1, 2. ¿Tlake panok ipan Pentecostés, xiuitl 33?

SE DOMINGO ika ijnalok ipan Pentecostés, xiuitl 33, ipan Jerusalén mosentilijtoyaj se 120 tlaneltokanij ipan se kali (Hech. 1:13-15; 2:1). Jesús ya kiniljuijtoyaj itokilijkauaj ma mokauakaj ipan Jerusalén pampa kiseliskiaj se tlamantli tlen tlauel ipati (Hech. 1:4, 5). ¿Tlake panok?

² “Nimantsi nochi kikajkej tlen elki keja se tlatomonilotl tlen ualajki tlen iluikak. Elki keja se ajakatl tlen tlapitski tlauel chikauak. Uan chikauak kakistik kalijtik kampa moseuijtoyaj. Uan monextik tlen elki keja miak piltlitsitsij tlen moxejxelojki uan kinasik inintsonpak sejse inijuantij. Uan itonal toTeko kalajki ipan ininyolo nochi nopa tlaneltokanij uan kintemitik” (Hech. 2:2-4). Kiampa, Jehová kinmakak itekipanojkauaj itonal tlatsejtseloltik (Hech. 1:8). Inijuantij achtoui kintlapejpenijkej ika toTeotsij itonal * uan kiampa ueliskiaj tlanauatisej iuaya Jesús.

3. ¿Kenke Cristo itokilijkauaj motemachijtoyaj nelia kintlapejpenijtoyaj yasej iluikak?

³ Tlaj nojkia tiitstoskia ininuaya Cristo itokilijkauaj, amo kema tikilkajtoskia tlen panok. Ximoiljui ipan motsonteko tijpixtoskia kejuak se tlilelemektli uan pejtoskia tikamanalti ipan miak tlajtoli (Hech. 2:5-12). Temachtli tijmajtoskia  toTeotsij mitstlapejpenijtok ika itonal. ¿Nochipa kichiua Jehová uejueyi tlamantli kema kintlapejpenia katli yasej iluikak uan nochi sansejko kintlapejpenia? Amo. Ma tikitakaj kenke tikijtouaj ni.

4. Ipan achtoui siglo, ¿nochi sansejko kintlapejpenijkej yasej iluikak? Xikixtoma.

⁴ Achtoui ma tikitakaj kema kitlapejpeniaj se akajya ika toTeotsij itonal. Amo san ipan Pentecostés kintlapejpenijkej 120 Cristo itokilijkauaj. Pampa se kentsi teipa, ipan nopa tonali, se tres mil Cristo itokilijkauaj nojkia kiselijkej toTeotsij itonal kej Jesús kintenkauilijtoya. Inijuantij kintlapejpenijkej yasej iluikak kema moatsonpoliuiltijkej (Hech. 2:37, 38, 41). Kema panok se keski xiuitl, sekinok amo kintlapejpenijkej kema moatsonpoliuiltijkej. Kiampa panok ika toikniuaj katli itstoyaj Samaria, inijuantij kintlapejpenijkej kema ya moatsonpoliuiltijtoyaj (Hech. 8:14-17). Uan maske amo nochi kinpanok kej Cornelio uan katli itstoyaj iuaya, inijuantij kintlapejpenijkej kema ayamo moatsonpoliuiltiyayaj (Hech. 10:44-48).

5. Kej kiijtoua 2 Corintios 1:21, 22, ¿tlake pano kema toTeotsij kitlapejpenia se akajya ika itonal?

⁵ Nama ma tikitakaj tlake pano kema se akajya kitlapejpeniaj ika toTeotsij itonal. Se keskij katli kintlapejpeniaj uelis moiljuiaj Jehová amo nelia kintlapejpenijtok uan motlajtlaniaj kenke inijuantij kintlapejpenik. Uan sekinok uelis moiljuiaj seyok tlamantli. Maske amo sanse kiyolmatij, apóstol Pablo kiijtoua tlake pano ika nochi katli kintlapejpenijtokej: “Kema inkineltokakej Cristo, toTeko inmechsellouijki * [...] para nesis ininaxkauaj pampa inmechmakak itonal para ma itsto inmouaya keja kitenkajtoya achtouia para kichiuaskia. Uan itonal toTeko eltok keja se tlayakankatomij tlen technextilia para temachtli tijselisej nochi tlen techtenkauilijtok techmakas nepa iluikak” (Efes. 1:13, 14). Jehová kitekiuia itonal uan kiampa  kinnextilia temachtli kintlapejpenijtok yasej iluikak. Yeka, itonal eli kejuak se “tlayakankatomij” tlen kichiua ma motemachikaj nelia itstosej iluikak uan amo ipan Tlaltipaktli (xijpoua 2 Corintios 1:21, 22).

6. ¿Tlake moneki kichiuas se akajya katli kitlapejpenijtokej yas iluikak?

⁶ Tlaj se Cristo itokilijka kitlapejpenijtokej ika toTeotsij itonal, ¿kiijtosneki temachtli yas iluikak? Amo. Pampa nopa toikni san kitlanejtokej o kiiyokatlalijtokej yas iluikak. Yeka, tlauel moneki nochipa kiilnamikis ni: “Noikniuaj, xinemikaj nelia kuali para inkinextisej para toTeko temachtli inmechtlapejpenijtok uan inmechnotstok para inelisej ininaxkauaj. Intla inkichijtinemij ni tlamantli tlen niinmechiljuijtok, axkema inuetsisej ipan tlajtlakoli” (2 Ped. 1:10). Yeka, tlaj se akajya kitlanejtokej o kiiyokatlalijtokej yas iluikak, kena uelis yas tlaj amo kema kitlauelkauas toTeotsij (Filip. 3:12-14; Heb. 3:1; Apoc. 2:10).

7. ¿Kenijkatsa kimatij toikniuaj nelia kitlapejpenijtokej?

⁷ Uajka, ¿kenijkatsa kimati se toikni nelia kitlanejtokej ma yaui iluikak? Uelis tijmatisej ika tlen Pablo kintlajkuiljuilik katli itstoyaj Roma uan kintlapejpenijtoyaj kej toTeotsij “itlatsejtseloltijkatlakauaj”. Ya kiniljuik: “Inmojuantij axmoneki inkimakasisej toTeko keja tlatekipanouanij tlen ininteko kinkojtok [...]. Pero inkiselijtokej itonal toTeko tlen inmechchijtok ininkoneuaj toTeko, uan ika itonal toTeko ipan tojuantij ama ueli inkinotsaj toTeko Dios: ‘[Abba,] Papá’. Uan itonal toTeko techyolmelaua ipan toyolo uan ipan totonal para tojuantij tiikoneuaj toTeko” (Rom. 1:7; 8:15, 16). Ika itonal, toTeotsij kinmatiltia nelia kintlapejpenijtok ma yakaj iluikak (1 Tes. 2:12).

8. Kej kiijtoua 1 Juan 2:20, 27, ¿kenijkatsa tijmatij katli kintlapejpenijtokej amo moneki sekinok ma kiniljuikaj tlaj kena kintlapejpenijtokej?

⁸ Jehová kuali kinmatiltia katli kintlanejtok temachtli ma kimatikaj yasej iluikak uan amo ma moiljuikaj tlaj kena o amo yasej (xijpoua 1 Juan 2:20, 27). Maske inijuantij nojkia moneki kikauasej Jehová ma kinmachti ipan tlanechikoli sanse kej nochi Cristo itokilijkauaj, amo moneki se akajya kiniljuis nelnelia kintlapejpenijtokej yasej iluikak. Jehová kuali kinmatiltijtok ika tonal nelia kintlapejpenijtok.

9. Kej kiijtoua Efesios 1:18, ¿tlake kipano se akajya katli kitlapejpeniaj?

⁹ Uelis miakej katli kitekipanouaj Jehová amo kikuamachiliaj tlake pano kema se toikni kitlapejpeniaj yas iluikak. Uan kiampa kinpano pampa inijuantij amo kintlapejpenijtokej. Uan nojkia pampa toTeotsij kichijki maseualmej ma kinekikaj itstosej ipan Tlaltipaktli uan amo ipan iluikak (Gén. 1:28; Sal. 37:29). Maske Jehová kiampa techchijchijki, ya kintlapejpenijtok se keskij katli yasej iluikak. Yeka, kema kintlapejpenia ika itonal, kipatla inintlalnamikilis uan kiampa kinekij itstosej iluikak uan amo ipan Tlaltipaktli (xijpoua Efesios 1:18).

10. ¿Tlake kiijtosneki kema se akajya ‘yankuik tlakatiʼ? (Nojkia xikita nopa nota).

¹⁰ Kema se toikni kitlapejpeniaj yas iluikak, kejuak sampa ‘tlakati’. * Jesús nojkia kinejki kiijtos tlauel ouij kiixtomilisej se akajya katli amo kitlapejpenijtokej kenijkatsa kiyolmati se akajya katli ‘yankuik tlakatkiʼ o katli “itonal toTeko kitlakatiltia” (Juan 3:3-8).

11. ¿Kenijkatsa mopatla inintlalnamikilis katli toTeotsij kintlapejpenia?

 ¹¹ ¿Kenijkatsa mopatla itlalnamikilis se akajya katli toTeotsij kitlapejpenia? Achtouia tlauel kipatiitayaya itstos nochipa ipan Tlaltipaktli, tlauel kinekiyaya kiitas kenijkatsa Jehová kitlamiltis nochi tlen amo kuali uan kichiuas se yejyektsi xochimili ipan Tlaltipaktli. Nojkia uelis moiljuiyaya kiitaskia kema moyolkuiskia se tlen ichampoyouaj o se iuampo. Uan nama, pampa kitlapejpenijkej yas iluikak, mopatlak itlalnamikilis. Amo mopatlak pampa ayokmo kinejki itstos ipan Tlaltipaktli, yon pampa onka miak kuesoli uan tekipacholi, yon pampa moiljuik kuesiuiskia itstos nochipa ipan Tlaltipaktli. Mopatlak tlen kinekiyaya pampa Jehová kipatilik itlalnamikilis kema kitlapejpenik ika itonal uan kichijki ma kineki itstos iluikak.

12. Kej kiijtoua 1 Pedro 1:3, 4, ¿tlake kiyolmati se akajya katli kitlapejpenijtokej kema moiljuia tlen kiselis teipa?

¹² Uelis se toikni katli kitlapejpenijtokej yas iluikak moiljuia amo kinamiki kiselis nopa ueyi tlateochiualistli. Maske kiampa moiljuia, kimati Jehová nelia kitlapejpenijtok. Yeka, tlauel yolpaki uan kitlaskamatilia Jehová (xijpoua 1 Pedro 1:3, 4).

13. ¿Kenijkatsa kiitaj ininnemilis katli kintlapejpenijtokej kema nojua itstokej ipan Tlaltipaktli?

¹³ ¿Kiijtosneki katli kintlapejpenijtokej yasej iluikak kinekij mikisej? Apóstol Pablo kinankilik ni tlajtlanili kema kiijtok inintlakayo kejuak eliskia se “yoyonkali”, ya kiijtok: “Pampa tiitstokej ipan ni Tlaltipaktli ipan totlakayo [o ‘yoyonkali’, TNM] tlen tlantia, techchiuilia ma tiayijtikaj, pero axpampa tijnekij ma miki totlakayo. Tiayijtij pampa tijnekij para toTeko ma techpatilis ni totlakayo tlen tlamis ika se totlakayo tlen kipias yolistli yankuik para nochipa” (2 Cor. 5:4). Uajka, amo kiijtosneki katli kintlapejpenijtokej kinekij mikisej pampa ayokmo kinpaktia itstosej nikaj. Inijuantij tlauel yolpakij itstosej uan mojmostla kinekij kitekipanosej Jehová ininuaya ininchampoyouaj uan ininuampoyouaj. Maske kichiuaj miak tlamantli, inijuantij nochipa kiilnamiktokej tlen teipa kiselisej (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. ¿Tlake tlamantli amo kinextia se akajya kitlapejpenijtokej yas iluikak?

¹⁴ Uelis timotlajtlania tlaj Jehová nojkia mitstlapejpenijtok tias iluikak. Tlaj kiampa timoiljuiaj, tlauel moneki ximotlajtlani ni: ¿tlauel tijneki tijchiuas toTeotsij ipakilis?, ¿tlauel titlajtolmoyaua ika miak pakilistli?, ¿mitspaktia tijpouas Biblia uan timomachtis tlamachtili tlen ouij?, ¿tijmati Jehová kiteochijtok nochi tlen tijchijtok ipan tlajtolmoyaualistli?, ¿tijmati nelia kinamiki tijchiuas kampeka tikinpaleuis sekinok kuali ma mouikakaj iuaya Jehová?, ¿nelia tikitstok kenijkatsa Jehová mitspaleuijtok ipan miak tlamantli? (1 Cor. 2:10). Tlaj kema tijnankilik ni tlajtlanili temachtli tikijtok kena, ¿kinextia mitstlapejpenijtokej tias iluikak? Amo, pampa nochi Jehová itekipanojkauaj kiampa kiyolmatij, maske kena o amo kintlapejpenijtokej. Nojkia, Jehová kinmaka itonal nochi itekipanojkauaj: katli kintlapejpenijtokej uan katli amo. Tlaj ta san timoiljuia mitstlapejpenijtokej o amo nelia kuali tijmati, uajka kiijtosneki amo mitstlapejpenijtokej. Katli nelia kintlanejtokej amo motlajtlaniaj tlaj nelia kintlapejpenijtokej. ¡Inijuantij temachtli kimatij Jehová kintlapejpenijtok!

15. ¿Kenijkatsa tijmatij amo nochi katli kiseliaj toTeotsij itonal kintlapejpenijtokej yasej iluikak?

 ¹⁵ Biblia kiijtoua miakej maseualmej kiselijkej toTeotsij itonal maske amo kintlapejpenijtoyaj yasej iluikak. ToTeotsij itonal kiyakanki David (1 Sam. 16:13). Nopa kipaleuik kuali ma kikuamachili se keski tlamantli tlen Jehová maske ouij eliyaya uan kiyakanki kema kiijkuilok se keski tlaxeloli tlen Biblia (Mar. 12:36). Maske kiampa kichijki, apóstol Pedro kiijtok David amo “tlejkok iluikak” (Hech. 2:34). Juan, katli teatsonpoliuiltiyaya, nojkia kipixtoya toTeotsij itonal (Luc. 1:13-16). Jesús kiijtok: “Axaka seyok tlen tlakajtok ipan ni Tlaltipaktli tlen más ueyi iixtla toTeko kej Juan [teAtsonpoliuiltijketl]”. Maske kiijtok nopa, Jesús kiijtok Juan amo eliskia se katli kitlapejpenijtoyaj tlanauatis iluikak (Mat. 11:10, 11). Uan maske Jehová itekipanojkauaj uelkej kichijkej uejueyi tlamantli pampa kinmakak itonal, amo kintlapejpenik ma yakaj iluikak. ¿Kiijtosneki amo tlauel kuali tlatekipanojkej uan yeka amo kintlapejpenijkej? Amo, san kiijtosneki Jehová kichiuas sampa ma itstokaj ipan Tlaltipaktli kema mochiuas se xochimili (Juan 5:28, 29; Hech. 24:15).

16. ¿Kanke motemachiaj itstosej miakej toTeotsij itekipanojkauaj?

¹⁶ Miakej toTeotsij itekipanojkauaj katli itstokej ipan Tlaltipaktli amo motemachiaj yasej iluikak. Sanse kej Abraham, Sara, David, Juan teAtsonpoliuiltijketl uan sekinok tlakamej uan siuamej katli itstoyaj uejkajkia, inijuantij motemachiaj itstosej ipan Tlaltipaktli kema tekichijtos toTeotsij iTlanauatijkayo (Heb. 11:10).

17. ¿Tlake tlajtlanili tijnankilisej ipan seyok tlamachtili?

¹⁷ Ipan ni tonali, nojua itstokej se keskij katli kintlapejpenijtokej yasej iluikak. Yeka, amo kenijki tlaj timotlajtlaniaj se keski tlamantli (Apoc. 12:17). Uelis timotlajtlaniaj: “¿Kenijkatsa kinamiki moitasej katli kintlapejpenijtokej? ¿Kenijkatsa kinamiki tikitasej tlaj se akajya ipan totlanechikol peua kikua pantsi uan kiiji vino kema moilnamiki Cristo imikilis? ¿Kinamiki timotekipachosej tlaj tikitaj sejse xiuitl momiakilijtiauij kikuaj pantsi uan kiijij vino?”. Ipan seyok tlamachtili tijnankilisej ni tlajtlanili.