1. ¿Tlake tijchiuaj uan kiampa tiitstokej ika Jehová?

 NOCHI techpaktia tiitstosej ininuaya katli tlauel tikinikneliaj. Se neskayotl, katli kipiaj ininnamik kinpaktia sansejko moyolpakiltisej. Telpokamej, kinpaktia itstosej ininuaya ininuampoyouaj, uan tojuantij techpaktia tiitstosej ininuaya toikniuaj. Maske kiampa pano, nojua tlauel techpaktia tiitstosej ika Jehová. ¿Kenijkatsa tijchiuaj? Kema timomaijtouaj, tijpouaj Biblia, timoyoliljuiaj tlen kichiuas uan ipan nopa kuajkuali tlamantli tlen kinextia. ¡Tlauel tijpatiitaj tiitstosej ika Jehová! (Sal. 139:17).

2. ¿Kenke kemantika tijmatij ouij tiitstosej ika Jehová?

² Maske tlauel techpaktia tiitstosej ika Jehová, kemantika amo tijpiaj tonali. Nochi tlauel timotekiuijtokej uan yeka kemantika tijmatij ouij tijchiuasej tlen techpaleuis kuali ma titlaneltokakaj. Toteki, tochampoyouaj uan sekinok tlamantli tlen moneki tijchiuasej, uelis kichiuas amo ma tijpiakaj tonali timomaijtosej, timomachtisej uan timoyoliljuisej.

3. ¿Ipan tlake tlamantli nojkia moneki timomokuitlauisej?

³ Maske timomokuitlauiaj ika tlamantli tlen uelis techtlanauis, onka se keski tlamantli tlen amo tikitaj kenijkatsa techkixtilia tonali uan kichiuas ayokmo kuali ma titlaneltokakaj. Se neskayotl, maske nochi techpaktia kemantika amo tlauel titekitisej uan timoyolpakiltisej, tlaj san ya nopa tijchiuaj teipa ayokmo tijpiasej tonali timomachtisej.  Yeka, moneki timoyolpakiltisej kej kinamiki (Prov. 25:27; 1 Tim. 4:8).

4. ¿Tlake tikitasej ipan ni tlamachtili?

⁴ Ipan ni tlamachtili tikitasej kenke moneki tikachtouitlalisej tlen tlauel ipati. Uan nojkia tikitasej tlake uelis tijchiuasej uan kiampa tiitstosej ika Jehová uan kenijkatsa techpaleuis.

5. ¿Kenijkatsa Efesios 5:15-17 uelis kinpaleuis telpokamej kuali ma kitlapejpenikaj tlen kichiuasej?

⁵ Kuali ma tijtlapejpenikaj tlen tijchiuasej. Ni tlauel kintekipachoua telpokamej. Uelis katli kinmachtiaj o ininuikaljuaj katli amo kitekipanouaj Jehová kiniljuiaj tlauel ma momachtikaj uan kiampa tlauel pankisasej. Tlaj kiampa kichiuasej, uelis tlauel motonalpolosej. Nojkia, inintatauaj o toikniuaj uelis kiniljuiaj senkistok ma kitekipanokaj Jehová. ¿Tlake kipaleuis se telpokatl katli kiiknelia Jehová kuali ma kitlapejpeni tlen kichiuas? Uelis kipouas Efesios 5:15-17 uan moyoliljuis tlen nopaya kiijtoua (xijpoua). Teipa, ueliskia motlatsintokis: “¿Tlake kineki Jehová ma nijchiua? ¿Uelis kiyolpakiltis tlen nijtlapejpenis? ¿Tlake nechpaleuis amo ma nimotonalpolo?”. Ma tikilnamikikaj ipan ni tonali pano “miak tlamantli tlen fiero” uan nochi tlen Satanás kinauatia nechka tlamis. Yeka, moneki tijchiuasej tlen kiyolpakiltis Jehová.

6. ¿Tlake kitlapejpenik María, uan kenke tlauel ipati tlen kichijki?

⁶ Kuali ma timoiljuikaj tlake tijchiuasej. Tlaj tijnekij kuali tijtekiuisej tonali, kemantika moneki tijtlapejpenisej tlake achtoui tijchiuasej, maske tlen timoiljuijtoyaj tijchiuasej nojkia eli ipati. Ma tikitakaj tlen kichijkej Marta uan María kema Jesús kinpaxalok. Marta tlauel kipaktiyaya kinselis sekinok uan tlauel yolpakiyaya kema Jesús itstoya ininuaya, yeka kichijki miak tlakualistli. Uan María, moseuik inechka Jesús uan kitlakakilik. Maske Marta kichijki tlen kuali, Jesús kiijtok María kichijki tlen tlauel kuali (Luc. 10:38-42). Maske uelis kema panok tonali María ayokmo kiilnamijki tlen kikuajki, amo kiilkajki tlen Jesús tlamachtik. Ya tlauel kipatiitak itstos iuaya Jesús, uan tojuantij nojkia tijpatiitaj kema tiitstokej ika Jehová. ¿Kenijkatsa nojua kuali tijtekiuisej nopa tonali?

7. ¿Kenke tlauel ipati timomaijtosej, timomachtisej uan timoyoliljuisej?

⁷ Nojkia titlaueyichiuaj kema timomaijtouaj, timomachtiaj uan timoyoliljuiaj. Kema timomaijtouaj, tikamanaltij ika toTata Jehová, katli tlauel techiknelia (Sal. 5:7). Kema timomachtiaj Biblia, tijyekouaj tlen toTeotsij katli tlauel tlalnamiki (Prov. 2:1-5). Uan kema timoyoliljuiaj, timonejneuiliaj ipan nopa kuajkuali tlamantli tlen ya kinextia uan tlen mosentlalijtok kichiuas ipan Tlaltipaktli. ¡Tlauel kuali tlaj kiampa tijchiuasej! Ma tikilnamikikaj nochi tijpiaj miak tlamantli tlen moneki tijchiuasej. Yeka, ¿tlake techpaleuis kuali tijtekiuisej tonali?

8. ¿Tlake tijyekouaj tlen Jesús kichijki kema yajki ipan uaktok tlali?

⁸ Tlaj tiuelij, ma tiakaj kampa tlatsitsikatok. Ma tikilnamikikaj tlen Jesús kichiuayaya. Kema pejki tlajtolmoyaua, yajki ipan uaktok tlali 40 tonali (Luc. 4:1, 2). Nopaya uelki momaijtoua uan  monejneuilia ipan tlen iTata kinekiyaya ma kichiua. Tlen Jesús kichijki, kipaleuik ma kiijiyoui tlen kiixnamijki teipa. ¿Tlake tijyekouaj? Uelis tikinpiaj miakej tochampoyouaj, yeka tijmatij ouij tiitstosej kampa amo aka tlauejchiua. Tlaj kiampa techpano, uajka uelis tiasej kalteno. Kiampa kichiua tosiuaikni Julie kema kineki kamanaltis ika Jehová. Ya uan iueue itstokej Francia, uan kampa itstokej amo tlauexka, yeka ouij kimati itstos iselti pampa tlauel tlauejchiuaj. Ya kiijtoua: “Mojmostla nia parque, pampa nopaya tlauel kuali nimomaijtoua uan kuali nimoyoliljuia tlake nikiljuis Jehová”.

9. ¿Kenijkatsa kinextik Jesús tlauel kipatiitayaya mouampojchijtos ika iTata, maske tlauel motekiuijtoya?

⁹ Jesús nochipa tlauel motekiuijtoya. Kampa yauiyaya nochipa itstoyaj miakej maseualmej uan kiiljuiyayaj ma kinpaleui. Biblia kiijtoua se tonali “nochi [maseualmej] tlen nopa altepetl mosentilijkej kalteno” pampa kinekiyayaj kiitasej Jesús. Maske kiampa kipanoyaya, ya nochipa kikixtik tonali uan kiampa nojua tlauel mouampojchijtos ika Jehová. Nojkia, kema nechka tlanesiskia, yajki kampa tlatsitsikatok, kiampa uelki itstos san ika iTata (Mar. 1:32-35).

10, 11. Kej kiijtoua Mateo 26:40, 41, ¿tlake kiniljuik Jesús ma kichiuakaj itokilijkauaj uan tlake panok?

¹⁰ Ipan nopa youali kema Jesús nechka kimiktiskiaj, sampa kitemok kampa itstoskia iselti. Nama yajki Getsemaní, nopaya uelki momaijtoua uan moyoliljuia (Mat. 26:36). Nopaya kiniljuik itokilijkauaj tlauel ipati momaijtosej.

¹¹ Ma tikitakaj tlake panok. Asitoj Getsemaní tlauel tlayoua, uelis ya panotoya tlajkoyoual. Jesús kiniljuik iapóstoles ma tlachixtokaj, uan teipa yajki momaijtoto (Mat. 26:37-39). Kema tlakuepilik, inijuantij kochtoyaj, yeka sampa kiniljuik: “Xitlachixtokaj uan ximomaijtokaj” (xijpoua Mateo 26:40, 41). Ya kimatiyaya tlauel motetsoptoyaj uan tlauel siajtoyaj, yeka kintlasojtlak uan kiniljuik: “Inmotlakayo axkipia tetili”. Maske kiampa panok, ya sampa yajki momaijtoto, uan kema tlakuepilik sampa kinpaktik kochtokej uan amo momaijtouayayaj (Mat. 26:42-45).

12. ¿Tlake uelis tijchiuasej tlaj tlauel timotetsoptokej o tlauel tisiajtokej uan yeka tijmatij ouij timomaijtosej?

¹² Kuali ma tikitakaj kema timomaijtosej. Kemantika tlauel timotetsoptokej uan tisiajtokej, yeka ouij tijmatij timomaijtosej. Ni amo san tojuantij techpano.  ¿Tlake uelis tijchiuasej? Se keskij toikniuaj momajtoyaj momaijtosej kema ya neltlayouatok. Maske kiampa kichiuayayaj, kiitakej tlauel kuali momaijtosej kema ayamo tlauel tlayoua, pampa ayamo tlauel siajtokej. Sekij, kiitstokej tlauel kinpaleuijtok kema motlankuaketsaj o moseuiaj. Uan, ¿tlaj tlauel timotekipachojtokej o amo kuali tijyolmatij timomaijtosej? Uajka ma tikiljuikaj toTata Jehová kenijkatsa tijyolmatij, ya tlauel tetlasojtla yeka kikuamachilis tlen techpano (Sal. 139:4).

13. ¿Kenijkatsa teléfono o sekinok tlamantli uelis kichiuas amo ma timosentlalikaj kema tiitstokej toselti ika Jehová?

¹³ Amo ma tijkauakaj yon se tlamantli ma kichiua amo ma timosentlalikaj kema timomachtiaj. Kej tikitstokej, tlauel ipati timomaijtosej. Nojkia, tlaj tijnekij nojua kuali timouampojchiuasej ika Jehová, tlauel ipati timomachtisej Biblia uan tiitstosej ipan tlanechikoli. ¿Tlake uelis tijchiuasej uan kiampa kuali timomachtisej uan kuali titlakaktosej ipan tlanechikoli? Ma timotlatsintokikaj: “¿Tlake kichiua amo ma nimosentlali? ¿Uelis kema nechnojnotsaj, asi correos electrónicos o mensajes ipan nocelular o ipan seyok tepostli?”. Maske celular o tableta nochi tlauel techpaleuia uan miakej kitekiuiaj, se keskij ixtlamatinij kiijtouaj kema se akajya kipixtok inechka icelular, kichiua ouij ma mosentlali. Se psicólogo kiijtoua: “Amo uelis timosentlalis ipan tlen tijchijtok pampa motlalnamikilis eltos sejkanok”. Kema nechka peuas se ueyi tlanechikolistli techiljuiaj ma tijchiuakaj tocelular amo ma kakisti uan kiampa kuali tlakaktosej sekinok, ¿nojkia ueliskia kiampa tijchiuasej kema tiitstosej toselti ika Jehová uan kiampa uelis timosentlalisej?

14. Kej kiijtoua Filipenses 4:6, 7, ¿kenijkatsa techpaleuis Jehová uan kiampa uelis timosentlalisej?

¹⁴ Ma tikiljuikaj Jehová ma techpaleui timosentlalisej. Tlaj timomachtiaj o tlaj tiitstokej tlanechikoli uan peua timoiljuiaj ipan sekinok tlamantli, nima ma tikiljuikaj Jehová ma techpaleui nojua kuali titlakaktosej uan timosentlalijtosej. Tlaj tlauel techtekipachoua se tlenijki, moneki tijchiuasej  kampeka tikilkauasej uan timosentlalisej ipan tlen techpaleuis kuali ma titlaneltokakaj. Ma tikiljuikaj Jehová ma techmaka tlaseuilistli tlen “kiyaualtsakuas” toyolo uan nojkia totlalnamikilis (xijpoua Filipenses 4:6, 7).

15. ¿Kenijkatsa techpaleuis tlaj tijkixtiaj tonali tiitstosej ika Jehová?

¹⁵ Tlauel techpaleuis tlaj tijkixtiaj tonali timonojnotsasej ika Jehová, tijtlakakilisej uan timoiljuisej kej ya moiljuia. ¿Kenijkatsa techpaleuis? Se. Kuali tijtlapejpenisej tlen tijchiuasej. Biblia kiijtoua tlaj se akajya “nemi ininuaya tlen tlalnamikij mochiuas tlalnamiki” (Prov. 13:20). Yeka, tlaj tijkixtiaj tonali tiitstosej ika Jehová, katli tlauel tlalnamiki, nojkia tlauel titlalnamikisej. Tlaj kiampa tijchiuaj, tijmatisej kenijkatsa tijyolpakiltisej uan amo tijyolkokosej ika tlen tijtlapejpenisej tijchiuasej.

16. ¿Kenke tlaj tijkixtiaj tonali tiitstosej ika Jehová techpaleuis kuali ma titlamachtikaj?

¹⁶ Ome. Kuali titlamachtisej. Kema tijmachtiaj se akajya ika Biblia tijnekij ma monechkaui ika Jehová. Yeka, tlaj nochipa timomaijtouaj ika toTata, techpaleuis nojua ma tikiknelikaj, uan nopa techpaleuis ma tijnextilikaj katli tijmachtiaj nojkia ma kiikneli toTeotsij. Kiampa kichijki Jesús. Kema kamanaltiyaya tlen iTata, kichiuayaya ika miak tlaiknelili, uan nopa kinpaleuik itokilijkauaj nojkia ma kiiknelikaj Jehová (Juan 17:25, 26).

17. ¿Kenke tlaj timomaijtouaj uan timomachtiaj toselti techpaleuis nojua kuali ma titlaneltokakaj?

¹⁷ Eyi. Nojua kuali titlaneltokasej. Ma timoiljuikaj ipan ni tlamantli: totlaneltokilis nojua moskaltia kema tikitaj kenijkatsa Jehová techyakana, techyolchikaua o techpaleuia (1 Juan 5:15). Nojkia, kema toselti timomachtiaj techpaleuia nojua kuali ma titlaneltokakaj. Biblia kiijtoua totlaneltokilis moskaltia ika tlen tijkakij (Rom. 10:17). Tlaj nojua tijnekij kuali titlaneltokasej, amo san moneki tijmatisej yajyankuik tlamachtili, nojkia moneki tijchiuasej seyok tlamantli. Ma tikitakaj.

18. Xikijto ika se neskayotl kenke tlauel ipati timoyoliljuisej.

¹⁸ Moneki timoyoliljuisej ipan tlen tijyekojtiauij. Ma timoiljuikaj ipan katli kiijkuilok Salmo 77. Ya tlauel mokuesojtoya pampa moiljuiyaya, ya uan israeleuanij, Jehová ayokmo kuali kinitayaya. Tlauel motekipachojtoya uan yeka amo ueliyaya kochi (versículos 2-8). ¿Tlake kichijki? Kiiljuik Jehová: ‘Mojmostla nimoiljuis  tlen nopa uejueyi tlamantli para nochipa. Axueli nijkauas nimoyoliljuis ipan tlen tijchijtok’ (versículo 12). Maske kimatiyaya miak tlamantli tlen Jehová kichijtoya uejkajkia, ya nojua motlatsintokiyaya: “¿Uelis toTeko Dios ya kiilkajki para moneki nechchiuilis tlen kuali [... o] uelis tlauel kualantok uan yeka ayok kineki nechtlasojtlas?” (versículo 9). Teipa, katli kiijkuilok ni salmo moyoliljuik tlen Jehová kichijtoya uan kenijkatsa tlauel kiniknelijtoya uan kintlasojtlatoya israeleuanij (versículo 11). Nopa kipaleuik ma motemachi Jehová amo kema kintlauelkaua itekipanojkauaj (versículo 15). Yeka, tlaj timoyoliljuiaj kenijkatsa Jehová kinpaleuijtok itekipanojkauaj uan kenijkatsa techpaleuijtok, techpaleuis nojua kuali titlaneltokasej.

19. ¿Kenijkatsa nojkia techpaleuis tlaj tijkixtiaj tonali tiitstosej ika Jehová?

¹⁹ Naui. Nojua tikiknelisej Jehová. ¿Kenke tlauel ipati? Pampa nopa tlaiknelili techpaleuis: 1) ma tijnekikaj tijchiuasej tlen ya kineki, 2) tijchiuasej kampeka tijyolpakiltisej uan 3) techpaleuis ma tikijiyouikaj tlen techpanos (Mat. 22:37-39; 1 Cor. 13:4, 7; 1 Juan 5:3). Kej tikitaj, tlauel ipati timouampojchiuasej san ika toTata Jehová (Sal. 63:1-8).

20. ¿Tlake uelis tijchiuas uan kiampa tijkixtis tonali tiitstos ika Jehová?

²⁰ Ma tikilnamikikaj: nojkia titlaueyichiuaj kema timomaijtouaj, kema timomachtiaj uan kema timoyoliljuiaj. Yeka, ma tijchiuakaj kej Jesús uan ma tijkixtikaj tonali tiitstosej ika Jehová. Amo ma tijkauakaj yon se tlamantli ma kichiua amo ma timosentlalikaj. Uan kema titlaueyichiuasej, ma tikiljuikaj Jehová ma techpaleui timosentlalisej. Tlaj tijchiuaj kampeka amo timotonalpolosej, Jehová tlauel techteochiuas uan tijpiasej nemilistli tlen axkema tlamis ipan se yejyektsi Tlaltipaktli (Mar. 4:24).