1. ¿Kenijkatsa uelis tijyolpakiltisej Jehová?

 MA TIMOILJUIKAJ tijmakaj se akajya se regalo tlen tlauel yejyektsi uan tlen kipaleuis. Tlaj nopa maseuali san kiajokuiskia uan kiilkauaskia, tlauel timoyolkokoskiaj. Pero tlaj tikitaskiaj kitekiuia, tlauel tiyolpakiskiaj. ¿Tlake techmachtia? Jehová temaktilik iKone por tojuantij, uan tlauel yolpaki kema kiita tijtlaskamatiliaj pampa techmakixtik uan kinextik techiknelia (Juan 3:16; Rom. 5:7, 8).

2. ¿Tlake tikitasej ipan ni tlamachtili?

² Tiyolpakij ika tlen Jehová uan Jesús kichijkej, pero uelis kej panotias tonali ayokmo tlauel tijtlaskamatisej yon tijpatiitasej. Tlaj kiampa techpanos, eliskia kejuak tikajokuiskiaj uan tikilkauaskiaj nopa regalo. Amo tijnekij kiampa ma techpano, yeka nochipa ma timoyoliljuijtinemikaj tlen Jehová uan Jesús kichijkej. Uan ya nopa tikitasej ipan ni tlamachtili. Tikitasej kenijkatsa techpaleuia Jesús imikilis ipan ni tonali uan teipa. Nojkia timomachtisej kenijkatsa uelis tijnextisej tijtlaskamatiliaj Jehová pampa techiknelia, uan más kema nechka moilnamikis Cristo imikilis.

¿KENIJKATSA TECHPALEUIA JESÚS IMIKILIS IPAN NI TONALI?

3. ¿Kenijkatsa techpaleuia Jesús imikilis ipan ni tonali?

³ Ipan ni tonali tlauel techpaleuia Jesús imikilis pampa Jehová techtlapojpoljuia totlajtlakoljuaj. Uan amo techtlapojpoljuia san pampa kiampa kinamiki kichiuas, ya kichiua  pampa nelnelia kineki. Ipan se uikatl, David kinextik tlauel kitlaskamatilia Jehová, yeka kiijtok: “Toteko, ta nelia tikuali uan timoketstok timokualtlalijtok para titetlapojpoljuis” (Sal. 86:5; 103:3, 10-13).

4. ¿Ajkia inijuantij kinpaleuia Jesús imikilis? (Lucas 5:32; 1 Timoteo 1:15).

⁴ Se keskij moiljuiaj amo kinamiki Jehová ma kintlapojpoljui inintlajtlakoljuaj. Uan nelia, Jehová amo kinamikiskia kiampa kichiuas. Yeka, Apóstol Pablo kiijtok: “Amo kinamiki ma nechiljuikaj niapóstol”. Pero teipa kiijtok: “Dios kinextijtok ueyi iyolo ika na, yeka nijselijtok ni tekitl” (1 Cor. 15:9, 10). Kema timoyolkuepaj tlen totlajtlakoljuaj, Jehová techtlapojpoljuia. ¿Kenke kiampa kichiua? Pampa tlauel techiknelia uan amo pampa timotlanilijtokej. Yeka, tlaj timoyolkokouaj pampa timoiljuiaj amo kinamiki Jehová ma techtlapojpoljui, ma tikilnamikikaj ya amo temaktilik iKone para kinmakixtis katli xitlauakej, ya kinejki kinmakixtis maseualmej katli tlajtlakolejkej uan moyolkuepaj (xijpoua Lucas 5:32; 1 Timoteo 1:15).

5. ¿Kenke amo kinamiki timoiljuisej Jehová moneki techtlapojpoljuis?

⁵ Amo kinamikiskia timoiljuisej moneki Jehová ma techtlapojpoljui san pampa tijtekipanojtokej miak xiuitl. Ya kipatiita nochi tlen tijchiuaj pampa tijtekipanouaj (Heb. 6:10). Pero Jehová temaktilik iKone kej se regalo uan amo pampa kiampa techtlaxtlauiskia pampa tijtekipanouaj. Tlaj timoiljuiskiaj moneki ma techtlapojpoljuikaj, uajka tijnextiskiaj Jesús amo kinamikiyaya ma motemaktili (nojkia xikita Gálatas 2:21).

6. ¿Kenke Pablo kuali kitekipanok Jehová?

⁶ Pablo kimatiyaya amo kinamikiyaya ma kitlapojpoljui Jehová maske kichiuayaya kampeka kuali kitekipanos. Tlaj kimatiyaya nopa tlamantli, ¿kenke nojua kichiuayaya kampeka kuali kitekipanos Jehová? Pampa kinekiyaya kinextis kitlaskamatiliyaya pampa kimakatoya miak tlamantli maske amo kinamikiyaya (Efes. 3:7). Uan tojuantij nojkia kiampa tijchiuaj, tijtekipanouaj Jehová ika miak pakilistli pampa tijnekij tijnextilisej tijtlaskamatiliaj.

7. ¿Ipan tlake seyok tlamantli techpaleuia Jesús imikilis? (Romanos 5:1; Santiago 2:23).

⁷ Jesús imikilis, nojkia techpaleuia ma timouampojchiuakaj iuaya Jehová. a Ipan tlamachtili 4 tikitakej kema titlakatij ayamo timouampojchiuaj iuaya Dios, pero Jesús imikilis techpaleuia “kuali ma timouikakaj” iuaya Dios uan ma tijnechkauikaj (xijpoua Romanos 5:1; Santiago 2:23).

8. ¿Kenke tijtlaskamatiliaj Jehová pampa ueli timomaijtouaj?

⁸ Tlauel tijpatiita pampa ueli tijnojnotsaj Jehová, kiampa tijchiuaj pampa kuali timouampojchijtokej iuaya. Ya amo san kitlakakilia nopa tlamaijtoli tlen mochiua ipan tlanechikoli, nojkia techtlakakilia kema timomaijtouaj toselti. Kema timomaijtouaj amo san kichiua kuali ma tijyolmatikaj, nojkia techpaleuia más kuali ma timouampojchiuakaj iuaya Jehová (Sal. 65:2; Sant. 4:8; 1 Juan 5:14). Kema Jesús itstoya ipan Tlaltipaktli, nochipa momaijtouayaya pampa kimatiyaya iTata kitlakakiliyaya uan kipaleuiyaya más kuali ma mouika iuaya (Luc. 5:16). Jesús imikilis techpaleuia ma tijnojnotsakaj Jehová uan ma timouampojchiuakaj iuaya, yeka tlauel tijtlaskamatiliaj.

 ¿KENIJKATSA JESÚS IMIKILIS TECHPALEUIS TEIPA?

9. ¿Kenijkatsa Jesús imikilis techpaleuis teipa?

⁹ Jesús imikilis uelis techpaleuis teipa pampa Jehová techmakas nopa nemilistli tlen amo kema tlamis. Miakej moiljuiaj amo kema uelis tiitstosej nochipa pampa maseualmej nochipa miktiualajtokej. Pero Jehová techchijchijki pampa kineki nochipa ma tiitstokaj. Uan maske ouij tijmatij, kena uelis tijneltokasej nochipa tiitstosej pampa Jehová temaktilik iKone para techmakixtis (Rom. 8:32).

10. ¿Tlake kichiaj tlapejpenilmej uan nopa tlauel miakej maseualmej?

¹⁰ Maske ipan ni tonali ayamo tijpiaj nopa nemilistli tlen amo kema tlamis, Jehová kineki ma timoyoliljuikaj ipan nopa tlamantli ika pakilistli, pampa temachtli kuali tiitstosej. Katli motemachiaj yasej iluikak tlauel kichiaj nopa tonali kema nopaya itstosej uan tlanauatisej iuaya Jesús (Apoc. 20:6). Uan nopa tlauel miakej maseualmej kichiaj itstosej ipan Tlaltipaktli kampa ayokmo aka tlaijiyouis (Apoc. 21:3, 4). ¿Timotemachia tiitstos nochipa ipan Tlaltipaktli? Amo ximoiljui katli nikaj itstosej amo tlauel ininpati, pampa kema toTeotsij kinchijchijki maseualmej, kinekiyaya nochipa ma itstokaj ipan Tlaltipaktli, yeka nopaya tlauel tiyolpakisej.

11, 12. ¿Tlake tlamantli tijchia ma moaxiti ipan Xochimili? (Nojkia xikita tlaixkopinkayomej).

¹¹ Ximoiljui kenijkatsa tiitstos ipan Xochimili. Ayokmo aka moiljuijtos tlaj mokokos o mikis (Is. 25:8; 33:24). Jehová mitsmakas nochi tlen ta tijnekis. ¿Mitspaktiskia tijmatis sekinok tlamantli tlen tlapialmej uan totomej? ¿Mitspaktiskia tijyekos titlatsotsonas? ¿Mitspaktiskia tijmaixkopinas se tlamantli? Ipan Xochimili monekis itstosej katli kimatisej kenijkatsa kalchiuasej, katli milchiuasej, tlakualchiuasej, tlatojtokasej, katli kichijchiuasej tlen ika tekitisej uan katli kichiuasej sekinok tlamantli (Is. 35:1; 65:21). ¡Ipan yankuik Tlaltipaktli uelis tijchiuas tlen ta mitspaktia!

 ¹² ¡Tlauel tiyolpakisej kema sampa tikinitasej katli moyolkuisej! (Hech. 24:15). Uan kiampa tijyolmatisej pampa nojua tijyekosej sekinok tlamantli tlen Jehová uan tlen kichijchijtok (Sal. 104:24; Is. 11:9). Pero nojkia tlauel tiyolpakisej pampa uelis tijtekipanosej Jehová uan ayokmo timotlajtlakoltisej ika tlen amo kuali tijchijkej. Tijnekij tijselisej nochi tlen Jehová kitenkajtok uan amo timoyolpakiltisej ika tlajtlakoli tlen san kichiuaskia ma tiyolpakikaj san se tlalochtli (Heb. 11:25). Yeka, nama tijchiuaj kampeka kuali tijtekipanosej Jehová. Teipa, ayokmo tijchiasej ma asi nopa yankuik Tlaltipaktli pampa ya moaxitijtos. Jehová kiampa kichiuas pampa tlauel techiknelia uan temaktilik iKone para techmakixtis.

MA TIJNEXTIKAJ TIJTLASKAMATILIAJ JEHOVÁ PAMPA TECHIKNELIA

13. ¿Kenijkatsa uelis tijnextisej tijtlaskamatiliaj Jehová pampa tlauel techiknelia? (2 Corintios 6:1).

¹³ Tlaj tikachtouitlaliaj tijtekipanosej Jehová, tijnextisej tijtlaskamatiliaj pampa techmakixtik (Mat. 6:33). Jesús mijki para “katli itstosej ayokmo kichiuasej san tlen inijuantij kinekij, itstosej para kichiuasej tlen kineki katli mijki por inijuantij uan moyolkuik” (2 Cor. 5:15). Tlaj tijchiuaj kampeka kuali tijtekipanosej Jehová, tijnextisej tijtlaskamatiliaj nochi tlen kichijtok (xijpoua 2 Corintios 6:1).

14. ¿Kenijkatsa tijnextiaj tijneltokaj tlen Jehová technauatia?

¹⁴ Nojkia uelis tijnextisej tijtlaskamatiliaj Jehová kema tijneltokaj tlen technauatia. ¿Uan kenijkatsa uelis tijchiuasej? Moneki tikitasej tlake kineki Jehová ma tijchiuakaj kema tijtlapejpenisej tlaj nojua timomachtisej ipan escuela o ika tlake titekitisej (1 Cor. 10:31; 2 Cor. 5:7). Tlaj kiampa tijchiuaj, techpaleuis nojua kuali ma titlaneltokakaj uan más kuali ma timouampojchiuakaj iuaya. Uan nojkia techpaleuis más ma timotemachikaj ipan tlen tijselisej teipa (Rom. 5:3-5; Sant. 2:21, 22).

15. ¿Kenijkatsa uelis tijnextisej tijtlaskamatiliaj Jehová kema moilnamikis Cristo imikilis?

¹⁵ Nojkia uelis tijnextisej tijtlaskamatiliaj Jehová tlaj kuali timokualchijchiuasej kema moilnamikis Cristo imikilis. Ma timosentlalikaj tiasej uan ma tikintlaneuikaj sekinok nojkia ma yakaj (1 Tim. 2:4). Uan ma tikinixtomilikaj kenke tlauel ipati nopa tonali. Uelis tikinnextilisej nopa videos ¿Kenke mijki Jesús? uan Ma tikilnamikikaj Cristo imikilis, tlen eltok ipan jw.org. Ueuejtlakamej uelis kintlaneuisej katli mouejkatlalijtokej tlen Jehová. Tlaj se akajya sampa kinekis tlakuepilis, Jehová, Jesús, ángeles uan nochi katli tijtekipanouaj, tlauel tiyolpakisej (Luc. 15:4-7). Kema moilnamikis Cristo imikilis, ma tikintlajpalokaj katli amo kema monechikojtoyaj touaya uan katli  miak xiuitl ayokmo yajtoyaj. Ma tijchiuakaj kampeka kuali tikinselisej katli yasej ipan nopa tonali (Rom. 12:13).

16. ¿Kenke uelis timosentlalisej más titlajtolmoyauasej kema nechka tikilnamikisej Cristo imikilis?

¹⁶ Kema nechka moilnamikis Cristo imikilis, uelis timosentlalisej más titlajtolmoyauasej. Kiampa tijnextisej tijtlaskamatiliaj tlen kichijkej Jehová uan Jesús. Tlaj tlauel titlajtolmoyauaj, tikitasej kenijkatsa Jehová techpaleuia uan más timotemachisej ipan ya (1 Cor. 3:9). Nojkia, amo ma tikilkauakaj tijpouasej tlen mopouas ipan Biblia nopa tonali, tlen uala ipan pilamochtsi Mojmostla timomachtiaj toTeotsij iTlajtol uan Tlen tijchiuasej ipan tlanechikoli. Uan nojkia uelis timomachtisej toselti tlen kiijtoua nopa tlapoualistli.

17. ¿Kenke Jehová yolpaki kema kiita tlen tijchiuaj? (Nojkia xikita recuadro “ Tlen mitspaleuis tijnextis tijtlaskamatilia Jehová”).

¹⁷ ¿Uan tlaj amo uelis tijtlamichiuas nochi tlen nikaj timomachtijtokej? Amo ximotekipacho. Jehová amo kiita tlen sekinok kichiuaj ika tlen ta tijchiua. Ya kiita tlen tijpia ipan moyolo uan tlauel yolpaki kema tijnextia tijpatiita pampa temakak iKone Jesús para techmakixtis (1 Sam. 16:7; Mar. 12:41-44).

18. ¿Kenke tlauel tikintlaskamatiliaj Jehová uan Jesús?

¹⁸ Jehová techtlapojpoljuia totlajtlakoljuaj, ueli timouampojchiuaj iuaya uan timotemachiaj tiitstosej nochipa pampa Jesús temaktilik inemilis. Nochipa ma tijnextikaj tijtlaskamatiliaj Jehová pampa kinextia techiknelia uan yeka techmaka miak tlateochiualistli (1 Juan 4:19). Nojkia ma tijtlaskamatilikaj Jesús pampa kinextik tlauel techiknelia uan temaktilik inemilis (Juan 15:13).