1, 2. ¿Tlake kiniljuik se iluikaejketl nopa siuamej katli yajtoyaj kampa kitlalijtoyaj Jesús itlakayo, uan tlake kiniljuik Jesús?

TLANEXILIJKEJ ipan nisán 16, xiuitl 33. Se keskij siuamej, katli tlauel moyolkokojtoyaj, yajkej kampa kitoktoyaj Jesucristo, uelis ya panotoya kipano 36 horas. Yauiyayaj pampa kinekiyayaj kitlalilisej tlaajuiyajkayotl uan sekinok tlamantli ipan itlakayo. Kema asitoj, san mosentlachilijkej pampa kaktoya kampa kitlalijtoyaj itlakayo. Se iluikaejketl kiniljuik Jesús moyolkuitoya, uan teipa kiniljuik: “Inmechtlayakankuilis hasta estado Galilea uan nepa inkiitasej” (Mat. 28:1-7; Luc. 23:56; 24:10).

² Kema nopa siuamej kistejkej, Jesús kinnamikito uan kiniljuik: “Xiakaj, xikinyolmelauatij noikniuaj para ma yakaj estado Galilea uan nepa timopantisej” (Mat. 28:10). Jesús kinekiyaya kinnauatis itokilijkauaj se keski tlamantli tlen tlauel ipati, pampa kema moyolkuik, nimantsi kinejki mosentilis ininuaya.

3, 4. ¿Kenke tikijtouaj nopa tlanauatili tlen eltok ipan Mateo 28:19, 20 amo san apóstoles kinmakakej? (Xikita tlaixkopinkayotl ipan ipantsajka).

³ (Xijpoua Mateo 28:16-18; 28:19, 20 *). Ipan nopa tlanechikoli, Jesús kinixtomilik itokilijkauaj monekiyaya kichiuasej se tekitl tlen tlauel ipati, se tekitl tlen nama nojkia tijchiuaj.  Kiniljuik: “Uajka, xiakaj, uan xijchiuakaj ma elikaj notokilijkauaj maseualmej tlen nochi altepemej, [...] xikinmachtikaj ma kineltokakaj nochi tlen niinmechnauatijtok”.

⁴ Jesús kineki nochi itokilijkauaj ma tlajtolmoyauakaj. Yeka nopa tlanauatili amo san kinmakakej nopa 11 apóstoles. ¿Kenijkatsa tijmatij ni? Pampa kema Jesús temakak nopa tlanauatili ipan Galilea, amo san apóstoles itstoyaj nopaya. Tlaj tikilnamikij, nopa iluikaejketl kiniljuik siuamej kiitaskiaj Jesús ipan Galilea. Uajka, uelis nopa siuamej nojkia itstoyaj nopa tonali. Nojkia, teipa apóstol Pablo kiijtok Jesús monextik ininixpa kipano “makuili ciento toikniuaj” (1 Cor. 15:6). ¿Kanke itstoyaj nopa maseualmej?

5. ¿Kenijkatsa tijmatij Pablo moiljuijtoya ipan tlen kiijtoua Mateo 28 kema kiijkuilok 1 Corintios 15:6?

⁵ Tlen Pablo kiijtok ipan 1 Corintios 15:6, kinextia moiljuijtoya ipan tlen panok kema mosentilijkej ipan Galilea, tlen ijkuilijtok ipan Mateo 28. ¿Kenke kiampa tikijtouaj? Se, pampa miakej itokilijkauaj Jesús euayayaj Galilea. Yeka, uelis moiljuik ueliskiaj mosentilisej ipan se tlamimili tlen Galilea uan amo ipan se kali ipan Jerusalén. Ome, Jesús mosentilijtoya ininuaya iapóstoles ipan Jerusalén kema ya moyolkuitoya. Tlaj kinektoskia san apóstoles ma tlajtolmoyauakaj uan ma kinpaleuikaj sekinok ma elikaj itokilijkauaj, uajka kiniljuijtoskia nopa kema mosentilik ininuaya ipan Jerusalén, uan amo kiniljuijtoskia nopa siuamej uan sekinok itokilijkauaj ma mosentilikaj iuaya ipan Galilea (Luc. 24:33, 36).

6. 1) ¿Kenijkatsa Mateo 28:20 kinextia tlen Jesús kinnauatik itokilijkauaj moneki nama mochiuas? 2) ¿Mochijtok tlen Jesús tlanauatik?

⁶ Eyi, Jesús amo san kiniljuik nopa 11 apóstoles ma kinpaleuikaj sekinok ma mochiuakaj itokilijkauaj. ¿Kenijkatsa tijmatij? Kema Jesús tlanki kinkamanaljuia itokilijkauaj, kiniljuik ni: “Mojmostla niitstos inmouaya uan nojkia kema tlamis nochi tlamantli tlen amo kuali” (Mat. 28:20, TNM). Kej Jesús kiijtok ipan ni tonali miakej maseualmej mochiuaj itokilijkauaj. Sejse xiuitl, nechka 300,000 maseualmej moatsonpoliuiltiaj uan mochiuaj Jehová itlajtoltemakauaj.

7. ¿Tlake tikitasej ipan ni tlamachtili, uan kenke?

⁷ Maske miakej katli kinmachtiaj ika Biblia moatsonpoliuiltiaj, sekij nesi amo kinekij mochiuasej Cristo itokilijkauaj. Maske kinpaktia tlen kinmachtiaj, amo kichiuaj kampeka moatsonpoliuiltisej. Tijnekij tikinpaleuisej katli tikinmachtiaj ma kichiuakaj ipan ininnemilis tlen kiyekouaj ipan Biblia uan ma mochiuakaj Cristo itokilijkauaj. Ipan ni tlamachtili tikitasej tlake uelis tijchiuasej uan kiampa tlen tikinmachtiaj maseualmej asis ipan ininyolo uan kenijkatsa tikinpaleuisej kuali ma tlaneltokakaj. ¿Kenke tlauel moneki tijmatisej? Pampa kemantika monekis tikitasej tlaj nojua kinamiki tijmachtisej se akajya o ayokmo.

8. ¿Kenke kemantika ouij asi ipan ininyolo maseualmej tlen tikinmachtiaj?

⁸ Jehová kineki maseualmej ma kitekipanokaj pampa nelia kiikneliaj. Yeka, tlauel moneki timosentlalisej tikinpaleuisej katli tikinmachtiaj ma kikuamachilikaj Jehová kitekipachoua tlen kinpano uan tlauel kiniknelia. Tijnekij ma kiitakaj Jehová kej “ininTata tlen iknotsitsij. Yajaya kinchiuilia tlen xitlauak nopa kaualtoauiuaj” (Sal. 68:5). Tlaj kiitaj kenijkatsa toTeotsij tlauel kiniknelia, uelis kinyololinis nojkia ma kiiknelikaj. Sekij  uelis kimatij ouij kiitasej Jehová kej ininTata katli tlauel kiniknelia, pampa uelis inintata amo kiniknelik (2 Tim. 3:1, 3). Yeka, kema tikinmachtisej ma tikinnextilikaj nopa kuajkuali tlamantli tlen Jehová kinextia. Nojkia ma tikinpaleuikaj kimatisej toTeotsij kineki ma itstokaj nochipa uan kineki kinpaleuis. ¿Tlake uelis tijchiuasej?

9, 10. ¿Tlake amochtli moneki tijtekiuisej kema titlamachtisej, uan kenke moneki tijtekiuisej?

⁹ Ma tijtekiuikaj amochtli ¿Tlake nelnelia tlamachtia Biblia? uan amochtli Xijchiuakaj ma inmechiknelijto toTeotsij. * Ni ome amochtli techpaleuia ma asi ipan ininyolo tlen tikinmachtiaj. Se neskayotl, ipan tlamachtili 1 tlen amochtli Tlake tlamachtia kinankilia ni tlajtlanili: ¿Kitekipachoua toTeotsij tlen techpano, o ya kichiua ma titlaijiyouikaj? ¿Kenijkatsa kiyolmati toTeotsij kema titlaijiyouiaj? ¿Uelis timouampojchiuasej iuaya Jehová? Uan nopa amochtli Ma inmechiknelijto toTeotsij kipaleuis  katli tijmachtiaj ma kikuamachili tlen Biblia tetlajtolmaka kipaleuis kuali ma itsto uan kuali ma mouika iuaya toTeotsij. Maske ya tikinmachtijtokej sekinok ika ni amochtli, moneki kuali timokualchijchiuasej uan timoiljuisej kenijkatsa kipaleuis nopa maseuali katli tijmachtiaj.

¹⁰ Ximoiljui katli tijmachtia kineki kimatis se tlamachtili tlen amo eltok ipan amatlajkuiloli tlen tlauel tijtekiuiaj. Uajka, uelis tikiljuis iselti ma kipoua nopa tlamachtili uan nojua tijmachtis ika amochtli Tlake tlamachtia o Ma inmechiknelijto toTeotsij.

11. ¿Kema moneki timomaijtosej iuaya katli tijmachtiaj, uan kenijkatsa uelis tijchiuasej?

¹¹ Ma timomaijtokaj kema titlamachtisej. Kema tijmachtiaj se akajya, ¿kema ueliskia peuas timomaijtosej? Kema peua tijmachtiaj kej kinamiki, moneki nima tijchiuasej. Moneki tijpaleuisej ma kiita uelis tijkuamachilisej Biblia tlaj tijkauaj toTeotsij itonal ma techpaleui. Sekij toikniuaj kinixtomiliaj kenke momaijtouaj kema peuaj momachtiaj uan kipouaj Santiago 1:5, kiijtoua: “Tlaj se tlen inmojuantij kineki achi más tlalnamikilistli pampa axkimati tlake ipakilis toTeko ipan inemilis, ma kitlajtlani toTeko uan yajaya kimakas. Yajaya tlen temaka miak tlalnamikilistli, uan axkiajuas pampa kitlajtlania”. Uan teipa kintlajtlaniaj katli kinmachtiaj: “¿Kenijkatsa uelis tijtlajtlanisej tlalnamikilistli toTeotsij?”. Uelis ya iselti tlanankilis ika tlamaijtoli.

12. ¿Kenijkatsa uelis tijtekiuisej Salmo 139:2-4 uan kiampa tikinpaleuisej katli tikinmachtiaj ma momaijtokaj?

¹² Xikinnextili kenijkatsa momaijtosej. Xikiniljui Jehová kineki kintlakakilis kema momaijtosej. Nojkia, xikiniljui uelis kiiljuisej tlen eltok ininyolijtik, kenijkatsa kiyolmatij uan kipouilisej tlen axaka kiiljuiskiaj. Ma tikiniljuikaj Jehová kuali kinixmati (xijpoua Salmo 139:2-4). Nojkia uelis tikiniljuisej ma kiiljuikaj Jehová ma kinpaleui kipatlasej inintlalnamikilis uan ayokmo kichiuasej tlen momajtokej kichiuaj. Ma timoiljuikaj ipan se akajya katli ya uejkaj momachtia Biblia uan nojua kichiua se iljuitl tlen Jehová amo kipaktia. Maske kimati amo kinamiki kichiuas, ya tlauel kipaktia. Moneki tikiljuisej ma momaijto uan ma kiiljui Jehová tlake nelnelia kiyolmati uan ma kipaleui kichiuas tlen ya kipaktia (Sal. 97:10).

13. 1) ¿Kenke moneki nima tikintlaneuisej katli tikinmachtiaj ma yakaj tlanechikoli? 2) ¿Tlake uelis tijchiuasej uan kiampa kuali kiyolmatisej kema yasej tlanechikoli?

¹³ Nima ma tikintlaneuikaj ma yakaj tlanechikoli. ¿Kenke? Pampa tlen nopaya kiitasej uan kikakisej uelis asis ipan ininyolo uan kinpaleuis kuali ma tlaneltokakaj. Yeka, moneki ma tikinnextilikaj nopa video ¿Tlake tijchiuaj ipan Kali kampa timosentiliaj? uan ma tikintlaneuikaj. Tlaj tiuelij, ma tikinkuitij ininchaj. Uan kema tikinmachtiaj, amo nochipa ma tiakaj ika sanse toikni, nojkia moneki tiasej ika sekinok, kiampa yolik kinixmajtiasej nochi toikniuaj uan amo pinauasej kema yasej tlanechikoli.

14. ¿Tlake kipaleuis katli tijmachtiaj kuali ma tlaneltoka?

¹⁴ Tijnekij tikinpaleuisej katli tikinmachtiaj kuali ma tlaneltokakaj (Efes. 4:13). Kema se akajya peua momachtia, uelis san moiljuia kenijkatsa kipaleuis nopa tlamachtili. Uan kema peua kiiknelia Jehová, uelis peuas moiljuis kenijkatsa kinpaleuis sekinok uan nojkia kenijkatsa kinpaleuis toikniuaj tlen tlanechikoli (Mat. 22:37-39). Nojkia, nochipa ma tikiljuikaj tlauel kuali  tlaj temakas se kentsi tomij pampa kiampa uelis tlapaleuis ma momoyaua toTeotsij iTlajtol.

15. ¿Kenijkatsa uelis tijpaleuisej katli tijmachtiaj kimatis kenijkatsa kisenkauas se kuesoli?

¹⁵ Ma tikinnextilikaj kenijkatsa kisenkauasej kuesoli. Ma timoiljuikaj katli tijmachtiaj pejki tlajtolmoyaua uan techiljuia se toikni kiyolkokok. ¿Tlake tijchiuasej? Moneki tijnextilisej tlen Biblia kiijtoua uan amo timokalakisej ipan nopa kuesoli. Ma tikiljuikaj uelis kichiuas ome tlamantli: 1) kitlapojpoljuis nopa toikni. Uan tlaj amo kiilkaua tlen panok, 2) ika miak tlaiknelili ma monojnotsa iuaya nopa toikni uan kiampa sampa kuali mouikasej (xikita Mateo 18:15). Ma tijpaleuikaj katli tijmachtiaj ma moiljui tlake uelis kiijtos. Nojkia, ma tijmachtikaj kenijkatsa kitekiuis JW Library^®, Tlen ika momachtiaj Jehová itlajtoltemakauaj uan jw.org^® uan kiampa kimatis kenijkatsa kisenkauas se kuesoli. Tlaj kiampa kichiuas kema ayamo moatsonpoliuiltia, kipaleuis teipa kuali ma mouika ininuaya toikniuaj.

16. ¿Kenke tlauel kuali tlaj tikintlaneuisej sekinok ma tlamachtitij touaya?

¹⁶ Ma tijtlaneuikaj toikni katli techpaxaloua chijchikuasej metstli uan sekinok toikniuaj. ¿Kenke? Pampa kej tikitakej ipan párrafo 13, sekinok toikniuaj uelis kipaleuisej katli tijmachtiaj ipan sekinok tlamantli. Ma timoiljuikaj katli tijmachtiaj nojua tlachichina maske kichijtok kampeka kikauas. Tlaj kiampa pano, uelis tijtlaneuisej se toikni katli nojkia kimatki ouij kikauas tlachichinas, pampa ya uelis kiiljuis tlake kipaleuik. Tlaj tijmatij ouij titlamachtisej pampa tiitstokej iuaya se toikni katli kuali tlamachtia, uelis tikiljuisej ya ma tlamachti. Moneki tijkauasej sekinok ma techpaleuikaj. Ma tikilnamikikaj tijnekij tikinpaleuisej kuali ma tlaneltokakaj katli tikinmachtiaj.

17, 18. ¿Tlake techpaleuis ma tijmatikaj tlaj nojua tijmachtisej se akajya o ayokmo?

¹⁷ Tlaj katli tijmachtiaj amo kichiua tlen kiyekoua, moneki tikitasej tlaj nojua kinamiki tijmachtisej o ayokmo. Moneki tikilnamikisej maseualmej amo sanse elij. Sekij nima tlaneltokaj uan sekij amo. Yeka, ma timotlajtlanikaj: “Maske ouij tlen kipano, ¿kichiua kampeka kitekipanos toTeotsij? ¿Kichiua ipan inemilis tlen kiyekoua?” (Mat. 28:20, TNM). Maske uelis yolik tlaneltokatia, moneki kinextis kipatlatok se keski tlamantli ipan inemilis.

¹⁸ ¿Tlake uelis tijchiuasej tlaj katli tijmachtiaj amo kipatiita tlen momachtia? Ma timoiljuikaj ya tijmachtijkej ika amochtli Tlamachtia Biblia uan nama pejki tijmachtiaj ika amochtli Ma inmechiknelijto toTeotsij, uan amo kema yajtok tlanechikoli yon kema moilnamiki Cristo imikilis. Nojkia, kemantika  amo momachtia maske amo tleno kitsakuilia. Tlaj kiampa pano, moneki tikamanaltisej iuaya. *

19. ¿Tlake uelis tikiljuisej katli tijmachtiaj tlaj tikitaj amo kipatiita tlen momachtia, uan tlake moneki tikilnamikisej?

¹⁹ Kema tikamanaltisej iuaya, achtoui ma tijtlatsintokikaj: “¿Tlake tlamantli timoiljuia mitstsakuilia uan yeka amo tijtekipanoua Jehová?”. Tlaj se akajya katli ya uejkaj tijmachtijtokej kiijtoua maske kipaktia momachtis Biblia, ya amo kema kitekipanos Jehová, ¿kinamiki nojua tijmachtisej? O uelis techiljuis tlake tlamantli kitsakuilia uan yeka amo kitekipanoua Jehová. Uelis moiljuia amo kema kimatis kenijkatsa tlajtolmoyauas kajkalpa. Kema tijmatisej tlake kiyolmati, uelis tijmatisej kenijkatsa tijpaleuisej.

20. ¿Kenijkatsa Hechos 13:48 uelis techpaleuis tijmatisej tlaj nojua tijmachtisej se akajya o ayokmo?

²⁰ Se keskij katli tikinmachtiaj uelis elij kej israeleuanij katli itstoyaj kema Ezequiel itstoya. Jehová kichijki nopa tlajtolpanextijketl ma kiijto tlen inijuantij: “San kikakij motlajtol para mopakiltiaj. Mitsitaj keja tieliskia se tlakatl tlen yejyektsi itos para uikas uikatl tlen teiknelijkayotl, o se tlen yejyektsi tlatsotsona. Kikakij motlajtol, pero axkichiuaj tlen tikiniljuia ma kichiuakaj” (Ezeq. 33:32). Maske uelis tijmatisej ouij tikiljuisej ayokmo tijmachtisej, moneki tikilnamikisej “axmokaua miak tonali” (1 Cor. 7:29). Yeka, amo ma timotonalpolokaj ika maseualmej katli amo kinekij kitekipanosej Jehová uan ma tikintemokaj katli kipiaj “kuali ininyolo” pampa kinekij “itstosej nochipa” (xijpoua Hechos 13:48 *).

21. ¿Tlake texto tikilnamiktosej ipan xiuitl 2020, uan kenke tlauel ipati?

²¹ Nopa texto tlen motekiuis ipan xiuitl 2020, techpaleuis ma timosentlalikaj nojua kuali titlamachtisej uan tikinpaleuisej maseualmej ma elikaj Cristo itokilijkauaj. Ipan nopa texto ijkuilijtok tlen Jesús kiijtok kema tlamachtik ipan tepetl tlen Galilea: “Xiakaj, uan xijchiuakaj ma elikaj notokilijkauaj, [...] xikinatsonpoliuiltikaj” (Mat. 28:19, TNM).