1, 2. ¿Tlake tlaouijkayotl ueliskia tikixnamikisej katli tijtekipanouaj Jehová?

 NOCHI uelis techpanos tlen amo kuali uan mopatlas kej tiitstokej. Ma tikitakaj tlen kinpanok se keskij toikniuaj. Se tonali, se tepajtijketl kiiljuik toikni Luis, a kipiayaya cáncer uan san itstoskia se keski metstli. Monika kuali kitekipanouayaya Jehová iuaya iueue, katli eliyaya ueuejtlakatl, pero se tonali kimatki iueue kikajkayajtoya miak xiuitl. Olivia, katli amo monamiktijtok, monejki kikajteuas ichaj pampa tlasojsoloskia se chikauak ajakatl kampa itstoya. Kema tlakuepilik ichaj, kiitak nopa ajakatl tlami tlanempolojtoya. Kej tikitaj nima mopatlak kej itstoyaj. ¿Nojkia kiampa mitspanotok?

² ToTeotsij itekipanojkauaj nojkia tikixnamikij tlaouijkayotl uan timokokouaj kej sekinok maseualmej. Nojkia techtlatsakuiltiaj katli amo kinekij ma tijtekipanokaj toTeotsij. Maske Jehová kikaua ma tikixnamikikaj tlaouijkayotl, ya kiijtojtok techpaleuis (Is. 41:10). Jehová uelis techpaleuis ma tiyolpakikaj, kuali ma tijtlapejpenikaj tlen tijchiuasej uan amo ma tijtlauelkauakaj maske tikixnamikisej uejueyi tlaouijkayotl. Ipan ni tlamachtili tikitasej naui tlamantli  tlen Jehová kichiua uan kiampa techpaleuia ma tikixnamikikaj tlen techpano. Nojkia tikitasej tlake moneki tijchiuasej uan kiampa tijselisej nopa tlapaleuili tlen Jehová techmaka.

JEHOVÁ TECHMOKUITLAUIS

3. ¿Tlake tijyolmatij kema tikixnamikij se ueyi tlaouijkayotl?

³ Tlaj tikixnamiktokej se ueyi tlaouijkayotl, uelis tlauel timokuesouaj uan tijmatij ouij kuali tijtlapejpenisej tlen tijchiuasej. Uelis kiampa tijyolmatij pampa tlauel techyolkokoua tlen techpanotok uan tlauel timotekipachouaj. Kiampa kiyolmatkej nopa omej tosiuaikniuaj katli tikijtojkej ipan párrafo se. Olivia kiijtoua: “Kema nopa chikauak ajakatl kisojsolok nochaj, tlauel nimotekipachok uan amo nijmatiyaya tlake nijchiuas”. Monika kiijtoua tlake kiyolmatki pampa iueue kikajkayajki: “Amo san nimokuesok, tlen nechpanok nelia tlauel nechyolkokok, ayokmo ueliyaya nijchiua tlen nimomajtoya. Amo kema nimoiljuik tlaj kiampa nechpanoskia”. ¿Tlake kiijtojtok Jehová kichiuas kema tikixnamikisej se ueyi tlaouijkayotl?

4. ¿Tlake kiijtoua kichiuas Jehová ipan Filipenses 4:6, 7?

⁴ Tlen Jehová kichiua. Ya kiijtojtok techmakas “tlaseuilistli” ipan toyolo (xijpoua Filipenses 4:6, 7). Tijpiaj nopa tlaseuilistli pampa timouampojchijtokej iuaya Jehová, uan maseualmej amo uelij kikuamachiliaj kenke kiampa tijyolmatij. Uelis se tonali tlauel timomaijtok pampa tlauel timotekipachojtoya uan kema titlanki, ayokmo kiampa tijyolmatki pampa Jehová mitsmakak tlaseuilistli.

5. ¿Kenijkatsa kimokuitlauia toyolo uan totlalnamikilis nopa “tlaseuilistli” tlen toTeotsij techmaka?

⁵ Filipenses 4:7 kiijtoua: “Nopa tlaseuilistli kiyaualtsakuas inmoyolo uan inmotlalnamikilis”. Nopa tlajtoli “kiyaualtsakuas” kitekiuiyayaj kema soldados kimokuitlauiyayaj se altepetl uan kiampa amo aka ueliskia kiteuis. Katli itstoyaj ipan nopa altepetl amo motekipachouayayaj pampa kimatiyayaj nopa soldados tlamokuitlauiyayaj. Kema toTeotsij techmaka tlaseuilistli ipan toyolo uan ipan totlalnamikilis, ayokmo timotekipachouaj yon timajmauij (Sal. 4:8). Uan maske uelis nojua tijpiasej nopa tlaouijkayotl, kej kipanok Ana, Jehová techpaleuis ma tijpiakaj tlaseuilistli (1 Sam. 1:16-18). Uan nopa techpaleuis ma timoiljuikaj kej kinamiki uan kuali ma tijtlapejpenikaj tlen tijchiuasej.

6. ¿Tlake moneki tijchiuasej tlaj tijnekij toTeotsij ma techmaka tlaseuilistli? (Nojkia xikita tlaixkopinkayomej).

⁶ Tlen tojuantij moneki tijchiuasej. Sanse kej nopa maseualmej kiiljuiyayaj se soldado  ma kinmokuitlaui. Tojuantij nojkia moneki tikiljuisej Jehová ma techpaleui. Tlaj tijnekij tijpiasej nopa tlaseuilistli tlen toTeotsij temaka, moneki tlauel timomaijtosej (Luc. 11:9; 1 Tes. 5:17). Kema kiiljuijkej Luis san itstoskia se keski metstli, ya uan isiua Ana, tlauel momaijtojkej. Luis kiijtok: “Tlauel ouij tijtlapejpenis ika tlake timopajtis kema tlauel timokokoua, pero tlamaijtoli techpaleuijtok ma tijpiakaj tlaseuilistli”. Luis uan isiua kiijtojkej inijuantij momaijtouayayaj ika nochi ininyolo uan kitlajtlaniyayaj Jehová ma kinmaka tlaseuilistli, ma kinpaleui kuali kiyolmatisej uan kuali kitlapejpenisej tlen kichiuasej. Uan kiitakej kenijkatsa Jehová kinpaleuik. Tlaj tikixnamiktok se tlaouijkayotl, nojua ximomaijto, kiampa tikitas kenijkatsa Jehová mitsmakas tlaseuilistli ipan moyolo uan ipan motlalnamikilis (Rom. 12:12).

JEHOVÁ TECHPALEUIS KUALI MA TIJYOLMATIKAJ

7. ¿Tlake tijyolmatij kema tikixnamikij se ueyi tlaouijkayotl?

⁷ Kema tikixnamikij se ueyi tlaouijkayotl, tlauel timotekipachouaj uan nopa uelis kichiuas amo ma tikitakaj tlen techpano kej kinamiki uan amo kuali ma tijtlapejpenikaj tlen tijchiuasej. Eli kej kema se barco tlauel mojmolinia pampa chikauak mokojkoxonia atl. Kiampa kipanok Ana, kema Luis mijki. Ya kiijtoua: “Kemantika nimomachiliyaya noselti uan tlauel nimokuesouayaya, uan nojkia tlauel nikualaniyaya pampa Luis ayokmo itstoya nouaya. Uan kemantika nimotetsopayaya pampa monekiyaya nijchiuas se keski tlamantli tlen achtouia Luis kichiuayaya”. Tlauel amo kuali kiyolmatiyaya. ¿Kenijkatsa techpaleuia Jehová kema amo kuali tijyolmatij uan timoiljuiaj amo uelis tikixnamikisej se ueyi tlaouijkayotl?

8. ¿Tlake kiijtojtok Jehová kichiuas ipan Isaías 33:6?

⁸ Tlen Jehová kichiua. Jehová kiijtojtok techpaleuis (xijpoua Isaías 33:6). Kema chikauak tlaajaka ipan mar, nopa atl tlauel mokojkoxonia uan kichiua tlauel ma mojmolini nopa barco. Para amo kiampa ma kinpano, sekij barcos kipiaj inintsala se tlamantli tlen kinpaleuia amo tlauel ma kinojolini atl. Kiampa nopa barco amo tlauel chikauak mojmolinia uan katli yauij nopaya amo majmauij uan kuali kiyolmatij. Kemantika, nopa tepostli tlen kipaleuia nopa barco amo tlauel ma mojmolini, más kuali tekiti kema nopa barco nejnentia. Sanse kej nopa barco, tlaj tijnekij Jehová ma techpaleui kuali tijyolmatisej kema tikixnamikisej tlaouijkayotl, moneki nojua tijtekipanojtosej.

9. ¿Kenijkatsa techpaleuia kuali ma tijyolmatikaj nochi tlen Jehová itlanechikol techmaka? (Nojkia xikita tlaixkopinkayomej).

 ⁹ Tlen tojuantij moneki tijchiuasej. Tlaj amo kuali tijyolmatij pampa tikixnamiktokej se tlaouijkayotl, ma tijchiuakaj kampeka nojua tijchiuasej tlen techpaleuis kuali titlaneltokasej. Uelis ayokmo tijchiuasej nochi tlen achtouia tijchiuayayaj, pero ma tikilnamikikaj Jehová amo kineki ma tijchiuakaj tlen amo tiuelij (nojkia xikita Lucas 21:1-4). Xijchiua kampeka kuali timomachtis uan timoyoliljuis ipan tlen tijpoua. Jehová itlanechikol techmakatok tlamachtili uan videos tlen uelis techpaleuis sampa kuali ma tijyolmatikaj. Tlaj tijneki tijpantis se tlamachtili, uelis tikalakis ipan JW Library^®, nojkia uelis tijtekiuis nopa Índice de las publicaciones Watch Tower uan Tlen ika momachtiaj Jehová itlajtoltemakauaj. Monika, katli tikijtojkej achtouia, kipaleuik kuali ma kiyolmati pampa kitekiuik ni tlamantli kema momachtiyaya. Kemantika kitemouayaya tlamachtili kampa kiijtouayaya tlake techpaleuis amo timosisinisej, tlake uelis tijchiuasej kema se akajya techkajkayaua o tlen kiijtosneki amo se tetlauelkauas. Kipouayaya nopa tlamachtili uan nopa kipaleuiyaya sampa kuali ma kiyolmati. Ya kiijtoua: “Kema peuayaya nimomachtia, tlauel nimokuesouayaya pero kema nitlamiyaya, kuali nijyolmatiyaya. Nikitayaya Jehová kikuamachilia tlen nijyolmati uan nechpaleuia”. Jehová nojkia uelis mitspaleuis kuali xijyolmati maske tikixnamiktok se tlaouijkayotl (Sal. 119:143, 144).

JEHOVÁ TECHPALEUIS NOJUA MA TIJTEKIPANOKAJ

10. ¿Tlake tijyolmatij kema tikixnamikij se tlaouijkayotl?

¹⁰ Kema tikixnamikij se tlaouijkayotl, tlauel tisiauij uan amo kuali tijyolmatij. Uelis techpano kej se motlalojketl katli moikxikokoua, maske achtouia chikauak motlalouayaya, nama ika yolik nejnemi. Uelis tijmatij ouij tijchiuasej tlen achtouia tijchiuayayaj o uelis ayokmo tijneki tijchiuasej tlen techpaktiyaya. Sanse kej Elías, uelis san tijnekiskiaj timotektosej uan tikochtosej (1 Rey. 19:5-7). ¿Tlake kiijtojtok Jehová kichiuas kema kiampa tijyolmatisej?

11. ¿Tlake kichiua Jehová pampa kineki techpaleuis? (Salmo 94:18).

¹¹ Tlen Jehová kichiua. Jehová kiijtojtok techpaleuis (xijpoua Salmo 94:18). Sanse kej se motlalojketl katli moikxikokojtok moneki ma kipaleuikaj uan kiampa sampa uelis  nejnemis, tojuantij nojkia moneki ma techpaleuikaj uan kiampa nojua tijtekipanojtosej Jehová. Kema amo kuali tijyolmatij, Jehová techiljuia: “Na niDios uan niinmoTEKO, niinmechitskitok ipan inmomanejmatl uan niinmechiljuia: ‘Amo ximajmauikaj. Nika niitstok para niinmechpaleuisʼ” (Is. 41:13). Kema David kiixnamijki miak tlaouijkayotl uan kinpixki miakej ikualankaitakauaj, ya kiitak Jehová kipaleuiyaya, yeka kiiljuik: “Tinechitskia ika monejmatl” (Sal. 18:35). Pero, ¿kenijkatsa techpaleuia Jehová?

12. Kema amo kuali tijyolmatij, ¿ajkia inijuantij kintekiuia Jehová ma techpaleuikaj?

¹² Miakpa Jehová kinyololinia sekinok ma techpaleuikaj. Se tonali David tlauel mokuesojtoya uan iuampo Jonatán yajki kiyolchikauato (1 Sam. 23:16, 17). Uan Jehová kitekiuik Eliseo kema kipaleuik Elías (1 Rey. 19:16, 21; 2 Rey. 2:2).Ipan ni tonali, Jehová techpaleuia ika tochampoyouaj, touampoyouaj uan ika ueuejtlakamej. Pero uelis kema amo kuali tijyolmatij tijnekij tiitstosej toselti. Maske amo kenijki tlaj kiampa tijyolmatij, ¿tlake moneki tijchiuasej tlaj tijnekij tijselisej nopa tlapaleuili tlen Jehová techmaka?

13. ¿Tlake moneki tijchiuasej tlaj tijnekij tijselisej nopa tlapaleuili tlen Jehová techmaka? (Nojkia xikita tlaixkopinkayomej).

¹³ Tlen tojuantij moneki tijchiuasej. Ma tijchiuakaj kampeka amo timouejkatlalisej. Kema timouejkatlaliaj, san timosentlaliaj ipan tlen techpano uan nopa uelis kichiuas amo kuali ma tijtlapejpenikaj tlen tijchiuasej (Prov. 18:1). Kemantika nochi tijnekij tiitstosej toselti, uan más kema tijpiaj se ueyi tlaouijkayotl. Pero tlaj tlauel timouejkatlaliaj, Jehová amo uelis kintekiuis sekinok uan kiampa techpaleuis. Uajka, maske tijmatisej ouij, ma tijkauakaj ma techpaleuikaj tochampoyouaj, touampoyouaj uan ueuejtlakamej. Ma tikilnamikikaj Jehová kintekiuia uan kiampa techpaleuia ma tikijiyouikaj tlen techpano (Prov. 17:17; Is. 32:1, 2).

JEHOVÁ TECHYOLCHIKAUAS

14. ¿Tlake uelis kichiuas ma timajmauikaj?

¹⁴ Uelis kemantika tlauel timajmauij. Biblia kiijtoua se keskij Jehová itekipanojkauaj tlauel majmajkej pampa kinkualankaitayayaj o pampa kiixnamijkej uejueyi kuesoli (Sal. 18:4; 55:1, 5). Uelis tojuantij nojkia techtetsopaj tochampoyouaj, tekichiuanij, kampa timomachtiaj o kampa titekitij. Nojkia  uelis timajmauij pampa tijpiaj se kokolistli uan timoiljuiaj timikisej. Tlaj kiampa techpano, uelis timomachiliaj kej se konetl katli amo ueli momanauia. ¿Kenijkatsa techpaleuia Jehová?

15. Kej kiijtoua Salmo 94:19, ¿tlake kiijtojtok kichiuas Jehová?

¹⁵ Tlen Jehová kichiua. Ya techyolchikaua uan techpaleuia kuali ma tijyolmatikaj (xijpoua Salmo 94:19). Ma timoiljuikaj ipan se siuapil katli majmaui uan amo ueli kochi pampa tlauel tlatomoni uan tlapetlani. Uala itata, kinajnaua uan kiyoltlalia, kiampa ueli kochi. Maske nojua chikauak tlapetlani uan tlatomoni, nopa siuapil ayokmo majmaui pampa itata kinajnauajtok. Uelis tojuantij nojkia kiampa techpano kema tlauel timajmauij. Uelis tijnekij kejuak ma technajnaua totata Jehová uan kiampa uelis kuali tijyolmatisej. ¿Tlake moneki tijchiuasej tlaj tijnekij Jehová ma techyolchikaua?

16. ¿Tlake moneki tijchiuasej tlaj tijnekij Jehová ma techyolchikaua? (Nojkia xikita tlaixkopinkayomej).

¹⁶ Tlen tojuantij moneki tijchiuasej. Tlauel moneki tijkixtisej tonali uan timomaijtosej uan tijpouasej Jehová iTlajtol (Sal. 77:1, 12-14). Tlaj kiampa tijchiuasej, kema tijpiasej se ueyi kuesoli, nima tikiljuisej Jehová ma techpaleui. Ma tikiljuikaj tlen techtekipachoua uan tlen kichiua ma timajmauikaj uan ma tijkauakaj ma techyakana uan ma techyolchikaua ika iTlajtol (Sal. 119:28). Se keski amochtli tlen Biblia uelis techyolchikauas kema tijpiaj tlaouijkayotl, kej amochtli Job, Salmos uan Proverbios. Nojkia techpaleuis tlen kiijtok Jesús ipan Mateo capítulo 6. Tlaj timomaijtos uan tijpouas Biblia tikitas kenijkatsa ya mitsyolchikauas.

17. ¿Tlake amo kinamiki tikilkauasej?

¹⁷ Amo ma tikilkauakaj Jehová nochipa techpaleuis maske tijpiasej uejueyi tlaouijkayotl. Amo kema techkauas toselti (Sal. 23:4; 94:14). Ma tikilnamikikaj, Jehová kiijtojtok techmokuitlauis, techpaleuis nojua ma tijtekipanokaj, techyolchikauas uan techpaleuis kuali ma tijyolmatikaj. Isaías kiiljuik Jehová: “TOTEKO, mojmostla tikinmakas yoltlaseuilistli nopa tlakamej tlen motemachiaj ipan ta, nochi tlen kisenuikiliaj mitstemouaj” (Is. 26:3). Yeka, ximotemachi ipan Jehová uan xijkaua ma mitspaleui. Tlaj kiampa tijchiuas, uelis tikijiyouis tlen ueli tlaouijkayotl.