1, 2. 1) ¿Tlake tijyolmatij kema timoiljuiaj tlen Jesús kichijki uan kej tlajtolmoyajki? 2) ¿Tlake tikitasej ipan ni tlamachtili?

 KEMA miki se katli tlauel tikikneliaj, tlauel tijtemouaj. Tlauel timoyolkokouaj kema timoiljuiaj tlen kipanok kema nechka mikiskia, uan nojua tlauel techyolkokoua tlaj tlauel tlaijiyouik kema nechka mikiskia. Teipa uelis tikilnamikij se tlamantli tlen techmachtik, tlen kichijki o tlen kiijtok pampa kinekiyaya techyolchikauas o techtlauetskiltis. Kema timoiljuiaj ipan nopa tlamantli, kichiua ayokmo tlauel ma timokuesokaj.

² Kema timoiljuiaj kenijkatsa Jesús tlaijiyouik kema kimiktijkej, nojkia techyolkokoua. Tlauel techyolkokoua kema tijpouaj ipan Biblia tlen kipanok. Kiampa tijchiuaj kema nechka moilnamikis imikilis, pampa ipan nopa tonali tijchiuaj kampeka kuali timoyoliljuisej kenijkatsa techpaleuia Cristo imikilis (1 Cor. 11:24, 25). Uan kema timoiljuiaj tlen Jesús kichijki uan kiijtok kema itstoya ipan Tlaltipaktli, kichiua tlauel ma tiyolpakikaj. Nojkia techyolchikaua kema timoiljuiaj tlen kichiua nama uan tlen kichiuas teipa. Kema timoyoliljuiaj ni tlamantli uan kenijkatsa Jesús techiknelia, techyololinia ma tijtlaskamatilikaj ika se keski tlamantli, kej tikitasej ipan ni tlamachtili.

3. ¿Kenke tijtlaskamatij pampa techmakixtijkej?

³ Kema timoyoliljuiaj tlen Jesús kichijki uan kema mijki, techpaleuia ma tijtlaskamatilikaj. Kema tlajtolmoyajki ipan Tlaltipaktli kinmachtik maseualmej tlen kichiuas toTeotsij  iTlanauatijkayo. Tojuantij tlauel tijpatiitaj nopa tlamachtili. Tlauel tijtlaskamatij pampa techmakixtijkej pampa nopa techpaleuia kuali ma timouampojchiuakaj iuaya Jehová uan Jesús. Katli tlaneltokaj ipan Jesús uelis itstosej nochipa uan uelis sampa kinitasej katli ya mijkej uan tlauel kinikneliyayaj (Juan 5:28, 29; Rom. 6:23). Tojuantij amo timotlanilijtokej ni tlateochiualistli uan amo kema uelis tikintlaxtlauilisej Jehová uan Jesús pampa techmakixtijkej (Rom. 5:8, 20, 21). ¿Kenijkatsa uelis tijnextisej tikintlaskamatiliaj? Ma tikitakaj.

4. ¿Kenijkatsa María Magdalena kinextik kitlaskamatiliyaya Jesús pampa kipaleuijtoya? (Xikita tlaixkopinkayotl).

⁴ Ma timoiljuikaj tlen kipanok se siuatl judía katli itoka María Magdalena. Ya kinpixtoya chikomej amo kuali ajakamej tlen tlauel kitlaijiyouiltiyayaj. Uelis moiljuiyaya nochipa kiampa itstoskia. Yeka, uelis tlauel kitlaskamatilik Jesús kema kikixtilik nopa amo kuali ajakamej. Ya mochijki se itokilijka, kitekiuik ichikaualis, tonali uan tlen kipixtoya pampa kinejki tlapaleuis ipan tlajtolmoyaualistli (Luc. 8:1-3). Maske María tlauel kitlaskamatiliyaya Jesús pampa kipaleuijtoya, ayamo kikuamachilijtoya kenke monekiyaya temaktilis inemilis. Jesús monekiyaya motemaktilis, kiampa nochi katli kineltokaskiaj ueliskiaj itstosej nochipa (Juan 3:16). Maske nopa siuatl amo kikuamachiliyaya miak tlamantli, tlauel kitlaskamatiliyaya Jesús, yeka amo kema kitlauelkajki. Kema Jesús kikuapilojtoyaj, María mokajki nopaya pampa kinekiyaya kiyolchikauas uan nojkia katli nopaya itstoyaj (Juan 19:25). Uan kema Jesús ya miktoya, María uan sekinok siuamej kiuikakej tlaajuiyajkayotl tlen kitlaliliskiaj itlakayo Jesús (Mar. 16:1, 2). Jehová tlauel kiteochijki María pampa amo kitlauelkajki Jesús. ¡Tlauel yolpajki kema kiitak Jesús moyolkuitoya uan  kamanaltik iuaya! Amo nochi Jesús itokilijkauaj uelkej kipiaj nopa tlateochiualistli (Juan 20:11-18).

5. ¿Kenijkatsa uelis tijnextisej tijtlaskamatij nochi tlen kichijtokej Jehová uan Jesús topampa?

⁵ Nochi uelis tijnextisej tijtlaskamatij tlen Jehová uan Jesús kichijtokej. ¿Kenijkatsa uelis kiampa tijchiuasej? Kema titemakaj totomij, tonali, uan tochikaualis uan kiampa titlapaleuiaj ika nochi tlen mochiua ipan Jehová itlanechikol. Nojkia, uelis titlapaleuisej kema kichijchiuaj uan kikualchijchiuaj kali kampa titlaueyichiuaj.

6. ¿Kenke tikijtouaj Jesús motemaktilik ininpampa sejse tlen tojuantij?

⁶ Kema timoyoliljuiaj kenijkatsa Jehová uan Jesús tlauel techikneliaj, kichiua nojkia ma tikiniknelikaj (1 Juan 4:10, 19). Uan nojua tlauel tikinikneliaj kema tijkuamachiliaj Jesús mijki topampa. Apóstol Pablo tlauel kipatiitayaya tlen Jesús kichijki. Yeka, kema kintlajkuiljuilik Cristo itokilijkauaj tlen Galacia, kiijtok: “Ikone Toteko tlen nechiknelik, uan motemaktilik uan mijki nopampa” (Gál. 2:20). Jesús motemaktilik, yeka Jehová mitsyoltilanki uan kiampa ueltok timouampojchiua iuaya (Juan 6:44). ¿Kenijkatsa tijyolmati kema timoiljuia Jehová kiitak se kuali tlamantli ipan ta uan yeka temakak iKone pampa kinekiyaya ximouampojchiua iuaya? Ni tlamantli kichiua nojua tlauel ma tikiniknelikaj Jehová uan Jesús. Yeka, ma timotlajtlanikaj: “¿Tlake nechyololinia ma nijchiua pampa nikiniknelia Jehová uan Jesús?”.

7. Kej nesi ipan tlaixkopinkayotl, ¿kenijkatsa uelis tijnextisej tikinikneliaj Jehová uan Jesús? (2 Corintios 5:14, 15; 6:1, 2).

⁷ Kema tikinikneliaj Jehová uan Jesús,  kichiua nojkia ma tikiniknelikaj sekinok (xijpoua 2 Corintios 5:14, 15; 6:1, 2). Tijnextiaj titeikneliaj kema titlajtolmoyauaj ika miak pakilistli uan tikinkamanaljuiaj nochi maseualmej. Tikinkamanaljuiaj katli kampa ueli euaj, katli amo sanse tlamantli momajtokej kichiuaj, uan katli tlatominpiaj o amo. Kiampa titlapaleuiaj ma mochiua tlen Jehová kineki “pampa yajaya kineki nochi tlakamej ma momakixtikaj uan ma kimatikaj tlen nelia melauak” (1 Tim. 2:4).

8. ¿Kenijkatsa uelis tijnextisej tikinikneliaj toikniuaj?

⁸ Nojkia uelis tijnextisej tikinikneliaj Jehová uan Jesús, kema tikinikneliaj toikniuaj (1 Juan 4:21). Kiampa tijnextiaj kema techtekipachoua tlen kinpano, kema tikinpaleuiaj kema kiixnamikij se tlaouijkayotl, kema tikinyolchikauaj kema miki se katli tlauel kiikneliaj, kema tikinpaxalouaj katli mokokouaj uan kema tijchiuaj kampeka tikinyolchikauasej katli mokuesouaj miak tonali (2 Cor. 1:3-7; 1 Tes. 5:11, 14). Nojkia tikiljuiaj Jehová ma kinpaleui pampa tijmatij kema se akajya itstok xitlauak iixpa toTeko, ya kitlakakilis (Sant. 5:16).

9. ¿Tlake seyok tlamantli uelis tijchiuasej uan kiampa tijnextisej tikinikneliaj toikniuaj?

⁹ Nojkia, tijnextiaj tikinikneliaj toikniuaj kema tijchiuaj kampeka kuali timouikasej ininuaya. Tijnekij tikintlapojpoljuisej kej Jehová kichiua. Ximoiljui ipan ni tlamantli: Jehová kikajki ma kimiktikaj iKone pampa kiampa ueliskia techtlapojpoljuis totlajtlakoljuaj. Tlaj ya kiampa kichijki, tojuantij nojkia moneki nima tikintlapojpoljuisej toikniuaj kema techyolkokouaj. Amo tijnekij tielisej kej nopa tlakatl katli amo tetlapojpoljuik tlen Jesús kiijtok ipan se tlapoualistli. Iteko ayokmo kiinanki tlen kitlauikiliyaya maske tlauel miak eliyaya, uan ya amo kinejki kitlapojpoljuis se tlatekipanojketl katli amo miak kitlauikiliyaya (Mat. 18:23-35). Tlaj timokualanik iuaya se toikni, xijchiua kampeka tijsenkauas nopa kuesoli kema ayamo tikilnamikij Cristo imikilis (Mat. 5:23, 24). Tlaj kiampa tijchiuas, tijnextis tlauel tikiniknelia Jehová uan Jesús.

10, 11. ¿Kenijkatsa ueuejtlakamej uelis kinextisej kiikneliaj Jehová uan Jesús? (1 Pedro 5:1, 2).

¹⁰ Ueuejtlakamej uelis kinextisej kiikneliaj Jehová kema kinmokuitlauiaj toikniuaj ika miak tlaiknelili (xijpoua 1 Pedro 5:1, 2). Jesús kinauatik Pedro ma kichiua ni tlamantli. Pedro expa kiijtojtoya amo kiixmati Jesús, yeka kinekiyaya kichiuas miak tlamantli uan kiampa kinextis nelia tlauel kiikneliyaya. Kema Jesús ya moyolkuitoya, kitlatsintokik: “Simón, tiikone Jonás [o Juan], ¿tinechiknelia?”. Pedro kinekiyaya kichiuas tlen ueli tlamantli uan kiampa Jesús kiitaskia nelnelia kiikneliyaya. Uan Jesús kiiljuik: “Xikinmokuitlaui notlakauaj keja se kinmokuitlauia iborregojuaj” (Juan 21:15-17). Uan ipan nopa tonali Pedro pejki kinmokuitlauia Cristo itokilijkauaj ika tlaiknelili, kiampa kinextik nelnelia kiikneliyaya Jesús.

¹¹ Ueuejtlakamej, kema nechka moilnamikis Cristo imikilis, ¿kenijkatsa uelis inkinextisej inkipatiitaj tlen Jesús kiiljuik Pedro? Uelis inkinextisej inkinikneliaj Jehová uan Jesús, tlaj inkichiuaj kampeka nochipa inkinyolchikauasej toikniuaj uan katli ayokmo monechikouaj (Ezeq. 34:11, 12). Nojkia kema moilnamikis Cristo imikilis, uelis  kuali inkinselisej katli momachtiaj Biblia uan katli amo kema yajtoyaj ipan nopa tlanechikoli. Ximoiljuikaj, teipa nopa maseualmej uelis elisej toikniuaj, yeka xijchiuakaj kampeka kuali ma kiyolmatikaj.

12. ¿Kenke tlen Jesús kiijtok kema nechka mikiskia techpaleuia amo ma timajmauikaj? (Juan 16:32, 33).

¹² Kema nechka kimiktiskiaj Jesús, kiniljuik itokilijkauaj: “Ipan ni tlaltipaktli inkipiasej tlaijiyouilistli uan kuesoli, pero ximosemakakaj pampa nijtlantok ni tlaltipaktli” (xijpoua Juan 16:32, 33). ¿Tlake kipaleuik Jesús amo ma kinmakasi ikualankaitakauaj uan amo kema ma kitlauelkaua Jehová? Ya nochipa motemachik ipan Jehová. Jesús kimatiyaya itokilijkauaj nojkia kintlaijiyouiltiskiaj, yeka kiiljuik Jehová ma kinmokuitlaui (Juan 17:11). ¿Kenijkatsa techpaleuia tlen Jesús kiijtok amo ma timajmauikaj? Techpaleuia ma timotemachikaj Jehová kipia miak chikaualistli uan tokualankaitakauaj amo (1 Juan 4:4). Uan ya kiita nochi tlen techpano. Tijmatij, tlaj timotemachiaj ipan Jehová ayokmo tleno tijmakasisej.

13. ¿Kenijkatsa José katli eua Arimatea kinextik amo majmauiyaya?

¹³ Ma timoiljuikaj tlen kichijki José katli eua Arimatea. Judíos tlauel kitlepanitayayaj. Ya eliyaya se tlen katli itstoyaj ipan Sanedrín, katli kinyakanayayaj judíos. Ya tlauel kinmakasiyaya maseualmej kema Jesús tlajtolmoyajki. Juan kiijtok: “Yajaya kitokilik Jesús ichtakatsi pampa kinmakasiyaya nopa tlayakankaisraelitajmej” (Juan 19:38). Maske kipaktiyaya kikakis tlen toTeotsij iTlanauatijkayo kichiuaskia, amo kinekiyaya ma kimatikaj ya nojkia kitokiliyaya Jesús. Ya kinekiyaya judíos nojua ma kitlepanitakaj. Maske amo tijmatij tlake moiljuiyaya, kema Jesús ya miktoya “José mosemakak uan kalakito kampa Pilato uan kitlajtlanito itlakayo Jesús” (Mar. 15:42, 43). Kiampa José kinextik eliyaya se Cristo itokilijka.

14. ¿Tlake uelis tijchiuasej tlaj tikinmakasij maseualmej?

¹⁴ ¿Nojkia timajmaui kej kipanok José katli eua Arimatea? ¿Tipinaua tikijtos tijtekipanoua Jehová kampa timomachtia o kampa titekiti? ¿Ayamo tijneki timoatsonpoliuiltis o titlajtolmoyauas pampa timoiljuia mitspinajtisej? Amo xijkaua  tlen sekinok kiijtosej ma mitstsakuili tijchiuas tlen kuali. Xikiljui Jehová ma mitspaleui tijchiuas tlen ya kineki uan amo timajmauis. Kema tikitas kenijkatsa ya mitsnankilia kema timomaijtoua, ayokmo tleno tijmakasis (Is. 41:10, 13).

15. ¿Tlake kichijkej Jesús itokilijkauaj kema kiitakej Jesús moyolkuitoya? (Lucas 24:52, 53).

¹⁵ Kema Jesús mijki, itokilijkauaj tlauel mokuesojkej. ¿Nojkia tijyolmajtoskia kej inijuantij? Amo san kipolojkej se kuali ininuampo, nojkia moiljuijkej ayokmo kema kuali itstoskiaj (Luc. 24:17-21). Teipa Jesús monextik ininixpa uan kiniljuik ya kichijtoya ma moaxiti tlajtolpanextili. Nojkia kiniljuik ma kichiuakaj se tekitl tlen tlauel ipati (Luc. 24:26, 27, 45-48). Kema panok 40 tonali uan Jesús sampa yajki iluikak, itokilijkauaj tlauel yolpaktoyaj. Yolpakiyayaj pampa kimatiyayaj Jesús moyolkuitoya uan kinpaleuiskia kuali ma kichiuakaj ininteki (xijpoua Lucas 24:52, 53; Hech. 5:42).

16. ¿Kenijkatsa uelis tijchiuasej kej Jesús itokilijkauaj?

¹⁶ Tlaj tijnekij tijchiuasej kej Jesús itokilijkauaj, moneki mojmostla tijtekipanosej Jehová ika pakilistli uan amo san kema tikilnamikij Cristo imikilis. Uajka, moneki timosentlalisej tijtekipanosej Jehová. Sekij ayokmo tekitij kej achtouia pampa kinekij nojua tlauel tlajtolmoyauasej, yasej tlanechikoli uan momachtisej ininuaya ininchampoyouaj sejse semana. Sekij toikniuaj amo kipiaj miak tlamantli tlen maseualmej tlauel kipatiitaj pampa kinekij tlapaleuisej ipan inintlanechikol o yasej tlapaleuitij kampa monekij tlajtolmoyauanij. Moneki tijchiuasej kampeka tijtekipanosej Jehová, pampa ya kiijtojtok nochipa techteochiuas tlaj kiampa tijchiuasej (Prov. 10:22; Mat. 6:32, 33).

17. ¿Tlake moneki tijchiuasej pampa ya nechka tikilnamikisej Cristo imikilis? (Xikita tlaixkopinkayotl).

¹⁷ Tijnekiskiaj ya ma eli martes, abril 4. Amo san ipan nopa tonali uelis timoyoliljuisej tlen Jesús kichijki, uan kenijkatsa ya uan Jehová tlauel techikneliaj. Uelis miakpa timoyoliljuisej ipan nopa tlamantli. Moneki tijpouasej uan timoyoliljuisej ipan tlen kiijtoua nopa recuadro tlen uala ipan Tlen tijchiuasej ipan tlanechikoli, abril, 2019, iamayo 4, 5. Kema timomachtijtias, xikita tlake textos mitspaleuis nojua xitetlaskamatili, xiteikneli, amo ximajmaui uan xiyolpaki. Teipa ximoiljui tlake uelis tijchiuas uan kiampa tijnextis tijtlaskamati tlen Jesús kichijki. Uelis timotemachisej Jesús kipatiitas nochi tlen tijchiuasej pampa tijnekij tikilnamikisej imikilis (Apoc. 2:19).