1. Kej David, ¿tlake uelis motlatsintokiaj toikniuaj?

NOCHI tijnekij kuali tiitstosej uan tijpiasej tlaseuilistli. Maske kiampa tijnekij tiitstosej, nochi tikixnamikij tlaouijkayotl. Uelis se keskij toikniuaj kiyolmatij kej tlanauatijketl David, katli kitlatsintoki Jehová: “¿Hasta kema nijpias kuesoli ipan noyolo uan noyoltsij tlaijiyouijtinemis? ¿Hasta kema nokualankaitaka noja nechtlanis?” (Sal. 13:2).

2. ¿Tlake tikitasej ipan ni tlamachtili?

² Maske ipan ni tonali nochi timokuesouaj, onka se keski tlamantli tlen techpaleuis ayokmo tlauel kiampa tijyolmatisej. Ipan ni tlamachtili tikitasej tlake kichiua ma timokuesokaj, uan nojkia tikitasej chikuasej tlamantli tlen techpaleuis amo tlauel kiampa ma tijyolmatikaj.

3. ¿Tlake kuesoli tikixnamikij, uan tlake amo tiuelij tijchiuaj?

³ Onka se keski tlamantli tlen kichiua ma timotekipachokaj uan tojuantij amo tleno ueli tijchiuaj. Ma timoiljuikaj sejse xiuitl amo uelis tijchiuasej ayokmo ma patiyoua tlakualistli, yoyomitl o kali kampa tiitstokej. Nojkia amo tijmatij kema katli ininuaya titekitij o katli ininuaya timomachtiaj, techtetsopasej ma timomekatikaj o ma titlaixpanokaj. Uan amo uelis tijchiuasej ayokmo ma itstokaj tlachtekinij kampa tiitstokej. Tijmatij  kiampa pano pampa miakej maseualmej amo kichiuaj tlen Biblia tetlajtolmaka. Satanás, katli kinauatia Tlaltipaktli, kimati se keskij maseualmej ‘mokuatotoniskiaj ika miak tlamantli’ uan nopa kichiuaskia amo ma kitekipanokaj Jehová (Mat. 13:22; 1 Juan 5:19). Yeka, onka miak kuesoli tlen kintetsopa maseualmej.

4. ¿Tlake ueliskia panos tlaj tlauel techtekipachoua tlen techpano?

⁴ Kema tijpiaj se ueyi kuesoli, uelis tlauel techtekipachos uan kichiuas san ya nopa ma timoiljuijtokaj. Ma timoiljuikaj ipan ni tlamantli: uelis techtekipachoua pampa kampa titekitij amo miak techtlaxtlauiaj uan amo techaxilia tlen ika tikinpanoltisej tochampoyouaj, kema timokokouaj uan amo tiuelij titekitij o pampa ayokmo techtekimakaj. Nojkia, uelis techtekipachoua tijtlauelkauasej Jehová kema techtetsopasej o kema Satanás kichiuas maseualmej ma kinteuikaj toTeotsij itekipanojkauaj. Yeka, uelis timotlatsintokiaj: “¿Kinamiki nimotekipachos ika ni tlamantli?”.

5. ¿Tlake kinejki kiijtos Jesús kema kiijtok: “Amo ximokuesokaj”?

⁵ Jesús kiniljuik itokilijkauaj: “Amo ximokuesokaj” (Mat. 6:25). ¿Kinejki kiijtos amo ma timokuesokaj ika niyon se tlamantli? Amo. Ma tikilnamikikaj se keskij Jehová itekipanojkauaj katli uejkajkia itstoyaj nojkia tlauel mokuesojkej, uan nopa amo kichijki Jehová ayokmo kuali ma kinita (1 Rey. 19:4; Sal. 6:3). * Jesús san kinekiyaya techyolchikauas uan techpaleuis amo tlauel ma timokuesokaj pampa nopa kichiuaskia ma tijtlauelkauakaj Jehová. Yeka, ¿tlake uelis tijchiuasej kema tlauel timotekipachouaj? (Xikita recuadro “Tlen uelis tijchiuas”).

6. Kej kiijtoua Filipenses 4:6, 7, ¿tlake techpaleuis amo tlauel ma timotekipachokaj?

⁶ 1) Nochipa ximomaijto. Kema tlauel mitstetsopa kuesoli, tlauel mitspaleuis tlaj tikiljuis Jehová tlen mitspano (1 Ped. 5:7). Tlaj kiampa tijchiuas Jehová mitsmakas “tlaseuilistli” ipan moyolo tlen sekinok “axuelis kimachilisej” (xijpoua Filipenses 4:6, 7). ToTeotsij kitekiuia itonal uan kiampa techpaleuia amo tlauel ma timotekipachokaj (Gál. 5:22).

7. ¿Tlake kinamiki tikilnamikisej kema timomaijtouaj?

⁷ Kema timomaijtos ika Jehová, xijtlapo moyolo. Xikiljui tlen nelnelia mitstekipachoua uan kenijkatsa tijyolmati. Tlaj tikita onka se tlamantli tlen mitspaleuis, uajka xikiljui Jehová ma mitsmaka tlalnamikilistli uan ma mitspaleui tijchiuas ipan monemilis. Uan tlaj amo tleno ueli tijchiua, uajka xikiljui Jehová ma mitspaleui amo tlauel timotekipachos. Tlaj tikiljuiaj tlen nelnelia techtekipachoua, tikitasej kenijkatsa technankilis ika tlen tikiljuiaj. Tlaj amo nima technankilia, amo ma timokuesokaj. Jehová kineki ajachika ma timomaijtokaj uan ma tikiljuikaj tlen nelnelia techtekipachoua (Luc. 11:8-10).

8. ¿Tlake nojkia moneki tikiljuisej kema timomaijtouaj?

⁸ Kema timomaijtos uan tikiljuis Jehová nochi tlen mitspano, nojkia uelis  tikilnamikis kenijkatsa mitsteochijtok maske tijpia tlaouijkayotl, uan xijtlaskamatili tlen kichijtok. Kemantika uelis amo tijmatis kenijkatsa tikiljuis tlen tijyolmati pampa tlauel timokuesoua. Xikilnamiki, ya mitstlakakilis maske san tikiljuis: “¡Xinechpaleui Jehová!” (2 Crón. 18:31; Rom. 8:26).

9. ¿Tlake moneki tijchiuasej kema timajmauij?

⁹ 2) Ximotemachi ipan Jehová uan amo ipan ta. Ipan siglo 8 a.u.J., judeaeuanij tlauel majmauiyayaj pampa moiljuiyayaj asiriaeuanij kinteuiskiaj uan eliskiaj tlatekipanouanij, yeka kiniljuijkej egiptoeuanij ma kinpaleuikaj (Is. 30:1, 2). Jehová kiniljuik amo kuali kisaskia tlen kitlapejpenijtoyaj (Is. 30:7, 12, 13). Ika itlajtolpanextijkaj Isaías, Jehová kiniljuik tlake monekiyaya kichiuasej. Kiijtok: “Intla inmotemachisej ipan na uan axinmolinisej, inkipiasej chikaualistli” (Is. 30:15).

10. Xikijto se keski tlamantli kampa monekis tijnextis timotemachia ipan Jehová.

¹⁰ ¿Ipan tlake tlamantli uelis tijnextisej nelia timotemachiaj ipan Jehová? Ximoiljui mitsiljuiaj xitekiti kampa kuali mitstlaxtlauisej, maske kuali tijtlanis ayokmo tijpias miak tonali titlaueyichiuas. O uelis se katli iuaya titekiti uan amo moatsonpoliuiltijtok kineki xinemi iuaya. Nojkia, uelis se tlen mochampoyouaj mitsiljuis: “Xijtlapejpeni: tijneki tiitstos touaya o tijtekipanos moTeotsij”. Maske eli ouij kema tikixnamikij kuesoli, timotemachiaj Jehová nochipa techiljuis tlake uelis tijchiuasej (Mat. 6:33; 10:37; 1 Cor. 7:39). ¿Tijnextisej timotemachiaj ipan Jehová uan tijchiuasej tlen techiljuia?

11. ¿Tlake tlapoualistli ueliskia timomachtisej uan kiampa amo timajmauisej kema techtlatsakuiltisej?

¹¹ 3) Xikita kenijkatsa mitspaleuis tlen kichijkej uejkajkia. Ipan Biblia onka miak neskayotl kampa kinextia kenke eli tlauel ipati amo timajmauisej uan timotemachisej ipan Jehová. Kema timomachtijtias, xikita tlake kinpaleuik toTeotsij itekipanojkauaj amo ma majmauikaj uan ma motemachikaj ipan Jehová. Ma tikilnamikikaj, apóstoles amo majmajkej kema nopa ueyi tlasentilistli tlen kinyakanayaya judíos kiniljuik ayokmo ma tlajtolmoyauakaj. Yeka, kiijtojkej: “Moneki tijneltokilisej toTeko Dios achtoui uan axtlakamej” (Hech. 5:29). Uan maske kinuijuitejkej amo majmajkej. ¿Kenke? Pampa kimatiyayaj Jehová kinpaleuiyaya uan kuali kinitayaya. Yeka, nojua kimoyajkej nopa kuali tlamachtili (Hech. 5:40-42). Nojkia, Esteban amo majmajki kema nechka kimiktiskiaj, yeka ixayak “nesiyaya keja ixayak se iluikaejketl” (Hech. 6:12-15). ¿Kenke? Pampa motemachiyaya Jehová kuali kiitayaya.

12. Kej kiijtoua 1 Pedro 3:14 uan 4:14, ¿kenke uelis tiyolpakisej kema techtlaijiyouiltiaj?

¹² Apóstoles motemachiyayaj Jehová itstoya ininuaya pampa uejkajkia kinpaleuik ma kichiuakaj uejueyi tlamantli (Hech. 5:12-16; 6:8). Maske ipan ni tonali Jehová amo kiampa kichiua, ipan Biblia techiljuia ya techpaleuis uan techmakas itonal kema titlaijiyouisej pampa tijchiuaj tlen xitlauak (xijpoua 1 Pedro 3:14; 4:14). Yeka, amo san ma timoiljuijtokaj tlake tijchiuasej kema techtlatsakuiltisej, tlauel techpaleuis tlaj tijchiuaj kampeka tikitasej tlake uelis tijchiuasej  nama, uan kiampa nojua timotemachisej Jehová techpaleuis uan techmanauis. Kej apóstoles, nojkia uelis tikilnamikisej tlen Jesús kiijtok: “Pampa ipan nopa hora na niinmechmakas tlalnamikistli [...], uan niyon se inmokualankaitakaj axuelis inmechnankilis” (Luc. 21:12-19). Nojkia, ma tikilnamikikaj kema se Jehová itekipanojka miki uan amo kitlauelkaua, ya kiyolkuis kej eliyaya pampa amo kiilkajtok.

13. ¿Kenijkatsa uelis techpaleuis tlaj timomachtisej tlen kichijkej katli majmajkej uan amo motemachijkej ipan Jehová?

¹³ Nojkia, tlauel techpaleuis tijpouasej tlen kichijkej katli majmajkej uan amo motemachijkej ipan Jehová. Tlaj timomachtisej tlen kinpanok, amo tijchiuasej kej inijuantij. Kema tlanauatijketl Asa pejtoya tlanauatia, motemachik ipan Jehová kema tlateuik uan tlatlanki pampa ya kiteochijki (2 Crón. 14:9-12). Uan, ¿tlake panok kema moteuik ininuaya itlateuijkauaj tlanauatijketl Baasa tlen Israel, katli amo tlauel miakej eliyayaj? Nama, Asa amo kiiljuik Jehová ma kipaleui kej kichijki achtouia, ya kiniljuik siriaeuanij ma kipaleuikaj (2 Crón. 16:1-3). Uan kema tlauel mokokok uan nechka mikiskia, amo kiiljuik Jehová ma kipaleui (2 Crón. 16:12).

14. ¿Tlake techmachtia tlen Asa kichijki?

¹⁴ Kema Asa pejtoya tlanauatia uan kipiayaya tlaouijkayotl, kiiljuiyaya Jehová ma kipaleui. Teipa ayokmo kiampa kichijki uan pejki kichiua tlen ya moiljuiyaya. Maske nesiyaya amo kenijki kema kiniljuik siriaeuanij ma kipaleuikaj kinteuisej israeleuanij, nopa amo kipaleuik. Jehová kiiljuik ika se itlajtolpanextijka: “Pampa timotemachik ipan nopa tlanauatijketl tlen tlali Siria para mitspaleuis uan axipan toTeko Dios tlen moTeko, ama tijpolojtok nopa tonali para tijtlanis yajaya uan nochi isoldados” (2 Crón. 16:7). Yeka, kema tijchiuaj se tlamantli amo ma timotemachikaj san ipan tojuantij, moneki tijtemosej Jehová itlapaleuil ipan Biblia. Maske kemantika monekis nimantsi tijtlapejpenisej se tlamantli, tlauel techpaleuis tlaj timotemachisej ipan Jehová uan amo timajmauisej.

15. ¿Tlake uelis tijchiuasej kema tijpouaj Biblia?

¹⁵ 4) Xijtsontekontlali textos. Kema tijpouasej se tlapoualistli ipan Biblia ma tijtsontekontlalikaj textos tlen tlauel ipati, kampa kiijtoua tlauel techpaleuis tlaj amo timajmauij uan timotemachiaj ipan Jehová. Tlauel techpaleuis tlaj chikauak tijpouaj o tikijkuilouaj se keski textos uan tikompauiaj. Jehová kiiljuik Josué ma kipoua nopa Tlanauatili uan ma monejneuili tonaya uan tlayoua, kiampa tlayakanaskia kej kinamiki. Tlen Josué kichiuaskia kipaleuiskia amo ma majmaui kema kiixnamikiskia tlen ueli tlaouijkayotl (Jos. 1:8, 9). Ipan Biblia tijpantisej tlen techpaleuis amo ma timajmauikaj uan kuali ma tijyolmatikaj kema tikixnamikij kuesoli uan tekipacholi (Sal. 27:1-3; Prov. 3:25, 26).

16. ¿Kenijkatsa Jehová kintekiuia toikniuaj uan kiampa techpaleuia?

¹⁶ 5) Xiitsto ininuaya toikniuaj. Jehová kintekiuia toikniuaj uan inijuantij techpaleuiaj kuali ma tijyolmatikaj uan nojua ma timotemachikaj ipan ya. Ipan tlanechikoli techpaleuia tlen nopaya moixtoma, kema tlanankiliaj toikniuaj uan  kema tikamanaltij ininuaya (Heb. 10:24, 25). Nojkia, tlauel techyolchikauas tlaj tikiljuisej se touampo tlen totlanechikol nochi tlen tijyolmatij. Se touampo uelis techiljuis “se kuali tlajtoli” tlen techpaleuis ma tiyolpakikaj uan ayokmo tlauel ma timotekipachokaj (Prov. 12:25).

17. Kej kiijtoua Hebreos 6:19, ¿kenijkatsa tlen timotemachiaj tijselisej teipa techpaleuis kema tijpiasej kuesoli?

¹⁷ 6) Ximoiljui ipan tlen tijselis teipa. Tlen timotemachiaj tijselisej teipa eli “keja tijpiaj toalma kuali ilpitok”, uan nopa techpaleuia amo ma timosentlalikaj ipan tlaouijkayotl tlen tikixnamikij (xijpoua Hebreos 6:19). Yeka, ximonejneuili ipan tlen Jehová kitenkajtok kichiuas teipa, kampa ayokmo techtekipachos yon se tlamantli (Is. 65:17). Ximoiljui ipan yankuik Tlaltipaktli onkas tlaseuilistli uan ayokmo onkas tlen amo kuali (Miq. 4:4). Nojkia, tlaj tikinpouilis sekinok tlen Jehová kichiuas teipa, mitspaleuis kuali titlaneltokatos. Yeka, xijchiua kampeka titlajtolmoyauas uan tikinpaleuis sekinok ma elikaj Cristo itokilijkauaj. Tlaj kiampa tijchiuas, nelnelia timotemachis tijselis tlen Jehová kitenkajtok (Heb. 6:11).

18. ¿Tlake tijselisej teipa uan tlake techpaleuis ma tikijiyouikaj tlen techpano?

¹⁸ Pampa nechka tlamis tlen amo kuali, tijmatij nojua tlauel onkas kuesoli, tlaouijkayotl uan tekipacholi. Nopa texto tlen 2021, techilnamikilia kenijkatsa tikixnamikisej tlaouijkayotl uan timotemachisej ipan Jehová, uan amo san ipan tochikaualis. Ipan ni xiuitl, nochi ma tijnextikaj ika tlen tijchiuaj nelnelia timotemachiaj ipan tlen Jehová techtenkauilijtok: “Intla inmotemachisej ipan na uan axinmolinisej, inkipiasej chikaualistli” (Is. 30:15).