1, 2. 1) ¿Kenke amo kenijki tlaj amo tijchiuaj miak tlamantli kema tikilnamikij Jesús imikilis? 2) ¿Tlake kuajkuali tlamantli tlen Jesús kinextia tikitasej ipan ni tlamachtili?

¿UELISKIA tikixtomas tlake tijchiuaj sejse xiuitl kema moilnamiki Cristo imikilis? Uelis kena, pampa amo ouij nochi tlen mochiua ipan nopa tonali. Sekij uelis moiljuiaj: “¿Kenke amo tijchiuaj se ueyi iljuitl tlaj nopa tlanechikoli tlauel ipati?”.

² Kema Jesús itstoya ipan Tlaltipaktli, nochipa tlamachtik tlen melauak ika amo ouij tlajtoli, kiampa maseualmej amo ouij kikuamachiliyayaj (Mat. 7:28, 29). Nojkia kiampa kichijki kema tlamachtik monekiyaya kiilnamikisej * imikilis, ya kinextik amo monekiyaya miak tlamantli kema tikilnamikiskiaj nopa tonali tlen tlauel ipati. Kuali ma tikitakaj tlake kiijtosneki kema tikilnamikij Jesús imikilis, uan nojkia ma tikitakaj se keski tlamantli tlen kichijki uan kiijtok. Kiampa uelis tikitasej kenijkatsa amo moueyimati, amo majmaui uan kenijkatsa tlauel teiknelia. Nojkia tikitasej kenijkatsa uelis tijchiuasej kej ya.

3. Kema tijpouaj Mateo 26:26-28, ¿kenke tikijtouaj Jesús san se keski tlamantli kitekiuik kema kinextik kenijkatsa monekiyaya kiilnamikisej imikilis, uan tlake kiixnextia nopa pantsi uan nopa xokomekaatl?

³ Jesús itstoya ininuaya nopa 11 iapóstoles kema kiijtok monekiyaya  tikilnamikisej imikilis. Kema kichijki nopa, ya kitekiuik pantsi tlen amo kixokoltijtoyaj uan xokomekaatl tlen mokajki tlen nopa iljuitl Pascua (xijpoua Mateo 26:26-28). Kiniljuik iapóstoles nopa ome tlamantli kiixnextiyayaj itlakayo tlen amo tlajtlakole uan ieso, katli nechka temakaskia. Inijuantij amo kenijki moiljuijkej kema kiitakej kichijki nopa ika san se keski tlamantli. ¿Kenke amo kenijki kiitakej?

4. ¿Kenijkatsa tlen kitlalnamiktijkej Marta techpaleuia ma tijkuamachilikaj kenke amo tijtekiuiaj miak tlamantli kema tikilnamikij Cristo imikilis?

⁴ Ma tikilnamikikaj tlen panok kema Jesús ya eyi xiuitl tlajtolmoyajtoya, kema kinpaxaloto iuampoyouaj Lázaro, Marta uan María. Maske Marta nojkia itstoya, ya san mosentlalijtoya kitlamakas katli kinpaxalojtoya. Jesús kitlalnamiktik ika tlaiknelili uan kiiljuik amo monekiyaya tlauel kuali kitlakualchiuilis (Luc. 10:40-42). Teipa, kema nechka temakaskia inemilis, kichijki sanse kej kiiljuijtoya Marta. Amo kitekiuik miak tlamantli kema kinextik kenijkatsa kiilnamikiskiaj imikilis. ¿Tlake kinextik Jesús kema kiampa kichijki?

5. ¿Tlake tijyekouaj tlen Jesús kema amo mochiua miak tlamantli kema tikilnamikij imikilis, uan tlake kinextia Filipenses 2:5-8?

⁵ Nochi tlen kichijki uan tlen kiijtok Jesús kinextik ya amo moueyimatiyaya. Nama tijkuamachiliaj kenke kinextik nopa kuali tlamantli ipan nopa youali kema nechka kimiktiskiaj (Mat. 11:29). Kimajtoya san ya kichiuaskia se tlamantli tlen tlauel ipati pampa temaktiliskia inemilis. Nojkia, kimajtoya Jehová kiyolkuiskia uan kitekimakaskia kej Tlanauatijketl ipan iluikak. Maske kimajtoya nopa, amo kema kinejki ma kiilnamikikaj imikilis ika se ueyi iljuitl. Ya kiniljuik itokilijkauaj sejse xiuitl sampatsi ma kiilnamikikaj imikilis uan amo monekiyaya kichiuasej miak tlamantli (Juan 13:15; 1 Cor. 11:23-25). Kiampa kinextik amo moueyimatiyaya. Tlauel tiyolpakij tijpiasej se Tlanauatijketl katli kinextia nopa kuali tlamantli (xijpoua Filipenses 2:5-8).

6. ¿Kenijkatsa kema tikixnamikij tlaouijkayotl uelis tijnextisej amo timoueyimatij kej Jesús?

⁶ Tijnextisej amo timoueyimatij kej Jesús tlaj nochipa timoiljuisej tlake kinpaleuis sekinok uan amo tlen tojuantij tijnekij (Filip. 2:3, 4). Ma timoiljuikaj tlake kichijki Jesús ipan nopa youali kema kimiktiskiaj. Maske kimatiyaya tlauel tlaijiyouiskia, ya amo mosentlalik ipan tlen kipanoskia. Ipan nopa youali  kinmachtik uan kinyolchikajki itokilijkauaj pampa kimatiyaya tlaijiyouiskiaj kema kiitaskiaj tlen panoskia (Juan 14:25-31). Kiampa kinextik kiyolkokouayaya tlen kinpanoyaya sekinok uan amo tlen ya kipanoskia. Jesús nelia kinextik kenijkatsa moneki amo timoueyimatisej.

7. ¿Kenijkatsa Jesús kinextik amo majmauiyaya kema kipeualtik toTeko iTlakualis?

⁷ Kema ya kipeualtijtoya toTeko iTlakualis, Jesús kinextik amo majmauiyaya. ¿Kenijkatsa kinextik nopa? Kinejki kichiuas tlen Jehová kinauatijtoya maske tlauel tlaijiyouiskia kema kipinaualtiskiaj, kema kitlaijiljuiskiaj uan kema kimiktiskiaj (Mat. 26:65, 66; Lucas 22:41, 42). Amo kema kitlauelkajki toTeotsij uan kiuejkapantlalik itoka, kinextik san toTeotsij kinamiki tlanauatis uan kichijki tlen kinamikiyaya, kiampa maseualmej katli moyolkuepaskiaj ueliskiaj itstosej nochipa. Nojkia, kinkualchijchijki itokilijkauaj, kiampa ueliskiaj kiixnamikisej tlaouijkayotl tlen nechka kipiaskiaj.

8. 1) ¿Tlake kiniljuik Jesús ma kichiuakaj itokilijkauaj? 2) ¿Kenijkatsa itokilijkauaj kinextijkej amo majmauiyayaj kema Jesús ya kimiktijtoyaj?

⁸ Jesús nojkia kinextik amo majmauiyaya kema amo moiljuik san ipan tlaouijkayotl tlen kiixnamikiskia. Nochipa moiljuiyaya tlake kinpolouayaya itokilijkauaj uan kenijkatsa kinpaleuiskia. Teipa, kema kiiljuik Judas ma kisteua, ininuaya itokilijkauaj katli motemachiyayaj yasej iluikak kipeualtik toTeko iTlakualis. Nopa tlamantli kinilnamikiliskia kenijkatsa kinpaleuiskia, pampa ya temaktiliskia inemilis uan kipeualtiskia ininuaya nopa yankuik tlajtolsenkaualistli (1 Cor. 10:16, 17). Kinekiyaya kinpaleuis amo ma kitlauelkauakaj  uan ma tekichiuakaj iuaya ipan iluikak, yeka kiniljuik tlen ya uan iTata kinekiyayaj ma kichiuakaj (Juan 15:12-15). Kema kiniljuik tlake tlaouijkayotl kipiaskiaj, nojkia kiniljuik monekiyaya amo majmauisej (Juan 16:1-4, 33). Kema panok miak xiuitl, itokilijkauaj kinextijkej amo majmauiyayaj uan yeka kinejkej kinpaleuisej ininikniuaj maske kintlaijiyouiltiskiaj (Heb. 10:33, 34).

9. ¿Kenijkatsa uelis tijnextisej amo timajmauij kej Jesús kichijki?

⁹ Ipan ni tonali, ¿kenijkatsa tijnextiaj amo timajmauij kej Jesús kichijki? Kema tikinpaleuiaj toikniuaj katli kintlatsakuiltiaj pampa kitekipanouaj Jehová. Kemantika se keskij toikniuaj kintsakuaj. Kema kiampa pano, moneki timomaijtosej uan tikiljuisej Jehová ma kinpaleui, nojkia uelis tikinmanauisej kema kinteljuiaj tekichiuanij o uejueyij tekichiuanij (Filip. 1:14; Heb. 13:19). Nojkia uelis tijnextisej amo timajmauij tlaj nochipa titlajtolmoyauasej (Hech. 14:3). Sanse kej Jesús, timosentlalijtokej titlajtolmoyauasej maske amo techkauasej uan techtlatsakuiltisej. ¿Tlake uelis tijchiuasej tlaj kemantika timajmauij?

10. ¿Tlake moneki tijchiuasej kema nechka tikilnamikisej Cristo imikilis, uan kenke?

¹⁰ Tlaj timoiljuiaj ipan nopa tlamantli tlen tijchiaj tijselisej pampa Jesús motemaktilik techpaleuis amo ma timajmauikaj (Juan 3:16; Efes. 1:7). Kema nechka tikilnamikisej Cristo imikilis, tlauel techpaleuis ma tijpatiitakaj tlen Jesús kichijki. Pampa ipan nopa tonali tijpouasej ipan Biblia nopa tlapoualistli tlen kinamiki tijpouasej kema nechka moilnamikis Cristo imikilis, kema tijpouasej ma timoyoliljuikaj ipan tlamantli tlen panotiajki kema nechka kimiktiskiaj Jesús. Tlaj kiampa tijchiuasej, kema timosentilisej  ipan toTeko iTlakualis kuali tijkuamachilisej tlen kiixnextia nopa pantsi uan nopa xokomekaatl, uan kenijkatsa tlauel techpaleuia tlen Jesús kichijki. Kema tijkuamachiliaj kenijkatsa techpaleuia tlen kichijkej Jesús uan Jehová ika tojuantij uan ika tochampoyouaj, kichiua nojua tlauel ma timotemachikaj ipan tlen tijselisej uan ayokmo timajmauij timosentlalisej tikijiyouisej nochi tlen techpanotias (Heb. 12:3).

11, 12. ¿Tlake tikitstokej ipan ni tlamachtili?

¹¹ Nama tikitstokej toTeko iTlakualis amo san techilnamikilia tlauel ipati tlen Jesús kichijki, nojkia techpaleuia ma tikitakaj kenijkatsa Jesús amo moueyimati uan amo majmaui. Tiyolpakij pampa tijmatij Jesús nojua kinextia nopa kuajkuali tlamantli pampa ya eli sumo sacerdote ne iluikak uan kiiljuia Jehová ma techtlapojpoljui (Heb. 7:24, 25). Kema tikilnamikij Jesús imikilis tijnextiaj tijtlaskamatiliaj tlen kichijki pampa tijchiuaj tlen technauatik (Luc. 22:19, 20). Tikilnamikij sejse xiuitl ipan tonali 14, metstli nisán. ¡Nopa tonali nelia tlauel ipati!

¹² Kema timoyoliljuiaj ipan toTeko iTlakualis tikitaj se kuali tlamantli tlen Jesús kinextia uan tlen kiyololinik ma temaktili inemilis. Nopa kuali tlamantli kinextik kema itstoya ipan Tlaltipaktli.

13. ¿Kenijkatsa Juan 15:9 uan 1 Juan 4:8-10 kinextia Jehová uan Jesús tlauel techikneliaj, uan ajkia inijuantij kinpaleuia?

¹³ Nochi tlen Jesús kichijki kinextik kenijkatsa Jehová tlauel techiknelia (xijpoua Juan 15:9; 1 Juan 4:8-10). Nopa tlaiknelili tlen Jesús kipia ika tojuantij kiyololinik ma temaktili inemilis. Tlaj timotemachiaj tiasej iluikak o tiitstosej ipan Tlaltipaktli, tlauel techpaleuia pampa Jehová uan Jesús kinextijtokej ika nopa tlaxtlauili tlauel techikneliaj (Juan 10:16; 1 Juan 2:2). Ma tikitakaj kenijkatsa Jesús kinextik kinikneliyaya itokilijkauaj kema kiilnamijkej toTeko iTlakualis.

14. ¿Kenijkatsa Jesús kinextik kinikneliyaya itokilijkauaj?

¹⁴ Kej tikitstokej, Jesús amo kiniljuik itokilijkauaj katli yasej iluikak ma kichiuakaj se tlamantli tlen tlauel ouij kema kiilnamikiskiaj imikilis. Kej panotiualajtok tonali, itokilijkauaj kiilnamiktokej imikilis sejse xiuitl maske amo sanse kej itstokej, pampa kemantika sekij kintsaktokej (Apoc. [Rev.] 2:10). ¿Kichijtokej tlen Jesús kinnauatik? Kena.

15, 16. ¿Kenijkatsa toikniuaj ueltokej kiilnamikij toTeko iTlakualis maske ouij eliyaya?

¹⁵ Jesús itokilijkauaj nochipa kichijtokej kampeka kiilnamikisej Jesús imikilis. Nojkia kichiuaj kampeka kichiuasej kej Jesús tlanauatik maske kemantika ouij. Ma timoiljuikaj tlen kichijki toikni Harold King. Kema tsaktoya ipan China monejki kitejtemolis uan kiampa kiilnamikis Cristo imikilis. Ika tlamantli tlen kipiayaya ichtakatsi kichijchiuayaya tlen kitekiuiskia kema kiilnamikiskia Jesús imikilis. Nojkia kuali kiitayaya kema eliskia nopa tonali. Maske iselti itstoya, ya uikayaya, momaijtouayaya uan kiixtomayaya se tlamachtili.

¹⁶ Ma tikitakaj seyok neskayotl. Kema mochijtoya nopa Ompa Ueyi Tlauilankayotl, se keskij tosiuaikniuaj katli kintsaktoyaj kichijkej kampeka kiilnamikisej toTeko iTlakualis maske ueltoskia kinmiktisej. Uelkej kichijkej ichtakatsi pampa amo monekiyaya miak tlamantli. Inijuantij kiijtouaj: “Tijyaualojkej nopa banca kampa timoseuiyayaj, tijtlalilijkej se yoyomitl uan nopaya tijtlalijkej nopa pantsi uan xokomekaatl. Pampa amo tijnekiyayaj ma techitakaj, tijtlatijkej se vela [...]. Sampa  tikiljuijkej Jehová tijnekiyayaj tijtekiuisej nochi tochikaualis uan kiampa tijuejkapantlalisej itoka”. ¡Nelia tlauel kuali tlaneltokayayaj nopa toikniuaj! Uajka, pampa ueli tikilnamikij Cristo imikilis maske kemantika tlauel ouij, kinextia kenijkatsa Jesús tlauel techiknelia.

17. ¿Tlake ueliskia timotlajtlanisej?

¹⁷ Kema nechka tikilnamikisej Cristo imikilis, kualtiaskia timotlajtlanisej: “¿Kenijkatsa uelis nijnextis niteiknelia kej Jesús? ¿Nimoiljuia tlen kinpaleuis sekinok toikniuaj uan amo san ipan tlen na nechpoloua? ¿Nimoiljuia uelis kichiuasej miak tlamantli, o nikilnamiki se keski tlamantli amo uelis kichiuasej?”. Nochipa ma tijchiuakaj kej Jesús uan ma tijyolmatikaj tlen sekinok kiyolmatij (1 Ped. 3:8).

18, 19. 1) ¿Ipan tlake tlamantli uelis timotemachisej? 2) ¿Tlake timosentlalijtok tijchiuas?

¹⁸ Ayokmo uejkauas tikilnamikisej Cristo imikilis. Kema Jesús “mokuepas” ipan nopa ueyi tlaijiyouilistli, kinuikas iluikak toikniuaj katli “kintlapejpenijtok”. Kema asis nopa tonali, ayokmo sampa tikilnamikisej imikilis (1 Cor. 11:26; Mat. 24:31).

¹⁹ Maske ayokmo tikilnamikisej Jesús imikilis, kena tikilnamikisej ika miak tlaiknelili tlen tijchiuayayaj kema tikilnamikiyayaj toTeko iTlakualis, uan nojkia tikilnamikisej kenijkatsa san Jesús nochipa kinextik amo moueyimati, amo majmaui uan tlauel kiniknelia maseualmej. Katli kiilnamijkej Jesús imikilis kiniljuisej katli itstosej ipan Xochimili kenijkatsa kichiuayayaj. Tlauel kinpaleuis tlen kimatisej. Tlaj tijnekij ipan ni tonali ma techpaleui Cristo imikilis, moneki tijchiuasej kampeka amo timoueyimatisej, amo timajmauisej uan titeiknelisej kej Jesús. Tlaj kiampa tijchiuasej, Jehová tlauel techteochiuas (2 Ped. 1:10, 11).