueueyak uan ne seyok nomets kototsi. Yeka, amo kuali ninejnemi uan nima nisiaui”.

Maske kiampa itstok, ipan 2014, Sylviana uan seyok tosiuaikni tlen itlanechikol katli itoka Sylvie Ann, yajkej ipan se pilaltepetsi katli mokaua se 85 kilómetros tlen ininchaj. Maske onkayaya se keski tlamantli tlen kitsakuiliyaya, Sylviana kichijki tlen tlauel kinekiyaya, uan Jehová tlauel kiteochijki. Ya kiijtoua: “Kema panok se xiuitl, Doratine, katli nijmachtiyaya ika Biblia, moatsonpoliuiltik ipan se ueyi tlanechikolistli”.

Tlen toikniuaj kinpanotok, techmachtia tlaj tojuantij nojkia tijchiuaj kampeka tlauel tijtekipanosej Jehová maske tijpiaj tlaouijkayotl, ya ‘techfuerzajmakas uan techpaleuis’ (Is. 41:10). Uan nopa kichiuas kuali ma timouampojchijtokaj iuaya Jehová. Tlaj nama ika nochi toyolo tijnekij titlapaleuisej ipan toaltepe o ipan seyok, techpaleuis ma timokualchijchijtokaj kema monekis titlatekipanosej ipan yankuik Tlaltipaktli. Didier, katli tikijtojkej ipan ni tlamachtili, kiijtoua: “Kema titlatekipanouaj kampa monekij tlajtolmoyauanij techpaleuia ma timokualchijchitokaj ika tlen tijchiuasej teipa”. Tlauel tijnekiskiaj sekinok toikniuaj nojkia ma kinekikaj tlapaleuisej uan kej nopa Jehová uelis kinkualchijchiuas.