1, 2. ¿Tlake tlamantli ipan xiuitl 2018 kichiuas tlauel miakej maseualmej ma itstokaj sansejko, uan kenke tlauel ipati? (Xikita nopa achtoui tlaixkopinkayotl).

IPAN marzo 31, 2018, kema kalaktias Tonati, tlauel miakej toTeotsij itekipanojkauaj uan miakej maseualmej monechikosej pampa kiilnamikisej toTeko iTlakualis. Sejse xiuitl, kema moilnamiki Cristo imikilis, kichiua tlauel miakej maseualmej ma itstokaj sansejko, ¡amo onka seyok tlamantli ipan nochi Tlaltipaktli tlen kichiua maseualmej ma itstokaj sansejko!

² Jehová uan Jesús tlauel yolpakij kema kiitaj ipan nochi Tlaltipaktli tlauel miakej maseualmej kiilnamikij Cristo imikilis. Biblia ipa kiijtojtoya tlauel miakej maseualmej “tlen kampa ueli tlaltinij, uan tlen nochi xinachtli tlakamej, uan [...] tlen kamatij nochi tlamantli tlajtoli”, kiijtoskiaj: “¡Ueyi pakilistli! Ya techmakixtijkej ni Pilborregojtsi uan toTeko Dios tlen moseuia ipan iueyi silla tlen yejyektsi” (Apoc. [Rev.] 7:9, 10). Tlauel kuali tlen mochiua kema moilnamiki Cristo imikilis,  pampa kiampa tikinnextiliaj Jehová uan Jesús tlauel tikinikneliaj uan tikintlepanitaj.

3. ¿Tlake tlajtlanili tijnankilisej ipan ni tlamachtili?

³ Ipan ni tlamachtili tijnankilisej naui tlajtlanili: 1) ¿Kenijkatsa uelis nimokualchijchiuas kema moilnamikis Cristo imikilis uan kiampa nechpaleuis ipan nonemilis? 2) ¿Kenijkatsa kema moilnamiki Cristo imikilis kichiua ma tiitstokaj sansejko? 3) ¿Kenijkatsa uelis nitlapaleuis ma tiitstokaj sansejko? 4) ¿Asis nopa tonali kema ayokmo moilnamikis Cristo imikilis? Tlaj kena, ¿kema mochiuas?

4. ¿Kenke moneki tijchiuasej kampeka timosentilisej kema moilnamiki Cristo imikilis?

⁴ ¿Kenke tlauel moneki ma timosentilikaj kema moilnamiki Cristo imikilis? Kema tiauij tlanechikoli tijueyichiuaj toTeotsij. Yeka, Jehová uan Jesús tlauel kipatiitaj kema tijchiuaj kampeka timosentilisej ipan nopa tonali tlen tlauel ipati. Tlaj amo tijpiaj se ueyi kokolistli o se ueyi kuesoli, amo ma tijkauakaj yon se tlamantli ma techtsakuili timosentilisej. Kema tijnextiaj tlauel tijpatiitaj tlanechikoli, kejuak tikiljuiaj Jehová tijnekij ma kikaua totokaj ipan nopa amochtli “kampa kipia nochi inintoka” itekipanojkauaj. Ni amochtli nojkia kiixmatij kej “amatlapouali tlen kiijtoua ajkeinijuantij kipia[se]j yolistli yankuik para nochipa” (Mal. 3:16; Apoc. 20:15).

5. Kema nechka moilnamikis Cristo imikilis, ¿kenijkatsa uelis ‘tijyejyekosej’ totlaneltokilis?

⁵ Kema nechka moilnamikis Cristo imikilis, kualtiaskia timomaijtosej uan kuali tikitasej kenijkatsa timouikaj iuaya Jehová (xijpoua 2 Corintios 13:5). ¿Kenijkatsa uelis tijchiuasej nopa? Pablo kiijtok ma ‘tijyejyekokaj’ totlaneltokilis. Yeka, kualtiaskia timotlajtlanisej: “¿Nimotemachia niitstok ipan nopa tlanechikoli tlen ika Jehová kichiua ipakilis ipan Tlaltipaktli? ¿Nijchiua se ueyi kampeka nitlajtolmoyauas uan nitlamachtis nopa kuali tlamachtili tlen toTeotsij iTlanauatijkayo? ¿Nijnextia nelia nimotemachia tiitstokej ipan itlamia tonali uan nechka kitsontlamiltisej Satanás itlanauatijkayo? ¿Nojua nimotemachia ipan Jehová uan ipan Jesús, sanse kej kema nimotemaktilik?” (Mat. 24:14; 2 Tim. 3:1; Heb. 3:14). Tlaj timoyoliljuisej ipan ni tlajtlanili, techpaleuis ma ‘tijnextikaj tlaj nelia kuali titlaneltokaj’.

6. 1) ¿Tlake techpaleuis ma tijpiakaj yolistli nochipa? 2) ¿Kenijkatsa mokualchijchiua se ueuejtlakatl, uan kenijkatsa uelis tijchiuasej kej ya?

⁶ Tlaj tijpouasej tlamachtili kampa moixtoma kenke tlauel ipati kema moilnamiki Cristo imikilis uan tlaj timoyoliljuisej ipan tlen tijpouasej, techpaleuis ma timokualchijchijtokaj kema moilnamikis Cristo imikilis (xijpoua Juan 3:16; 17:3). Uelis tijpiasej yolistli nochipa tlaj tikixmatisej Jehová uan Jesucristo. Yeka, kema timokualchijchiuasej, kualtiaskia tijtemosej tlamachtili tlen techpaleuis nojua ma tikinnechkauikaj. Ma tikitakaj tlake kichiua se toikni katli tlatekipanojtok miak xiuitl kej ueuejtlakatl. Ipan miak xiuitl, kiajoktok tlamachtili tlen kistok ipan pilamochtsi Tlen Tematiltia kampa moixtoma tlen Cristo imikilis uan kenijkatsa Jehová uan Jesús kinextijtokej tlauel techikneliaj. Sejse xiuitl, kema nechka moilnamikis Cristo imikilis, sampa kipoua nopa tlamachtili uan moyoliljuia kenijkatsa nopa tonali nelia tlauel ipati. Uan kemantika kiajokui sekinok tlamachtili tlen kistia ipan amatlajkuiloli. Ni toikni kiitstok kenijkatsa kipaleuijtok ma kiyeko yajyankuik tlamantli kema sampa kipoua nopa tlamachtili, textos tlen mopoua kema moilnamiki Cristo imikilis uan kema moyoliljuia ipan tlen kipoua. Uan nojkia tlauel kipaleuijtok ma kinikneli Jehová uan Jesús. Tlaj nojkia kiampa tijchiuasej, techpaleuis nojua tlauel ma tikiniknelikaj uan ma tikinpatiitakaj. Uan kema moilnamikis Cristo imikilis, nojua tlauel techpaleuis ipan tonemilis.

7. 1) ¿Tlake tlajtlanki Jesús kema mochijki achtoui toTeko iTlakualis? 2) ¿Kenke tijmatij Jehová kichijki tlen iKone kitlajtlanik?

⁷ Kema mochijki achtoui toTeko iTlakualis, Jesús kiiljuik iTata ma kinpaleui itokilijkauaj ma itstokaj sansejko uan kuali ma mouikakaj sanse kej ya mouika iuaya (xijpoua Juan 17:20, 21). Jehová kichijtok tlen iKone kitlajtlanik. Kema moilnamiki Cristo imikilis tikitaj kenijkatsa Jehová itlajtoltemakauaj itstokej sansejko. Ipan nopa tonali, ipan nochi Tlaltipaktli tlauel miakej maseualmej katli kampa ueli euaj mosentiliaj uan kinextiaj kineltokaj Jehová kititlanki iKone. Kanajya, maseualmej amo mosentiliaj ininuaya sekinok katli amo elij kej inijuantij uan kinkualankaitaj katli kena mosentiliaj. Maske sekij maseualmej amo kinpaktia, Jehová uan Jesús tlauel yolpakij kema kiitaj sansejko tiitstokej.

8. ¿Kenke Ezequiel kimatiyaya toTeotsij itekipanojkauaj sansejko tlaueyichiuaskiaj?

⁸ Tojuantij tijmatij toTeotsij itekipanojkauaj kuali timouikaskiaj pampa Jehová kiiljuik tlajtolpanextijketl Ezequiel panoskia nopa. Nopa tlajtolpanextili kiijtouayaya ome kuauitl, se “kuauitl tlen kiixnextia tlali Judá” uan se “kuauitl tlen kiixnextia [...] José”, mosansejkotiliskiaj uan eliskiaj kejuak san setsi kuauitl (xijpoua Ezequiel 37:15-17). Ipan “Preguntas de los lectores”, tlen kiski ipan La Atalaya, julio, 2016, kiijtok: “Jehová kiyolchikajki Ezequiel ika tlen kiiljuik: kitenkauilik altepetl Israel sampa tlakuepiliskia itlal uan nochi israeleuanij sansejko itstoskiaj. Ika tlen kiiljuik, nojkia kipannextik ipan itlamia tonali toTeotsij itekipanojkauaj sansejko kiueyichiuaskiaj”.

9. ¿Kenijkatsa kema moilnamiki Cristo imikilis moaxitia tlen Ezequiel kiijtok?

⁹ Ipan xiuitl 1919, Jehová sampa kinkualchijchijtiajki katli yaskiaj iluikak uan kinpaleuik sansejko ma tlatekipanokaj, inijuantij eliyayaj kej nopa “kuauitl tlen kiixnextia tlali Judá”. Teipa, tlauel miakej katli kichiaj itstosej ipan Tlaltipaktli nojkia pejkej kinpaleuiaj tlapejpenilmej, inijuantij elij kej nopa “kuauitl tlen kiixnextia [...] José”. Jehová kitenkajki kisansejkotiliskia ni ome kuauitl uan kichiuaskia ma eli “san se[tsi]” (Ezeq. 37:19). ToTeotsij kichijki nopa tlapejpenilmej uan nopa “sekinok tlakamej” ma “itsto[ka]j sansejko” (Juan 10:16; Zac. 8:23, TNM). Nama, sansejko tlatekipanouaj uan kipiaj san setsi ininTlanauatijka, Jesucristo, katli toTeotsij kitokaxtik “notlatekipanojka David” (Ezeq. 37:24, 25). Sejse xiuitl tikitaj kenijkatsa moaxitijtok tlen Ezequiel kiijtok. Ni tikitaj kema toikniuaj tlapejpenilmej uan nopa “sekinok tlakamej” sansejko kiilnamikij Cristo imikilis. Uajka, ¿kenijkatsa uelis titlapaleuisej nojua kuali ma timouikakaj uan tikinpaleuisej sekinok nojkia kiampa ma kichiuakaj?

10. ¿Kenijkatsa uelis titlapaleuisej nochi kuali ma timouikakaj uan sansejko ma tiitstokaj?

¹⁰ Tlaj timoechkapanosej, uelis titlapaleuisej ipan tlanechikoli nochi kuali ma timouikakaj uan sansejko ma tiitstokaj. Kema Jesús itstoya ipan Tlaltipaktli, kiniljuik itokilijkauaj monekiyaya moechkapanosej (Mat. 23:12). Katli amo kitekipanouaj Jehová moiljuiaj san inijuantij tlauel ininpati uan sekinok amo. Maske inijuantij kiampa moiljuiaj, tojuantij amo tijnekij timoueyimatisej, uan nopa techpaleuis ma tikintlepanitakaj katli tlayakanaj ipan tlanechikoli, kej nopa titlapaleuisej nochi kuali ma timouikakaj uan sansejko ma tiitstokaj. Tlaj timoechkapanosej Jehová tlauel yolpakis pampa ya “axkinkualita tlen moueyimatij, pero ueyi iyolo ika tlen [moechkapanouaj] iixtla” (1 Ped. 5:5).

11. ¿Kenke tlaj timoyoliljuisej tlake kiixnextia nopa pantsi uan vino techpaleuis ma tijnekikaj sansejko tiitstosej?

¹¹ Tlaj timoyoliljuisej ipan tlen kiixnextia nopa  pantsi uan vino tlen motekiuia kema moilnamiki Cristo imikilis, techpaleuis ma tijnekikaj kuali timouikasej ininuaya sekinok uan tiitstosej sansejko. Uelis timoyoliljuisej nopa tlamantli kema monechkauia nopa tonali, uan nojkia ipan nopa youali kema timosentilisej (1 Cor. 11:23-25). Nopa pantsi tlen amo kixokoltijtokej kiixnextia Jesús itlakayo tlen amo tlajtlakole katli temakak kej tlakajkaualistli, uan nopa vino kiixnextia ieso tlen kitoyajki. Nojkia moneki timoyoliljuisej ipan seyok tlamantli uan kiampa uelis tijkuamachilisej tlake kiijtosneki nopa pantsi uan nopa vino. Jesús imikilis technextilia ome tlamantli: 1) kinextik Jehová tlauel techiknelia pampa temaktilik iKone ma techmakixtiki, uan 2) Jesús kinextik tlauel techiknelia pampa kinejki motemaktilis. Timoyoliljuisej ipan ni tlamantli techyololinis nojkia tlauel ma tikiniknelikaj. Pampa tlauel tikikneliaj Jehová uan tikinikneliaj toikniuaj techpaleuia kuali ma timouikakaj uan sansejko ma tiitstokaj.

12. Ipan nopa tlapoualistli tlen Jesús kiijtok, ¿kenijkatsa kinextik Jehová kineki ma tikintlapojpoljuikaj toikniuaj?

¹² Tlaj titetlapojpoljuisej, nojkia techpaleuis kuali ma timouikakaj uan sansejko ma tiitstokaj ininuaya toikniuaj. Kema tikintlapojpoljuiaj sekinok tijnextiaj tijtlaskamatiliaj Jehová pampa techtlapojpoljuia ika Cristo imikilis. Ma timoyoliljuikaj ipan nopa tlapoualistli tlen Jesús kiijtok ipan Mateo 18:23-34, uan ma timotlajtlanikaj: “¿Nechyololinia ma nijchiua tlen Jesús tlamachtik? ¿Nijchiua kampeka nijpias noyolo ika toikniuaj? ¿Nelia nijneki nikintlapojpoljuis katli nechixpanoj?”. Maske titlajtlakolejkej uan kemantika amo nima tikilkauaj se keski tlamantli tlen techchiuilijkej, tlen Jesús kiijtok kinextia Jehová kineki ma titetlapojpoljuikaj (xijpoua Mateo 18:35). Jesús xitlauak kiijtok Jehová amo techtlapojpoljuis tlaj tojuantij amo tikintlapojpoljuiaj toikniuaj. ¡Moneki kuali timoyoliljuisej tlake tijchiuasej! Kema titetlapojpoljuiaj tijchiuaj kuali ma timouikakaj ininuaya sekinok uan sansejko ma tiitstokaj, uan nojkia tikinyololiniaj sekinok kiampa ma kichiuakaj.

13. ¿Kenijkatsa titlapaleuiaj ma tiitstokaj sansejko kema tijchiuaj kampeka tiitstosej ika tlaseuilistli ininuaya toikniuaj?

¹³ Kema tikintlapojpoljuiaj toikniuaj techpaleuia  ma tiitstokaj ika tlaseuilistli. Ma tikilnamikikaj tlen Pablo kiijtok ipan Efesios 4:3: “Xijchiuakaj kampeka inkipiasej sanse inmotlalnamikilis. Uan kej nopa inkipiasej tlaseuilistli”. Kema moilnamikis Cristo imikilis uan ipan nopa youali kema timosentilisej, kuali ma timoyoliljuikaj kenijkatsa timouikaj ininuaya sekinok. Ma timotlajtlanikaj: “¿Nijnextia amo nitekualankaita? ¿Nijchiua kampeka nitlapaleuis ma tiitstokaj sansejko uan ika tlaseuilistli?”. Ipan nopa tonali tlen tlauel ipati, kinamiki ma timotlajtlanikaj ni tlamantli.

14. ¿Kenijkatsa uelis tijnextisej tlaiknelili sanse kej Jehová kichiua?

¹⁴ Seyok tlamantli tlen nojkia techpaleuis kuali ma timouikakaj uan sansejko ma tiitstokaj, eli kema tijnextiaj tijchiuaj kej Jehová, katli tlauel teiknelia (1 Juan 4:8). Amo kema ma tikijtokaj ni tlamantli: “Maske nijmati moneki nikiniknelis toikniuaj, nopa amo kiijtosneki moneki kuali nimouikas ininuaya”. Tlaj kiampa timoiljuiskiaj, amo tijchiuaskiaj tlen Pablo kiijtok kema kiijkuilok: “Sejse inmojuantij xikijiyouikaj kema seyok inmoikni kichiua o kiijtoua se tlamantli [...]. Kej nopa inkinextilisej inkiikneliaj” (Efes. 4:2). Pablo amo san kiijtok moneki ‘tikijiyouisej’ tlen techchiuiliaj, ya kiijtok moneki tijchiuasej ika ‘tlaiknelili’. Nopa techmachtia kenijkatsa moneki tikinitasej sekinok. Jehová kinselijtok ipan itlanechikol maseualmej katli amo elij sanse ika sekinok toikniuaj (Juan 6:44). Uan ya kimati kenke kiniknelia. Yeka, amo kinamiki tikijtosej se toikni amo kinamiki ma tikiknelikaj. Jehová techiljuia moneki ma tikiniknelikaj nochi toikniuaj uan moneki kiampa ma tijchiuakaj (1 Juan 4:20, 21).

15. ¿Kenke tijmatij asis se tonali kema ayokmo moilnamikis Cristo imikilis?

¹⁵ Asis se tonali kema ayokmo moilnamikis Cristo imikilis. ¿Kenke tijmatij nopa? Kema Pablo kintlajkuiljuilik toikniuaj tlen Corinto, kiijtok kema Cristo itokilijkauaj kiilnamikiskiaj sejse xiuitl Jesús imikilis, ‘teyolmelauaskiaj para toueyiTeko mijki topampa uan keja nopa moneki kichijtiasej hasta yajaya mokuepas’ (1 Cor. 11:26). Kema Jesús kiijtok tlen itlamia tonali, nojkia kiijtok kema sampa ualaskia o tlakuepiliskia. Kema kiijtok tlen nopa ueyi tlaijiyouilistli, kiijtok: “Ipan iluikaktli monextis notlanextilis para na tlen nimokuepki tlakatl niuala. Uan nochi tlakamej tlen kamatij nochi tlamantli tlajtoli ipan Tlaltipaktli tlauel chokasej kema nechitasej. Uan niualajtiualas ipan mixtli tlen iluikaktli ika noueyichikaualis uan ika notlatlanex. Uan na nikintitlanis noiluikaejkauaj ika tlapitsali uan yajuantij kinsentilisej tlen toTeko kintlapejpenijtok tlen kampa ueli ipan Tlaltipaktli” (Mat. 24:29-31). Jesús kinsentilis katli “toTeko kintlapejpenijtok” kema kinuikas iluikak nochi tlapejpenilmej katli nojua itstosej ipan Tlaltipaktli. Ni panos teipa kema mochiuas nopa ueyi tlaijiyouilistli, kema nechka peuas Armagedón. Ipan nopa tlauilankayotl, Jesús uan nopa 144,000 kintsontlamiltisej nochi tlanauatianij ipan Tlaltipaktli (Apoc. 17:12-14). Jesús ‘ualas’ uan kinuikas iluikak nochi tlapejpenilmej. Kema kiampa kichiuas, ayokmo monekis moilnamikis Cristo imikilis. Uajka, nopa tlanechikoli tlen mochiuas kema ayamo ualayaya, ika nopa tlamis moilnamikis Cristo imikilis.

16. ¿Kenke timosentlalijtok tikilnamikis Cristo imikilis ni xiuitl?

¹⁶ Ma tijchiuakaj se ueyi kampeka timosentilisej kema moilnamikis Cristo imikilis ipan marzo 31, xiuitl 2018. Uan ma tikiljuikaj Jehová ma techpaleui titlapaleuisej kuali ma timouikakaj ininuaya toikniuaj uan sansejko ma tiitstokaj (xijpoua Salmo 133:1). Ma tikilnamikikaj asis tonali kema ayokmo tikilnamikisej Cristo imikilis. Yeka, nama ma tijnextikaj tlauel tijpatiitaj tiitstosej sansejko ika nochi toikniuaj kema moilnamiki Cristo imikilis.