1, 2. 1) ¿Kenijkatsa Yoshiko tlauel kipaleuik tlen kiijtoua Isaías 41:10? 2) ¿Ajkia inijuantij nojkia kinpaleuia tlen Jehová kiijtok?

SE TOSIUAIKNI katli motokaxtia Yoshiko kiiljuijkej se tlamantli tlen amo kuali. Tepajtijketl kiiljuik itstoskia san se keski metstli uan teipa mikiskia. ¿Kenijkatsa kiyolmatki? Nimantsi kiilnamijki se texto tlen tlauel kipaktia, Isaías 41:10 (xijpoua). Teipa, kiiljuik nopa tepajtijketl ya amo majmauiyaya pampa Jehová kimaitskitoya. * Tlen kiijtoua nopa texto tlauel kiyolchikajki uan kipaleuik ma motemachi ipan Jehová ika nochi iyolo. Tojuantij nojkia uelis techyolchikauas kema tijpiasej uejueyi kuesoli. Tlaj tijnekij tijkuamachilisej kenijkatsa techyolchikaua nopa texto, achtoui ma tikitakaj kenke tlajtolpanextijketl Isaías kiiljuijkej nopa.

² Achtoui, Jehová kiiljuik Isaías nopa tlamantli pampa kinekiyaya kinyolchikauas judíos katli kinuikaskiaj Babilonia. Uan nojkia kichijki ma moijkuilo pampa kinekiyaya ma kinpaleui itekipanojkauaj katli teipa itstoskiaj (Is. 40:8; Rom. 15:4). Ipan ni tonali tlauel ouij tiitstokej, yeka tlauel moneki timoyolchikauasej ika tlen kiijtoua pilamochtsi Isaías (2 Tim. 3:1).

3. 1) ¿Tlake kitenkajtok Jehová ipan texto tlen xiuitl 2019? 2) ¿Kenke monekiyaya ma techtenkauilikaj nopa eyi tlamantli?

³ Ipan ni tlamachtili tikitasej eyi tlamantli tlen techpaleuis  nojua kuali ma titlaneltokakaj. Nopa eyi tlamantli tlen Jehová kitenkajtok uala ipan Isaías 41:10: se) itstoskia touaya, ome) yaya eli toTeotsij uan eyi), ya techpaleuiskia. Monekiyaya ma techtenkauilikaj * ni pampa sanse kej Yoshiko, nojkia tijpiaskiaj kuesoli ipan tonemilis. Uan nojkia tikixnamikiskiaj sekinok tlaouijkayotl, kej se keskij toikniuaj katli tlaijiyouiaj pampa tekichiuanij kintlatsakuiltiaj.

4. 1) ¿Tlake achtoui tlamantli tlen Jehová kitenkajtok tikixtomasej? (Xikita nopa nota). 2) ¿Kenijkatsa kinextia Jehová tlauel techiknelia? 3) ¿Kenijkatsa tijyolmati kema tikita tlen Jehová kiijtoua?

⁴ Jehová tlauel techyolchikaua kema techiljuia: “Amo ximajmauikaj pampa na niitstok inmouaya”. * Jehová kinextia itstok touaya pampa tlauel techiknelia uan kitekipachoua tlen techpano. Ma timoiljuikaj kenijkatsa techiknelia kema kiijtoua ni: “Niinmechita para nelia miak inmopati. Niinmechtlepanita uan miak niinmechiknelia” (Is. 43:4). Yon se tlamantli uelis kichiuas Jehová ayokmo ma techikneli. Ya amo kema techtlauelkauas (Is. 54:10). Kema tijmatij Jehová techiknelia uan eli touampo, techpaleuia amo ma timajmauikaj. Ya techmokuitlauis kej uejkajkia kimokuitlauik Abram (Abraham). Jehová kiiljuik: “Amo ximajmaui, Abram, pampa na nimitsmokuitlauis” (Gén. 15:1).

5, 6. 1) ¿Kenijkatsa tijmatij Jehová kineki techpaleuis ma tikixnamikikaj tokuesoljuaj? 2) ¿Tlake techmachtia tlen kichijki Yoshiko?

⁵ Jehová kineki techpaleuis kema tijpiaj kuesoli, ni tijmatij pampa ya techtenkauilijtok: “Kema inpanosej ipan kuesoli keja se atl tlen uejkatla, na niitstos inmouaya. Kema inkipanosej tlaouijkayotl tlen eltok keja se ueyi atemitl, axinmechatsonpoliuiltis. Uan kema inpanosej ipan se tlaijiyouilistli keja se tlitl, axinmechtlatis” (Is. 43:2). ¿Tlake kiijtosneki nopa tlajtoli?

 ⁶ Maske Jehová amo kiijtoua techkixtilis kuesoli, amo kikauas ma techisaui kejuak eliskia “ueyi atemitl” o tlaouijkayotl ma techtlati “keja se tlitl”. Ya kiijtoua itstos touaya uan techpaleuis ma tikijiyouikaj. Uan nojkia techpaleuis amo ma tijtlauelkauakaj maske timikiskiaj (Is. 41:13). Kej nopa kipaleuik Yoshiko, katli tikijtojkej achtouia. Iichpoka kiijtoua: “Timosentlachiliyayaj kema tikitayayaj nonana amo momajmatiyaya. Nesiyaya kenijkatsa Jehová kimakayaya tlaseuilistli. Ipan nopa tonali kema mijki, ya nojua kiniljuik tepajtianij uan katli mokokouayayaj ajkia eli Jehová uan tlake mosentlalijtok kichiuas”. Tlen Yoshiko kipanok techmachtia tlaj timotemachisej Jehová itstok touaya, techpaleuis amo ma timajmauikaj uan ma tikijiyouikaj kuesoli.

7, 8. 1) ¿Tlake seyok tlamantli tlen Jehová kitenkajtok tikixtomasej, uan tlake kiijtosneki nopa tlajtoli “ximokuesokaj”? 2) ¿Kenke Jehová kiniljuik judíos amo ma majmauikaj? 3) ¿Tlake kiijtok Jehová ipan Isaías 46:3, 4 uan kiampa kinyolchikauaskia itekipanojkauaj?

⁷ Ma tikitakaj seyok tlamantli tlen Jehová kitenkajtok ipan pilamochtsi Isaías: “Amo ximokuesokaj pampa na niinmoTeko”. Ipan hebreo, nopa tlajtoli “ximokuesokaj” kiijtosneki “moikantlachilijtinemi pampa moiljuia kichiuilisej tlen amo kuali” o “kampa ueli tlajtlachia pampa majmaui”.

⁸ ¿Kenke Jehová kiniljuik amo ma mokuesokaj nopa judíos katli itstoskiaj ipan Babilonia? Pampa kimajtoya tlauel momajmatiskiaj kema persiaeuanij kiteuiskiaj Babilonia kema tlamiskia nopa 70 xiuitl. Jehová kinmakixtiskia itekipanojkauaj ika nopa altepetl (Is. 41:2-4). Kema babiloniaeuanij uan sekinok maseualmej kiitakej nechka kintekiuiskiaj, kinejkej moyolchikauasej uan yeka nochi moiljuiyayaj amo kinamikiyaya majmauisej. Uan kinchijchijkej miak teotsitsij pampa moiljuiyayaj kinmanauiskiaj (Is. 41:5-7). Jehová kinyolchikajki itekipanojkauaj kema kiniljuik: “Inmojuantij inisraelitajmej, [inelij] innotlatekipanojkauaj”. Kiampa kinextik amo kinitayaya sanse kej sekinok maseualmej. Uan teipa kiniljuik: “Na niinmoTeko” (Is. 41:8-10). Kema kiijtok “na niinmoTeko”, Jehová kinmatiltik judíos ya amo kinilkajtoya uan nojua kinitayaya kej itekipanojkauaj. Uan nojkia kiniljuik ya kinyakanaskia uan kinpaleuiskia ma mochololtikaj. Tlen kiniljuik nelia tlauel kinyolchikajki (xijpoua Isaías 46:3, 4).

9, 10. ¿Kenke amo kinamiki timotekipachosej? Xikijto se neskayotl.

⁹ Ipan ni tonali maseualmej nelia tlauel mokuesouaj pampa pano miak tlamantli tlen amo kuali ipan nochi Tlaltipaktli. Uan maske tojuantij nojkia titlaijiyouiaj, amo kinamiki timotekipachosej, pampa Jehová techiljuia: “Na niinmoTeko”. ¿Kenke tlauel techyolchikaua tlen Jehová kiijtoua?

¹⁰ Ma tikitakaj se neskayotl: ma timoiljuikaj Juan uan Bruno yauij ipan se avión. Kema nopa avión yaui uejkapa peua chikauak mojmolinia. Teipa, se akajya peua kinkamanaljuia uan kiniljuia: “Tijnekij xijmajtokaj namantsi tlauel chikauak uetstok atl uan yeka tlauel mojmolinia ni avión. Ximoseuijtokaj uan amo ximomajmatikaj. amo tleno techpanos”. Juan tlauel majmaui, uan kiita Bruno san tekitl itstok uan nesi amo majmaui. Yeka kiiljuia: “¿Kenke amo timajmaui?”. Bruno san uetska uan kiiljuia Juan: “Kuali nikixmati katli kiuika ni avión. Yaya notata. Nimitsiljuis ajkia ya uan kenijkatsa kuali kichiua iteki, kema tijmatis nopa, ayokmo timajmauis”.

11. ¿Tlake techmachtia tlen kinpanok nopa omej maseualmej katli yauiyayaj ipan avión?

 ¹¹ ¿Tlake techmachtia nopa neskayotl? Kej Bruno, amo timomajmatiaj pampa tojuantij kuali tikixmatij toTata, Jehová. Tijmatij ya techpaleuis ma tikixnamikikaj nochi kuesoli tlen tijpiaj ipan itlamia tonali (Is. 35:4). Maske maseualmej tlauel momajmatiaj, tojuantij amo pampa timotemachiaj ipan Jehová (Is. 30:15). Uan kej kichijki Bruno, tikiniljuiaj maseualmej kenke timotemachiaj ipan toTeotsij. Kiampa, kema kinpanos se tlaouijkayotl o se kuesoli, nojkia motemachisej Jehová kinpaleuis.

12. 1) ¿Tlake nopa expa tlamantli tlen Jehová kitenkajtok? 2) ¿Tlake techilnamikilia tlen Isaías kiijtok?

¹² Ma tikitakaj nopa eyi tlamantli tlen Jehová techtenkauilia: “Niinmechfuerzajmakas. Niinmechpaleuis”. Isaías kiijtojtoya kenijkatsa Jehová kiyolchikauaskia ialtepe. Kiijtok: “ToTeko [...] uala ika iueyi chikaualis uan tlanauatis ika nochi tekiuejkayotl” (Is. 40:10). Tlen kiijtok Isaías techilnamikilia Jehová eli se Tlanauatijketl katli kipia miak chikaualistli. Uejkajkia, Jehová kitekiuik ichikaualis uan kiampa kinpaleuik uan kinmanauik itekipanojkauaj. Uan ipan ni tonali nojkia kinyolchikaua uan kinmanauia katli motemachiaj ipan ya (Deut. 1:30, 31; Is. 43:10).

13. 1) ¿Kema Jehová nojua tlauel techpaleuia? 2) ¿Tlake tlamantli tlauel techyolchikaua?

¹³ Kema tokualankaitakauaj techtlaijiyouiltiaj, Jehová kichiua tlen kitenkajtok uan nojua tlauel techpaleuia ma tikijiyouikaj nopa tlaouijkayotl. Ipan se keski altepemej, toikniuaj amo kinkauaj ma tlajtolmoyauakaj yon ma kitekipanokaj Jehová.  Maske kiampa kichiuaj, amo tlauel timotekipachouaj pampa tlen Jehová techiljuia tlauel techyolchikaua. Ya kiijtoua: “Niyon se tepostli tlen kichijchijtokej tlakamej axuelis inmechtsontlamiltis” (Is. 54:17). Tlen Jehová kitenkajtok techilnamikilia eyi tlamantli tlen tlauel ipati.

14. ¿Kenke tijmatij tokualankaitakauaj techtlaijiyouiltiskiaj?

¹⁴ Achtoui, moneki tikilnamiktosej miakej maseualmej techkualankaitaskiaj (Mat. 10:22). Jesús kiijtok ipan itlamia tonali itokilijkauaj tlauel kintlaijiyouiltiskiaj (Mat. 24:9; Juan 15:20). Ome, moneki tikilnamikisej tlajtolpanextijketl Isaías kiijtok tokualankaitakauaj amo san techkualankaitaskiaj, nojkia techijilnamikiskiaj, techistlakauiskiaj uan tlauel techtlaijiyouiltiskiaj (Mat. 5:11). Jehová kikaua tokualankaitakauaj ma kichiuakaj nopa tlamantli (Efes. 6:12; Apoc. [Rev.] 12:17). Maske kiampa pano, ¿kenke amo kinamiki timajmauisej?

15, 16. 1) ¿Tlake nopa eyi tlamantli tlen moneki tikilnamikisej, uan kenijkatsa Isaías 25:4, 5 kinextia nelia temachtli? 2) ¿Tlake kiijtoua Isaías 41:11, 12 kinpanos katli techkualankaitaj?

¹⁵ Ma tikitakaj nopa eyi tlamantli tlen moneki tikilnamikisej. Jehová kiijtok: “Niyon se tepostli tlen kichijchijtokej tlakamej axuelis inmechtsontlamiltis”. Sanse kej se tepamitl techpaleuia kema tlauel chikauak tlaajaka, Jehová nojkia techmanauia “tlen mosisinijka tlakamej” (xijpoua Isaías 25:4, 5). Maske tokualankaitakauaj techchiuilisej tlen amo kuali, amo nochipa titlaijiyouijtosej (Is. 65:17).

¹⁶ Jehová kineki nojua tlauel ma timotemachikaj ipan ya, yeka techiljuia tlake kinpanos katli techkualankaitaj (xijpoua Isaías 41:11, 12). Maske tokualankaitakauaj  kinekisej techchiuilisej tlen amo kuali o techtlaijiyouiltisej, Jehová kiijtoua tlake kinpanos: “Nochi tlen kinekisej mitsteuisej, mikisej”.

17, 18. 1) ¿Kenke kema tijpouaj Biblia techpaleuia nojua tlauel ma timotemachikaj ipan toTeotsij? Xikijto se neskayotl. 2) ¿Kenke kinamiki timoyoliljuisej ipan texto tlen xiuitl 2019?

¹⁷ Kema nojua kuali tikixmatij Jehová, nojua tlauel timotemachiaj ipan ya. Uan tlaj tijpouasej uan timoyoliljuisej ipan tlen kiijtoua Biblia, techpaleuis nojua kuali ma tikixmatikaj. Biblia kiijtoua kenijkatsa Jehová kinmanauik itekipanojkauaj katli uejkajkia itstoyaj, uan nopa techpaleuia ma timotemachikaj ya nojkia techmokuitlauis ipan ni tonali.

¹⁸ Tlajtolpanextijketl Isaías kitekiuik se neskayotl tlen techpaleuia ma tikitakaj kenijkatsa Jehová techmokuitlauia. Kiixnextia ika se tlapialmokuitlauijketl katli kuali kinmokuitlauia pilborregojtsitsij. Kiijtoua: “Ipan ima kinuikas nopa pilborregojtsitsij nechka iyolixpa” (Is. 40:11). Kema tijmatij kenijkatsa Jehová kejuak chikauak technajnaua, kuali tijyolmatij uan amo timajmauij. Nopa tlalnamijkatlatekipanojketl nojkia kineki amo ma timotekipachokaj o ma timokuesokaj, yeka kitlapejpenik kitekiuis Isaías 41:10 ipan xiuitl 2019: “Amo ximokuesokaj pampa na niinmoTeko”. Ma timoyoliljuikaj ipan nopa texto. Tlaj kiampa tijchiuasej, amo timajmauisej uan tikijiyouisej nochi tlaouijkayotl tlen tikixnamikisej.