1. ¿Kenijkatsa techpaleuia kema tikilnamikij Jesús imikilis sejse xiuitl?

 JEHOVÁ techmakak se ueyi regalo (2 Cor. 9:15). Jesús temaktilik inemilis, yeka uelis timouampojchiuasej iuaya Jehová uan uelis tiitstosej nochipa. Tlauel tijtlaskamatiliaj Jehová katli techmakak nopa regalo pampa tlauel techiknelia (Rom. 5:8). Jesús technauatik ma tikilnamikikaj imikilis sejse xiuitl, kiampa uelis tijtlaskamatilisej tlen ya uan iTata kichijkej (Luc. 22:19, 20).

2. ¿Tlake tikitasej ipan ni tlamachtili?

² Ni xiuitl tikilnamikisej Cristo imikilis ipan sábado, abril 12, uan nochi tijnekij tiasej. Kema nechka moilnamikis, tlauel techpaleuis tlaj tijchiuaj kampeka timoyoliljuisej a ipan tlen Jehová uan Jesús kichijtokej. Ipan ni tlamachtili tikitasej tlake techmachtia tlen kichijkej. Uan ipan tlamachtili 5, tikitasej kenijkatsa techpaleuia pampa techmakixtijkej uan kenijkatsa tijnextisej tikintlaskamatiliaj.

¿TLAKE TECHMACHTIA TLEN JEHOVÁ KICHIJKI KEMA TEMAKTILIK IKONE?

3. ¿Kenijkatsa imikilis se tlakatl ueliskia kinmakixtis miakej maseualmej? (Nojkia xikita tlaixkopinkayomej).

³ Jehová kipaktia kichiuas tlen xitlauak, yeka techmakixtik (Deut. 32:4). ¿Kenke kiampa tikijtouaj? Adán kiijixnamijki Dios, yeka nochi titlajtlakolejkej uan timikij (Rom. 5:12).  Jehová kiualtitlanki Jesús ma techmakixti tlen tlajtlakoli uan mikilistli. Pero, ¿kenijkatsa kinmakixtiskia miakej maseualmej se tlakatl katli amo eli tlajtlakole? Apóstol Pablo kiijtok: “Sanse kej miakej mochijkej tlajtlakolejkej pampa se tlakatl [Adán] amo kineltokak Dios, nojkia miakej elisej xitlauakej pampa se tlakatl [Jesús] kena kineltokak Dios” (Rom. 5:19; 1 Tim. 2:6). Uajka tlaj se tlakatl katli amo kineltokak Dios kichijki ma tielikaj titlajtlakolejkej uan ma timikikaj, uajka nojkia se tlakatl katli amo kipixki tlajtlakoli uan kineltokak Dios ueliskia techmakixtis.

4. ¿Kenke Jehová amo san kinkajki ma itstokaj nochipa iteipaixuiuaj Adán katli kuali tlaneltokaskiaj?

⁴ ¿Pero nelnelia monekiyaya mikis Jesús para techmakixtis? ¿Jehová ueltoskia kinkauas iteipaixuiuaj Adán katli kuali tlaneltokaj ma itstokaj nochipa? Uelis tojuantij timoiljuiskiaj más kuali tlaj kiampa kichijtoskia, pero ma tikilnamikikaj Jehová nochipa kichiua tlen xitlauak. Uan tlaj Jehová kiampa kichijtoskia, kinextijtoskia amo kenijki kema Adán kiixpanok.

5. ¿Kenke uelis timotemachisej Jehová nochipa kichiuas tlen xitlauak?

⁵ Pero ma timoiljuikaj, ¿tlake panotoskia tlaj Jehová amo temaktilijtoskia iKone uan kinkajtoskia iteipaixuiuaj Adán ma itstokaj nochipa? Kinextijtoskia kiixpano itlanauatiljuaj. Uan maseualmej uelis moiljuiskiaj nojkia kiampa kichiuaskia ika tlen kitenkajtok uan ayokmo kineltokaskiaj tlaj Jehová kiaxitiskia nochi tlen kiijtojtok. ¿Kenke amo kinamiki timoiljuisej ni tlamantli? Pampa Jehová kichijki tlen xitlauak maske monejki temaktilis iKone katli tlauel kiiknelia. Yeka, timotemachiaj ya nochipa kichiuas tlen xitlauak.

6. ¿Kenijkatsa pampa Jesús motemaktilik kinextia Jehová tlauel techiknelia? (1 Juan 4:9, 10).

⁶ Kema Jehová temaktilik iKone, kinextik kichiua tlen xitlauak. Pero nojkia kinextik tlauel techiknelia (Juan 3:16; xijpoua 1 Juan 4:9, 10). Jehová kititlanki iKone ma motemaktili pampa kineki ma tiitstokaj nochipa uan ma tielikaj ichampoyouaj. Ximoiljui ni: kema Adán tlajtlakolchijki ayokmo elki ikone Jehová, yeka nochi katli teipa tlakajtiajkej ayokmo elkej ichampoyouaj. Pero tlen Jehová kichijki uelis kinpaleuis nochi maseualmej katli kineltokasej uan motemachisej ipan ya, sampa ma elikaj ichampoyouaj se tonali. Ipan ni tonali Jehová ueli techtlapojpoljuia totlajtlakoljuaj uan uelis timouampojchiuasej iuaya uan ininuaya toikniuaj. ¡Jehová tlauel techiknelia! (Rom. 5:10, 11).

7. ¿Kenke kema timoyoliljuiaj Jesús tlauel tlaijiyouik techpaleuia ma tikitakaj Jehová tlauel techiknelia?

 ⁷ Kema timoyoliljuiaj ipan tlen Jehová monejki kichiuas para techmakixtis, uelis tikitasej tlauel techiknelia. Satanás kiijtoua nochi Jehová itekipanojkauaj kitlauelkauasej kema kiixnamikisej tlaouijkayotl. Pero Jehová kinekiyaya kinextis san istlakatiyaya, yeka kikajki iKone tlauel ma tlaijiyoui kema nechka kimiktiskiaj (Job 2:1-5; 1 Ped. 2:21). Jehová kiitak kema maseualmej kipinajtijkej Jesús, kema soldados kiuijuitejkej, kema kiuiyonijkej ipan se kuauitl uan kema kimiktijkej (Mat. 27:28-31, 39). Jehová ueltoskia kimanauis iKone, kej kema maseualmej kiijtojkej: “Nama Dios ma kimakixti tlaj kineki kipaleuis” (Mat. 27:42, 43). Pero tlaj kimanauijtoskia, yon se maseuali ueltoskia momakixtis uan amo ueliskia motemachisej teipa kuali itstosej. Yeka, Jehová kikajki ma kitlaijiyouiltikaj uan ma kimiktikaj.

8. ¿Kenke tijmatij Jehová tlauel kiyolkokok kema kitlaijiyouiltijkej iKone? (Nojkia xikita tlaixkopinkayotl).

⁸ Jehová amo kimanauik iKone maske amo kinekiyaya ma tlaijiyoui, pero nopa amo kiijtosneki amo kiyolkokok tlen kipanok. Kema Jehová techchijchijki, kichijki ma tijyolmatikaj miak tlamantli sanse kej ya. Biblia kiijtoua se keskij maseualmej “kiyolkokojkej” uan kichijkej ma mokueso (Sal. 78:40, 41). Ma timoiljuikaj ipan tlen kinpanok Abrahán uan Isaac. Jehová kinauatik ma kimaktili ikone kej tlakajkaualistli (Gén. 22:9-12; Heb. 11:17-19). Uelis Abrahán tlauel mokuesojtoya uan moyolkokouayaya kema mokualchijchiuayaya para kimiktis ikone. Uan, ¿kenijkatsa kiyolmatki Jehová kema kiitak kitlaijiyouiltijkej uan kimiktijkej iKone? Uelis tlauel kiyolkokok uan tlaijiyouik kema kiitak tlen kipanok. (Xikita ipan jw.org nopa video Ma titlaneltokakaj kej inijuantij: Abrahán [tlaxeloli 2]).

9. ¿Tlake techmachtia Romanos 8:32, 38 uan 39?

⁹ Kema Jehová temaktilik iKone kinextik san ya tlauel techiknelia. Yon se touampo o se touikal techiknelia sanse kej ya (xijpoua Romanos 8:32, 38, 39). Uan uelis timotemachisej Jehová tlauel techiknelia maske kemantika timoiljuiaj amo tlauel topatij. Ximoiljui ipan ni tlamantli: ¿mitspaktiskia tiitstos nochipa? Jehová tlauel kineki xiitsto nochipa. ¿Tijneki ma mitstlapojpoljuikaj motlajtlakoljuaj? Jehová tlauel kineki mitstlapojpoljuis. Ya san kineki ma tijtlaskamatilikaj pampa temaktilik iKone, ma timotemachikaj ipan ya uan ma tijneltokakaj. Kema Jehová temaktilik iKone kinextik tlauel techiknelia. Uan ipan yankuik Tlaltipaktli tikitasej sekinok tlamantli tlen Jehová kichijtok pampa techiknelia (Ecl. 3:11).

 ¿TLAKE TECHMACHTIA TLEN JESÚS KICHIJKI KEMA MOTEMAKTILIK?

10. 1) ¿Tlake tlamantli más kitekipachouayaya Jesús kema nechka kimiktiskiaj? 2) ¿Kenijkatsa Jesús kinextik Satanás san istlakatiyaya? (Xikita nopa recuadro “ Jesús kimanauik Jehová itoka pampa amo kitlauelkajki”).

¹⁰ Jesús amo kineki ma kiistlakauikaj iTata (Juan 14:31). Ya tlauel motekipachojtoya pampa maseualmej ueliskia kitlaijiljuisej iTata. Kema kitlajtolsenkajkej kiijtojkej kiixpanotoya Dios uan kinextijtoya amo kitlepanitayaya, yeka kiijtok: “NoTata, tlaj uelis, xinechkixtili ni copa” (Mat. 26:39). Jesús amo kema kitlauelkajki iTata maske kimiktijkej, kiampa kinextik Satanás san istlakatiyaya.

11. ¿Kenijkatsa Jesús kinextik tlauel kiniknelia maseualmej? (Juan 13:1).

¹¹ Jesús kitekipachoua tlen kinpano maseualmej uan más tlen kinpano itokilijkauaj, kiampa kinextik kema motemaktilik (Prov. 8:31; xijpoua Juan 13:1). Jesús kimajtoya kema itstoskia ipan Tlaltipaktli kiixnamikiskia miak tlaouijkayotl uan tlauel kitlaijiyouiltiskiaj kema kimiktiskiaj. Pero Jesús amo kichijki nochi nopa tlamantli san pampa Jehová kinauatijtoya. Kiampa kichijki pampa tlauel kiniknelia maseualmej, yeka ika iyolo tlajtolmoyajki, tlamachtik uan kinpaleuik sekinok. Uan kema nechka kimiktiskiaj, kinikxipajpajki iapóstoles, kinyolchikajki uan kinmachtik (Juan 13:12-15). Teipa, kema ya kikuapilojtoyaj, kiiljuik nopa tlakatl katli itstoya inakastla teipa kuali itstoskia uan nojkia kiiljuik Juan ma kimokuitlaui inana, María (Luc. 23:42, 43; Juan 19:26, 27). Kema Jesús itstoya ipan Tlaltipaktli kinextik tlauel kiniknelia maseualmej, yeka tlauel tlajtolmoyajki uan temaktilik inemilis.

12. ¿Tlake sekinok tlamantli nojua kichijtok Jesús por tojuantij?

 ¹² Maske Cristo sempatsi mijki, ipan ni tonali nojua kichijtok miak tlamantli para techpaleuis (Rom. 6:10). Ya nojua tekititok pampa kineki techmakas miak tlateochiualistli uan ueli kichiua pampa motemaktilik. Jesús kichiua miak tlamantli pampa eli tlanauatijketl, Sumo Sacerdote uan kiyakana tlanechikoli (1 Cor. 15:25; Efes. 5:23; Heb. 2:17). Ya kinsentilis nopa tlapejpenilmej uan nopa tlauel miakej maseualmej, kema ayamo tlantos nopa ueyi tlaijiyouilistli (Mat. 25:32; Mar. 13:27). b Nojkia ika nopa tlatekipanojketl katli temachtli techmaka tlamachtili tlen techpaleuis kuali ma titlaneltokakaj ipan ni tonali (Mat. 24:45). Uan kema tlanauatijtos ipan nopa Mil Xiuitl nojua techpaleuijtos ika miak tlamantli. Jehová amo san kiualtitlanki iKone para ma motemaktiliki, nojkia kiualtitlanki para kichiuas sekinok tlamantli tlen techpaleuis.

NOCHIPA XIMOMACHTI SEKINOK TLAMANTLI

13. ¿Kenijkatsa tlaj timoyoliljuiaj techpaleuis ma tikitakaj Jehová uan Jesús tlauel techikneliaj?

¹³ Tlaj timoyoliljuis, mitspaleuis nojua tikitas tlen Jehová uan Jesús kichijtokej pampa tlauel mitsikneliaj. Kema nechka moilnamikis Cristo imikilis ipan ni xiuitl, uelis tijchiuas kampeka tijpouas se keski Evangelios. Amo xijpoua miak capítulos san ipan se tlalochtli, más kuali yolik xijpojtia uan ximoyoliljuijtia sekinok tlamantli tlen mitspaleuis xikikneli Jehová uan Jesús. Uan nojkia xijchiua kampeka tikiniljuis sekinok tlen tijyekojtia.

14. Kej kiijtoua Salmo 119:97, ¿tlake moneki tijchiuasej para nojua tijyekojtiasej sekinok tlamachtili tlen Biblia uan tlen Jehová kichijki kema techmakixtik? (Nojkia xikita tlaixkopinkayotl).

¹⁴ Tlaj ya tijtekipanojtok Jehová miak xiuitl, uelis timotlajtlania tlaj nojua uelis tijyekos sekinok tlamantli tlen amo tijmajtoya ika se keski tlamachtili tlen tlauel kiixmatij, kej kema Jehová techmakixtik, kenijkatsa kinextia techiknelia uan kej tetlajtolsenkaua. Nochipa uelis tijyekos sekinok tlamantli ika ni tlamachtili. ¿Tlake mitspaleuis xijpanti sekinok tlamantli? Kuali xijtekiui nopa amatlajkuiloli tlen tijpiaj. Tlaj amo tijkuamachilia  se texto, uelis tijtemos sekinok tlamachtili. Teipa se tonal ximoyoliljuijtinemi tlen timomachtik, tlen tijyekok tlen Jehová uan Jesús uan kenijkatsa inijuantij tlauel mitsikneliaj (xijpoua Salmo 119:97).

15. ¿Kenke moneki tijtemosej sekinok tlamachtili ipan Biblia?

¹⁵ Nojua xijchijto kampeka tijpouas o timomachtis Biblia maske kemantika amo tijpantis se tlamachtili tlen amo tijmajtoya. Uelis tikijtosej kema timomachtiaj eli sanse kej kema se akajya kitemoua oro. Miakej maseualmej kemantika miak tonali kitemouaj uan amo san se keski horas. Maske ouij kimatij kipantisej, inijuantij nojua kichiuaj kampeka kitemosej pampa kimatij tlauel ipati tlaj kipantisej se kentsi. Kiampa pano kema ipan Biblia tijpantiaj se tlamantli tlen amo tijmajtoyaj, eli más ipati uan amo tlaj tijpantiskiaj oro (Sal. 119:127; Prov. 8:10). Yeka, nochipa xijpoua uan ximomachti Biblia (Sal. 1:2).

16. ¿Kenijkatsa uelis tijchiuasej kej Jehová uan Jesús?

¹⁶ Kema timomachtijtias xijchiua kampeka tikitas kenijkatsa tijchiuas tlen tijyekok. Uelis tijchiuas kej Jehová uan amo tikinchikoitas sekinok. Nojkia uelis tijchiuas kej Jesús, tijnextis tikiknelia Jehová uan maseualmej tlaj timosentlalis tikinpaleuis toikniuaj maske kemantika tijpias tlaouijkayotl. Uan titlajtolmoyauas pampa kiampa uelis tikinpaleuis sekinok nojkia ma kinpaleui tlen Jehová uan Jesús kichijkej.

17. ¿Tlake tikitasej ipan tlamachtili 5?

¹⁷ Tlaj tijchiuaj kampeka timomachtisej kenijkatsa techpaleuia Jesús imikilis, tlauel tikiknelisej ya uan Jehová. Uan inijuantij nojkia más techiknelisej (Juan 14:21; Sant. 4:8). Yeka, ma tijtekiuikaj nochi tlen Jehová techmaka para timomachtisej tlen Jesús kichijki. Ipan tlamachtili 5, tikitasej kenijkatsa techpaleuia Jesús imikilis uan tlake moneki tijchiuasej para tijtlaskamatilisej pampa techiknelia.