1. ¿Kenijkatsa tijyolmati pampa Jehová eli “teiknelijkayotl”?

IKA se keski tlajtoli apóstol Juan kiijkuilok se tlamantli tlen tlauel ipati: “ToTeko, yajaya teiknelijkayotl” (1 Juan 4:8). Jehová techmakak tonemilis uan nojkia ya eli “teiknelijkayotl”. Ya tlauel techiknelia, uan pampa kiampa kichiua tlauel tiyolpakij, amo timajmauij uan amo tleno techpoloua.

2. 1) Kej kiijtoua Mateo 22:37-40, ¿tlake ome tlanauatili tlauel ipati? 2) ¿Kenke uelis tijmatij ouij tijneltokasej nopa ompa tlanauatili?

² Cristo itokilijkauaj amo uelis kitlapejpenisej tlaj teiknelisej o amo, eli se tlanauatili (xijpoua Mateo 22:37-40). Kema kuali tikixmatij Jehová techpaleuia tijchiuasej nopa achtoui tlanauatili pampa ya eli xitlauak, nochipa tlauel techiknelia uan kitekipachoua tlen techpano. Maske kiampa tijchiuaj, uelis tijmatij ouij tijchiuasej nopa ompa tlanauatili. ¿Kenke? Pampa toikniuaj elij tlajtlakolejkej uan kemantika kichiuaj o kiijtouaj se tlamantli tlen techyolkokoua. Pampa Jehová kimatiyaya kiampa panoskia, kiniljuik se keskij tlakamej ma kiijkuilokaj ipan Biblia kenijkatsa tijnextiskiaj titeikneliaj uan kenke moneki tijchiuasej. Se tlen katli kiijkuilok, elki Juan (1 Juan 3:11, 12).

3. ¿Tlake kipankixtik Juan?

³ Ipan nopa amochtli tlen Juan kiijkuilok kipankixtik nochi Cristo itokilijkauaj moneki moiknelisej. San ipan pilamochtsi Juan ajachika kamanalti tlen tlaiknelili uan amo kej ipan pilamochtsi Mateo, Marcos uan Lucas.  Kema kiijkuilok pilamochtsi Juan uan nopa eyi amatlajkuiloli uelis kipixtoya se 100 xiuitl. Tlen kiijkuilok kinextia kema se Cristo itokilijka kineki kichiuas se tlamantli moneki kichiuas pampa teiknelia (1 Juan 4:10, 11). Maske ya nopa kiijkuilok, nojkia ouij kimatki teiknelis.

4. ¿Nochipa teiknelik Juan?

⁴ Kema Juan nojua eliyaya telpokatl, amo nochipa teiknelik. Ma tikilnamikikaj kema Jesús ininuaya iapóstoles yauiyayaj Jerusalén uan panoyayaj Samaria, nopaya ipan se pilaltepetsi amo kuali kinselijkej. ¿Tlake kichijki Juan? Kiiljuik Jesús: “¿Tijneki ma tijnauatikaj tlitl ma uetsi tlen iluikak [...] uan ma kintlamitlati ni tlakamej?” (Luc. 9:52-56). Ipan seyok tonali amo kintlepanitak apóstoles kema ya uan iikni Santiago kichiualtijkej ininnana ma kiiljuiti Jesús ma kintekimaka kampa ya tlanauatis. Yeka, kema kimatkej nopa sekinok apóstoles tlen kichijtoyaj, tlauel kualankej (Mat. 20:20, 21, 24). Maske Juan kichijki tlen amo kinamiki, Jesús nochipa kiiknelik (Juan 21:7).

5. ¿Tlake tikitasej ipan ni tlamachtili?

⁵ Ipan ni tlamachtili tikitasej tlen Juan kichijki uan se keski tlamantli tlen tlaiknelili. Tikitasej kenijkatsa uelis tijnextisej tikinikneliaj toikniuaj uan nojkia tikitasej tlake uelis kichiuas se tetaj uan kiampa kinextis kiniknelia ichampoyouaj.

6. ¿Kenijkatsa Jehová kinextijtok techiknelia?

⁶ Se maseuali katli teiknelia amo san moneki kiijtos, moneki kinextis ika tlen kichiua nelia teiknelia (nojkia xikita Santiago 2:17, 26). Ma tikilnamikikaj Jehová techiknelia (1 Juan 4:19). Uan kinextia ika yejyektsitsij tlajtoli tlen eltok ipan Biblia (Sal. 25:10; Rom. 8:38, 39). Nojkia tijmatij techiknelia amo san ika tlen kiijtoua, nojkia ika tlen kichiua. Juan kiijkuilok: “ToTeko technextilik hasta kanke techiknelia pampa techtitlanilik iKone iyojtsi para ma uala ipan ni Tlaltipaktli para ma tijpiakaj yolistli yankuik ipampa ya” (1 Juan 4:9). Jehová kikajki iKone ma tlaijiyoui uan ma miki topampa (Juan 3:16). Yeka, timotemachiaj ya techiknelia.

7. ¿Kenijkatsa kinextik Jesús tlauel techiknelia?

⁷ Jesús nojkia kiampa kinextik, kiniljuik itokilijkauaj tlauel kinikneliyaya  (Juan 13:1; 15:15). Ika tlen kichijki kinextik nelia tlauel kinikneliyaya iapóstoles uan nojkia tlauel techiknelia. Kiijtok: “Se tlen motemaktilis uan mikis ipampa iuampoyouaj, yajaya más teiknelia que nochi tlakamej” (Juan 15:13). Nama, ¿tlake moneki tijchiuasej pampa Jehová uan Jesús tlauel techikneliaj?

8. Kej kiijtoua 1 Juan 3:18, ¿tlake moneki tijchiuasej?

⁸ Kema tijchiuaj tlen Jehová uan Jesús kiijtouaj, tijnextiaj nelia tikinikneliaj (Juan 14:15; 1 Juan 5:3). Jesús nojkia tlanauatik ma timoiknelikaj (Juan 13:34, 35). Yeka, tijnextiaj tikinikneliaj toikniuaj ika tlen tijchiuaj uan amo san ika tlen tikijtouaj (xijpoua 1 Juan 3:18). ¿Ipan tlake tlamantli uelis tijnextisej tikinikneliaj toikniuaj?

9. ¿Tlake kichijki Juan pampa teikneliyaya?

⁹ Maske Juan ueltoskia tekitis iuaya itata kampa michtlajtlamayayaj uan kiampa ueliskia kitlanis miak tomij, ya mosentlalik nochipa kinpaleuis maseualmej ma kimatikaj tlen melauak tlen Jehová uan Jesús. Tlen kitlapejpenik elki ouij pampa kitlaijiyouiltijkej uan ipan itlamia achtoui siglo kema ya ueuejtixtoya, kiuikakej sejkanok pampa tlajtolmoyauayaya (Hech. 3:1; 4:1-3; 5:18; Apoc. 1:9). Maske Juan tsaktoya pampa tlajtolmoyauayaya, nochipa motekipachok ipan tlen kinpanok sekinok. Ma tikilnamikikaj kema itstoya ipan Patmos kiijkuilok tlen kiitak ipan se temiktli uan kintitlanilik toikniuaj ipan tlanechikoli uan kiampa kimatkej tlen panoskia “ipan tlen ueli tlalochtli” (Apoc. 1:1). Uelis kema ayokmo tsaktoya kiijkuilok tlen Jesús kichijki kema itstoya ipan Tlaltipaktli uan kema tlajtolmoyajki. Nojkia, kiijkuilok eyi amatlajkuiloli kampa kinyolchikajki sekinok apóstoles. ¿Kenijkatsa uelis tijchiuasej kej Juan?

10. ¿Kenijkatsa uelis tijnextisej tikinikneliaj maseualmej?

¹⁰ Uelis tijnextisej tikiniknelia sekinok ika tlen tijtlapejpeniaj tijchiuasej. Tlen kinauatia Satanás kineki ma timotonalpolokaj uan ma tijchiuakaj kampeka titlapijpiasej o ma techixmatikaj maseualmej. Maske kiampa pano, miakej toikniuaj kimoyauaj nopa kuali tlamachtili uan kinpaleuiaj maseualmej ma monechkauikaj ika Jehová. Yeka, sekij senkistok tlatekipanouaj.

11. ¿Kenijkatsa kinextiaj miakej toikniuaj kiikneliaj Jehová uan nojkia toikniuaj?

¹¹ Miakej Cristo itokilijkauaj kichiuaj kampeka tekitisej uan kiampa uelis kinmakasej tlen moneki ininchampoyouaj. Maske kiampa kichiuaj, inijuantij nojkia tlapaleuiaj ipan toTeotsij itlanechikol. Sekij tlapaleuiaj kema toikniuaj kintlasojsoljuilia se tlenijki, kema kichijchiuaj kali kampa timosentiliaj, uan nochi uelis titemakasej tomij ika nochi toyolo. Kema kiampa tijchiuaj tijnextiaj tikikneliaj Jehová uan toikniuaj. Nojkia, tijnextiaj tikinikneliaj toikniuaj kema tiauij tlanechikoli maske tisiajtokej, kema tijpanoltiaj se tlamachtili maske timajmauij uan kema tijchiuaj kampeka tikinyolchikauasej sekinok, uelis kema peua o kema tlami tlanechikoli, maske tojuantij nojkia tijpiaj kuesoli (Heb. 10:24, 25). ¡Tlauel tijtlaskamatij nochi tlen toikniuaj kichiuaj!

12. ¿Kenijkatsa Juan nojkia kinextik kinikneliyaya toikniuaj?

 ¹² Juan kinextik kinikneliyaya toikniuaj kema kiniljuiyaya kuali tlen kichijtoyaj uan kema kintlajtolmakayaya. Kema kintlajkuiljuilik amo san kiniljuik tlauel kuali tlaneltokayayaj uan kipatiitayaya tlen kichiuayayaj, nojkia kiniljuik tlake monekiyaya kichiuasej uan kiampa amo tlajtlakolchiuasej (1 Juan 1:8-2:1, 13, 14). Tojuantij nojkia uelis tikinyolchikauasej toikniuaj ika tlen kichiuaj. Uan tlaj tikitaj se akajya peua kichiua tlen amo kinamiki o amo kuali monejnemiltia, uelis tijnextisej tikikneliaj tlaj tijtlajtolmakaj ika tlatlepanitakayotl. Maske uelis achi timajmauij tijchiuasej nopa, Biblia kiijtoua tojuantij uelis timopaleuisej tijchiuasej tlen kuali (Prov. 27:17).

13. ¿Tlake amo kinamiki tijchiuasej?

¹³ Nojkia tijnextiaj tikinikneliaj toikniuaj kema amo tijchiuaj se keski tlamantli. Amo moneki nima tikualanisej kema techiljuisej se tlenijki. Ma tikilnamikikaj tlen panok kema Jesús nechka mikiskia uan kiniljuik itokilijkauaj ueliskiaj itstosej nochipa tlaj kikuaskiaj itlakayo uan kiiskiaj ieso (Juan 6:53-57). Miakej amo kinpaktik tlen kiijtok, yeka kitlauelkajkej. Maske kiampa kichijkej, katli nelia eliyayaj iuampoyouaj amo kitlauelkajkej, kej Juan katli mokajki iuaya. Maske amo kikuamachilijkej tlake kinekiyaya kiijtos uan kenke kiampa kiijtok, amo moyolkokojkej yon moiljuijkej mokuapolojtoya. Inijuantij motemachijkej ipan Jesús pampa nochipa kiniljuiyaya tlen melauak (Juan 6:60, 66-69). Yeka, tlauel ipati amo nima tikualanisej ininuaya toikniuaj. Kema kinekisej techiljuisej se tlenijki, moneki kuali tikintlakakilisej (Prov. 18:13; Ecl. 7:9).

14. ¿Kenke amo kinamiki tikinkualankaitasej toikniuaj?

¹⁴ Juan nojkia kiijtok amo kinamiki tikinkualankaitasej toikniuaj. Tlaj amo tijchiuasej tlen kiijtok, uelis tijchiuasej tlen Satanás kineki (1 Juan 2:11; 3:15). Kiampa kinpanok se keskij Cristo itokilijkauaj ipan achtoui siglo. Satanás kichijki ma mokualankaitakaj uan ma moxelokaj. Kema Juan kintlajkuiljuilik, ipan tlanechikoli itstoyaj se keskij  katli kiampa kichiuayayaj, kej Diótrefes. Ya tlauel kinxelouayaya toikniuaj ipan tlanechikoli. Amo kintlepanitayaya toikniuaj katli tepaxalouayayaj, katli cuerpo gobernante kintitlaniyaya. Pampa tlauel tekualankaitayaya, kinejki kinkixtis tlen tlanechikoli toikniuaj katli kuali kinseliyayaj katli kinkualankaitayaya (3 Juan 9, 10). Ipan ni tonali Satanás nojkia kitekiuia miak tlamantli uan kiampa kixelos toTeotsij itlanechikol. Yeka, amo ma titekualankaitakaj, kiampa amo timoxelosej.

15. ¿Tlake moneki kiilnamikisej tetajmej?

¹⁵ Kema se tetaj kinmaka ichampoyouaj tlen moneki, kinextia kiniknelia (1 Tim. 5:8). Maske kiampa kichiua, moneki kiilnamikis tlauel ipati kinpaleuis ichampoyouaj kuali ma tlaneltokakaj (Mat. 5:3). Ma tikitakaj tlen Jesús kichijki. Pilamochtsi Juan kiijtoua kema Jesús kikuapilojtoyaj, nojua kitekipachouayaya ichampoyouaj. Juan uan María, inana Jesús, itstoyaj kampa kikuapilojtoyaj. Kema Jesús tlauel tlaijiyouijtoya, kiiljuik Juan ma kimokuitlaui inana (Juan 19:26, 27). Maske María kinpixtoya sekinok ikoneuaj katli ueliskiaj kimokuitlauisej, Jesús amo kiniljuik ma kimokuitlauikaj pampa ayamo eliyayaj itokilijkauaj. Jesús kinejki kuali ma kimokuitlauikaj inana uan ma kipaleuikaj nojua kuali tlaneltokas.

16. ¿Tlake tekitl kipixtoya Juan?

¹⁶ Juan kipixtoya miak tekitl. Pampa eliyaya apóstol, monekiyaya kiitasej sekinok kenijkatsa kuali tlajtolmoyauayaya. Nojkia uelis mosiuajtijtoya. Yeka, monekiyaya kinmakas tlen moneki ichampoyouaj uan kinpaleuis kuali ma tlaneltokakaj (1 Cor. 9:5). ¿Tlake kiyekouaj tetajmej?

17. ¿Kenke eli tlauel ipati tetajmej kinpaleuisej ininchampoyouaj kuali ma tlaneltokakaj?

¹⁷ Uelis tetajmej nojkia kipiaj miak tekitl. Moneki kuali kichiuasej ininteki, kiampa katli ininuaya tekitij kuali kiitasej uan kiueyichiuasej Jehová (Efes. 6:5, 6; Tito 2:9, 10). Nojkia, uelis kipiasej se keski tekitl ipan tlanechikoli, kej kinpaxalosej uan kinyolchikauasej toikniuaj uan kuali tlajtolmoyauasej. Nojkia, se tetaj  moneki mojmostla momachtis Biblia ininuaya ichampoyouaj. Tlaj kiampa kichiua, inijuantij kitlaskamatisej pampa kinmaka tlen moneki, kinyolchikaua uan kinpaleuia nojua kuali ma tlaneltokakaj (Efes. 5:28, 29; 6:4).

18. ¿Ipan tlake motemachijtoya Juan?

¹⁸ Juan itstoya miak xiuitl uan kipanok miak tlamantli. Kipixki miak tlaouijkayotl tlen ueltoskia kichiuas ayokmo kuali ma tlaneltoka. Maske kiampa kipanok, nochipa kichijki kampeka kichiuas tlen Jesús tlanauatik, kej kiniknelis iikniuaj. Juan motemachijtoya Jehová uan Jesús kiikneliyayaj uan kipaleuiskiaj kiijiyouis tlen ueli tlaouijkayotl (Juan 14:15-17; 15:10; 1 Juan 4:16). Ya nochipa kinextik ika tlen kiijtok uan ika tlen kichijki kinikneliyaya iikniuaj, maske Satanás uan tlen kinauatia kinekiyayaj kichiuasej ayokmo ma teikneli.

19. ¿Tlake techyololinia ma tijchiuakaj 1 Juan 4:7, uan kenke?

¹⁹ Sanse kej kema Juan itstoya, ipan ni tonali pampa Satanás tlanauatia nojkia itstokej miakej maseualmej katli amo teikneliaj uan tekokoliaj (1 Juan 3:1, 10). Ya amo kineki ma tikiniknelikaj toikniuaj, yeka amo ma tijkauakaj kiampa ma kichiua. Ma timosentlalikaj tikiniknelisej toikniuaj, uan ma tijnextikaj ika tlen tikijtouaj uan ika tlen tijchiuaj. Tlaj kiampa tijchiuaj, tlauel kuali tijyolmatisej pampa tiitstokej ipan Jehová itlanechikol uan nelnelia tiyolpakisej (xijpoua 1 Juan 4:7).