IPAN nopa tonali kena, ma tikitakaj se neskayotl. Deuteronomio 24:14, 15 kiijtoua: “Amo xijkajkayauakaj se tlen teikneltsi tlen inmechmapaleuia, niyon amo xiuejkaualtikaj para inkitlaxtlauisej, yonke eli se tlen sansejko inualauij, o se tlakatl tlen sejkoyokejketl tlen inmouaya itstok ipan inmoaltepe. [...] Pampa intla axtle, uelis yajaya kitsajtsilis toTeko uan kiiljuis tlen inkichijtokej uan toTeko kiitas para intlajtlakolchijtokej”.

Nechka altepetl Asdod, kipantijkej se tepalkatl tlen kichijchijkej ipan siglo siete a.u.J. Nopa tlajkuiloli kiijtoua se akajya kipanok tlen kiijtoua Deuteronomio 24. Uelis kipanok se tlakatl katli tlatojtokayaya uan amo uelki kitlamiltia iteki ipan se tonal. Kiijtoua: “Amo kipia miak tonali, motekipanojka [katli moteljuik] ya kisentilijtoya nochi tlen kipixkatoya, uajka ualajki Hoshayahu ikone Shobay uan kiuikak motekipanojka iyoyo. [...] Nochi katli nouaya tonalixko tekitiyayaj kiijtosej [...] nelia tlen nikijtoua. Na amo nitlaixpanotok. [...] Tlaj nopa tekichijketl kiijtos amo ya iteki mitsnauatis xinechkuepili noyoyo, ta uelis tinechtlasojtlas uan tinechkuepilis. Moneki tijpaleuis motekipanojka kema tikitas amo kipia iyoyo”.

Nopa historiador Simon Schama kiijtoua kema nopa tlakatl moteljuik “amo san kinextik kinekiyaya ma kikuepilikaj [iyoyo]”, nojkia kinextik seyok tlamantli. Ya kiijtoua: “Nojkia kinextia nopa tlakatl kuali kiixmatiyaya tlen kiijtouayaya nopa Tlanauatili, kuali kimajtoya tlen kiijtoua Levítico uan Deuteronomio, kampa kiijtoua monekiyaya kinpatiitasej teikneltsitsij”.