MIÉRCOLES ika ijnalok, ipan enero 24, 2018, katli itstokej ipan Kali Betel ne Estados Unidos uan Canadá kinmatiltijkej ni tlamantli: toikni Kenneth Cook kitlapejpenijtoyaj kej se Katli kinyakana Jehová itlajtoltemakauaj.

Toikni Cook tlakatki uan moskaltik ipan altepetl Pensilvania (Estados Unidos). Kema nechka kisaskia tlen secundaria, se katli iuaya momachtiyaya pejki kimachtia Biblia, uan ipan junio 7, 1980, moatsonpoliuiltik. Ya pejki tlatekipanoua kej precursor regular ipan septiembre 1, 1982. Kema panok ome xiuitl, kitlanejkej ma tlatekipanoti ipan kali Betel. Uan ipan octubre 12, 1984, pejki tlatekipanoua ipan Wallkill (Nueva York).

Ipan 25 xiuitl tlen panotok, nopa toikni kipixki miak tekitl kampa kichijchiuaj amatlajkuiloli uan sekinok tlamantli tlen mochiua ipan kali Betel. Ipan 1996, mosiuajtik iuaya se tosiuaikni katli itoka Jamie, uan ya nojkia pejki tlatekipanoua ipan Wallkill. Ipan diciembre 2009 kintitlankej ipan Centro Educativo de la Watchtower ipan Patterson (Nueva York). Nopaya, toikni Cook pejki tlatekipanoua ipan Correspondencia de Redacción. Ipan abril 2016, kema sampa itstoyaj ipan Wallkill, toikniuaj kintitlankej Brooklyn (Nueva York). Kema panok makuili metstli, kintitlankej ipan ueyi Kali Betel ipan Warwick (Nueva York). Ipan enero 2017, toikni Cook kitekimakakej kej se katli kinpaleuiskia Katli kiijkuilouaj amatlajkuiloli tlen nopa toikniuaj Katli kinyakanaj Jehová itlajtoltemakauaj.