1-3. ¿Tlake tlamantli uelis kichiuas ma timochokilikaj?

 ¿TIKILNAMIKI kema timochokilik? Maske kemantika timochokiliaj pampa tiyolpakij, amo nochipa kiampa pano, pampa kemantika timochokiliaj pampa tlauel timokuesouaj. Uelis timochokilijtokej pampa mijki se akajya katli tlauel tikikneliaj. Lorilei, * se tosiuaikni katli eua Estados Unidos, kiijtok: “Kema mijki nopilsiuapil tlauel nimokuesok uan nijyolmatiyaya kejuak amo aka ueliskia nechyolchikauas. Nelnelia nijmatiyaya kejuak niyoltlapantoya, uan amo nijmati tlake nechpaleuik nojua ma niyolto”.

² Nojkia, kemantika timochokiliaj pampa techyolkokoua sekinok tlamantli. Hiromi, se precursora katli eua Japón, kiijtoua: “Kemantika nimoyolkokoua pampa maseualmej amo kinekij kitlakakilisej tlen Biblia tlamachtia, uan yeka niixayotemo kema nikiljuia Jehová ma nechpaleui nijpantis se akajya katli kineki momachtis”.

³ Uelis nojkia tijyolmajtokej kej ni tosiuaikniuaj (1 Ped. 5:9). Maske nochi tijnekij tijtekipanosej Jehová ika miak pakilistli, kemantika amo ueli kiampa tijchiuaj pampa uelis mijki se katli tlauel tikikneliaj, amo kuali tijyolmatij o tikixnamikij se tlaouijkayotl kampa moneki tijnextisej amo tijtlauelkauaj toTeotsij (Sal. 6:6; 100:2). ¿Tlake uelis tijchiuasej kema kiampa techpano?

4. ¿Tlake tikitasej ipan ni tlamachtili?

⁴ Tlen Jesús kichijki tlauel techpaleuis. Kemantika tlauel mokuesok uan yeka chokak (Juan 11:35; Luc. 19:41; 22:44; Heb. 5:7). Ipan ni tlamachtili tikitasej kenke mochokilik, tlake techmachtia ya uan Jehová pampa kiampa kichijki uan nojkia tlake uelis tijchiuasej kema tikixnamikij se ueyi kuesoli tlen kichiua ma timochokilikaj.

5. ¿Tlake techmachtia tlen Jesús nopa tlapoualistli tlen eltok ipan Juan 11:32-36?

⁵ Itlamia xiuitl 32 y.u.J., se iuampo Jesús katli motokaxtiyaya Lázaro tlauel mokokok uan mijki (Juan 11:3, 14). Jesús tlauel kinikneliyaya Lázaro, María uan Marta. Se tonali, inijuantij tlauel mokuesojkej pampa mijki ininikni katli tlauel kiikneliyayaj. Kema Lázaro ya miktoya, Jesús yajki Betania kampa itstoyaj María uan Marta. Kema Marta kimatki Jesús yauiyaya kampa itstoyaj, yajki kinamikito. Ma timoiljuikaj kenijkatsa Marta tlauel mokuesojtoya kema kiiljuik: “NoTeko, intla tiualajtoskia kema mokokouayaya, noikni axmiktoskia” (Juan 11:21). Teipa, kema Jesús kinitak María uan sekinok katli nopaya itstoyaj tlauel mochokiliyayaj, ya nojkia chokak (xijpoua Juan 11:32-36).

6. ¿Kenke Jesús chokak ipan nopa tonali?

⁶ Amochtli Perspicacia para comprender las Escrituras kiijtoua kenke Jesús mochokilik ipan nopa tonali: “Kiampa kichijki pampa mijki iuampo Lázaro uan pampa kinitak isiuaikniuaj tlauel mokuesojtoyaj”. * Uelis Jesús pejki moiljuia kenijkatsa iuampo Lázaro tlaijiyouik kema mokokouayaya uan kenijkatsa kiyolmatki kema kiitak amo mochikauaskia. Nojkia chokak kema kinitak María uan Marta tlauel mokuesojtoyaj pampa kitemouayayaj ininikni. Uelis nojkia kiampa mitspanok kema mijki se mouampo o se tlen mochampoyouaj. Nama, ma tikitakaj eyi tlamantli tlen techmachtia ni tlapoualistli.

7. ¿Tlake techmachtia tlen Jehová pampa Jesús chokak ika tlen kiyolmatiyayaj iuampoyouaj?

⁷ Jehová kikuamachilia tlen tijyolmati. Jesús eli “keja iixkopinka [...] toTeko Dios” (Heb. 1:3). Yeka kema mochokilik, kinextik tlen Jehová kiyolmati (Juan 14:9). Tlaj ipan ni tonali mitsyolkokoua pampa mijki se akajya katli  tlauel tikiknelia, xikilnamiki Jehová amo san kiita tlen mitspano, ya nojkia tlauel kiyolkokoua. Ya kineki mitspaleuis ma pachiui moyolo (Sal. 34:18; 147:3).

8. ¿Kenke timotemachiaj Jesús nelnelia kinyolkuis katli ya mijkej?

⁸ Jesús kineki kinyolkuis katli tlauel tikiniknelia. Kema Jesús ayamo mochokiliyaya, kiiljuik Marta: “Moikni sampa moyolkuis”, uan ya kineltokak (Juan 11:23-27). Marta kiueyichiuayaya Jehová, yeka kimatiyaya tlajtolpanextianij Elías uan Eliseo kinyolkuikej se keskij maseualmej (1 Rey. 17:17-24; 2 Rey. 4:32-37). Uan uelis nojkia kimatki kema Jesús kinyolkuik se keskij maseualmej (Luc. 7:11-15; 8:41, 42, 49-56). Yeka, nojkia uelis timotemachis sampa tikinitas mouampoyouaj o mochampoyouaj katli mijkejya. Jesús chokak kema kinyolchikajki iuampoyouaj, nopa kinextia tlauel kineki kinyolkuis nochi katli miktokej.

9. Kej Jesús kichijki, xikijto ika se neskayotl kenijkatsa uelis tikinpaleuisej katli mijki se tlen ichampoyouaj.

⁹ Ta uelis tikinyolchikauas katli tlauel mokuesouaj pampa mijki se tlen katli tlauel kiikneliaj. Jesús amo san mochokilik ininuaya Marta uan María, ya nojkia kintlakakilik uan kiniljuik tlen tlauel kinyolchikajki. Tojuantij nojkia uelis kiampa tijchiuasej. Dan, se ueuejtlakatl katli eua Australia, kiijtoua: “Kema mijki nosiua, tlauel nijnekiyaya ma nechyolchikauakaj. Miakej toikniuaj ininuaya ininsiuajuaj nechiljuijkej tlaj nijnekiskia nikijtos tlen nijyolmati, inijuantij nechtlakakiliskiaj. Nechkauayayaj ma nimochokili, uan amo pinauayayaj nechitasej. Uan, kema nijmatiyaya amo nijpia chikaualistli, inijuantij kipajpakayayaj nocarro, yauiyayaj tlakouaj uan tlakualchiuayayaj. Nojkia, nochipa momaijtouayayaj nouaya. Ipan nopa tonali kema tlauel nimokuesojtoya, kinextijkej nelnelia eliyayaj kuali nouampoyouaj” (Prov. 17:17).

10. ¿Tlake kiijtoua nopa tlapoualistli tlen eltok ipan Lucas 19:36-40?

¹⁰ Ipan nisán 9, xiuitl 33, Jesús yajki Jerusalén. Kema monechkauijtiauiyaya ipan nopa altepetl, miakej maseualmej kitlalijtoyaj yoyomitl ipan ojtli, pampa kiampa kinextiyayaj kiseliaj kej Tlanauatijketl. Ipan nopa tonali, nochi tlauel yolpaktoyaj (xijpoua Lucas 19:36-40). Yeka, uelis itokilijkauaj mosentlachilijkej kema kiitakej tlen panok teipa. “Kema Jesús monechkauik nepa Jerusalén, kitlachilik nopa altepetl uan chokak ininpampa nopa tlakamej tlen nopona itstoyaj”. Kiampa kichijki pampa kimatiyaya tlake kinpanoskia nopa maseualmej (Luc. 19:41-44).

11. ¿Kenke Jesús kinchokilik katli itstoyaj ipan Jerusalén?

¹¹ Jesús tlauel mokuesojtoya, pampa kimatiyaya maske tlauel kuali kiselijkej, miakej judíos amo kiseliskiaj nopa tlamachtili tlen toTeotsij iTlanauatijkayo. Yeka, Jerusalén kitsontlamiltiskiaj uan katli momanauiskiaj kinuikaskiaj ma tlatekipanotij ipan seyok altepetl (Luc. 21:20-24). Uan kej Jesús kiijtok, miakej maseualmej amo kiselijkej. Kampa ta tiitstok, ¿kenijkatsa kiitaj maseualmej nopa tlamachtili tlen tijmoyauaj? Tlaj nochipa tijchijtok kampeka tijmoyauas tlen Biblia tlamachtia uan tikita san se keskij kinekij mitstlakakilisej, ¿tlake ueliskia tijyekos kema Jesús mochokilik? Ma tikitakaj eyi tlamantli.

12. ¿Tlake techmachtia tlen Jehová kema Jesús kinchokilik maseualmej?

 ¹² Jehová tlauel kiniknelia maseualmej. Kema Jesús mochokilik kinextik kenijkatsa Jehová tlauel kitekipachoua tlen kinpano maseualmej. Ya “kineki nochi ma timoyolpatlakaj uan tijkauasej totlajtlakoljuaj. Axkineki niyon se ma poliui para nochipa” (2 Ped. 3:9). Tojuantij tijnextiaj tikinikneliaj maseualmej kema tijchiuaj kampeka ma asi ipan ininyolo nopa kuali tlamachtili uan tijchiuaj ika pakilistli (Mat. 22:39). *

13, 14. 1) ¿Kenijkatsa Jesús kinextik kintlasojtlayaya maseualmej? 2) ¿Kenijkatsa uelis tijchiuasej kej Jesús?

¹³ Jesús nochipa kichijki kampeka tlajtolmoyauas. Ya tlauel kinikneliyaya maseualmej, yeka nochipa tlamachtiyaya (Luc. 19:47, 48). ¿Tlake kiyololinik? Jesús kinmachtik sekinok pampa tlauel kintlasojtlayaya. Kemantika itstoyaj miakej maseualmej katli kinekiyayaj kitlakakilisej, uan yeka ya uan itokilijkauaj “axkipiayayaj yon se tlalochtli para tlakuasej” (Mar. 3:20). Uan kema se tlakatl kiitato ika tlayoua, Jesús kinejki kamanaltis iuaya (Juan 3:1, 2). Maske amo nochi nopa maseualmej mochijkej itokilijkauaj, nochi uelkej kikakij tlen tlamachtik. Ipan ni tonali tijnekij nochi maseualmej ma kikakikaj nopa kuali tlamachtili (Hech. 10:42). Yeka, uelis monekis tijpatlasej kej titlajtolmoyauaj, kiampa nochi tikinkamanaljuisej.

¹⁴ Xijpatla kema titlajtolmoyaua. Tlaj nochipa san titlajtolmoyauaj ika ijnalok o ika tiotlak, uelis amo tikinpantisej katli kinekiskiaj momachtisej Biblia. Se precursora katli itoka Matilda kiijtoua: “Noueue uan na tijchiuaj kampeka titlajtolmoyauasej kema tikinpantisej maseualmej. Yeka, ika ijnalok titlajtolmoyauaj kampa tlanamakaj, tlajkotona tijtlaliaj carritos kampa miakej panoj uan ika tiotlak titlajtolmoyauaj kajkalpa”. Kej tikitaj, tlauel ipati titlajtolmoyauasej kema uelis tikinpantisej maseualmej, uan amo kema tojuantij tijnekij. Tlaj kiampa tijchiuaj, tijyolpakiltisej Jehová.

15. Kej kiijtoua Lucas 22:39-44, ¿tlake kichijki Jesús kema nechka kimiktiskiaj?

¹⁵ Ipan nisán 14, xiuitl 33, Jesús yajki ika tlayoua ipan Getsemaní uan nopaya kiiljuik Jehová nochi tlen kiyolmatiyaya (xijpoua Lucas 22:39-44). Maske tlauel mokuesojtoya, “kitlajtlanik toTeko tlen kinekiyaya uan kikamauik ika nochi iyolo hasta chokak” (Heb. 5:7). ¿Tlake tlajtlanki Jesús kema nechka mikiskia? Kiiljuik iTata ma kimaka chikaualistli, uan kiampa amo kitlauelkauaskia uan kichiuaskia ipakilis. Jehová kitlakakilik iKone uan kititlanki se iluikaejketl ma kiyolchikauati.

16. ¿Kenke Jesús tlauel mokuesouayaya kema momaijtouayaya ipan Getsemaní?

¹⁶ Jesús tlauel mokuesouayaya pampa maseualmej ueliskia moiljuisej amo kitlepanitayaya toTeotsij, yeka mochokilik kema itstoya ipan Getsemaní. Nojkia, ya kimatiyaya kipixtoya se ueyi tekitl: kiuejkapantlalis o kimanauis Jehová itoka. Tlaj ta nojkia tikixnamiki se tlaouijkayotl kampa moneki tijnextis amo tijtlauelkaua Jehová, ¿tlake ueliskia tijyekos kema Jesús mochokilik? Ma tikitakaj eyi tlamantli.

17. ¿Tlake tijyekouaj tlen Jehová pampa kinankilik Jesús kema momaijtok?

¹⁷ Jehová mitstlakakilia kema timomaijtoua. Ya kitlakakilik iKone kema momaijtok. ¿Kenke? Pampa Jesús tlauel kipatiitayaya kimanauis iTata itoka uan amo kitlauelkauas. Tlaj tojuantij nojkia amo tijnekij tijtlauelkauasej Jehová uan tijmanauisej itoka, ya technankilis kema tikiljuisej ma techpaleui (Sal. 145:18, 19).

18. ¿Kenke Jesús eli se touampo katli techkuamachilia?

¹⁸ Jesús kikuamachilia tlen tijyolmati. Kema timokuesojtokej, tlauel techyolchikaua kema techpaleuia se touampo katli techkuamachilia, uan nojua kiampa tijyolmatij kema techpaleuia katli kipanok sanse kej tojuantij. Jesús uelis elis nopa touampo, pampa ya nojkia moyolkokok uan kikajki sekinok ma kipaleuikaj. Nojkia, kimati kenijkatsa techchijchijtokej uan kichiuas kampeka ma tijselikaj nopa tlapaleuili “kema más moneki”  (Heb. 4:15, 16). Kema Jesús itstoya ipan Getsemaní, kikajki se iluikaejketl ma kiyolchikaua. Tojuantij nojkia moneki tijkauasej Jehová ma techyolchikaua ika amatlajkuiloli, videos, ika se tlamachtili, kema techpaxalosej ueuejtlakamej o ika se touampo katli kuali tlaneltoka.

19. Xikijto ika se neskayotl tlake uelis mitspaleuis kema tikixnamikis kuesoli.

¹⁹ Jehová mitsmakas tlaseuilistli. ¿Kenijkatsa techyolchikauas Jehová? Kema timomaijtouaj, ya techmakas tlaseuilistli ipan toyolo “tlen tlakamej axuelis kimachilisej” (Filip. 4:6, 7). Nopa tlaseuilistli tlen Jehová techmaka, tlauel techyolseuia uan techpaleuia kuali ma timoiljuikaj tlake tijchiuasej. Ma tikitakaj tlake kipanok tosiuaikni Luz. Ya kiijtoua: “Kemantika nijyolmati niitstok noselti, uan nopa kichiua ma nimoiljui Jehová amo nechiknelia. Kema kiampa nechpano, nima nijpouilia Jehová tlen nijyolmati. Tlamaijtoli tlauel nechpaleuijtok amo tlauel ma nimokueso”. Kej tikitaj, tlamaijtoli uelis techpaleuis tijpiasej tlaseuilistli.

20. ¿Tlake tijyekojkej pampa Jesús mochokilik?

²⁰ Tlauel techpaleuia uan techyolchikaua kema tikitaj Jesús nojkia mochokilik. Tlen kichijki techmachtia moneki tikinpaleuisej touampoyouaj katli mokuesouaj pampa mijki se tlen katli tlauel kiikneliaj uan timotemachiaj Jehová uan Jesús nochipa techpaleuisej. Nojkia, techyololinia ma titlajtolmoyauakaj uan ma titlamachtikaj pampa tikintlasojtlaj maseualmej, kej kichiuaj Jehová uan Jesús. Uan tlauel techyolchikaua kema Jesús chokak, pampa kinextia Jehová uan ya kiyolmatij tlen techpano, kimatij tlake ouij tijmatij tijchiuasej uan techpaleuisej ma tikijiyouikaj tlen ueli tlamantli. Jehová nechka kiaxitis tlen kitenkajtok: “kinuachilis nochi ininixayo” tlen itekipanojkauaj (Apoc. 21:4). Yeka, maske ayamo moaxitia ni texto, nochipa ma tijchijtokaj tlen timomachtijtokej.