TLAMACHTILI 4
¿Kenke timosentiliaj kema moilnamiki Cristo imikilis?
“Xijchiuakaj ya ni para inkineskayotisej innechilnamikij” (LUC. 22:19).
UIKATL 20 Jehová titechmakak moKone
TLEN MOIXTOMAS *
1, 2. 1) ¿Kema tlauel tikilnamikij katli ya mijki? 2) ¿Tlake tlanauatik Jesús kema nechka kimiktiskiaj?
KEMA miki se katli tikikneliaj, maske ya panok miak xiuitl mijki, nojua tikilnamikij. Uan nojua tlauel tikilnamikij kema kiaxitia xiuitl kema mijki.
2 Sejse xiuitl, ipan nochi Tlaltipaktli timosentiliaj pampa tikilnamikij Cristo imikilis (1 Ped. 1:8). Kiampa tijchiuaj, pampa tikilnamikij ya techmakixtik tlen tlajtlakoli uan mikilistli (Mat. 20:28). Jesús kinekiyaya itokilijkauaj ma kiilnamikikaj imikilis. Ipan nopa youali kema nechka mikiskia, tlakuajki ininuaya itokilijkauaj uan kiniljuik: “Xijchiuakaj ya ni para inkineskayotisej innechilnamikij” (Luc. 22:19). *
3. ¿Tlake tikitasej ipan ni tlamachtili?
3 Maske tlauel miakej maseualmej mosentiliaj kema kiilnamikij Cristo imikilis, san se keskij katli mosentiliaj ipan nopa tonali kintlapejpenijtokej yasej iluikak, pampa nopa sekinok itstosej ipan Tlaltipaktli. Ipan ni tlamachtili tikitasej kenke nochi inijuantij tlauel yolpakij kiilnamikisej sejse xiuitl Cristo imikilis. Nojkia, tikitasej kenke techpaleuia tiitstosej ipan nopa tonali. Achtoui ma tikitakaj kenke miakej katli motemachiaj yasej iluikak yauij ipan nopa tlanechikoli.
¿KENKE KATLI KINTLAPEJPENIJTOKEJ MOSENTILIAJ IPAN NOPA TONALI?
4. ¿Kenke katli kintlapejpenijtokej yasej iluikak kikuaj pantsi uan kiijij vino kema moilnamiki Cristo imikilis?
4 Sejse xiuitl katli kintlapejpenijtokej yasej iluikak, itstokej kema moilnamiki Cristo imikilis pampa ipan nopa tonali kikuaj nopa pantsi uan kiijij nopa vino. ¿Kenke kiampa kichiuaj? Techpaleuis tijmatisej tlaj tikitasej tlen Jesús kichijki ipan nopa youali kema nechka kimiktiskiaj. Kema Jesús tlanki kichiua Pascua ininuaya itokilijkauaj, tlanauatik sejse xiuitl ma moilnamiki imikilis. Teipa kitokaxtijkej toTeko iTlakualis. Kema itstoya ininuaya 11 iapóstoles, kinmakak pantsi uan kiniljuik ma kikuakaj, uan nojkia kinmakak vino uan kiniljuik ma kiikaj. Nojkia, kiniljuik nopa ome tlajtolsenkauali: nopa yankuik tlajtolsenkaualistli uan nopa tlajtolsenkaualistli tlen toTeotsij iTlanauatijkayo (Luc. 22:19, 20, 28-30). * Ni tlajtolsenkaualistli, kinpaleuik apóstoles uan se keskij Cristo itokilijkauaj ma elikaj tlanauatianij uan sacerdotes ne iluikak (Apoc. 5:10; 14:1). Katli kintlapejpenijtokej yasej iluikak uan nojua itstokej ipan Tlaltipaktli kinpaleuia ni ome tlajtolsenkaualistli, yeka ipan nopa tonali san inijuantij uelis kikuasej nopa pantsi uan kiijisej nopa vino.
5. ¿Tlake nojua moneki kichiuasej katli kintlapejpenijtokej?
5 Nojkia, kema tlapejpenilmej mosentiliaj ipan nopa tonali kinpaleuia ma moyoliljuikaj ipan tlen kinselisej teipa. Jehová kinmakatok se ueyi tlateochiualistli: 1) amo kema mikisej uan kipiasej inintlakayo tlen amo nempoliui ipan iluikak, 2) tekichiuasej iuaya Jesús uan nojkia ininuaya nopa sekinok tlen nopa 144,000 uan 3) itstosej iixpa Jehová (1 Cor. 15:51-53; 1 Juan 3:2). Maske kintlanejtokej yasej iluikak, nojua moneki kichiuasej kampeka amo kitlauelkauasej toTeotsij uan kiampa kiselisej tlen kintenkauilijtokej (2 Tim. 4:7, 8). Inijuantij tlauel yolpakij kema moyoliljuiaj ipan tlen kiselisej (Tito 2:13). ¿Uan nopa “sekinok tlakamej”? (Juan 10:16). ¿Kenke nojkia mosentiliaj kema moilnamiki Cristo imikilis? Ma tikitakaj kenke kiampa kichiuaj.
¿KENKE NOPA “SEKINOK TLAKAMEJ” MOSENTILIAJ IPAN NOPA TONALI?
6. ¿Kenke sejse xiuitl nopa “sekinok tlakamej” nojkia mosentiliaj kema moilnamiki Cristo imikilis?
6 Nopa “sekinok tlakamej” mosentiliaj kema moilnamiki Cristo imikilis pampa kiitaj tlen nopaya mochiua, uan amo pampa kiijij nopa vino o kikuaj nopa pantsi. Ipan 1938 nochi katli itstosej ipan Tlaltipaktli pejkej mosentiliaj ipan nopa tonali. Ipan pilamochtsi La Torre del Vigía abril, 1938, kiijtok “tlauel kuali uan kinamiki” nochi nopa sekinok tlakamej ma “itstokaj ipan nopa tlanechikoli uan ma kiitakaj tlen nopaya mochiua”. Sanse kej kema se akajya mosiuajtia uan nochi katli nopaya itstokej tlauel yolpakij, nopa “sekinok tlakamej” nojkia yolpakij ika tlen kiitaj mochiua ipan nopa tonali kema moilnamiki Cristo imikilis.
7. ¿Kenke nopa “sekinok tlakamej” kitlakakiliaj tlamachtili tlen moixtoma kema moilnamiki Cristo imikilis?
7 Nopa “sekinok tlakamej” nojkia mosentiliaj ipan nopa tonali pampa moyoliljuiaj ipan tlen kiselisej teipa. Nojkia, kinpaktia kikakisej nopa tlamachtili pampa nojkia moixtoma tlen kichiuasej Cristo uan nopa 144,000 ipan nopa Mil Xiuitl. Jesús kinyakanas nopa 144,000, uan kiampa kichiuasej Tlaltipaktli se xochimili uan ma elikaj xitlauakej nochi maseualmej katli kipiasej kuali ininyolo. Tlauel kuali kema nopa “sekinok tlakamej” kiitaj tlen mochiua kema moilnamiki Cristo imikilis, pampa kinpaleuia ma moyoliljuikaj ipan tlen kiijtoua Isaías 35:5, 6; 65:21-23 uan Apocalipsis 21:3, 4. Kema moyoliljuiaj sampa itstosej ininuaya katli tlauel kinikneliaj, kinpaleuia nojua ma motemachijtokaj ipan tlen kiselisej teipa uan amo ma kitlauelkauakaj Jehová (Mat. 24:13; Gál. 6:9).
8. ¿Kenke nojkia nopa “sekinok tlakamej” mosentiliaj kema kiilnamikij Cristo imikilis?
8 Nopa “sekinok tlakamej” nojkia mosentiliaj kema kiilnamikij Cristo imikilis pampa kinekij kinextisej kinikneliaj uan kinpaleuiaj katli kintlapejpenijtokej yasej iluikak. Biblia kiijtok inijuantij mosentikapaleuiskiaj. Ma tikitakaj se keski tlajtolpanextili tlen kinextia kenijkatsa kichiuaskiaj.
9. Kej kiijtoua Zacarías 8:23, ¿tlake kiyolmatij nopa “sekinok tlakamej” ika tlapejpenilmej?
9 (Xijpoua Zacarías 8:23, TNM). * Ipan ni tlajtolpanextili kiijtoua tlake kiyolmatij nopa “sekinok tlakamej” ika katli kitlapejpenijtokej yasej iluikak. Nopa tlajtoli “judío” uan “inmouaya”, kineki kiijtos nochi katli kintlapejpenijtokej yasej iluikak (Rom. 2:28, 29). Nopa “matlaktli tlakamej tlen kamanaltij miak tlajtoli” elij nopa “sekinok tlakamej”. Inijuantij kejuak motlatskiliaj ipan ininyoyo o amo kintlauelkauaj katli kintlapejpenijtokej yasej iluikak, uan sansejko kiueyichiuaj Jehová. Yeka, kema moilnamiki Cristo imikilis, nopa “sekinok tlakamej” nojkia itstokej ininuaya, kiampa kinextiaj sansejko kitekipanouaj Jehová.
10. ¿Tlake kichijtok Jehová uan kiampa moaxitijtok tlen kiijtoua Ezequiel 37:15-19, 24, 25?
10 (Xijpoua Ezequiel 37:15-19, 24, 25). Jehová kichijtok ma moaxiti ni tlajtolpanextili kema katli kintlapejpenijtokej uan nopa “sekinok tlakamej” sansejko tekitij. Nopa tlajtolpanextili kamanalti tlen ome kuauitl. Katli motemachiaj yasej iluikak, elij kej nopa kuauitl tlen Judá (iteipaixuiuaj kintlapejpeniyayaj ma tlanauatikaj ipan Israel). Uan katli motemachiaj itstosej ipan Tlaltipaktli, elij kej nopa kuauitl tlen Efraín. * Jehová kinsansejkotilijtok uan kiampa itstokej kej san se kuauitl. Ni kiijtosneki sansejko kitekipanouaj Jesús katli eli Tlanauatijketl, yeka sejse xiuitl sansejko kiilnamikij Cristo imikilis, pampa kipiaj san se inintlapialmokuitlauijka (Juan 10:16).
11. Kej kiijtoua Mateo 25:31-36, 40, ¿kenijkatsa nopa “borregojmej” kinpaleuiaj katli kintlapejpenijtokej?
11 (Xijpoua Mateo 25:31-36, 40). Nopa “borregojmej” o “sekinok tlakamej” tlen kiijtoua ipan ni texto, kinixnextia nochi katli itstokej xitlauakej ipan itlamia tonali uan motemachiaj itstosej nochipa ipan Tlaltipaktli. Ika nochi ininyolo kinpaleuiaj tlapejpenilmej katli nojua itstokej ipan Tlaltipaktli, ma mochiua nopa tekitl tlen tlauel ipati: tlajtolmoyauasej uan tlamachtisej ipan nochi Tlaltipaktli (Mat. 24:14; 28:19, 20).
12, 13. ¿Ika tlake sekinok tlamantli nopa “sekinok tlakamej” nojkia kinpaleuiaj katli kintlapejpenijtokej?
12 Sejse xiuitl kema nechka kiilnamikisej Cristo imikilis, nopa “sekinok tlakamej” kichiuaj kampeka kinpaleuisej katli kintlapejpenijtokej yasej iluikak. ¿Kenijkatsa kichiuaj? Kema mosentlaliaj tetlaneuisej ma yakaj ipan nopa youali kema moixtomas nopa tlamachtili (xikita nopa recuadro “ Xikita kenijkatsa titlapaleuis kema moilnamikis Cristo imikilis”). Ipan nochi Tlaltipaktli, toikniuaj kuali kiitaj tlake kichiuasej ipan nopa tonali, maske ipan inintlanechikol amo itstok se katli kitlapejpenijtokej yas iluikak. Nopa “sekinok tlakamej” tlauel yolpakij kinpaleuisej Cristo iikniuaj. Inijuantij kimatij kema kinpaleuiaj, Jesús kiita kejuak ya kipaleuiaj (Mat. 25:37-40).
13 ¿Kenke nopa “sekinok tlakamej” uan katli kintlapejpenijtokej mosentiliaj kema moilnamiki Cristo imikilis?
¿KENKE NOCHI TIMOSENTILIAJ?
14. ¿Kenijkatsa Jehová uan Jesús kinextijtokej tlauel techikneliaj?
14 Tijtlaskamatij pampa Jehová uan Jesús tlauel techikneliaj. Tikitstokej kenijkatsa Jehová tlauel techiknelia. Uan nojua tlauel kinextik itlaiknelil kema kititlanki iKone ma techmakixtiki (Juan 3:16). Jesús nojkia kinextik tlauel techiknelia kema kinejki motemaktilis uan mikis (Juan 15:13). Maske amo kema uelis tikixtlauasej nochi tlen kichijkej, kena uelis tijnextisej tikintlaskamatiliaj kema kuali timonejnemiltiaj (Col. 3:15). Tlaj timosentiliaj kema moilnamiki Cristo imikilis, tijnextiaj tikintlaskamatiliaj uan tikinikneliaj.
15. ¿Kenke katli kitlapejpenijtokej uan katli amo, tlauel kitlaskamatij pampa Jesús techmakixtik?
15 Tijtlaskamatij pampa Jesús techmakixtik (Mat. 20:28). Katli kintlapejpenijtokej tlauel kitlaskamatij tlen Jesús kichijki pampa nama kimatij temachtli kiselisej tlen kintenkauilijtokej. Inijuantij motemachiaj ipan Cristo imikilis, yeka Jehová kinita xitlauakej uan kinselia kej ikoneuaj (Rom. 5:1; 8:15-17, 23). Uan nopa “sekinok tlakamej” nojkia kipatiitaj Cristo imikilis, kiampa Jehová kuali kinita, uelij kitekipanouaj uan motemachiaj momakixtisej kema mochiuas nopa “ueyi tlaijiyouilistli” (Apoc. 7:13-15). Kema katli kintlapejpenijtokej uan katli amo, sansejko mosentiliaj kema kiilnamikij Cristo imikilis, kinextiaj tlauel kitlaskamatij pampa Jesús kinmakixtik.
16. ¿Kenke nojkia timosentiliaj kema moilnamiki Cristo imikilis?
16 Tijnekij tijchiuasej tlen Jesús technauatik. Tlaj timotemachiaj tiasej iluikak o amo, nochi tijneltokaj kema Jesús kiijtok moneki tikilnamikisej imikilis. Ipan nopa youali, ya kiijtok: “Xijchijtiakaj ya ni para innechilnamikisej” (1 Cor. 11:23, 24).
¿KENKE TLAUEL TECHPALEUIA TIITSTOSEJ IPAN NOPA TONALI?
17. ¿Kenke kema tikilnamikij Cristo imikilis techpaleuia nojua timonechkauisej ika Jehová?
17 Techpaleuia ma timonechkauikaj ika Jehová (Sant. 4:8). Kej tikitstokej, kema timosentiliaj ipan nopa tonali techpaleuia ma timoyoliljuikaj ipan tlen Jehová techtenkauilijtok techmakas uan nojkia techpaleuia tikitasej ya tlauel techiknelia (Jer. 29:11; 1 Juan 4:8-10). Timotemachiaj temachtli tijselisej tlen techtenkauilijtok uan nochipa techiknelijtos. Kema timoyoliljuiaj ipan nochi ni tlamantli, techpaleuia nojua tlauel ma tikiknelikaj Jehová uan ma tiitstokaj inechka (Rom. 8:38, 39).
18. ¿Kenijkatsa techpaleuia timoyoliljuisej ipan tlen Jesús kichijki?
18 Techpaleuia ma tijnekikaj tijchiuasej kej Jesús (1 Ped. 2:21). Kema nechka moilnamikis Cristo imikilis, tijpouaj ipan Biblia tlen Jesús kipanok kema nechka kimiktiskiaj, kej kimiktijkej uan kema moyolkuik. Uan ika tiotlak kema moilnamiki Cristo imikilis, nopa tlamachtili tlen kipanoltiaj techilnamikilia Jesús tlauel techiknelia (Efes. 5:2; 1 Juan 3:16). Kema tijpouaj nochi tlen Jesús kichijki uan timoyoliljuiaj ipan ya, techpaleuia ma tijnekikaj “tinejnemisej kuali keja yaja nejnenki” (1 Juan 2:6).
19. ¿Tlake uelis tijchiuasej uan kiampa nojua techiknelijtos Jehová?
19 Techpaleuia ma tijchiuakaj kampeka nojua tlauel ma techiknelijto Jehová (Jud. 20, 21). Kema tijchiuaj kampeka tijchiuasej tlen ya kineki, tijuejkapantlalisej itoka uan tijyolpakiltisej, kichiua nojua ma techiknelijto (Prov. 27:11; Mat. 6:9; 1 Juan 5:3). Kema timosentiliaj ipan nopa youali, techpaleuia kejuak mojmostla tikiljuiaj Jehová: “¡Nijneki nochipa nimouampojchiuas mouaya!”.
20. ¿Kenke timosentiliaj kema moilnamiki Cristo imikilis?
20 Tlaj timotemachiaj tiitstosej ipan iluikak o ipan Tlaltipaktli, nochi tijnekij tiitstosej ipan nopa tonali kema moilnamiki Cristo imikilis. ¿Kenke? Pampa kema timosentiliaj, tikilnamikij Jesús katli tlauel tikikneliaj. Uan nojkia pampa tikilnamikij kenijkatsa Jehová kinextijtok tlauel techiknelia kema temaktilik iKone ma techmakixtiki. Ipan ni xiuitl, Cristo imikilis moilnamikis ipan viernes 15, abril 2022. Tlauel tikinikneliaj Jehová uan iKone, yeka tlauel tijpatiitaj tiitstosej ipan nopa tonali kema moilnamiki Cristo imikilis.
UIKATL 16 Xijueyichiua Jehová, Jesús tekichiua
^ Tlaj timotemachiaj tiasej iluikak o ipan Tlaltipaktli, sejse xiuitl nochi tijnekij tiitstosej kema moilnamiki Cristo imikilis. Ipan ni tlamachtili tikitasej se keski textos kampa kinextia tlauel ipati timosentilisej ipan nopa tonali uan kenijkatsa techpaleuia.
^ Ipan sekinok biblias motlajtolkueptok: “Kej ni xinechilnamikikaj” (Nuevo Testamento, de P. Ortiz) uan “Xijchiuakaj ni pampa innechilnamikij” (Biblia de Jerusalén Latinoamericana).
^ Tlaj nojua tijneki tijpatiitas kema moilnamiki Cristo imikilis, kema techmakixtik uan kenijkatsa ya uan Jehová techikneliaj, xikita amochtli ¡Nochipa xiitsto ika pakilistli! ipan tlamachtili 27, 28, tlaxeloli NOJKIA XIKITA NI. Uan ipan Tlen Tematiltia abril, 2021, “Nochipa ma tijtlaskamatikaj Jesús pampa techmakixtik”.
^ Zacarías 8:23, TNM: “Kej ni kiijtoua Jehová katli kinyakana itlateuijkauaj: ‘Ipan nopa tonali matlaktli tlakamej tlen kamanaltij miak tlajtoli uan tlen kampa ueli euaj kiitskilisej iyoyo se judío, uan kiiljuisej: “Tijnekij tiasej inmouaya, pampa tijkaktokej toTeotsij itstok inmouaya”’”.
^ Ipan amochtli La adoración pura de Jehová: ¡por fin restaurada!, iamayo 130-135, párrafos 3-17, tijpantis sekinok tlamachtili tlen Ezequiel capítulo 37, kampa kiijtoua tlen nopa ome kuauitl.
