TLAMACHTILI 3
UIKATL 35 Ma tijchiuakaj tlen tlauel ipati
Xijyolpakilti Jehová ika tlen tijtlapejpenis
“Tlalnamikilistli peua kema se akajya kiimakasi uan kitlepanita TOTEKO. Uan intla se akajya kiixmatis TOTEKO tlen tlatsejtseloltik, kichiuas para kimachilis miak tlamantli” (PROV. 9:10).
TLEN MOIXTOMAS
Tlaj tijmati nochi tlen moneki, tijkuamachilia tlen Jehová moiljuia uan timoiljuia tlake ueliskia panos ika tlen tijneki tijchiuas, mitspaleuis kuali xijtlapejpeni se tlamantli.
1. ¿Tlake moneki tijchiuasej mojmostla, uan kenke kemantika eli ouij?
MOJMOSTLA moneki tijtlapejpenisej tlake tijchiuasej. Se keski tlamantli amo ouij tijtlapejpenia, kej tlake tijkuasej o tlake hora tikochisej. Pero se keski kena ouij pampa moneki kuali tikitasej tlake tijchiuasej, kej kema tijtlapejpeniaj ika tlake timopajtisej, tlen techpaleuis ma tiyolpakikaj, tlen techpaleuis ika tochampoyouaj o kenijkatsa tijueyichiuasej Dios. Tijnekij tlen tijtlapejpenisej ma techpaleui tojuantij uan nojkia tochampoyouaj, pero tlen más ipati ma kiyolpakilti Jehová (Rom. 12:1, 2).
2. ¿Tlake mitspaleuis kuali xijtlajpejpeni tlen tijchiuas?
2 Ipan ni tlamachtili tikitasej eyi tlamantli tlen uelis mitspaleuis kuali xijtlapejpeni tlen tijchiuas: 1) tijmatis nochi tlen moneki, 2) tikitas tlake moiljuia Jehová uan 3) kuali timoiljuis tlake uelis tijchiuas. Nojkia tikitasej tlake uelis techpaleuis kuali ma tijtekiuikaj totlalnamikilis (Prov. 2:11).
XIJMATI NOCHI TLEN MONEKI
3. Ika se neskayotl xikijto kenke tlauel ipati tijmatis nochi tlen moneki kema tijtlapejpenis se tlamantli.
3 Tlaj tijneki kuali tijtlapejpenis tlen tijchiuas, achtoui moneki tijmatis sekinok tlamantli. ¿Kenke moneki kiampa tijchiuas? Ma timoiljuikaj se akajya tlauel mokokoua uan yaui ika se tepajtijketl. ¿Kinamikiskia nopa tepajtijketl, nima ma kiiljui tlake pajtli kitolos maske ayamo kitlajtlania tlake kikokoua? Amo kinamikiskia kiampa kichiuas. Yeka, tlaj kuali tijtlachilia nochi tlen moneki, mitspaleuis kuali tijtlapejpenis tlen tijchiuas. ¿Kenijkatsa uelis tijchiuas?
4. Kej kiijtoua Proverbios 18:13, ¿kenijkatsa uelis tijmatis sekinok tlamantli? (Nojkia xikita tlaixkopinkayomej).
4 Tlaj titlatsintokas mitspaleuis tijmatis tlen moneki. Ximoiljui mitstlaneuij xitlakuati uan ximijtotiti ininuaya toikniuaj. ¿Tiaskia tlaj amo tijmati tlake mochiuas uan amo tikixmati nopa toikni katli iljuichiuas? Uelis monekis tijtlatsintokis se keski tlamantli: “¿Kema uan kanke mochiuas? ¿Keskij yasej? ¿Ajkia kiitas nochi tlen mochiuas? ¿Ajkia inijuantij yasej? ¿Tlake kinekij kichiuasej? ¿Temakasej tlaili?”. Tlaj tijmatis nochi tlen mochiuas, mitspaleuis kuali xijtlapejpeni tlen tijchiuas (xijpoua Proverbios 18:13).
Tlaj titlatsintoka se keski tlamantli, mitspaleuis xijmati nochi tlen moneki. (Xikita párrafo 4). a
5. ¿Tlake moneki tijchiuas kema ya tijmajtos nochi tlen moneki?
5 Kema tijmatis nochi tlen moneki, mitspaleuis tikitas tlake ueliskia panos. Ximoiljui, tlaj mitsiljuiskiaj ipan nopa iljuitl tlauel tlaisej o yasej katli amo kuali monejnemiltiaj. ¿Timoiljuia ipan nopa iljuitl sekinok uelis kichiuasej tlen amo kuali? (1 Ped. 4:3). ¿Uan tlake moneki tijchiuas tlaj nopa iljuitl mochiuas kema monekis tias tlanechikoli o kema titlajtolmoyauas? Tlaj achtoui timoiljuia tlake ueliskia panos, mitspaleuis kuali xijtlapejpeni tlen tijchiuas. Pero, nojua moneki tijchiuas seyok tlamantli. Uelis ta ya tikitak tlake ueliskia panos, pero ¿kenijkatsa kiita Jehová? (Prov. 2:6).
XIKITA TLAKE MOILJUIA JEHOVÁ
6. Kej kiijtoua Santiago 1:5, ¿kenke moneki tikiljuisej Jehová ma techpaleui?
6 Xikiljui Jehová ma mitspaleui tijkuamachilis kenijkatsa kiita tlen tijneki tijtlapejpenis. Ya kiijtojtok techmakas tlalnamikilistli uan amo techixkoiljuis (xijpoua Santiago 1:5). Nopa tlalnamikilistli techpaleuis ma tikitakaj tlaj tlen tijneki tijchiuasej kiyolpakiltis o amo.
7. ¿Kenijkatsa uelis tijmatis tlen Jehová moiljuia? Xikijto se neskayotl.
7 Kema ya tikiljuijtos Jehová ma mitspaleui, moneki kuali tikitas kenijkatsa mitsnankilis. Ximoiljui tia tipaxaloti kanajya uan timokuapoloua. Yeka, tikiljuia se akajya katli nopaya eua ma mitspaleui, kema mitsiljuis kanke moneki tias, uelis kuali tijtlakakilis uan amo nima tikisteuaskia. Nojkia kiampa pano kema tikiljuia Jehová ma mitsmaka tlalnamikilistli. Xijchiua kampeka tikitas kenijkatsa Jehová mitsnankilia kema tijtemoua se keski textos tlen mitspaleuis tikitas tlaj kuali tlen tijchiuas. Sampa ma timoiljuikaj ipan nopa iljuitl tlen tikijtojkej ipan párrafo 4. Kema tijtlapejpenis tlaj tias o amo, moneki timoiljuis tlake kiijtoua Biblia kema mochiua se iljuitl kampa san tlemach tlachiuaj, kema se akajya mouika ininuaya katli amo kuali monejnemiltiaj uan kenke tlauel ipati tikachtouitlalis tijtekipanos Dios (Mat. 6:33; Rom. 13:13; 1 Cor. 15:33).
8. ¿Tlake uelis tijchiuas tlaj tijneki tijtemos sekinok tlamachtili? (Nojkia xikita tlaixkopinkayotl).
8 Uelis kemantika moneki se akajya ma mitspaleui tijpantis tlamachtili tlen tijneki tijmatis. Se toikni o tosiuaikni katli kuali tlaneltoka ueliskia mitsiljuis tlake ueliskia tijchiuas. Pero nojkia ueliskia tijtemos sekinok tlamachtili tlen mitspaleuis. Onka miak amatlajkuiloli kampa uelis timomachtis, kej nopa amochtli tlen itoka Textos tlen nochipa techyakanas uan Tlen ika momachtiaj Jehová itlajtoltemakauaj. Xikilnamiki tlen timoiljuijtok tijchiuas moneki kiyolpakiltis Jehová.
Xikita tlake moiljuia Jehová. (Xikita párrafo 8). b
9. ¿Kenijkatsa tijmatis tlen tijchiuas kiyolpakiltis Jehová? (Efesios 5:17).
9 Moneki kuali tikixmatisej Jehová para tijmatisej tlaj kiyolpakiltis tlen tijchiuasej. Proverbios 9:10 kiijtoua: “Intla se akajya kiixmatis TOTEKO [ . . . ] kimachilis miak tlamantli”. Yeka, tlaj tijnekij tijkuamachilisej miak tlamantli, moneki tikixmatisej tlake kuajkuali tlamantli kinextia Jehová, tlake mosentlalijtok kichiuas, tlake kipaktia uan tlake kikualankaita. Uelis timoiljuis: “Ya nikitak tlen moiljuia Jehová, ¿kipaktis tlen nijchiuas?” (xijpoua Efesios 5:17).
10. ¿Kenke tlauel tijpatiita tlen kiijtoua Biblia uan amo tlen momajtokej kichiuaj tochampoyouaj o sekinok maseualmej?
10 Kemantika tlen tijchiuasej, tochampoyouaj o touampoyouaj amo kuali kiitasej pampa tijnekij tijyolpakiltisej Jehová. Se neskayotl, uelis tetajmej kiiljuisej iichpoka ma monamikti iuaya se tlakatl katli tlatominpia maske amo kuali tlaneltoka pampa kinekiskiaj ma kintlamajmaka. Kiampa kichiuaj pampa tetajmej kinekij iichpoka kuali ma itsto uan amo tleno ma kipolo. Pero, ¿ajkia kipaleuis nojua kuali ma tlaneltoka ininichpoka? ¿Uan kenijkatsa kiitas Jehová tlaj kiampa kichiuasej? Uelis kinpaleuis tlen kiijtoua Mateo 6:33, kampa kiijtoua Jehová itekipanojkauaj moneki achtoui kitemosej iTlanauatijkayo Dios. Maske tikinpatiitaj totatauaj uan tikintlepanitaj maseualmej, tojuantij tlauel tijpatiitaj tijyolpakiltisej Jehová.
KUALI XIMOILJUI TLAKE UELIS TIJCHIUAS
11. Kej kiijtoua Filipenses 1:9, 10, ¿tlake mitspaleuis kuali xikita tlake uelis tijchiuas?
11 Kema ya timomachtijtos se keski textos ipan Biblia, moneki tikitas tlake más ipati ika tlen timoiljuijtok tijchiuas (xijpoua Filipenses 1:9, 10). ¿Kenijkatsa uelis tijchiuas? Moneki tijtekiuis motlalnamikilis para tikitas tlake más kuali. Kemantika amo ouij tijtlapejpenis se tlamantli, pero kemantika kena elis ouij pampa amo nima tikitas tlake más kuali mitspaleuis. Tlaj timoiljuia tlen ueliskia panos, mitspaleuis tikitas tlake más kuali tijchiuas maske eliskia ouij.
12, 13. ¿Kenijkatsa mitspaleuis tlaj kuali timoiljuia kema tijtlapejpenis se tekitl?
12 Ximoiljui tijtemoua se tekitl para uelis tikinpanoltis mochampoyouaj, uan tijpantia onkak kampa uelis titekitis. Moneki kuali tikitas tlake tijchiuas ipan nopa tekitl, keski horas tekitis, tlaj uejka mokaua uan sekinok tlamantli. Nopa onkak tekitl tlen tijpantijtok amo kiixpano Biblia, uelis tijtlapejpenis se pampa mitspaktis kampa titekitis o pampa más kuali mitstlaxtlauisej. Pero amo san ya nopa moneki timoiljuis, nojkia moneki tikitas sekinok tlamantli.
13 Uelis timotlatsintokis: ¿Ueliskia kichiuas se tlen ni ome tekitl kemantika ayokmo ma nia tlanechikoli? ¿Ueliskia ayokmo nikinpaleuis ma yolpakikaj uan kuali ma tlaneltokakaj nochampoyouaj? Tlaj timotlajtlanis se keski tlamantli, mitspaleuis xikita tlauel ipati tijueyichiuas Jehová uan tikinmokuitlauis mochampoyouaj. Uan amo san timoiljuis tlen tijtlanis. Tlaj kiampa tijchiuas, Jehová kiteochiuas tlen tijtlapejpenis.
14. ¿Kenijkatsa tlaj titeiknelia uan kuali timoiljuiaj tlen tijchiuasej techpaleuis amo ma tikinyolkokokaj sekinok?
14 Kema timoiljuia tlake ueliskia panos ika tlen tijtlapejpenisej tijchiuasej, techpaleuis ma tikitakaj tlaj kinpaleuis sekinok uan kiampa amo “ma tlajtlakolchiuakaj” (Filip. 1:10). Kema tijtlapejpenisej kenijkatsa timoyoyontisej uan timoyejyekchiuasej, tlauel ipati timoiljuisej ipan sekinok. Uelis tijnekij timoyoyontisej kej tojuantij techpaktia. Pero, ¿nopa tlamantli kichiuas toikniuaj o sekinok amo kuali ma techitakaj? Tlaj timoyoliljuisej tlen tijchiuasej, techpaleuis ma tijtlepanitakaj tlen sekinok kiyolmati. Tlaj titeikneliaj, techpaleuis ma timoiljuikaj “tlen kinpaleuis sekinok” uan nojkia kuali ma tijtlapejpenikaj kej timoyejyekchiuasej (1 Cor. 10:23, 24, 32; 1 Tim. 2:9, 10). Kiampa tlen tijtlapejpenisej kinextis tikinikneliaj uan tikintlepanitaj sekinok.
15. ¿Ipan tlake tlamantli moneki timoiljuis achtoui?
15 Tlaj tijtlapejpenis se tlamantli tlen tlauel ipati, xikita tlake moneki tijchiuas para kuali ma kisa. Jesús techmachtik tlaj tijnekij tijchiuasej se tlamantli achtoui ma tikitakaj “tlaj kiaxilis” tlen tijtekiuisej (Luc. 14:28). Yeka, ximoiljui keski tonali tijtekiuis, keski tomij monekis uan tlake moneki tijchiuas para kuali ma kisa tlen tijtlapejpenik. Kemantika monekis tikamanaltis ininuaya mochampoyouaj para kiitasej kenijkatsa uelis mitspaleuisej ika tlen tijtlapejpenik. ¿Kenke moneki kiampa tijchiuas? Pampa nopa mitspaleuis tikitas tlaj monekis tijpatlas se keski tlamantli o tijtlapejpenis seyok tlamantli tlen más kuali. Nojkia tlaj kuali tikintlakakilia, kinekisej mitspaleuisej para kuali ma kisa tlen tijneki tijchiuas (Prov. 15:22).
KUALI XIJTLAJPEJPENI TLEN TIJCHIUAS
16. ¿Tlake tlamantli moneki tijchiuas para kuali ma kisa tlen tijtlapejpenis? (Nojkia xikita recuadro “ ¿Tlake nechpaleuis kuali nijtlapejpenis tlen nijchiuas?”).
16 Tlaj tijchiua nochi ni tlamantli tlen timomachtijtokej, mitspaleuis kuali xijtlapejpeni tlen tijchiuas. Tlaj ya tikitak nochi tlen moneki tijmatis uan ya timomachtik se keski textos ipan Biblia, mitspaleuis xijyolpakilti Jehová ika tlen tijtlapejpenis. Uan xikiljui ma mitspaleui kuali ma kisa tlen tijneki tijchiuas.
17. ¿Tlake mitspaleuis kuali xijtlapejpeni tlen tijchiuas?
17 Uelis achtouia tijchijki se keski tlamantli tlen tikitak kuali kiski. Maske kiampa tijchijki, xikilnamiki tlaj tijneki kuali tijtlapejpenis tlen tijchiuas, moneki tikitas tlake moiljuia Jehová uan amo san ipan tlen ta timoiljuia o timoiljuis titlalnamiki. San Jehová mitspaleuis xikixmati nochi tlen moneki, xijkuamachili tlen ya moiljuia uan ximoiljui tlake ueliskia panos ika tlen tijtlapejpenis. Ni eyi tlamantli techpaleuia ma tijnextikaj tlalnamikilistli (Prov. 2:1-5). Jehová mitspaleuis kuali xijtlapejpeni tlen tijchiuas (Sal. 23:2, 3).
UIKATL 28 Ximouampojchiua iuaya Jehová
