1, 2. ¿Kenijkatsa kitekiuia Jehová nochi tlen iaxka?

JEHOVÁ temaka nochi tlen kipia, yeka nochi tlen tijpiaj yaya techmakatok. Iaxka nochi tlamantli tlen pajpatiyo tlen onka ipan Tlaltipaktli, kej oro, plata uan sekinok tlamantli, uan ya techmaka nochi tlen moneki (Sal. 104:13-15; Hag. 2:8). Biblia kiijtoua Jehová miakpa kitekiuik tlen iaxka uan kiampa uelki kinpaleuik itekipanojkauaj.

² Kema israeleuanij itstoyaj ipan uaktok tlali, ipan 40 xiuitl, Jehová kinmakak maná uan atl (Éx. 16:35). Biblia kiijtoua “axtleno kinpolok” (Neh. 9:20, 21). Jehová kipaleuik Eliseo ma kichiua se ueyi tlamantli: kichijki amo ma tlami iaceite se siuatl katli ayokmo kipiayaya iueue. Tlen Jehová kichijki, kipaleuik nopa siuatl ma kiixtlaua tlen tlauikayaya uan ma kipia tomij tlen ika mopanoltiskia ininuaya ikoneuaj (2 Rey. 4:1-7). Jehová nojkia kipaleuik Jesús ma kintlamaka maseualmej uan ma temaka tomij kema monekiyaya (Mat. 15:35-38; 17:27).

3. ¿Tlake tikixtomasej ipan ni tlamachtili?

³ Jehová kipia tlauel miak tlamantli tlen ika uelis kinpaleuis katli itstokej ipan nochi Tlaltipaktli. Maske ya iaxka nochi tlen onka,  ya kiniljuia itekipanojkauaj ma temakakaj tlen kipiaj uan kiampa uelis kipaleuisej itlanechikol (Éx. 36:3-7; xijpoua Proverbios 3:9). ¿Kenke Jehová kineki ma tijmakakaj tlen ya techmakatok? ¿Kenijkatsa tlapaleuijkej katli uejkajkia itstoyaj? ¿Kenijkatsa kitekiuia Jehová itlanechikol nochi tomij tlen titemakaj? Ni tlajtlanili tijnankilisej ipan ni tlamachtili.

4. ¿Tlake tijnextiaj kema tijpaleuiaj Jehová itlanechikol ika tlen tijpiaj?

⁴ ¿Kenke tijmakaj Jehová tlen tijpiaj? Pampa tlauel tikikneliaj. Tijmatij ya techmakatok tlauel miak tlamantli uan tlauel techpaleuijtok. Tijyolmatij kej David kema kiniljuik sekinok tlake kitekiuiskiaj ipan nopa teokali tlen teipa mochiuaskia. Ya kiijtok nochi tlamantli iaxka Jehová uan nochi tlen tijmakaj yaya techmakatok (xijpoua 1 Crónicas 29:11-14).

5. ¿Kenijkatsa kinextia Biblia toTeotsij itekipanojkauaj moneki temakasej tlen kipiaj ika nochi ininyolo?

⁵ Kema titemakaj tlen tijpiaj nojkia tijnextiaj tlauel tijpatiitaj tijueyichiuasej Jehová. Kejuak ipan se temiktli, apóstol Juan kinkajki toTeotsij itekipanojkauaj ipan iluikak kiijtouayayaj: “Ta titoTeko Dios tlen onpano tiueyi. Nochi chikaualistli tijpia. Kinamiki ma timitsnextilikaj nochi tlatlepanitakayotl. Kinamiki para san ta ma timitsueyichiuakaj. Ta tijchijchijki nochi tlen onka. Kena, nochi tlen onka eltok pampa eltoya mopakilis para ma onka, uan yeka tijchijchijki” (Apoc. [Rev.] 4:11). San Jehová kinamiki ma tijnextilikaj tlauel miak tlatlepanitakayotl uan ma tijueyichiuakaj, yeka moneki tijmakasej nochi tlen tijpiaj. Jehová kiiljuik Moisés ma kiniljui israeleuanij monekiyaya iljuichiuasej expa ipan se xiuitl. Kema kichiuaskiaj nopa iljuitl, kiueyichiuaskiaj Jehová, yeka kiniljuik: “Amo ximonextikaj san [ika] inmoma” (Deut. 16:16). Ipan ni tonali, nochi katli tijtekipanouaj Jehová moneki titemakasej tlen tijpiaj ika nochi toyolo. Tlaj kiampa tijchiuasej, tijnextisej tijpaleuiaj nopa tekitl tlen kichiua Jehová itlanechikol ipan Tlaltipaktli.

6. ¿Kenke tlauel kuali kema titemakaj tlen tijpiaj? (Xikita nopa achtoui tlaixkopinkayotl).

⁶ Maske tiyolpakij kema tijseliaj se tlenijki, tlaj ika nochi toyolo titemakasej tlen tijpiaj, kichiuas nojkia tlauel kuali ma tijyolmatikaj (xijpoua Proverbios 29:21). Ximoiljui se konetl kinnemaktia itatauaj se tlamantli tlen kikojki ika nopa tomij tlen inijuantij kimakatokej. ¡Itatauaj nelia tlauel yolpakij! Nojkia ma timoiljuikaj ipan se telpokatl katli tlatekipanoua kej precursor uan nojua itstok ika itatauaj. Uelis temaka se kentsi tomij tlen ika kikouasej o kiixtlauasej se tlamantli tlen moneki ininkalijtik. Maske itatauaj amo kiiljuiaj ma kinmaka se tlenijki, kena kiseliaj pampa kimatij kiampa ininkone kinextia kintlaskamatilia. Jehová nojkia kimati tlauel techpaleuis tlaj titemakasej tlen tijpiaj.

7, 8. 1) ¿Kenijkatsa tlapaleuijkej toTeotsij itekipanojkauaj kema monekiyaya mochiuas se tekitl? 2) ¿Kenijkatsa tlapaleuiyayaj ma kiueyichiuakaj Jehová?

⁷ Ipan Biblia nesi kenijkatsa toTeotsij itekipanojkauaj temakayayaj tlen kipixtoyaj. Kemantika temakakej tlen kipixtoyaj kema monekiyaya mochiuas se tekitl. Moisés tlajtlanki tlamantsitsij tlen ika kichijchiuaskiaj nopa tabernáculo, uan tlanauatijketl David nojkia kichijki nopa kema kichijchiuaskiaj nopa teokali (Éx. 35:5; 1 Crón. 29:5-9). Kema tlanauatiyaya Joás, nopa sacerdotes kisentiliyayaj tomij uan ika nopa tomij kikualchijchiuayayaj teokali (2 Rey. 12:4, 5). Ipan achtoui siglo, kema mochijki se  ueyi mayantli, Cristo itokilijkauaj “moiljuijkej kuali kisentilisej tomij keja imiaka [tlen] sejse kipixtoyaj para temakas. Uan kititlankej para kinpaleuisej tlaneltokanij tlen teikneltsitsij ipan estado Judea” (Hech. 11:27-30).

⁸ ToTeotsij itekipanojkauaj nojkia temakayayaj tlen kipixtoyaj, kiampa kinpaleuiyayaj katli kiyakanayayaj nopa tekitl kampa kiueyichiuayayaj Jehová. Ipan nopa Tlanauatili tlen kimakakej Moisés kiijtouayaya levitas amo kiseliskiaj se tlali kej sekinok pilaltepetsitsij. Israeleuanij monekiyaya temakasej diezmo, kiampa levitas ueliskiaj mosentlalisej tlatekipanosej ipan tabernáculo (Núm. 18:21). Kema Jesús itstoya ipan Tlaltipaktli, sekij siuamej kinpaleuijkej ya uan iapóstoles pampa “ki[n]makayayaj inintomij para ki[n]paleuisej [...] ika tlen monekiyaya” (Luc. 8:1-3).

9. ¿Kanke kisayaya nochi tomij tlen uejkajkia temakayayaj toTeotsij itekipanojkauaj?

⁹ Amo nochi temakakej sanse tlamantli. Ipan uaktok tlali, israeleuanij temakakej tlamantsitsij tlen kikuitejkej Egipto (Éx. 3:21, 22; 35:22-24). Ipan achtoui siglo, sekij Cristo itokilijkauaj kipixtoyaj tlen ueliskiaj kinamakasej, kej se tlali o se kali, uan nopa tomij kinuikiliyayaj apóstoles. Teipa inijuantij kinmakayayaj nopa tomij katli kinpolouayaya tlen ika mopanoltisej (Hech. 4:34, 35). Sekinok momajtoyaj kiiyokatlalisej se kentsi tomij uan kiampa tlapaleuiyayaj (1 Cor. 16:2). Kiampa, nochi toTeotsij itekipanojkauaj temakayayaj tlen kipixtoyaj, maske sekij kipixtoyaj miak uan sekinok amo (Luc. 21:1-4).

10, 11. 1) ¿Kenijkatsa tijnextisej titemakaj tlen tijpiaj sanse kej toTeotsij itekipanojkauaj katli uejkajkia itstoyaj? 2) ¿Tlake tijyolmati pampa ueli tijpaleuia nopa tekitl tlen kichiua toTeotsij iTlanauatijkayo?

¹⁰ Ipan ni tonali, kemantika moneki ma titemakakaj tomij pampa peuas mochiuas se tekitl. Uelis kikualchijchiuasej nopa kali kampa timosentiliaj o kichijchiuasej seyok yankuik. O uelis moneki tomij pampa kikualchijchiuasej kali Betel, pampa moixtlauas tlen motekiuik ipan se ueyi tlanechikolistli o pampa kanajya se chikauak ajakatl o seyok tlamantli kintlasojsoljuilik toikniuaj. Ika nopa tomij tlen titemakaj nojkia kinpaleuiaj misioneros, precursores especiales, toikniuaj katli tepaxalouaj chijchikuasej metstli uan katli tekitij ipan nochi kali Betel ipan nochi Tlaltipaktli. Nojkia, uelis ipan totlanechikol moijtok sejse metstli kititlaniskiaj tomij tlen ika tlapaleuiskiaj ma mochiua kali kampa timosentiliaj uan kali kampa mochiua uejueyi tlanechikolistli ipan nochi Tlaltipaktli.

¹¹ Nochi uelis titlapaleuisej ipan nopa tekitl tlen Jehová kichiua ipan ni itlamia tonali. San tojuantij tijmatij kema titemakaj tomij, pampa amo aka tikiljuiaj kema tijtlaliaj ipan pilkuakajontsitsij o kema titemakaj ipan jw.org. Maske timoiljuiaj amo tlauel titlapaleuiaj ika totomij pampa amo miak titemakaj, moneki tikilnamiktosej nopa tomij tlen kitekiuia Jehová itlanechikol amo eltok san pampa se keskij temakaj miak tomij, eltok pampa miakej toikniuaj temakaj maske amo miak. Nochi toikniuaj, maske amo kipiaj miak tomij, elij kej toikniuaj tlen Macedonia. Inijuantij maske amo kipixtoyaj miak tomij, kinejkej tlapaleuisej uan kichijkej ika nochi ininyolo (2 Cor. 8:1-4).

12. ¿Kenke tijmatij Jehová itlanechikol kuali kitekiuia nopa tomij tlen titemakaj?

¹² Toikniuaj Katli kinyakanaj Jehová itlajtoltemakauaj kichiuaj kampeka kuali kitekiuisej nopa tomij tlen motekiuia ipan Jehová itlanechikol (Mat. 24:45). Ni toikniuaj momaijtouaj uan moiljuiaj kenijkatsa kuali kitekiuisej nopa tomij (Luc. 14:28). Uejkajkia, nopa tomij tlen maseualmej  temakayayaj, kimokuitlauiyayaj tlakamej katli temachmej. Uan san kitekiuiyayaj kema mochiuayaya se tlamantli tlen ika kiueyichiuaskiaj Jehová. Se tonali, Esdras tlakuepilik Jerusalén uan kiuikak tlamantli tlen tlanauatijketl tlen Persia kimakatoya: oro, plata uan sekinok tlamantli. Ipan ni tonali, nochi nopa tlamantli ipati eliskia kipano 100 millones de dolares. Esdras kiitayaya nopa tlamantli eliyaya iaxka Jehová, yeka kema tlakuepiliskiaj, kiniljuik monekiyaya kimokuitlauisej (Esd. 8:24-34). Miak xiuitl teipa, apóstol Pablo kinechikok tomij tlen ika ueliskia kinpaleuisej toikniuaj tlen Judea. Pablo kintlajtolmakak katli temajmakakej nopa tomij uan kiniljuik monekiyaya kichiuasej “tlen xitlauak iixpa toTeko uan ininixpa nochi tlakamej” (xijpoua 2 Corintios 8:18-21). Ipan ni tonali Jehová itlanechikol kichiua sanse kej Esdras uan Pablo. Yeka xitlauak kiijtoua kenijkatsa motekiuis tomij uan tlake kikouasej ika nopa tomij tlen toikniuaj temakatokej.

13. ¿Kenke mopatlatok se keski tlamantli ipan Jehová itlanechikol?

¹³ Kemantika tetajmej kiitaj ayokmo moneki kitekiuisej miak tomij pampa amo kitlanij miak o amo kinaxilia. O uelis pampa kinekij tlauel kitekipanosej Jehová. Ipan Jehová itlanechikol nojkia kiampa pano. Ipan se keski xiuitl tlen panotok, Jehová itlanechikol kinekiyaya kichiuas miak kuajkuali tlamantli, yeka pejki motekiuia miak tomij maske amo miak kiseliyaya. Yeka, nama Jehová itlanechikol kuali kiita tlake kipaleuis amo ma kichiua miak tekitl uan amo ma motekiui miak tomij. Kiampa, nopa tomij tlen titemakaj uelis motekiuis ipan sekinok tlamantli tlen tlauel ipati.

14-16. 1) ¿Kenijkatsa motekiuia nopa tomij tlen titemakaj? 2) ¿Kenijkatsa mitspaleuijtok nochi tlen Jehová itlanechikol techmaka?

¹⁴ Miakej toikniuaj katli ya uejkajtok kitekipanouaj Jehová kiijtouaj ipan ni tonali Jehová itlanechikol kinmakatok tlauel miak tlamantli. Uan nelia tlen kiijtouaj pampa namanok pejki jw.org uan JW Broadcasting. Nojkia nopa Traducción del Nuevo mundo de las Santas Escrituras mochijtok ipan tlauel miak tlajtoli. Uan ipan xiuitl 2014, mochijki nopa asambleas internacionales katli motokaxtik “Achtoui xijtemokaj inkalakisej  ipan toTeotsij iTlanauatijkayo”. Mochijki ipan uejueyi estadios ipan 14 uejueyi altepemej. ¡Nochi katli mosentilijkej tlauel kinpaktik!

¹⁵ Miakej tlauel kitlaskamatiliaj Jehová itlanechikol pampa kiselijtokej miak kuajkuali tlamantli. Ipan se pilaltepetsi tlen Asia, tlatekipanouaj se toikni iuaya isiua, uan tlauel kinpaktia JW Broadcasting, kiijtouaj: “Pampa uejka tiitstokej, kemantika tikilkauaj nochi tlen Jehová itlanechikol kichiua. Yeka, kema tikitaj nopa tlamachtili tlen moixtoma ipan JW Broadcasting, nimantsi sampa tikilnamikij nochi timosentikapaleuiaj. Toikniuaj katli nikaj euaj nojkia tlauel kinpaktia. Miakej kiijtouaj nopa tlamachtili tlen kisa sejse metstli kinpaleuia ma kiyolmatikaj itstokej ininnechka toikniuaj Katli kinyakanaj Jehová itlajtoltemakauaj. Uan tlauel yolpakij pampa itstokej ipan Jehová itlanechikol”.

¹⁶ Ipan nochi Tlaltipaktli, kichijchiuaj o kikualchijchiuaj se 2,500 kali kampa timosentiliaj. Ipan Honduras, kema toikniuaj pejkej kitekiuiaj nopa kali kampa mosentiliaj, kiijkuilojkej: “Tlauel tiyolpakij pampa tiitstokej ipan Jehová itlanechikol uan pampa timosentikapaleuiaj ika nochi toikniuaj. Ika inintlapaleuil, nama tijpiaj se kali kampa timosentilisej nikaj ipan toaltepe”. Sekinok toikniuaj nojkia kiampa kiyolmatij kema kiseliaj Biblia uan sekinok amatlajkuiloli ipan inintlajtol, kema kinpaleuiaj pampa se chikauak ajakatl o seyok tlamantli kintlasojsoljuilik o kema kiitaj maseualmej tlauel kipatiitaj tlajtolmoyaualistli kampa nemij miakej.

17. ¿Kenke tijmatij Jehová kipaleuia itlanechikol ipan ni tonali?

¹⁷ Miakej maseualmej amo techneltokiliaj kema tikiniljuiaj nochi tlen tijchiuaj eli ika tomij tlen sekinok temakaj ika nochi ininyolo. Se katli kiyakana se ueyi empresa paxaloto kampa tijchijchiuaj amatlajkuiloli. Uan mosentlachilik kema kimatki nochi tlen mochiuayaya eliyaya ika tomij tlen sekinok temakatokej, uan katli nopaya tlapaleuiyayaj amo tlainamaj uan axkema tlajtlanij tomij. Ya kiijtok amo aka ueliskia kichiuas tlen tojuantij tijchiuaj. ¡Uan nopa nelia! Pampa nochi tlen tijchiuaj, mochiua pampa Jehová techpaleuia (Job 42:2).

18. 1) ¿Tlake tlateochiualistli tijselisej tlaj tijpaleuisej toTeotsij iTlanauatijkayo? 2) ¿Kenijkatsa uelis tikinmachtisej konemej uan katli namanok kitekipanouaj Jehová nojkia ma tlapaleuikaj?

¹⁸ Jehová kinextia motemachia ipan tojuantij uan kikaua ma titlapaleuikaj ipan nopa tekitl tlen kichiua itlanechikol ipan ni tonali. Uan kiijtoua tlaj titlapaleuisej, tijselisej tlauel miak tlateochiualistli (Mal. 3:10). Jehová kiijtoua katli temakaj tlen kipiaj teipa kiselisej miak tlamantli (xijpoua Proverbios 11:24, 25). Uan nojkia tlauel tiyolpakisej, pampa Biblia kiijtoua: “Más pakilistli kiselia tlen temaka se tlenijki, uan axkeja tlen kiselia” (Hech. 20:35). Nojkia, uelis tikinmachtisej tokoneuaj ika tlen tijchiuaj uan ika tlen tikiniljuiaj, uan nojkia katli namanok pejtokej kitekipanouaj Jehová. Tlaj inijuantij nojkia temakasej tlen kipiaj, temachtli kiselisej miak tlateochiualistli.

19. ¿Kenijkatsa mitspaleuijtok ni tlamachtili?

¹⁹ Nochi tlen tijpiaj, Jehová techmakatok. Kema tijmakaj tlen tijpiaj tijnextiliaj tlauel tikikneliaj uan tijtlaskamatiliaj nochi tlen techmakatok (1 Crón. 29:17). Kema mochijchijki teokali, israeleuanij temakakej tlen kipixtoyaj uan nochi “tlauel yolpajkej ika nopa ofrendas pampa kimakatoyaj toTeko tlamantsitsij ika nochi ininyolo” (1 Crón. 29:9). Ma timosentlalikaj tijmakasej Jehová nochi tlen ya techmakatok, kiampa tlauel kuali tijyolmatisej uan tlauel tiyolpakisej.