1, 2. ¿Tlake uelis moiljuiyayaj apóstoles pampa Jesús ayokmo itstoya ininuaya?

NOPA apóstoles itstoyaj ipan tepetl Olivos iuaya ininuampo uan inintlamachtijka Jesús. Teipa kiitakej Jesús ixpolijtiajki ipan se mixtli kema tlejkok iluikak (Hech. 1:9, 10). Maske ipan ome xiuitl Jesús kinmachtik miak tlamantli, kinyolchikajki uan kinyakanki, nama ayokmo itstoskia ininuaya. Yeka, ¿tlake kichiuaskiaj?

² Kema ayamo tlakuepiliyaya iluikak, Jesús kiniljuik itokilijkauaj: “Intlayolmelauatij tlen na ipan ni altepetl Jerusalén, uan ipan estados Judea uan Samaria. Uan teipa intlayolmelauatij tlen na hasta kampa más uejuejka pilaltepetsitsij ipan ni Tlaltipaktli” (Hech. 1:8). ¿Kenijkatsa kichiuaskiaj ni tekitl? Jesús kiniljuijtoya toTeotsij itonal kinpaleuiskia (Hech. 1:5). ¿Ajkia kinyakanaskia ma tlajtolmoyauakaj ipan nochi Tlaltipaktli uan kinpaleuiskia ma mosentikapaleuikaj? Nopa apóstoles kimatiyayaj Jehová ipa kintekiuijtoya tlakamej ma kinyakanakaj israeleuanij. Yeka uelis moiljuiyayaj tlaj Jehová sampa kitlapejpeniskia se akajya katli kinyakanaskia.

3. 1) Kema Jesús tlakuepilijtoya iluikak, ¿tlake tlamantli tlen tlauel ipati monejki kitlapejpenisej apóstoles? 2) ¿Tlake tlajtlanili tijnankilisej ipan ni tlamachtili?

 ³ Se keski tonali teipa kema Jesús tlakuepilijtoya iluikak, itokilijkauaj momachtijkej toTeotsij iTlajtol, momaijtojkej uan kiiljuijkej Jehová ma kinpaleui uan kitlapejpenijkej Matías kej apóstol, katli kipatlaskia Judas Iscariote. Kiampa sampa eliskiaj 12 apóstoles (Hech. 1:15-26). ¿Kenke inijuantij uan Jehová kiitakej tlauel monekiyaya kitlapejpenisej se yankuik apóstol? Pampa kimatiyayaj monekiyaya itstosej 12 apóstoles. * Jesús kintlapejpenijtoya iapóstoles uan kinnextilijtoya kenijkatsa uelis kichiuasej se tekitl tlen tlauel ipati ipan toTeotsij itlanechikol. ¿Tlake tekitl monekiyaya kichiuasej, uan kenijkatsa Jehová uan Jesús kinpaleuijkej? ¿Itstokej ipan ni tonali se keskij tlakamej katli kichiuaj nopa tekitl? ¿Kenijkatsa uelis ‘tikinilnamikisej katli techyakanaj’, uan nojua tlauel tikilnamikisej nopa “tlalnamijkatlatekipanojketl tlen nelia temachtli”? (Heb. 13:7; Mat. 24:45).

4. ¿Tlake tekitl kipixtoyaj nopa apóstoles uan sekinok ueuejtlakamej katli itstoyaj ipan Jerusalén?

⁴ Apóstoles pejkej kinyakanaj Cristo itokilijkauaj ipan Pentecostés, xiuitl 33. Biblia kiijtoua “Pedro moketski ininuaya nopa sekinok matlaktli uan se” uan kinmachtik miakej maseualmej tlake moneki kichiuasej tlaj kinekiyayaj momakixtisej (Hech. 2:14, 15). Miakej nojkia mochijkej Cristo itokilijkauaj. Teipa “nochi nopa tlaneltokanij kitlakakiliyayaj nochi tlen nopa tlayolmelauanij kinmachtiyayaj” (Hech. 2:42). Nopa apóstoles kiajokuiyayaj nochi tomij tlen mosentiliyaya ipan tlanechikoli (Hech. 4:34, 35). Nojkia kinmachtiyayaj toTeotsij itekipanojkauaj uan kema momaijtouayayaj, kiiljuiyayaj toTeotsij ma kinpaleui. Inijuantij kiijtojkej: “Tojuantij titlayolmelauanij [o apóstoles], nojua timomaijtosej ika toueyiTeko uan titlamachtisej iTlajtol” (Hech. 6:4). Uan nojkia kintitlaniyayaj sekinok toikniuaj katli kuali tlaneltokayayaj ma tlajtolmoyauatij kampa amo kema tlajtolmoyajtoyaj (Hech. 8:14, 15). Teipa, sekinok ueuejtlakamej katli nojkia kintlapejpenijtoyaj kinpaleuijkej apóstoles uan nojkia kinyakankej toTeotsij itekipanojkauaj. Nochi inijuantij elkej tlen nopa cuerpo gobernante, katli kiyakanayayaj nochi tlanechikoli (Hech. 15:2).

5, 6. 1) ¿Kenijkatsa toTeotsij itonal kinpaleuik katli tlayakanayayaj? (Xikita nopa achtoui tlaixkopinkayotl). 2) ¿Kenijkatsa iluikaeuanij kinpaleuijkej katli tlayakanayayaj? 3) ¿Kenijkatsa toTeotsij iTlajtol kinyakanki toikniuaj katli tlayakanayayaj?

⁵ Nopa Cristo itokilijkauaj katli itstoyaj ipan achtoui siglo kimatiyayaj Jehová kiyakanayaya ika Jesús nopa cuerpo gobernante. ¿Kenke temachtli kimatiyayaj nopa? Ma tikitakaj eyi tlamantli. Se: toTeotsij itonal kinpaleuiyaya katli tlayakanayayaj (Juan 16:13). Maske toTeotsij itonal kinpaleuik nochi katli kintlapejpenijtoyaj, san apóstoles uan sekinok ueuejtlakamej tlen Jerusalén tlauel kinpaleuik. Kiampa  ueliskiaj kinyakanasej nochi toikniuaj katli itstoyaj ipan miak tlanechikoli. Ipan xiuitl 49, toTeotsij itonal kinpaleuik katli tlayakanayayaj ma kimatikaj tlake kichiuasej ika nopa circuncisión. Uan nochi toikniuaj kichijkej tlen inijuantij kiijtojtoyaj, yeka nochi kipixkej “más fuerza para kineltokasej toTeko. Uan mojmostla toTeko kinmiakiliyaya” (Hech. 16:4, 5). Nopa amatlajkuiloli tlen kititlankej kampa kiijtouayaya tlake kichiuaskiaj ika nopa circuncisión, kinextia toTeotsij itonal nelia kinpaleuiyaya, uan nojkia kinextiyaya inijuantij tlauel teikneliyayaj uan kuali tlaneltokayayaj (Hech. 15:11, 25-29; Gál. 5:22, 23).

⁶ Ome: iluikaeuanij kinpaleuiyayaj katli tlayakanayayaj, yeka Cristo itokilijkauaj motemachiyayaj Jehová kinyakanayaya. Se tonali, se iluikaejketl kiiljuik Cornelio ma kinotsa apóstol Pedro. Kema Pedro tlanki kinmachtia Cornelio uan ichampoyouaj, kiselijkej toTeotsij itonal maske nopa tlakamej amo mochiuilijtoyaj circuncisión. Yeka Cornelio elki nopa achtoui tlakatl katli mochijki Cristo itokilijka maske amo eliyaya judío uan maske amo mochiuilijtoya circuncisión. Kema apóstoles uan sekinok toikniuaj kimatkej tlen panotoya, inijuantij kuali kinselijkej katli mochijtoyaj Cristo itokilijkauaj pampa kimatiyayaj ya nopa kinekiyaya toTeotsij (Hech. 11:13-18). Ni kinextia iluikaeuanij kinpaleuiyayaj toikniuaj katli tlayakanayayaj kema tlajtolmoyauayayaj (Hech. 5:19, 20). Eyi: toTeotsij iTlajtol kinyakanayaya. Toikniuaj katli tlayakanayayaj nochipa kuali kiitayayaj tlen toTeotsij iTlajtol kiijtoua, kiampa kimatiyayaj kenijkatsa kitlapejpenisej se tlenijki, tlake kineltokasej uan kenijkatsa kinyakanasej nochi toikniuaj (Hech. 1:20-22; 15:15-20).

7. ¿Kenke uelis tikijtosej Jesús kinyakanayaya itokilijkauaj katli itstoyaj ipan achtoui siglo?

⁷ Maske katli tlayakanayayaj kiijtouayayaj tlake monekiyaya mochiuas ipan nochi tlanechikoli, inijuantij kikuamachiliyayaj Jesucristo eliyaya ininTlayakanka. ¿Kenke tikijtouaj ni? Apóstol Pablo kiijtok eliyaya Cristo katli kintlapejpeniyaya ajkia inijuantij eliskiaj apóstoles. Uan nojkia kiijtok Cristo yaya “totsonteko” pampa kiyakana tlanechikoli (Efes. 4:11, 15). Uan toTeotsij kinejki Jesús itokilijkauaj ma kinixmatikaj kej “cristianos” o Cristo itokilijkauaj, uan amo ika itoka se apóstol (Hech. 11:26). Pablo kimajtoya tlauel monekiyaya kichiuasej tlen apóstoles uan sekinok ueuejtlakamej tlamachtiyayaj, pampa nochi tlen tlamachtiyayaj ualayaya ipan Biblia. Maske kimajtoya nopa, Pablo kiijtok: “Cristo kipia tekiuejkayotl ika nochi tlakamej”. Uajka sejse tlen nopa toikniuaj katli tlayakanayayaj monekiyaya kiitasej Cristo kej inintlayakanka. Teipa, Pablo kiijtok: “ToTeko Dios kipia tekiuejkayotl ika Cristo” (1 Cor. 11:2, 3). Ni kinextiyaya Jehová kitlapejpenijtoya iKone Jesucristo ma kiyakana nochi tlanechikoli.

8, 9. ¿Tlake tekitl tlen tlauel ipati kichijki toikni Russell?

⁸ Ipan 1870, Charles Taze Russell uan se keskij iuampoyouaj kichijkej kampeka kiueyichiuasej toTeotsij kej Biblia kiijtoua. Uan kinekiyayaj kinpaleuisej sekinok maseualmej nojkia kiampa ma kichiuakaj. Yeka ipan 1884, pejki kitekiuiaj nopa Zion’s Watch Tower Tract Society, uan toikni Russell kiyakanayaya. * Pampa kuali momachtiyaya Biblia, amo majmajki kiniljuis sekinok kenijkatsa ipan Iglesia amo tlamachtiyayaj tlen melauak, kej kema tlamachtiaj Trinidad uan kema kiijtouaj alma amo miki, pampa Biblia amo tlamachtia nopa. Russell nojkia kikuamachilik kema Cristo ualaskia amo tikitaskiaj uan kikuamachilik “nopa  tonali tlen toTeko kitlalijtok tlen sejkoyok euanij” tlamiskia ipan xiuitl 1914 (Luc. 21:24). Toikni Russell kitekiuik tomij, tonali uan ichikaualis pampa kinejki kinmachtis sekinok tlen melauak. Temachtli tijmatij Jehová uan Jesús kitekimakakej nopa toikni ma kiyakana tlanechikoli ipan nopa tonali.

⁹ Toikni Russell amo kinekiyaya ma kiuejkapantlalikaj. Ipan 1896, kiijtok ya uan sekinok katli nojkia tlayakanayayaj amo kinekiyayaj ma kinuejkapantlalikaj. Nojkia amo kinekiyayaj ma kinuejkapantlalikaj ika se tokajyotl o sekinok ma kitekiuikaj inintoka uan kiampa ma kinixmatikaj. Teipa kiijtok: “Ni tekitl amo ininaxka tlakamej”.

10. 1) ¿Kema kitekimakakej nopa “tlalnamijkatlatekipanojketl”? 2) Xikixtoma kenijkatsa kiixtonkej nopa Sociedad Watch Tower amo sanse ika Katli kinyakanaj Jehová itlajtoltemakauaj.

¹⁰ Ipan 1919, kema pantoya eyi xiuitl ika miktoya toikni Russell, Jesús kitekimakak nopa “tlalnamijkatlatekipanojketl tlen nelia temachtli”. ¿Kenke kitekimakak? Pampa kiampa kinmakaskia itokilijkauaj nopa tlamachtili kema kinamikiskia (Mat. 24:45). Ipan nopa xiuitl, san se keskij toikniuaj katli kintlapejpenijtoyaj yasej iluikak kikualchijchiuayayaj tlamachtili tlen ika kinpaleuiyayaj Jesús itokilijkauaj, nopa tlakamej itstoyaj ipan Brooklyn (Nueva York). Ipan 1940, nopa tlajtoli “Katli kinyakanaj Jehová itlajtoltemakauaj” o “cuerpo gobernante” pejki moijkuiloua ipan amatlajkuiloli. Ipan nopa tonali moiljuiyayaj nopa tlajtoli kinixnextiyaya nochi katli tlayakanayayaj ipan Watch Tower Bible and Tract Society. Uan ipan 1971 kiixtonkej nopa tlajtoli Katli kinyakanaj Jehová itlajtoltemakauaj amo eliyaya sanse ika Sociedad Watch Tower. Nopa Sociedad Watch Tower san kitlachilia kenijkatsa mochiuas tlen tekichiuanij tlanauatiaj. Ipan nopa xiuitl, sekinok toikniuaj katli amo tlayakanayayaj ipan Sociedad Watch Tower nojkia elkej tlen Katli kinyakanaj Jehová itlajtoltemakauaj. Uan ipan ni tonali, ipan Sociedad Watch Tower uan ipan sekinok corporaciones nojkia tlayakanaj toikniuaj katli amo kintlapejpenijtokej yasej iluikak. Kiampa, Katli kinyakanaj Jehová itlajtoltemakauaj uelij mosentlaliaj kinyakanasej uan kinmachtisej katli itstokej ipan Jehová itlanechikol (Juan 10:16; Hech. 6:4). Ipan La Atalaya, julio 15, 2013, moixtonki Katli kinyakanaj Jehová itlajtoltemakauaj o nopa Cuerpo Gobernante eliyayaj nopa “tlalnamijkatlatekipanojketl tlen nelia temachtli”.

11. ¿Tlake kichiuaj Katli kinyakanaj Jehová itlajtoltemakauaj kema kitlapejpeniaj tlake uelis mochiuas ipan toTeotsij itlanechikol?

¹¹ Katli kinyakanaj Jehová itlajtoltemakauaj mosentiliaj sejse chikueyi uan kitlapejpeniaj tlake uelis mochiuas ipan toTeotsij itlanechikol. Uan pampa nochipa mosentiliaj, kinpaleuia kuali ma mouikakaj uan ma tekitikaj sansejko (Prov. 20:18). Uan amo san setsi toikni tlauel ipati uan sekinok amo, yeka sejse xiuitl kipatlatiauij katli kiyakana nopa tlanechikoli tlen kichiuaj sejse chikueyi. Kiampa ipan se xiuitl se toikni kiyakana nopa tlanechikoli, uan ipan seyok xiuitl, kiyakana seyok toikni (1 Ped. 5:1). Katli kinyakanaj Jehová itlajtoltemakauaj nojkia kiampa kichiuaj ika nopa chikuasej comités tlen onka. Yon se tlen nopa toikniuaj moiljuia san yaya tlayakana ipan se  comité o moneki kinnauatis toikniuaj. Sejse tlen nopa toikniuaj nojkia elij tlen nopa “sekinok ipan ichaj” o domésticos, yeka nojkia moneki ma kinmachtikaj. Sejse tlen nopa toikniuaj nojkia kichiuaj tlen kiijtoua nopa tlalnamijkatlatekipanojketl.

12. ¿Tlake tlajtlanili tijnankilisej?

¹² Katli kinyakanaj Jehová itlajtoltemakauaj nojkia tlajtlakolejkej, uan toTeotsij amo kinkamanaljuia o kiniljuijtia tlake moneki kichiuasej. Uelis kemantika mokuapolosej kema kiixtomasej se tlamachtili tlen Biblia o kema kiijtosej tlake moneki kichiuas toTeotsij itlanechikol. Ipan Índice de las publicaciones Watch Tower, kampa kiijtoua “Aclaración de creencias” nesi nochi tlamachtili tlen pejki moixtoma ipan 1870 uan nesi kenijkatsa kipatlatiualajtokej. Jesús amo kiijtok amo mokuapoloskia nopa tlalnamijkatlatekipanojketl kema techixtomiliskia tlamachtili. Uajka, ¿ajkia nopa “tlalnamijkatlatekipanojketl tlen nelia temachtli” katli Jesús kiijtok kitekimakaskia? (Mat. 24: 45). ¿Kenijkatsa tijmatij Katli kinyakanaj Jehová itlajtoltemakauaj inijuantij elij nopa tlalnamijkatlatekipanojketl tlen nelia temachtli? Ma tikitakaj kenijkatsa inijuantij nojkia kinpaleuijtokej sanse kej kinpaleuijkej katli kinyakanayayaj Cristo itokilijkauaj ipan achtoui siglo.

13. ¿Kenijkatsa toTeotsij itonal kinpaleuijtok Katli kinyakanaj Jehová itlajtoltemakauaj?

¹³ ToTeotsij itonal kinpaleuia Katli kinyakanaj Jehová itlajtoltemakauaj. ToTeotsij itonal kinpaleuijtok Katli kinyakanaj Jehová itlajtoltemakauaj kuali ma kikuamachilikaj se keski tlamachtili tlen achtouia amo kikuamachiliyayaj. Ma timoiljuikaj ipan nochi nopa tlamachtili tlen kipatlatiualajtokej. Iselti se maseuali amo ueltoskia kikuamachilis “nopa tlamantli tlen más ueyi” o tlamachtili tlen tlauel ouij (xijpoua 1 Corintios 2:10). Katli kinyakanaj Jehová itlajtoltemakauaj nojkia kiijtouaj kej Pablo: “Kema tikinkamauiaj, axtijtekiuiaj tlajtoli tlen uala ipan totlalnamikilis titlakamej, san tijtekiuiaj tlajtoli tlen itonal toTeko techmachtia” (1 Cor. 2:13). Religiones tlen amo melauak tlauel uejkajki kinkajkayajtoya maseualmej uan amo kema kuali kinyakanki. Uajka, ¿kenke ipan 1919 pejki kuali kikuamachiliaj miak tlamachtili uan ipan ni tonali nojua kuali tijkuamachilijtiauij? Kiampa panotok pampa Jehová kinpaleuijtok ika itonal.

14. Kej kiijtoua Apocalipsis 14:6, 7, ¿kenijkatsa iluikaeuanij kinpaleuiaj Katli kinyakanaj Jehová itlajtoltemakauaj, uan kenijkatsa techpaleuiaj tojuantij?

¹⁴ Iluikaeuanij kinpaleuiaj Katli kinyakanaj Jehová itlajtoltemakauaj. Toikniuaj katli kiyakanaj toTeotsij itlanechikol kiyakanaj nopa tlajtolmoyaualistli ipan nochi Tlaltipaktli, uan moneki kinpaleuisej kipano ocho millones toikniuaj ma kimatikaj kanke uelis tlajtolmoyauasej. ¿Kenke kuali kisa tlen kichiuaj? Pampa iluikaeuanij kinpaleuiaj (xijpoua Apocalipsis 14:6, 7). Kemantika, iluikaeuanij kinyakantokej tlajtolmoyauanij ma kipantikaj se maseuali katli momaijtok pampa kinekiyaya toTeotsij ma kipaleui. * Maske kanajya maseualmej tlauel kualanij uan amo techkauaj ma titlajtolmoyauakaj uan ma titlamachtikaj, tojuantij nojua tijchiuaj nopa tekitl. Ni ueli tijchiuaj pampa iluikaeuanij nojkia techpaleuiaj.

15. ¿Kenke Katli kinyakanaj Jehová itlajtoltemakauaj amo sanse kej katli tlayakanaj ipan religiones? Xikijto se neskayotl.

¹⁵ ToTeotsij iTlajtol kinpaleuia Katli kinyakanaj Jehová itlajtoltemakauaj (xijpoua Juan 17:17). Ma timoiljuikaj tlen panok ipan 1973. Ipan La Atalaya, octubre 15, ualayaya ni tlajtlanili: “¿Uelis moatsonpoliuiltisej maseualmej katli nojua tlachichinaj?”. Pampa kuali kiitstoyaj tlake kiijtoua Biblia, kiijtojkej amo ueliskiaj moatsonpoliuiltisej. Nopa pilamochtsi kitekiuik miak textos kampa kiijtouayaya kenke monekiyaya kikixtisej tlen tlanechikoli se akajya katli nojua tlachichinaskia (1 Cor. 5:7; 2 Cor. 7:1). Nopa pilamochtsi kiijtok tlen kichiuaskiaj amo eliyaya maseualmej inintlalnamikilis, eliyaya “toTeotsij itlalnamikilis tlen ijkuilijtok ipan iTlajtol”. San Jehová itlajtoltemakauaj kinekij kichiuasej tlen Biblia tlamachtia. Namanok, se amochtli kiijtok tlake kichiuaj religiones ipan Estados Unidos: “Katli tlayakanaj ipan religiones nochipa kiitaj tlake tlamachtiaj, kiampa uelis kipatlasej ika seyok tlamachtili tlen kinpaktis uan kinyoltilanas maseualmej”. Katli kinyakanaj Jehová itlajtoltemakauaj amo kipatlaj se tlamachtili san pampa ya nopa kinpaktia maseualmej, inijuantij kichiuaj san tlen tlamachtia Biblia. Ni kinextia Jehová nelia kinyakana itekipanojkauaj ipan ni tonali.

16. ¿Kenijkatsa uelis tijnextisej ‘tikinilnamikij katli techyakanaj’?

¹⁶ (Xijpoua Hebreos 13:7). Biblia kiijtoua moneki ‘tikinilnamikisej katli techyakanaj’. Ni uelis tijchiuasej kema timomaijtosej uan tikiljuisej toTeotsij ma kinpaleui (Efes. 6:18). Inijuantij tlauel miak tekitl kipiaj: techmakaj tlamachtili, techyakanaj ipan tlajtolmoyaualistli, kiitaj kenijkatsa kinamiki motekiuis tomij tlen temakaj ipan toTeotsij itlanechikol uan sekinok tekitl. Yeka, tlauel moneki tikiljuisej Jehová ma kinpaleui kema timomaijtosej.

17, 18. 1) ¿Kenijkatsa tijnextiaj tikinpaleuiaj toikniuaj katli kiyakanaj Jehová itlanechikol? 2) ¿Kenke kinamiki tijchiuasej kampeka titlajtolmoyauasej ika nochi toyolo?

¹⁷ Nojkia tijnextiaj tikinilnamikij toikniuaj katli kiyakanaj Jehová itlanechikol kema tijchiuaj tlen techiljuiaj uan kema tijkauaj ma techyakanakaj. Inijuantij techyakanaj ika nopa amatlajkuiloli tlen techmakaj, ika tlen techmachtiaj ipan tlanechikoli uan ipan uejueyi tlanechikolistli. Nojkia kintekimakaj toikniuaj katli tepaxalouaj chijchikuasej metstli, uan ni toikniuaj nojkia kintekimakaj ueuejtlakamej ipan tlanechikoli. Ueuejtlakamej uan toikniuaj katli tepaxalouaj kinextiaj kinilnamikij toikniuaj katli kiyakanaj Jehová itlanechikol kema kichiuaj tlen inijuantij kiijtouaj. Uan nochi tojuantij tijnextiaj tijtlepanitaj Jesús kema tikintlepanitaj toikniuaj katli ya kintlapejpenijtok ma techyakanakaj ipan ni tonali (Heb. 13:17).

¹⁸ Nojkia tijnextiaj tikinilnamikij Katli kinyakanaj Jehová itlajtoltemakauaj kema tijchiuaj kampeka titlajtolmoyauasej. Hebreos 13:7 techiljuia moneki titlaneltokasej kej inijuantij tlaneltokaj. Katli kinyakanaj Jehová itlajtoltemakauaj kinextiaj kuali tlaneltokaj kema tlajtolmoyauaj ika nochi ininyolo uan kema kinyololiniaj nochi toikniuaj nojkia kiampa ma kichiuakaj. ¿Tikinpaleuiaj nopa toikniuaj ipan ni tekitl tlen tlauel ipati? Tlaj tijchiuasej, tlauel tiyolpakisej kema Jesús techiljuis: “Nelia niinmechiljuia, kema inkipaleuiyayaj se tlen ni noikniuaj tlen teikneltsitsij, nikitak keja eliskia para na innechpaleuiyayaj” (Mat. 25:34-40).

19. ¿Kenke timosentlalijtokej tijtokilisej toTlayakanka Jesús?

¹⁹ Kema Jesús tlakuepilik iluikak, amo san kej ueli kinkajki itokilijkauaj (Mat. 28:20, TNM). Ya kimajtoya toTeotsij itonal, iluikaeuanij uan toTeotsij iTlajtol kipaleuijtoyaj ma kinyakana itokilijkauaj kema itstoya ipan Tlaltipaktli. Uan ipan ni tonali ya nojkia kiampa kipaleuia nopa tlalnamijkatlatekipanojketl. Katli kinyakanaj Jehová itlajtoltemakauaj “kitokiliaj nopa Pilborregojtsi [Jesús] kampa ueli kampa yaui” (Apoc. 14:4). Yeka, kema tijkauaj ma techyakanakaj nopa toikniuaj, tijnextiaj tijkauaj ma techyakana toTlayakanka Jesús. Ya nechka “[tech]uikas amelko kampa meya atl tlen yoltok” uan kiampa uelis tiitstosej nochipa (Apoc. 7:14-17). ¡Yon se maseuali uelis techmakas nopa tlamantli!