1, 2. ¿Tlake nojua moneki tijchiuasej maske ya timoatsonpoliuiltijkej, uan kenke?

 ¿MOJMOSTLA titlachpana mochaj? Uelis kema nechka tiaskia tiitstoti nopaya kuali titlachpanki. Uan, ¿tlake panoskia tlaj ayokmo titlachpanaskia? Nima sampa tlasokiyouaskia. Tlaj tijnekij kuali ma nesi tochaj, moneki mojmostla titlachpanasej.

² Nojkia moneki kiampa tijchiuasej ipan tonemilis uan ika tlen timoiljuiaj. Kema ayamo timoatsonpoliuiltiyayaj, tijchijkej kampeka tijpatlasej tonemilis uan ayokmo tijchijkej tlen kisokiuiaj totlakayo uan toyolo (2 Cor. 7:1). Nama nojua moneki tijneltokasej tlen apóstol Pablo kiijtok, moneki nojua tijyankuilisej totlalnamikilis uan toyolo (Efes. 4:23). ¿Kenke moneki kiampa tijchiuasej? Pampa kej maseualmej moiljuiaj uelis kisokiuis totlalnamikilis uan kichiuas ayokmo kuali ma tiitstokaj iixpa Jehová. Tlaj tijnekij Jehová nochipa kuali ma techita, moneki nochipa tikitasej tlake timoiljuiaj, kenijkatsa tielij uan tlen tijnekij tijchiuasej.

3. ¿Tlake moneki tijchiuasej tlaj tijnekij tijpatlasej totlalnamikilis? (Romanos 12:2).

³ ¿Kenijkatsa uelis tijpatlasej totlalnamikilis? (Xijpoua Romanos 12:2). Amo san moneki tijchiuasej se keski kuajkuali tlamantli. Moneki tikitasej tlake eltok ipan toyolo uan tijpatlasej tonemilis kej Jehová kineki. Uan moneki nochipa kiampa tijchijtosej.

4. ¿Tlake uelis tijchiuasej uan kiampa amo timoiljuisej kej sekinok maseualmej?

 ⁴ Kema tielisej tixitlauakej, nochipa tijyolpakiltisej Jehová ika tlen timoiljuisej. Maske ipan ni tonali ayamo kiampa tielij, moneki tijchiuasej kampeka tijpatlasej totlalnamikilis. Ipan Romanos 12:2 apóstol Pablo kiijtok tlaj tijnekij tijyolpakiltisej Jehová, achtoui moneki tijpatlasej totlalnamikilis. Moneki tijchiuasej kampeka amo timoiljuisej kej sekinok maseualmej uan amo tijchiuasej tlen inijuantij kichiuaj. Moneki timotlajtlanisej se keski tlamantli uan tikitasej tlaj timoyakanaj ika toTeotsij itlalnamikilis ipan tlen timoiljuiaj uan ipan tlen timosentlalijtokej tijchiuasej.

5. ¿Kenijkatsa uelis tijmatisej tlaj nelnelia tijneltokaj toTeotsij nechka kitlamiltis tlen amo kuali? (Xikita tlaixkopinkayomej).

⁵ Se neskayotl, toTeotsij kineki nochipa ma tikilnamiktokaj nechka kitsontlamiltis tlen amo kuali (2 Ped. 3:12). Uajka ma timotlajtlanikaj: “¿Nijnextia ipan nonemilis nelnelia nijneltoka toTeotsij nechka kitsontlamiltis nochi tlen amo kuali? Kema nijtlapejpenia tlaj tlauel nimomachtis o tlaj tlauel nitekitis, ¿nijnextia nikachtouitlalia nijtekipanos Jehová? ¿Nimotemachia Jehová kinmokuitlauis nochampoyouaj? ¿Nochipa nimotekipachojtok pampa nijneki nijpias tlen moneki?”. Jehová tlauel yolpaki kema kiita tijchiuaj kampeka timonejnemiltisej kej ya kineki (Mat. 6:25-27, 33; Filip. 4:12, 13).

6. ¿Tlake nojua moneki tijchiuasej?

⁶ Moneki nochipa tikitasej tlake timoiljuiaj uan tijpatlasej tlen moneki. Pablo kiniljuik ni tlamantli Cristo itokilijkauaj katli itstoyaj Corinto: “Ximotlachilikaj  kuali intla nelia intlaneltokanij o axtle. Ximoyejyekokaj intla inkichiuaj tlamantli tlen kinextia para nelia inkineltokaj Toueyiteko” (2 Cor. 13:5). Kema kuali titlaneltokaj amo san tiauij tlanechikoli o titlajtolmoyauaj kemantika. Nojkia tijnextiaj kuali titlaneltokaj ika tlen timoiljuiaj, ika tlen tijnekij tijchiuasej uan kenke tijchiuaj se tlamantli. Yeka mojmostla ma tijpouakaj Biblia, kiampa tijpatlatiasej totlalnamikilis uan timoiljuisej kej toTeotsij kineki. Nojkia ma tijpatlakaj tlen moneki, kiampa tijyolpakiltisej toTeotsij (1 Cor. 2:14-16).

7. Kej kiijtoua Efesios 4:31, 32, ¿tlake sekinok tlamantli moneki tijchiuasej, uan kenke uelis ouij tijchiuasej?

⁷ (Xijpoua Efesios 4:31, 32). Amo san moneki tijpatlasej totlalnamikilis, nojkia moneki tijpatlasej tonemilis (Efes. 4:24). Yeka, moneki tijchiuasej se keski tlamantli, moneki tijchiuasej kampeka ayokmo titekualankaitasej yon timosisinisej. ¿Kenke uelis tijmatisej ouij ayokmo kiampa tijchiuasej? Pampa uelis kiampa timomajtokej tijchiuaj. Biblia kiijtoua itstokej maseualmej katli nima mosisiniaj o katli tlauel kualanij (Prov. 29:22). Tlaj ayokmo tijnekij kiampa tielisej, moneki tijchiuasej kampeka nojua tijpatlasej tonemilis maske ya timoatsonpoliuiltijkej. Ma tikitakaj tlake kichijki se toikni.

8, 9. ¿Kenijkatsa tlen kipanok Stephen kinextia moneki tijpatlatiasej tonemilis?

⁸ Se toikni katli itoka Stephen monejki kichiuas kampeka ayokmo tlauel mosisinis. Ya kiijtoua: “Maske ya nimoatsonpoliuiltijtoya nojua monejki nijchiuas kampeka nijpatlas kej nieliyaya. Se neskayotl, se tonali kema titlajtolmoyauayayaj kajkalpa, nikitak se tlachtejketl kiuikayaya iradio nocarro uan nijtepotstokak. Kema nechka nikitskiskia, kimajkajki nopa radio uan motlalojtejki. Teipa kema nikinpouiliyaya sekinok toikniuaj tlen nechpanotoya, se toikni katli kuali tlaneltoka, nechiljuik: ‘¿Tlake tijchijtoskia tlaj kena tikitskitoskia nopa tlakatl?’. Ika tlen nechiljuik nikitak nojua monekiyaya nijpatlas se keski tlamantli ipan nonemilis”. b

⁹ Tlen kipanok Stephen kinextia uelis kemantika nojua tijnekisej tijchiuasej se tlamantli tlen achtouia tijchiuayayaj. Tlaj kiampa techpanos, amo tlauel ma timoyolkokokaj yon ma timoiljuikaj amo kuali tijtekipanouaj Jehová. Apóstol Pablo kiijtok: “Yonke tijnekij tijchiuasej tlen kuali, tijchiuaj tlen axkuali” (Rom. 7:21-23). Sanse kej se kali sampa sokiyoua, uelis sampa tijchiuasej tlen amo kuali pampa titlajtlakolejkej. Yeka, moneki tijchijtosej kampeka tijpiasej tlapajpaktik totlalnamikilis. ¿Tlake techpaleuis?

10. ¿Tlake techpaleuis ayokmo ma tijchiuakaj tlen amo kuali? (1 Juan 5:14, 15).

¹⁰ Ma tikiljuikaj Jehová tlake tlamantli tijmatij ouij tijpatlasej uan ma timotemachikaj ya techtlakakilis uan techpaleuis (xijpoua 1 Juan 5:14, 15). Maske Jehová amo techkixtilis nopa tlamantli, techpaleuis ayokmo kiampa ma tijchiuakaj (1 Ped. 5:10). Amo san moneki timomaijtosej, nojkia moneki tijchiuasej  kampeka amo sampa tijchiuasej tlen timomajtoyaj tijchiuaj. Amo ma tijtlachilikaj películas yon ma tijpouakaj amatlajkuiloli kampa nesi kejuak kuali tlen tijnekij tijpatlasej. Nojkia ma tijchiuakaj kampeka amo timoiljuisej ipan tlamantli tlen amo kuali (Filip. 4:8; Col. 3:2).

11. ¿Tlake techpaleuis nojua ma tijpatlatokaj tonemilis?

¹¹ Amo san moneki ayokmo tijchiuasej tlen amo kuali, nojkia moneki tijchiuasej kampeka tijnextisej kuajkuali tlamantli. ¿Tlake techpaleuis kiampa tijchiuasej? Tlaj timosentlalisej nojua kuali tikixmatisej Jehová uan tijnextisej nopa kuajkuali tlamantli kej ya kinextia (Efes. 5:1, 2). Kema ipan Biblia tijpantisej se tlapoualistli kampa kinextia kenijkatsa Jehová tetlapojpoljuia, ma timotlajtlanikaj: “¿Nikintlapojpoljuia sekinok o amo?”. Uan kema tijpouaj kenijkatsa Jehová kiniknelik uan kinpaleuik katli kiixnamijkej tlaouijkayotl, ma timotlajtlanikaj: “¿Nojkia nechtekipachoua tlen kinpano toikniuaj katli amo kipiaj tlen ika mopanoltisej uan nikinpaleuia?”. Nochipa ma tijchijtokaj kampeka tijpatlasej tonemilis uan totlalnamikilis.

12. ¿Kenijkatsa tlen kipanok Stephen kinextia Biblia kinpaleuia maseualmej ma kipatlakaj ininnemilis?

¹² Stephen, katli tikijtojkej ipan párrafo 8, kichijki kampeka kipatlas inemilis. Ya kiijtoua: “Maske ya nimoatsonpoliuiltijtoya, kemantika nojua ouij nijmatki amo nimosisinis. Kema kiampa nechpano, nia sejkanok o nijchiua seyok tlamantli tlen nechpaleuia amo ma nikualani ininuaya sekinok maseualmej. Kema nosiua uan sekinok maseualmej kiitaj nijchiua kampeka amo nimosisinis, nechiljuiaj tlauel kuali tlen nijchiua uan na nojkia kuali nijyolmati. Nijmati noselti amo ueltoskia nijpatlas nonemilis. Nimotemachia Biblia nelnelia kinpaleuia maseualmej ma kipatlakaj ininnemilis”.

13. ¿Tlake techpaleuis ma tijnekikaj tijchiuasej tlen kuali? (Gálatas 5:16).

¹³ (Xijpoua Gálatas 5:16). Jehová kipaktia temakas tlen kipia, uan ya techmakas itonal tlen techpaleuis ma tijchiuakaj tlen kuali. Kema timomachtiaj Biblia, tijkauaj toTeotsij itonal ma techpaleui. Nojkia tijseliaj itonal kema tiauij tlanechikoli. Nopaya tiitstokej ininuaya toikniuaj, katli nojkia kichiuaj kampeka kuali monejnemiltisej, uan nopa tlauel techyolchikaua (Heb. 10:24, 25; 13:7). Kema tikiljuiaj Jehová ma techpaleui tijpatlasej se tlamantli ipan tonemilis, ya techmaka itonal uan kiampa techpaleuia tijpatlasej tlen moneki. Maske ni tlamantli amo kichiuas ayokmo ma tijnekikaj tijchiuasej tlen amo kuali, kena techpaleuis amo ma tijchiuakaj. Kej kiijtoua Gálatas 5:16, katli moyakanaj ika toTeotsij itonal amo kitokilisej inintlakayo “tlen kineki tlajtlakolchiuas”.

14. ¿Kenke moneki nojua tijnekisej tijchiuasej tlen kuali?

¹⁴ Tlaj ya timomatkej tijchiuaj se keski tlamantli tlen techpaleuia kuali ma titlaneltokakaj, nojua kiampa ma tijchijtokaj uan amo ma timoiljuikaj tlen amo kinamiki. ¿Kenke kiampa tikijtouaj? Pampa totlakayo nochipa techyoltilana ma tijchiuakaj tlen amo kuali. Maske ya timoatsonpoliuiltijkej uelis kemantika  tijnekisej tijchiuasej tlen amo kuali, kej titlaisej, timauiltisej ika tomij o tikitasej pornografía (Efes. 5:3, 4). Se toikni telpokatl kiijtoua: “Tlauel ouij nijmati pampa nikinixtoka tlakamej. Maske nimoiljuiyaya amo nochipa kiampa nijyolmatiskia, ipan ni tonali nojua kiampa nijyolmati”. ¿Tlake techpaleuis tlaj tlauel techyoltilana se tlamantli tlen amo kuali?

15. ¿Kenke tlauel techyolchikaua pampa tijmatij amo san tojuantij techyoltilana tlen amo kuali? (Xikita tlaixkopinkayotl).

¹⁵ Tlaj tijmatij ouij amo tijchiuasej tlen techyoltilana, ma tikilnamikikaj amo san tojuantij kiampa techpano. Biblia kiijtoua: “Axkema inmechyoltilantok niyon se tlajtlakoli para xijchiuakaj tlen axkinyoltilantok sekinok tlakamej” (1 Cor. 10:13a). Uan seyok Biblia kiijtoua: “Inmojuantij inkiixnamikij sanse tlaouijkayotl kej sekinok”. Kiampa kiniljuijkej Cristo itokilijkauaj tlen achtoui siglo katli itstoyaj ipan Corinto. Se keskij achtouia auilnemiyayaj, mosiuanekiyayaj, motlakanekiyayaj uan moiuintiyayaj (1 Cor. 6:9-11). Inijuantij nojkia monejki kipatlasej ininnemilis maske kintlapejpenijtoyaj yasej iluikak, pampa nojua eliyayaj tlajtlakolejkej. Uelis kemantika monekiyaya amo kichiuasej tlen kinyoltilanayaya. Nopa tlauel techyolchikaua pampa tijmatij sekinok nojkia kichijkej kampeka amo kichiuasej tlen kinyoltilanayaya. Uajka nochipa kuali ma titlaneltokakaj uan ma tikilnamikikaj “toikniuaj ipan Cristo kampa ueli ipan ni tlaltipaktli nojkia tlaijiyouiaj” (1 Ped. 5:9).

16. ¿Tlake amo kinamiki timoiljuisej, uan kenke?

¹⁶ Amo ma timoiljuikaj amo aka techkuamachilis tlaj tijmatij ouij tijchiuasej tlen kuali. Nopa amo techpaleuis. Tlaj kiampa timoiljuiaj uelis kichiuas ma timoiljuikaj  amo kema uelis tijchiuasej tlen kuali. Biblia techtlajtolmaka: “Toteko, yajaya temachtli, uan axkikauilis ma inmechyoltilana se tlajtlakoli hasta kampa ayok uelis inkixikosej” (1 Cor. 10:13e). Uajka, maske tlauel techyoltilana tlen amo kuali, uelis tijchiuasej kampeka amo tijtlauelkauasej Jehová. Ya techpaleuis amo ma tijchiuakaj tlen techyoltilana.

17. Maske uelis nojua tijnekisej tijchiuasej tlen amo kuali, ¿tlake techpaleuis amo ma tijchiuakaj?

¹⁷ Tijmatij titlajtlakolejkej, yeka kemantika tijnekisej tijchiuasej tlen amo kuali. Kema kiampa panos, ma tijchiuakaj kampeka ayokmo timoiljuisej tlen amo kuali uan ma tijchiuakaj kej José, katli nima cholok kema isiua Potifar kinejki motekas iuaya (Gén. 39:12). Tlaj timosentlalijtosej ipan tlen kuali, amo tijchiuasej tlen totlakayo kineki.

18, 19. ¿Tlake tlajtlanili techpaleuis nojua ma tijpatlatiakaj totlalnamikilis?

¹⁸ Moneki tijchiuasej tijpatlasej kej timonejnemiltiaj uan kej timoiljuiaj, kiampa uelis tijyolpakiltisej Jehová. Yeka, moneki tikitasej kenijkatsa tielij uan timotlajtlanisej: “Ika tlen nijchiua, ¿nijnextia nijneltoka tiitstokej ipan itlamia tonali? ¿Nijchiua kampeka nijpatlas nonemilis? ¿Nijkaua toTeotsij itonal ma nechyakana uan amo nijchiua tlen nechyoltilana?”.

¹⁹ Kema timotlajtlanisej ni tlamantli ma tikitakaj tlen ya tijpatlakej uan amo ma timoiljuikaj nochipa tijchiuasej tlen xitlauak. Tlaj tikitaj nojua moneki tijpatlasej se keski tlamantli, amo ma timoyolkokokaj. Moneki tijchiuasej tlen kiijtoua Filipenses 3:16: “Mojmostla ma tinejnemikaj keja kiijtoua nochi itlajtol tlen ya tijmajtokej”. Tlaj kiampa tijchiuaj, Jehová techteochiuas pampa tijchiuaj kampeka tijpatlasej totlalnamikilis.