1, 2. ¿Kenke sejse xiuitl tikilnamikij Cristo imikilis?

 KIPIA se ome mil xiuitl, Jesús temaktilik inemilis topampa, uan yeka nama uelis tiitstosej nochipa. Ipan nopa youali kema Jesús nechka kimiktiskiaj, kinnauatik itokilijkauaj ma kiilnamikaj imikilis. Uan kitekiuik pantsi uan vino (1 Cor. 11:23-26).

² Katli tielij Cristo itokilijkauaj, tijchiuaj tlen ya tlanauatik pampa tlauel tikikneliaj (Juan 14:15). Kema nechka tikilnamikisej Cristo imikilis tijnextiaj tlauel tijpatiitaj tlen kichijki. Yeka tijkixtiaj tonali uan kiampa timomaijtouaj uan timoyoliljuiaj. Nojkia tijchiuaj kampeka titlajtolmoyauasej uan tikintlaneuisej miakej maseualmej ma monechikokaj touaya ipan nopa tonali. Uan amo tijkauaj yon se tlamantli ma techtsakuili pampa tijnekij tikilnamikisej Cristo imikilis.

3. ¿Tlake tikitasej ipan ni tlamachtili?

³ Katli tijtekipanouaj Jehová nochipa tijchijtokej kampeka tikilnamikisej Cristo imikilis. Ipan ni tlamachtili tikitasej eyi tlamantli tlen kinextia kiampa tijchijtokej: 1) tikilnamikij Jesús imikilis kej ya tlanauatik, 2) tikintlaneuij sekinok nojkia ma monechikokaj touaya ipan nopa tonali uan 3) tikilnamiki Jesús imikilis maske tikixnamikij tlaouijkayotl.

4. 1) ¿Tlake moixtoma kema moilnamiki Cristo imikilis? (Lucas 22:19, 20). 2) ¿Kenijkatsa techpaleuia tijmatisej ni tlamantli?

⁴ Sejse xiuitl kema tikilnamikij Cristo imikilis, tijkakij se tlamachtili tlen mokixtijtok ipan Biblia uan kiixtomaj se keski tlajtlanili tlen timochiuiliaj. Ipan nopa tlamachtili kiixtomaj kenke monekiyaya ma techmakixtikaj uan kenijkatsa Jesús imikilis uelis kichiuas ma techtlapojpoljuikaj. Techixtomiliaj ajkia inijuantij kinamiki kikuasej nopa pantsi uan kiisej vino, uan tlake kiixnextia ni ome tlamantli (xijpoua Lucas 22:19, 20). Kema kiixtomaj nopa tlamachtili, techpaleuia ma timoyoliljuikaj kenijkatsa tlauel yolpakisej katli itstosej ipan Tlaltipaktli (Is. 35:5, 6; 65:17, 21-23). Tlauel techpaleuia kema tijkuamachiliaj ni tlamantli. Tlauel miakej maseualmej amo kimatij tlen melauak, yeka amo kipatiitaj tlen Jesús kichijki. Nojkia amo kiilnamikij Jesús imikilis kej ya tlanauatik. ¿Kenke kiampa kichiuaj?

5. ¿Kenijkatsa pejkej kiilnamikij Jesús imikilis kema ayokmo itstoyaj miakej apóstoles?

⁵ Kema ya miktoyaj miakej apóstoles, katli kiijtouayayaj eliyayaj Jesús itokilijkauaj kalajkej ipan tlanechikoli (Mat. 13:24-27, 37-39). Inijuantij tlamachtijkej tlen amo melauak pampa kinekiyayaj kinkajkayauasej miakej (Hech. 20:29, 30). Tlamachtiyayaj tlen amo uala ipan Biblia, kiijtouayayaj Jesús amo temaktilik inemilis sempatsi uan kiampa tlaxtlajki totlajtlakoljuaj. Pejkej tlamachtiaj Jesús monekiyaya motemaktilis miakpa (Heb. 9:27, 28). Ipan ni tonali miakej maseualmej katli kipiaj kuali ininyolo kineltokaj ni istlakatili, yauij iglesia sejse semana o mojmostla pampa kichiuaj tlen kitokaxtiaj la Sagrada Comunión. b Uan maske ipan se keski religiones san kemantika kiilnamikij Jesús imikilis, katli monechikouaj nopaya amo kimachiliaj tlake kiijtosneki tlen Jesús kichijki. Uelis se keskij maseualmej motlajtlaniaj: “¿Nelia toTeotsij uelis nechtlapojpoljuis pampa Jesús temaktilik inemilis?”. Uan sekij motlajtlaniaj ni pampa kinmachtijtokej Jesús imikilis amo techmakixtik tlen totlajtlakoljuaj. Uan, ¿tlake kichijtokej katli nelia elij Cristo itokilijkauaj?

6. ¿Tlake kikuamachilijkej Estudiantes de la Biblia ipan 1872?

⁶ Ipan xiuitl 1870, se keskij Estudiantes de la Biblia katli kinyakanayaya Charles Russell, pejkej kuali momachtiaj tlen Biblia kiijtoua. Inijuantij kinekiyayaj kimatisej kenke moneki tijpatiitasej Jesús imikilis uan kenke moneki tikilnamikisej. Ipan 1872 kikuamachilijkej Jesús mijki pampa kinejki techmakixtis. Uan nima pejkej kiniljuiaj sekinok tlen kiyekojtoyaj. Pejkej tematiltiaj ipan amochtli, periódicos uan ipan pilamochtsitsij. Teipa nojkia pejkej kiilnamikij Cristo imikilis sejse xiuitl, kej kichiuayayaj Cristo itokilijkauaj tlen achtoui siglo.

7. ¿Kenijkatsa techpaleuia ipan ni tonali tlen momachtijkej Estudiantes de la Biblia?

⁷ Tlauel techpaleuia tlen kipantijkej toikniuaj. Jehová tlauel kinteochijki, yeka nama tijkuamachiliaj kenke Jesús temaktilik inemilis uan kenijkatsa techpaleuis teipa tlen kichijki (1 Juan 2:1, 2). Nojkia tijyekojtokej toTeotsij tlauel  kinteochiuas katli kineltokaj: se keskij itstosej nochipa iluikak uan tlauel miakej maseualmej itstosej nochipa ipan Tlaltipaktli. Uan kema timoyoliljuiaj Jehová tlauel techiknelia uan kenijkatsa techpaleuia iKone imikilis, kichiua nojua tlauel ma tikiknelikaj (1 Ped. 3:18; 1 Juan 4:9). Yeka, tojuantij tijchiuaj sanse kej Estudiantes de la Biblia, tikintlaneuij tlauel miakej maseualmej ma monechikokaj touaya kema tikilnamikij Jesús imikilis uan tijchiuaj kej ya tlanauatik.

8. ¿Tlake tijchijtokej pampa tijnekij tikintlaneuisej tlauel miakej maseualmej ma kiilnamikikaj Cristo imikilis? (Xikita tlaixkopinkayomej).

⁸ Ipan miak xiuitl tlen panotok, toikniuaj kintlanejtokej tlauel miakej maseualmej ma monechikokaj touaya kema tikilnamikij Cristo imikilis. Ipan 1881 ni pilamochtsi kintlanejki toikniuaj tlen Estados Unidos ma monechikokaj ipan se kali tlen mokauayaya ipan Allegheny (Pensilvania) uan nopaya kiilnamikiskiaj Cristo imikilis. Teipa toikniuaj pejkej kichiuaj ni tlanechikoli kampa inijuantij monechikouayayaj. Ipan marzo 1940, kiniljuijkej toikniuaj ma kitlaneuikaj sekinok maseualmej katli nojkia kinekiyayaj kiilnamikisej Cristo imikilis. Uan ipan 1960, kali Betel kintitlanilik nochi toikniuaj pilamatsitsij tlen ika ueliskiaj kintlaneuisej maseualmej, ipan nopa xiuitl pejki titetlaneuij ika pilamatsitsij. ¿Kenke tijchiuaj kampeka titetlaneuisej?

9, 10. ¿Ajkia kinpaleuia kema titetlaneuij ma kiilnamikikaj Cristo imikilis? (Juan 3:16).

⁹ Tikintlaneuij maseualmej ma kiilnamikikaj Cristo imikilis touaya pampa tijnekij  ma kimatikaj tlen Jehová uan Jesús kichijtokej topampa (xijpoua Juan 3:16). Tijnekij tlen kiitasej uan kikakisej ma kinyololini ma kinekikaj kiixmatisej Jehová uan ma kitekipanokaj. Kema titetlaneuij amo san tikinpaleuiaj katli ayamo kitekipanouaj Jehová.

¹⁰ Kema titetlaneuij nojkia tikinpaleuiaj katli mouejkatlalijtokej tlen Jehová. Tikintlaneuij pampa tijnekij ma kimatikaj Jehová nojua kiniknelia. Tlauel tiyolpakij kema tikitaj sekij kena monechikouaj ipan nopa tonali. Nopa kinpaleuia ma kiilnamikikaj kenijkatsa tlauel yolpakiyayaj kema kitekipanouayayaj Jehová. Ma tikitakaj tlen kipanok Mónica. c Kema pejki COVID-19, ya sampa pejki tlajtolmoyaua. Ya monechikok kema tikilnamijkej Cristo imikilis ipan 2021, uan kiijtok: “Ni tlanechikoli tlauel nechpaleuik. Kipia 20 xiuitl amo nitlajtolmoyajtoya uan nama uelki nikintlaneui sekinok ma kiilnamikikaj Cristo imikilis. Nikintlanejki sekinok ika miak pakilistli uan kiampa nijnextik nikintlaskamatilia Jehová uan Jesús tlen kichijtokej nopampa” (Sal. 103:1-4). Maske amo nochi maseualmej kinekisej monechikosej, tijchiuaj kampeka tikintlaneuisej pampa tijmatij Jehová tlauel kipatiita tlen tijchiuaj.

11. ¿Kenijkatsa Jehová tlauel techteochijtok pampa tikintlaneuij maseualmej? (Ageo 2:7).

¹¹ Jehová tlauel techteochijtok pampa tijchijtokej kampeka tikintlaneuisej maseualmej kema moilnamiki Cristo imikilis. Se neskayotl, ipan xiuitl 2021 kema momoyajtoya COVID-19, monechikokej se 21,367,603 maseualmej kema tikilnamijkej Cristo imikilis. Kipano ompa imiaka toikniuaj tlen itstokej ipan nochi Tlaltipaktli. Jehová amo san kiita keskij monechikouaj, ya kinpatiita nochi maseualmej (Luc. 15:7; 1 Tim. 2:3, 4). Nochi ni tlamantli kinextia Jehová kinyoltilana maseualmej katli kipiaj kuali ininyolo kema tikintlaneuij ma kiilnamikikaj Cristo imikilis (xijpoua Ageo 2:7).

12. ¿Tlake tlamantli uelis kichiuas ouij ma tijmatikaj tikilnamikisej Cristo imikilis? (Xikita tlaixkopinkayotl).

¹² Jesús kiijtok ipan itlamia tonali tikixnamikiskiaj miak tlaouijkayotl: techtetsopaskiaj tochampoyouaj, techtlatsakuiltiskiaj maseualmej, onkaskia uejueyi tlauilankayotl, uejueyi kokolistli o sekinok tlamantli (Mat. 10:36; Mar. 13:9; Luc. 21:10, 11). Se tlen ni tlamantli ueliskia kichiuas amo ma timonechikokaj kema tikilnamikij Cristo imikilis. ¿Tlake kichijtokej toikniuaj kema kiixnamikij tlaouijkayotl? Uan, ¿kenijkatsa Jehová kinpaleuijtok?

13. ¿Kenijkatsa Jehová kiteochijki Artiom pampa amo majmajki uan kiilnamijki Cristo imikilis kampa tsaktoya?

¹³ Kema kintsakuaj. Toikniuaj katli kintsakuaj kichiuaj kampeka kiilnamikisej Cristo imikilis. Ma tikitakaj tlen kipanok Artiom. Kema tikilnamijkej Cristo imikilis ipan xiuitl 2020, ya kitsaktoya ipan se cuarto tlauel pilsiltsi ininuaya sekinok makuiltij maseualmej. Maske itstoya nopaya, kichijki kampeka kitemos tlen kitekiuiskia kema kiilnamikiskia Cristo imikilis uan nojkia kipanoltik nopa tlamachtili. Maske kinekiyaya kipanoltis nopa tlamachtili, kimatiyaya ouij pampa katli ininuaya tsaktoya tlachichinayayaj uan kiijtouayayaj tlajtoli tlen amo kuali. ¿Tlake kichijki Artiom?  Kiniljuik katli iuaya itstoya tlaj ueliskia amo tlachichinasej yon kitekiuisej tlajtoli tlen amo kuali ipan nopa hora. Mosentlachilik kema kiiljuijkej kena kichiuaskiaj tlen kiniljuik. Artiom kiijtoua: “Nikiniljuik nikinixtomiliskia kenijkatsa tikilnamikij Cristo imikilis”. Maske kiiljuijkej amo kinekiyayaj kimatisej, kema kiitakej kenijkatsa kichijki kitlajtlanijkej se keski tlamantli

14. ¿Tlake kichijki Jehová itlanechikol uan kiampa toikniuaj kiilnamijkej Cristo imikilis maske momoyajtoya COVID-19?

¹⁴ Kema momoyajki COVID-19. Maske kema momoyajki ni kokolistli amo tikilnamijkej Cristo imikilis kej ipa tijchijtoyaj, kena timonechikojkej. d Toikniuaj katli kipiaj internet kiitakej ni tlanechikoli ipan videollamada. Uan, ¿kenijkatsa kiitakej ni tlamachtili toikniuaj katli amo kipiaj internet? Ipan se keski altepemej kipanoltijkej ni tlamachtili ipan televisión o ipan radio. Nojkia ipan kali Betel kichijkej grabaciones ipan kipano 500 tlajtoli uan kintlanejkej se keskij toikniuaj ma kinuikilikaj katli tlauel uejka itstoyaj,  kiampa nojkia ueliskiaj kiilnamikisej Cristo imikilis.

15. ¿Tlake techmachtia tlen kichijki Sue?

¹⁵ Kema tochampoyouaj techtetsopaj. Miakej tlauel ouij kimajtokej mosentilisej kema moilnamiki Cristo imikilis pampa ininchampoyouaj kintetsopaj. Kiampa kipanok Sue, katli namanok momachtia Biblia. Ipan xiuitl 2021, kema poliuiyaya se tonal moilnamikis Cristo imikilis, yajki kiitato tosiuaikni katli kimachtiyaya Biblia uan kiiljuik ichampoyouaj amo kikauayayaj ma monechiko ipan nopa tonali. Tosiuaikni kipouilik tlen kiijtoua Lucas 22:44. Uan kiiljuik kema tochampoyouaj amo techkauaj ma titlaueyichiuakaj, uelis tijchiuasej kej Jesús, ma timomaijtokaj uan ma timotemachikaj Jehová techpaleuis. Kema tonilik, Sue kichijki pantsi uan kitemok vino, nojkia kiitak nopa tlamachtili tlen mopanoltia ika ijnalok ipan jw.org. Uan ika tiotlak, mokaltsajki ipan icuarto uan kikajki tlamachtili tlen moixtoma kema moilnamiki Cristo imikilis san ipan teléfono. Kema panok tonali, kitlajkuiljuilik katli kimachtiyaya: “Yaloua tlauel tinechyolchikajki. Nijchijki kampeka niitstos kema moilnamiki Cristo imikilis, uan nikitak Jehová tlauel nechpaleuik. Tlauel niyolpaki uan nijtlaskamati Jehová”. Tlaj nojkia mitspano kej Sue, ¿timoiljuia Jehová uelis mitspaleuis?

16. ¿Kenke timotemachiaj Jehová techteochiuas tlaj tijchiuaj kampeka tikilnamikisej Cristo imikilis? (Romanos 8:31, 32).

¹⁶ Jehová tlauel kipatiita kema tijchiuaj kampeka tikilnamikisej iKone imikilis. Uelis timotemachisej ya techteochiuas tlaj tijnextiaj tijtlaskamatij ika tlen kichijtok topampa (xijpoua Romanos 8:31, 32). Yeka amo tijnekij yon se tlamantli ma techtsakuili tikilnamikisej Cristo imikilis ni xiuitl. Ma tijchiuakaj kampeka nojua tlauel titlajtolmoyauasej ipan nopa metstli.