1. ¿Kenke kemantika timajmauij?

 NOCHI timajmauij kemantika. Maske Biblia kiijtoua amo kinamiki tikinmakasisej katli miktokej, amo kuali ajakamej, yon tlen panos teipa, kemantika timajmauij pampa ipan ni tonali pano “tlamantli tlen temajmati”, kej uejueyi tlauilankayotl, kokolistli uan kema maseualmej kichiuaj tlen amo kuali (Luc. 21:11). Uelis nojkia timajmauij pampa tekichiuanij, tochampoyouaj o sekinok maseualmej amo kuali techitaj pampa tijtekipanouaj Jehová. Uan sekij majmauij pampa moiljuiaj amo kiijiyouisej se tlaouijkayotl tlen nama kiixnamikij o tlen kiixnamikisej teipa.

2. ¿Tlake panok kema David asito Gat?

² Ma timoiljuikaj ipan David, kemantika ya nojkia majmajki. Kema tlanauatijketl Saúl kinekiyaya kimiktis, cholok uan yajki Gat, se altepetl tlen Filistea. Kema kiiljuijkej Aquis, katli tlanauatiyaya Gat, David kuali tlateuiyaya uan kinmiktijtoya “matlaktli mil” tlateuianij, David “tlauel momajmatik” (1 Sam. 21:10-12). Motekipachouayaya pampa moiljuiyaya nopa tlanauatijketl kichiuiliskia tlen amo kuali. ¿Tlake kipaleuik ayokmo ma majmaui?

3. Kej kiijtoua Salmo 56: 1-3, 11, ¿tlake kipaleuik David ayokmo ma majmaui?

³ Ipan Salmo capítulo 56, David kiijtok kenijkatsa kiyolmatki kema itstoya Gat. Ipan nopa Salmo kiijtok kenke majmauiyaya uan tlake kipaleuik ayokmo kiampa ma kiyolmati. David ayokmo majmajki pampa motemachik ipan Jehová (xijpoua Salmo 56:1-3, 11). Uan tlauel kuali pampa kiampa  kichijki. Jehová kipaleuik David ma kichiua kejuak kuauiuitiyaya, kiampa Aquis ayokmo kiitak kej se ikualankaitaka uan uelki cholok (1 Sam. 21:13–22:1).

4. ¿Tlake uelis tijchiuasej tlaj tijnekij más timotemachisej ipan Jehová? Xikijto se neskayotl.

⁴ Tlaj timotemachiaj ipan Jehová techpaleuis ayokmo ma timajmauikaj. Pero, ¿tlake techpaleuis más ma timotemachikaj ipan Jehová kema timajmauij? Ma timoiljuikaj ipan ni tlamantli. Tlaj techiljuiskiaj tijpiaj se kokolistli uelis timomajmatisej, pero tlaj tijmatij techpajtis se kuali tepajtijketl, ayokmo tlauel timajmauisej. Uelis tijmatij nopa tepajtijketl ya kinpajtijtok sekinok katli nojkia kipiayayaj nopa kokolistli, tikitaj kuali techtlakakilia uan kikuamachilia tlen techpano. Uan uelis techiljuia techmakas se pajtli tlen kinpaleuijtok sekinok. Nojkia kiampa pano ika Jehová, tlaj timoiljuiaj tlen uejkajkia kichijki, tlen kichiua nama, uan tlen kichiuas teipa, más timotemachisej ipan ya. Ya nopa kichijki David ipan Salmo 56. Kema tikitstiasej tlen kiijtoua se keski versículos, ma timoiljuikaj tlake techpaleuis más timotemachisej ipan Jehová uan kiampa ayokmo timajmauisej.

TLEN JEHOVÁ KICHIJKI UEJKAJKIA

5. ¿Ipan tlake moyoliljuik David uan kiampa ayokmo majmajki? (Salmo 56:12, 13).

⁵ Maske ueliskia kimiktisej, David mosentlalik ipan nopa kuajkuali tlamantli tlen Jehová kichijtoya uejkajkia (xijpoua Salmo 56:12, 13). Uan nochipa kiampa kichijki. Kemantika moyoliljuiyaya ipan tlen toTeotsij kichijchijtok. Nopa kiilnamikiliyaya Jehová kipia miak chikaualistli uan tlauel kiniknelia maseualmej (Sal. 65:6-9). Nojkia moyoliljuiyaya kenijkatsa Jehová kinpaleuijtoya sekinok (Sal. 31:19; 37:25, 26). Uan nojkia moyoliljuiyaya kenijkatsa Jehová kipaleuijtoya. David kiijtok Jehová pejki kipaleuia uan kimokuitlauia kema nojua eliyaya pilkonetsi (Sal. 22:9, 10). Nopa kipaleuik más ma motemachi ipan ya.

6. ¿Tlake techpaleuis ma timotemachikaj ipan Jehová kema timajmauij?

⁶ Kema timajmauis, ximotlajtlani: “¿Tlake  kichijki Jehová uejkajkia?”. Nojkia uelis mitspaleuis tlaj timoyoliljuis ipan tlen Jehová kichijchijtok. Se neskayotl, kema tikitaj kenijkatsa Jehová kinmokuitlauia totomej uan xochitl, tlen amo kinchijchijki kej itlachialis uan amo uelij kiueyichiuaj, techpaleuia más ma timotemachikaj ya nochipa techmokuitlauis (Mat. 6:25-32). Uelis timomachtis uan timoyoliljuis kenijkatsa Jehová kipaleuik uejkajkia se itekipanojka o tijpouas tlen kipanok se toikni ipan ni tonali. a Nojkia, uelis timoyoliljuis kenijkatsa Jehová mitspaleuijtok. Uelis timoiljuis kenijkatsa mitspaleuik xikixmati tlen melauak (Juan 6:44). Kenijkatsa mitsnankilik kema timomaijtok (1 Juan 5:14). Uan kenijkatsa mojmostla mitspaleuia pampa temaktilik iKone (Efes. 1:7; Heb. 4:14-16).

7. ¿Kenijkatsa kipaleuik Vanessa tlen kipanok teokamanalojketl Daniel?

⁷ Vanessa, b se tosiuaikni katli eua Haití, kipanok se tlamantli tlen kichijki tlauel ma majmaui. Se tlakatl katli mochantiyaya nechka kampa ya itstoya, mojmostla kinojnotsayaya, kititlaniliyaya mensajes uan kitetsopayaya ma nemi iuaya. Kema kiiljuik amo nemiskia iuaya, nopa tlakatl tlauel kualanki uan kiiljuik kimiktiskia. ¿Tlake kipaleuik Vanessa ayokmo ma majmaui? Kichijki se keski tlamantli, uan se ueuejtlakatl kipaleuik ma kinojnotsa policía. Nojkia tlauel kipaleuik kema kiilnamijki kenijkatsa Jehová kinpaleuik itekipanojkauaj uejkajkia. Ya kiijtoua: “Nima nikilnamijki tlen kipanok teokamanalojketl Daniel, maske ya amo kichijtoya se tlamantli tlen amo kuali, kimajkajkej kampa itstoyaj leones, pero Jehová kimanauik. Nikiljuik Jehová ya nijchijtoya nochi tlen monekiyaya uan nikiljuik ma nechpaleui, kema kiampa nijchijki, ayokmo nimajmajki” (Dan. 6:12-22).

TLEN JEHOVÁ KICHIUA IPAN NI TONALI

8. ¿Ipan tlake motemachiyaya David? (Salmo 56: 8).

⁸ Maske ueltoskia kimiktisej kema itstoya ipan altepetl Gat, David amo mosentlalik ipan nopa tlamantli, ya moiljuik kenijkatsa Jehová kipaleuiyaya. Kiitak kenijkatsa Jehová kiyakanayaya, kimokuitlauiyaya uan kikuamachiliyaya tlen kiyolmatiyaya (xijpoua Salmo 56:8). Nojkia, se keskij iuampoyouaj, kej Jonatán uan sumo sacerdote Ahimelec, kipaleuijkej uan kiyolchikajkej (1 Sam. 20:41, 42; 21:6, 8, 9). Uan maske tlanauatijketl Saúl kinekiyaya kimiktis, David mochololtik uan kiampa momanauik. Ya motemachik Jehová kiitayaya nochi tlen kipanoyaya uan tlen kiyolmatiyaya.

9. ¿Tlake kimati Jehová tlen tojuantij?

⁹ Tlaj timajmaui pampa tikixnamiktok se tlaouijkayotl, xikilnamiki Jehová kiita nochi tlen mitspano uan nojkia kikuamachilia tlen tijyolmati. Ximoiljui ipan ni tlamantli, kema israeleuanij itstoyaj Egipto, Jehová kiitayaya kenijkatsa tlauel tlaijiyouiyayaj uan kikuamachiliyaya tlen kiyolmatiyayaj (Éx. 3:7). Ipan se uikatl, David kiijtok Jehová kiitstoya nochi tlen kipanotoya uan kenijkatsa tlauel tlaijiyouijtoya (Sal. 31:7). Uan kema israeleuanij tlaijiyouiyayaj pampa kichijtoyaj tlen amo kuali, Jehová “nojkia tlaijiyouik” (Is. 63:9). Tlauel techyolchikaua tijmatisej Jehová techkuamachilia uan kineki techpaleuis ayokmo ma timajmauikaj.

10. ¿Tlake mitspaleuia ximotemachi Jehová kitekipachoua tlen mitspano uan nochipa mitspaleuis?

 ¹⁰ Maske Jehová kiampa kichiua, kema tikixnamikij se tlaouijkayotl uelis amo tikitaj kenijkatsa techpaleuia. ¿Tlake uelis tijchiuasej tlaj kiampa techpano? Ma tikiljuikaj Jehová ma techpaleui tikitasej kenijkatsa techpaleuia (2 Rey. 6:15-17). Uan ma timoiljuikaj: ¿Nechyolchikajki se tlamachtili o tlen kiijtok se toikni kema tlanankilik ipan tlanechikoli? ¿Nechyolchikajki se amatlajkuiloli, se video o se uikatl? ¿Se toikni nechpouilik se texto o nechiljuik se tlamantli tlen tlauel nechyolchikajki? Ma tikilnamikikaj Jehová kichiua ma techiknelikaj toikniuaj uan techmaka nochi nopa tlamachtili tlen techyolchikaua (Is. 65:13; Mar. 10:29, 30). Nochi nopa tlamantli kinextia ya kitekipachoua tlen techpano uan uelis timotemachisej ipan ya (Is. 49:14-16).

11. ¿Tlake kipaleuik Aida ayokmo tlauel ma motekipacho?

¹¹ Tosiuaikni Aida katli eua Senegal, kipanok se tlamantli tlen tlauel ouij, uan kiitak kenijkatsa Jehová kipaleuik. Ya achtouiejketl, yeka itatauaj kinekiyayaj ma kitlani miak tomij, uan kiampa ueliskia kinpaleuis. Pero ya kinejki tekitis san se keski tonali pampa kinekiyaya tlatekipanos kej precursora. Yeka ichampoyouaj kualankej iuaya uan pejkej kitlaijiljuiaj. Aida kiijtoua kenijkatsa kiyolmatki: “Na nijnekiyaya nikinpaleuis notatauaj uan amo nijnekiyaya sekinok ma nechijilnamikikaj. Pejki nijtlajtlakoltia Jehová pampa kikauayaya ma nikixnamiki nopa tlaouijkayotl”. Pero se tonali, kikajki se tlamachtili tlen tlauel kipaleuik, ya kiijtoua: “Nopa toikni techilnamikilik Jehová kimati nochi tlen techyolkokoua. Nojkia, ueuejtlakamej uan se keskij toikniuaj nechpaleuijkej ma nikita Jehová nechiknelia. Uan kej panotiajki tonali sampa kuali nijyolmatki, pejki nikiljuia Jehová nochi tlen nijyolmatiyaya uan kema nikitayaya kenijkatsa nechnankiliyaya pejki nijpia tlaseuilistli”. Teipa, Aida kipantik se tekitl tlen kipaleuik ma tlatekipano kej precursora, uan nojkia uelki kinpaleuik itatauaj uan sekinok maseualmej. Aida nojua  kiijtoua: “Nama nimotemachia ipan Jehová ika nochi noyolo uan kema nimomaijtoua nechpaleuia ayokmo ma nimajmaui”.

¿TLAKE KICHIUAS JEHOVÁ TEIPA?

12. Kej kiijtoua Salmo 56:9, ¿ipan tlake motemachiyaya David?

¹² (Xijpoua Salmo 56:9). Ni texto kiijtoua seyok tlamantli tlen kipaleuik David ayokmo ma majmaui: moyoliljuik kenijkatsa Jehová kipaleuiskia teipa. Ya kimatiyaya toTeotsij kimanauiskia. Kiampa moiljuiyaya pampa Jehová kitenkauilijtoya ya tlanauatiskia ipan Israel (1 Sam. 16:1, 13). Uan David motemachiyaya Jehová kichiuaskia tlen kitenkajtoya.

13. ¿Tlake kichiuas Jehová teipa?

¹³ ¿Tlake techtenkauilijtok Jehová? Ya amo kiijtojtok amo tijpiasej kuesoli ipan ni tonali. c Maske nama tikixnamikij miak tlaouijkayotl, Jehová kiijtojtok ipan Xochimili kitlamiltis nochi tlen techtlaijiyouiltia (Is. 25:7-9). Timotemachiaj Jehová kipia miak chikaualistli uan uelis kinyolkuis katli miktokej uan kitsontlamiltis nochi tlen amo kuali (1 Juan 4:4).

14. ¿Ipan tlake uelis timoyoliljuisej?

¹⁴ Kema timajmauis, ximoyoliljui tlake kichiuas Jehová teipa. Ximoiljui kenijkatsa tiitstosej kema Satanás ayokmo itstos, kema ayokmo itstosej katli amo kualmej uan kema ika yolik tielisej tixitlauakej. Ipan ueyi tlanechikolistli tlen eyi tonali tlen 2014 mopanoltik se tlanextili tlen techpaleuia ma timoiljuikaj tlen tijselisej teipa. Nopaya se toikni kamanaltik ininuaya ichampoyouaj uan kiijtok kenijkatsa moaxitiskia 2 Timoteo 3:1-5 tlaj eliskia se tlajtolpanextili tlen kiijtoua kenijkatsa tiitstosej ipan Xochimili: “Ipan Yankuik Tlaltipaktli nochi yolpakisej pampa nochi maseualmej moiknelisej uan nochi tlauel kinekisej kichiuasej tlen toTeotsij kipaktia, amo moueyimatisej, kiueyichiuasej toTeotsij, kintlepanitasej inintatauaj uan ininnanauaj, tetlaskamatilisej, amo tetlauelkauasej, teiknelisej, kintlasojtlasej ininchampoyouaj, kinekisej kisenkauasej ininkuesoljuaj ika kuali, amo teijilnamikisej, nochi kuali monauatisej, nochi elisej temachmej, amo moueyimatisej, kinekisej kichiuasej tlen toTeotsij kineki uan amo san kinekisej mopakilismakasej, ika tlen kichiuasej kinextisej kiixmatij toTeotsij. Nochipa xiitsto ininuaya”. Uan tojuantij, ¿nojkia tikiniljuiaj tochampoyouaj o toikniuaj kenijkatsa tiitstosej ipan Xochimili?

15. ¿Tlake kipaleuik Tanja ayokmo ma majmaui?

¹⁵ Tanja, se tosiuaikni tlen Macedonia del Norte, ayokmo majmajki kema moyoliljuik ipan tlen Jehová techtenkauilijtok. Kema pejki momachtia Biblia, itatauaj tlauel kualankej. Ya kiijtoua: “Tlen kichiuayayaj tlauel nechmajmatiyaya. Kema nitlakuepiliyaya tlen tlanechikoli, nonana nechmakiliyaya uan nechiljuijkej nechmiktiskiaj tlaj nimochiuaskia se Jehová itlajtoltemajka”. Teipa kikixtijkej tlen ininchaj. ¿Tlake kichijki? Ya nojua kiijtoua: “Nimoiljuik tlaj amo nijtlauelkauaskia Jehová, teipa nochipa niyolpakiskia. Nimoiljuiyaya maske ipan ni tonali amo nijpia se keski tlamantli, ipan yankuik Tlaltipaktli Jehová nechmakas más uan ayokmo nikilnamikis tlen nechpanok”. Tanja amo kitlauelkajki Jehová uan ya kipaleuik ma kipanti kanke itstos. Teipa monamiktik iuaya se toikni katli kuali tlaneltoka uan nama senkistok kitekipanouaj Jehová.

 XIJCHIUA TLEN MITSPALEUIS MÁS TIMOTEMACHIS IPAN JEHOVÁ

16. ¿Tlake techpaleuis amo ma timajmauikaj kema moaxitis tlen kiijtoua Lucas 21: 26-28?

¹⁶ Ipan ueyi tlaijiyouilistli “maseualmej tlapolosej pampa tlauel majmauisej”. Pero Jehová itekipanojkauaj amo timajmauisej uan amo tijtlauelkauasej (xijpoua Lucas 21:26-28). ¿Kenke amo timajmauisej? Pampa nochipa timotemachiaj ipan Jehová. Tanja kiijtoua tlen kipanok kipaleuijtok kema kiixnamiki sekinok tlaouijkayotl: “Nikitstok Jehová nochipa techpaleuia uan techteochiua. Maske timoiljuisej maseualmej uelis techchiuilisej miak tlamantli tlen amo kuali, Jehová nochipa techpaleuis. Maske tijpiasej se ueyi tlaouijkayotl tijmatij amo nochipa tijpixtosej”.

17. ¿Kenijkatsa techpaleuis nopa texto tlen 2024? (Xikita tlaixkopinkayotl ipan ipantsajka).

¹⁷ Maske ipan ni tonali pano miak tlamantli tlen amo kuali, tojuantij tijchiuaj kej David: amo tijkauaj majmajtli ma techtsakuili. Nopa texto tlen xiuitl 2024, eli tlen David kiiljuik Jehová: “Kema nijmati nimajmaui, nimotemachia ipan ta” (Sal. 56:3). Se amochtli kiijtoua tlen ni texto: “David amo mosentlalia ipan tlen kimajmatia, ya motemachia ipan katli uelis kimanauis”. Nochipa xikilnamikto ni texto uan más tlaj tikixnamiktok se tlaouijkayotl. Ximoyoliljui tlen Jehová kichijki uejkajkia, tlen kichiua ipan ni tonali uan tlen kichiuas teipa. Tlaj kiampa tijchiuas, nojkia uelis tikijtos kej David: “Nimotemachia ipan ya para nechmanauis” (Sal. 56:4).