1. ¿Ipan tlake mosentlaliaj miakej maseualmej?

 IPAN ni tonali miakej maseualmej mosentlaliaj san ipan inijuantij. Se keskij kitekiuiaj redes sociales pampa kinekij sekinok ma kiitakaj tlake kipiaj uan tlake kichijtokej. Pero san se keskij kiuejkapantlaliaj Jehová. Ipan ni tlamachtili tikitasej tlake kiijtosneki tijuejkapantlalisej Jehová uan kenke moneki kiampa tijchiuasej. Nojkia tikitasej kenijkatsa uelis tijuejkapantlalisej Jehová kej kinamiki uan kenijkatsa nechka kiuejkapantlalis itoka.

¿TLAKE KIIJTOSNEKI TIJUEJKAPANTLALISEJ JEHOVÁ?

2. ¿Kenijkatsa Jehová kinextik iueyitilis ipan tepetl Sinaí? (Nojkia xikita tlaixkopinkayotl).

² Ipan Biblia nopa tlajtoli mouejkapantlalia eli se tlamantli tlen kichiua sekinok ma mosentlachilikaj ika se akajya. Kema Jehová ya kinkixtijtoya israeleuanij tlen Egipto, kinextik iueyitilis ininixpa. Ma timoiljuikaj tlen panok: miakej israeleuanij mosentilijtokej iixpa tepetl Sinaí pampa kinekij kikakisej tlen Dios kiniljuis. Se ueyi mixtli kitsakua nopa tepetl, chikauak mojmolinia tlali, nopa tepetl peua popoka, chikauak tlapetlani, tlatomoni uan kakisti chikauak tlapitsaj (Éx. 19:16-18; 24:17; Sal. 68:8). Uelis nopa israeleuanij tlauel mosentlachilijkej kema Jehová kinextik iueyitilis uan mouejkapantlalik.

3. ¿Tlake kiijtosneki tijuejkapantlalisej Jehová?

³ ¿Uan tojuantij nojkia uelis tijuejkapantlalisej Jehová? Kena, uelis kiampa tijchiuasej kema tikiniljuisej sekinok nochi tlen Jehová kichijchijtok uan kenijkatsa kinextia kuajkuali  tlamantli. Nojkia uelis tijuejkapantlalisej kema tikijtouaj ya techpaleuia kuali ma kisa tlen tijchiuaj (Is. 26:12). Tlanauatijketl David kiampa kichijki kema momaijtok ininixpa israeleuanij, ya kiijtok: “Ta tijpia nochi ueyitilistli uan chikaualistli. Ta titlatlani uan kinamiki tijselis tlatlepanitakayotl. Pampa nochi tlamantli tlen onka ipan iluikaktli uan ipan tlaltipaktli, nochi moaxka”. Kema tlanki, “nochi inijuantij kiueyichijkej TOTEKO” (1 Crón. 29:11, 20).

4. ¿Kenijkatsa Jesús kiuejkapantlalik Jehová?

⁴ Kema Jesús itstoya ipan Tlaltipaktli, kiuejkapantlalik iTata ika miak tlamantli. Kiampa kinextik pampa ya nochipa kiniljuiyaya sekinok Jehová kimakayaya chikaualistli para kichiuas milagros (Mar. 5:18-20). Nojkia kiueyichiuayaya kema kuali kamanaltiyaya tlen ya uan kema kinpaleuiyaya sekinok ma kimatikaj nopa kuajkuali tlamantli tlen kinextia. Se tonali, Jesús tlamachtiyaya kampa tlaueyichiuayayaj judíos uan nopaya itstoya se siuatl katli kipixtoya se amo kuali ajakatl 18 xiuitl. Yeka, nopa siuatl tlauel kuitlapanuijkolijtoya uan amo ueliyaya moxitlaua. Nelia tlauel amo kuali kej itstoya. Kema Jesús kiitak tlauel tlaijiyouijtoya, kitlasojtlak uan kiiljuik ika tlaiknelili: “Aui, ya timochikajki”. Teipa, kitlalik imax ipani uan nima moxitlajki uan pejki “kiueyichiua Dios” (Luc. 13:10-13). Nopa siuatl kiitak monekiyaya kiuejkapantlalis Jehová pampa kichikajtoya. Uan tojuantij nojkia moneki tijuejkapantlalisej.

¿KENKE TIJNEKIJ TIJUEJKAPANTLALISEJ JEHOVÁ?

5. ¿Kenke tlauel tijtlepanitaj Jehová?

⁵ Tijuejkapantlaliaj Jehová pampa tlauel tijtlepanitaj. Kiampa tijchiuaj pampa Jehová kipia nochi chikaualistli (Sal. 96:4-7). Nochi tlen kichijchijtok kinextia tlauel tlalnamiki. Ya techmakatok tonemilis uan techmaka nochi tlen moneki (Apoc. 4:11). Amo tetlauelkaua (Apoc. 15:4). Kuali kisa tlen kichiua uan nochipa kichiua tlen kitenkaua (Jos. 23:14). Yeka, teokamanalojketl Jeremías kiiljuik: “San ta kinamiki mitsimakasisej pampa ipan nochi tlalnamikinij uan tlanauatianij tlen itstokej ipan ni tlaltipaktli, axaka seyok kej ta” (Jer. 10:6, 7). Uajka, tijtlepanitaj Jehová pampa techmakatok miak tlamantli. Pero amo san moneki tijtlepanitasej, nojkia moneki tikiknelisej.

6. ¿Kenke tikikneliaj Jehová?

⁶ Tijuejkapantlaliaj Jehová pampa tikikneliaj ika nochi toyolo. Jehová kinextia miak kuajkuali tlamantli tlen kichiua ma tikiknelikaj, techtlasojtla uan techpaleuia kema titlaijiyouiaj (Sal. 103:13; Is. 49:15). Techkuamachilia uan nojkia kiyolkokoua kema titlaijiyouiaj (Zac. 2:8). Techpaleuia ma tijnechkauikaj uan ma timouampojchiuakaj iuaya (Sal. 25:14; Hech. 17:27). Nojkia, amo moueyimati uan “mouijtsoma para tlachias ipan ni tlaltipaktli. Uan kitlanana nopa teikneltsi tlen eltok keja masitok ipan sokitl tlen uejkatla” (Sal. 113:6, 7). Nochi tijnekij tijuejkapantlalisej Jehová pampa kinextia nopa kuajkuali tlamantli (Sal. 86:12).

7. ¿Tlake uelis tijchiuasej ipan ni tonali?

⁷ Tijuejkapantlaliaj Jehová pampa tijnekij sekinok maseualmej ma kiixmatikaj. Miakej amo kiixmatij Jehová pampa kineltokaj nopa istlakatili tlen Satanás kimoyajtok tlen ya (2 Cor. 4:4). Kichijtok ma moiljuikaj Jehová momakuepa, amo kiyolkokoua kema titlaijiyouiaj uan kichiua ma pano miak tlamantli tlen amo kuali. Pero tojuantij tijmatij tlen Biblia kiijtoua uan ueli tikinmachtiaj sekinok  kenijkatsa eli Jehová uan kiampa tijuejkapantlaliaj (Is. 43:10). Nama ma tikitakaj tlen kiijtoua se keski versículos tlen Salmo 96, kampa kiijtoua ma tijuejkapantlalikaj Jehová. Nopa techpaleuis ma tikitakaj kenijkatsa uelis tijuejkapantlalisej kej kinamiki.

¿KENIJKATSA UELIS TIJUEJKAPANTLALISEJ JEHOVÁ KEJ KINAMIKI?

8. ¿Kenijkatsa uelis tijuejkapantlalisej Jehová? (Salmo 96:1-3).

⁸ (Xijpoua Salmo 96:1-3). Uelis tijuejkapantlalisej Jehová ika tlen tikijtouaj. Ni versículos techiljuia ma tijuikatikaj Jehová, ma tijueyichiuakaj itoka, ma tikiniljuikaj sekinok uelis timomanauisej uan ma tijuejkapantlalikaj itoka ipan nochi altepemej. Ika nochi ni tlamantli uelis tijuejkapantlalisej Jehová. Judíos katli kuali tlaneltokayayaj uan Cristo itokilijkauaj tlen achtoui siglo, amo majmauiyayaj uan nochipa kinixtomiliyayaj sekinok nochi tlen Jehová kichijtoya uan kimanauiyayaj itoka (Dan. 3:16-18; Hech. 4:29). ¿Kenijkatsa uelis tijchiuasej kej inijuantij?

9, 10. ¿Tlake mitsmachtia tlen kichijki Angelina? (Nojkia xikita tlaixkopinkayotl).

⁹ Ma tikitakaj tlen kipanok tosiuaikni Angelina, a katli eua Estados Unidos. Ya amo majmajki uan kinkamanaljuik tlen Jehová katli ininuaya tekiti. Se tonali, kiniljuijkej ma mosentilikaj katli namanok pejtoyaj tekitij uan ma kiijtokaj se keski tlamantli para moixmatisej. Angelina kinekiyaya kinnextilis se keski tlaixkopinkayotl pampa kinekiyaya ma kiitakaj ya tlauel yolpaki pampa kitekipanoua Jehová. Kema nechka panoskia, se tlakatl kiijtok itatauaj kiiskaltijtoyaj kej se Jehová itlajtoltemajka uan pejki techpinajtia. Angelina kiijtoua: “Na ayokmo nijmatiyaya tlake nijchiuas. Pero nimotlatsintokik: ‘¿Nijkauas ni tlakatl ma kiistlakaui Jehová, o nijmanauis?’”.

¹⁰ Kema nopa tlakatl tlanki kamanalti, Angelina ichtakatsi momaijtok. Teipa, ika tlatlepanitakayotl kiiljuik: “Notatauaj nojkia nechiskaltijkej kej se Jehová itekipanojka uan nojua nijtekipanoua”. Nopa tlakatl amo kipaktik tlen kiiljuik, pero Angelina amo kualanki. Uajka, pejki kinnextilia se keski tlaixkopinkayotl kampa nesiyaya kenijkatsa tlauel yolpaki pampa kitekipanoua Jehová uan teipa pejki kinixtomilia tlen kineltoka (1 Ped. 3:15). Kema Angelina tlanki  kamanalti, nopa tlakatl ayokmo kualantoya uan kiijtok nojkia kiilnamikiyaya kenijkatsa tlauel yolpakiyaya kema monechikouayaya ininuaya Jehová itlajtoltemakauaj. Angelina kiijtoua: “Kinamiki ma tijmanauikaj Jehová itoka uan eli se tlateochiualistli”. Tojuantij nojkia tijpiaj se ueyi tlateochiualistli pampa tijueyichiuaj uan tijuejkapantlaliaj Jehová maske sekinok kiistlakauiaj.

11. ¿Kenijkatsa Jehová itekipanojkauaj kichijtiualajtokej tlen kiijtoua Salmo 96:8?

¹¹ (Xijpoua Salmo 96:8). b Uelis tijuejkapantlalisej Jehová kema titemakaj tlen tijpiaj. Katli kitekipanouaj Jehová nochipa kiampa kichiuaj (Prov. 3:9). Se neskayotl, israeleuanij temakakej tomij kema kichijchijkej uan kikualchijchijkej nopa teokali (2 Rey. 12:4, 5; 1 Crón. 29:3-9). Se keskij Cristo itokilijkauaj “kitekiuiyayaj tlen kipixtoyaj” para kipaleuisej Jesús uan iapóstoles (Luc. 8:1-3). Uan ipan achtoui siglo, Cristo itokilijkauaj nojkia kintitlanilijkej sekinok toikniuaj tlen kipixtoyaj (Hech. 11:27-29). Ipan ni tonali, nojkia tijueyichiuaj Jehová kema titemakaj tomij ika nochi toyolo.

12. ¿Kenijkatsa tijuejkapantlaliaj Jehová kema titemakaj totomij? (Nojkia xikita tlaixkopinkayotl).

¹² Ma tikitakaj kenijkatsa tijuejkapantlaliaj Jehová kema titemakaj tomij ika nochi toyolo. Ipan xiuitl 2020, ipan altepetl Zimbabue miakej maseualmej amo kipiayayaj tlen kikuasej pampa amo uetsiyaya atl. Nopaya itstoya se tosiuaikni katli itoka Prisca. Maske amo uetsiyaya atl uan monekiyaya kipoxonis itlal kampa tlatojtokaskia, ya nochipa tlajtolmoyauayaya miércoles uan viernes. Ikalnechkauaj kipinajtiyayaj pampa tlajtolmoyauayaya uan amo tekitiyaya ipan imil, uan kiiljuiyayaj: “¡Timayankamikis!”. Pero ya kinnankiliyaya: “Jehová amo kema kintlauelkaua itekipanojkauaj”. Ika nopa tomij tlen titemakaj, toikniuaj kititlanilijkej tlakualistli uan sekinok tlamantli tlen kitekiuiskia. Se keskij ikalnechkauaj mosentlachilijkej uan kiiljuijkej: “Dios amo kema mitstlauelkajtok. Nojkia tijnekij tikixmatisej”. Uan chikomej tlen nopa maseualmej pejkej yauij tlanechikoli.

13. ¿Kenijkatsa uelis tijuejkapantlalisej Jehová ika tlen tijchiuaj? (Salmo 96:9).

¹³ (Xijpoua Salmo 96:9). Uelis tijuejkapantlalisej Jehová ika tlen tijchiuaj.  Sacerdotes katli tlatekipanouayayaj ipan teokali monekiyaya momajtekisej uan moikxipajpakasej kema tlaueyichiuaskiaj (Éx. 40:30-32). Maske tojuantij tijchiuaj kampeka amo tinemisej tisokiyojkej, nojkia moneki tijchiuasej kampeka kuali timonejnemiltisej (Sal. 24:3, 4; 1 Ped. 1:15, 16). Moneki tijtlauelkauasej tonemilis tlen achtouia tijpiayayaj uan tlen tijchiuayayaj, uan sanse kej timotlaliliskiaj se yankuik yoyomitl, moneki tijpiasej tonemilis “tlen yankuik”. Nopa kiijtosneki moneki tijchiuasej kampeka timoiljuisej uan timonejnemiltisej kej Jehová kipaktia uan tijnextisej nopa kuajkuali tlamantli tlen ya kinextia (Col. 3:9, 10). Jehová ueli kinpaleuia maseualmej kuali ma monejnemiltikaj maske achtouia auilnemiyayaj uan tlauel mosisiniyayaj.

14. ¿Tlake techmachtia tlen kichijki Jack? (Nojkia xikita tlaixkopinkayotl).

¹⁴ Ma tikitakaj tlen kipanok Jack. Ya tlauel mosisiniyaya uan sekinok kimakasiyayaj, yeka kitokaxtiyayaj el Demonio. Kichijtoya tlen tlauel amo kuali, yeka ipan cárcel kiijtojkej kimiktiskiaj. Pero kema kichixtoya nopa tonali para kimiktisej, kinejki ma kimachti se toikni katli nopaya yauiyaya tlajtolmoyaua. Maske achtouia Jack amo kuali monejnemiltiyaya, teipa kipatlak inemilis uan moatsonpoliuiltik. Yeka, kema nechka kimiktiskiaj, se keskij katli kimokuitlauiyayaj pejkej chokaj. Se sargento katli nopaya tekitiyaya, kiijtok: “Achtouia, Jack tlauel mosisiniyaya. Pero nama kipia tlauel kuali iyolo”. Uan ika ualchikueyi kema ya kimiktijtoyaj Jack, toikniuaj tlakuepilijkej pampa kipanoltiskiaj tlanechikoli tlen mochiua sejse semana ipan cárcel, nopaya kiitakej nojkia itstoya se tlakatl katli amo kema monechikojtoya. ¿Kenke nojkia yajki? Pampa tlauel mosentlachilik kema kiitak Jack kipatlatoya inemilis, yeka nojkia kinekiyaya kimatis kenijkatsa kiueyichiuas Jehová. Uajka, tlaj kuali timonejnemiltiaj, uelis tijuejkapantlalisej Jehová (1 Ped. 2:12).

¿KENIJKATSA JEHOVÁ NECHKA KIUEJKAPANTLALIS ITOKA?

15. ¿Tlake nechka kichiuas Jehová para kiuejkapantlalis itoka ipan nochi Tlaltipaktli? (Salmo 96:10-13).

¹⁵ (Xijpoua Salmo 96:10-13). Kampa tlami Salmo 96 kiijtoua Jehová tetlajtolsenkauas kej kinamiki. ¿Kenijkatsa Jehová  nechka kiuejkapantlalis itoka? Kema xitlauak tetlajtolsenkauas. Nechka kintsontlamiltis nochi religiones tlen amo melauak pampa kisokiuijtokej itoka (Apoc. 17:5, 16; 19:1, 2). Kema se keskij maseualmej kiitasej ni tlamantli, nojkia uelis kinekisej kiueyichiuasej Jehová. Teipa, ipan Armagedón Jehová kitsontlamiltis nochi tlen Satanás kinauatia. Kintsontlamiltis nochi katli kisokiuiaj itoka uan kikualankaitaj, pero kinmanauis katli kiikneliaj, kineltokaj uan kiuejkapantlaliaj itoka (Mar. 8:38; 2 Tes. 1:6-10). Uan teipa kema ya tlantos nopa Mil xiuitl kema tlanauatijtos Jesús, Jehová ya kiuejkapantlalijtos itoka ipan nochi Tlaltipaktli. Ipan nopa tonali, “iuextilis TOTEKO kitemitis ni tlaltipaktli uan senkistok nochi tlakamej kiitasej uan kimatisej. Temis tlaltipaktli keja nopa miak atl kitemitia ueyi atl” (Hab. 2:14).

16. ¿Tlake timosentlalijtok tijchiuas? (Nojkia xikita tlaixkopinkayotl).

¹⁶ ¡Tlauel tiyolpakisej kema nochi maseualmej kiuejkapantlalisej itoka Jehová ipan nochi Tlaltipaktli! Pero ipan ni tonali nojkia uelis tijchiuasej kampeka tijuejkapantlalisej Jehová. Uan pampa tlauel ipati ma tijchiuakaj ni tlamantli, Katli kinyakanaj Jehová itlajtoltemakauaj kiijtojkej Salmo 96:8, TNM, elis texto tlen xiuitl 2025: “Xijuejkapantlalikaj itoka Jehová kej kinamiki”.