1. ¿Tlake tijselisej pampa toTeotsij temaktilik iKone?

JESÚS imikilis kichiua ma tijselikaj miak tlateochiualistli. Pampa toTeotsij temaktilik iKone, nochi maseualmej katli kichiuaj tlen xitlauak uelis motemachisej se tonali Jehová uelis kinitas kej ikoneuaj. Uan nojkia uelis motemachisej ayokmo kema mikisej uan nochipa itstosej ika pakilistli. Jesús imikilis amo san ya nopa kiijtosneki, nojkia kichiua ma mosenkaua se keski tlamantli ipan iluikaktli uan ipan Tlaltipaktli (Heb. 1:8, 9).

2. 1) ¿Tlake tlamantli tlen tlauel ipati kiijtok Jesús kema kinmachtik itokilijkauaj kenijkatsa momaijtosej? (Xikita nopa achtoui tlaixkopinkayotl). 2) ¿Tlake tikitasej ipan ni tlamachtili?

² Uelis kema poliuiyaya ome xiuitl ika kimiktiskiaj Jesús, ya kinnextilik itokilijkauaj kenijkatsa momaijtoskiaj, kiniljuik: “Uajka kema inmomaijtosej ipan toTeko, xikiljuikaj kej ni: ‘ToTeko toTata tlen tiitstok nepa iluikak. Nochi tlakamej ma kiueyichiuakaj motoka. Xiuala, xitlanauatiki nikaj. Ma [mochiua] mopakilis [...] ipan ni Tlaltipaktli keja mochijtok nepa iluikak” (Mat. 6:9, 10). Ipan ni tlamachtili tikitasej kenijkatsa Jesús imikilis kichiua 1) ma moueyichiua toTeotsij itoka, 2) ma onka se Tlanauatijkayotl uan 3) ma mochiua tlen toTeotsij kineki.

3. 1) ¿Tlake kinextia toTeotsij itoka? 2) ¿Kenijkatsa Satanás kejuak kisokiuik toTeotsij itoka?

³ Kema Jesús momaijtok, achtoui kiijtok ma moueyichiua toTeotsij itoka, o ma kitlepanitakaj itoka pampa eli tlatsejtseloltik. Nopa tokajyotl kinextia kenijkatsa eli Jehová uan ajkia ya. San ya tlauel Kipia miak chikaualistli uan san ya kichiua tlen xitlauak. Jesús kiijtok iTata eliyaya Jehová “tlen tlatsejtseloltik” (Juan 17:11). Jehová tlauel tlatsejtseloltik, yeka nochi tlen kichiua uan tlen kiijtoua nojkia eli tlatsejtseloltik, kej itlanauatiljuaj. Ipan Edén, Satanás kiijtok toTeotsij amo kinamikiyaya kinnauatis maseualmej. Kiistlakauik uan kejuak kisokiuik itoka pampa kiijilnamijki (Gén. 3:1-5).

4. ¿Kenijkatsa Jesús kiueyichijki toTeotsij itoka?

⁴ Jesús amo kichijki kej Satanás, pampa ya nelia kiikneliyaya Jehová. Yeka tlauel kichijki kampeka kitlepanitas uan kiueyichiuas toTeotsij itoka (Juan 17:25, 26 TNM). ¿Kenijkatsa kichijki? Jesús kiueyichijki toTeotsij itoka ika tlen tlamachtik uan ika tlen kichijki. Kiampa kinpaleuik sekinok ma kikuamachilikaj tlen Jehová tlanauatia nelia xitlauak uan kinextik tlauel kuali tiitstosej tlaj tijneltokasej (xijpoua Salmo 40:8-10). Maske Satanás kichijki tlauel ma kitlaijiyouiltikaj kema kimiktijkej, Jesús amo kema kitlauelkajki Jehová. Kiampa kinextik se tlakatl katli amo tlajtlakole kena uelis kineltokas nochi tlen Jehová tlanauatia.

5. ¿Kenijkatsa uelis tijueyichiuasej toTeotsij itoka?

⁵ ¿Kenijkatsa tijnextiaj tijueyichiuaj uan tijtlepanitaj toTeotsij itoka? Jehová kineki ma ‘tiitstokaj titlatsejtseloltikej’, yeka ika nochi tlen tijchiuasej uelis tijnextisej tijueyichiuaj itoka (xijpoua 1 Pedro 1:15, 16). San Jehová tijueyichiuaj uan tijneltokaj ika nochi toyolo. Maske sekinok techtlatsakuiltiaj, tojuantij tijchiuaj kampeka timonejnemiltisej kej technauatia. Uajka, kema tijneltokaj, tijueyichiuaj itoka (Mat. 5:14-16). Uan nojkia tijnextiaj Jehová itlanauatiljuaj tlauel techpaleuia uan tijnextiaj Satanás san se istlakatiketl. Maske timokuapolouaj pampa titlajtlakolejkej, tojuantij timoyolkuepaj uan tijchiuaj kampeka ayokmo tijchiuasej yon se tlamantli tlen ueliskia kisokiuis toTeotsij itoka (Sal. 79:9).

6. ¿Kenke Jehová ueli techita kej tixitlauakej maske titlajtlakolejkej?

⁶ Tlaj timotemachiaj tiitstosej iluikak o ipan Tlaltipaktli, Jehová techtlapojpoljuis tlaj titlaneltokasej ipan Jesús imikilis. ToTeotsij kinselia nochi katli kinekij kimaktilisej ininnemilis uan kinkaua ma kiueyichiuakaj. Katli kintlapejpenijtok kinita xitlauakej uan kinselia kej ikoneuaj. Nojkia kinita xitlauakej nopa “sekinok tlakamej” uan kinselia kej iuampoyouaj (Juan 10:16; Rom. 5:1, 2; Sant. 2:21-25). Pampa Jesús temaktilik inemilis, ipan ni tonali tiuelij timouampojchiuaj iuaya toTeotsij uan tijueyichiuaj itoka.

7. ¿Tlake tlateochiualistli techmakas toTeotsij ipan iTlanauatijkayo pampa Jesús temakak inemilis?

⁷ Ipan nopa tlamaijtoli tlen Jesús kichijki nojkia kiijtok: “Xiuala, xitlanauatiki nikaj”. ¿Kenijkatsa Jesús imikilis kichiua ma onka se Tlanauatijkayotl? Nama tijmatij ipan toTeotsij iTlanauatijkayo tekichiuasej Jesús uan nopa 144,000 maseualmej katli kintlapejpenijtokej. Imikilis Jesús kichiua nopa maseualmej ma moyolkuikaj uan ma itstokaj iluikak (Apoc. [Rev.] 5:9, 10; 14:1). Inijuantij elisej tlanauatianij uan sacerdotes, uan iuaya Jesús kinauatisej Tlaltipaktli mil xiuitl. Ipan nochi nopa xiuitl, ika nopa Tlanauatijkayotl Jehová kichiuas Tlaltipaktli ma eli se xochimili uan  kinpaleuis maseualmej ayokmo ma elikaj tlajtlakolejkej. Kiampa nochi itekipanojkauaj katli itstosej ipan iluikak uan ipan Tlaltipaktli elisej Jehová ichampoyouaj (Apoc. 5:13; 20:6). Jesús kitsontlamiltis Satanás uan kitlamiltis nochi tlen amo kuali (Gén. 3:15, TNM).

8. 1) ¿Kenijkatsa Jesús kinpaleuik itokilijkauaj ma kikuamachilikaj kenke tlauel ipati nopa toTeotsij iTlanauatijkayo? 2) ¿Kenijkatsa tijnextiaj tijpaleuiaj toTeotsij iTlanauatijkayo?

⁸ Jesús kinpaleuik itokilijkauaj ma kikuamachilikaj kenke tlauel ipati nopa toTeotsij iTlanauatijkayo. ¿Kenijkatsa kichijki? Kema moatsonpoliuiltik, nimantsi pejki tlamachtia “nopa kuali tlajtoli tlen toTeotsij iTlanauatijkayo” ipan miak altepemej (Luc. 4:43, TNM). Uan kiniljuik itokilijkauaj monekiyaya tlajtolmoyauatij “kampa más uejuejka pilaltepetsitsij ipan ni Tlaltipaktli” (Hech. 1:6-8). Ipan ni tonali miakej maseualmej uelis kikuamachilisej kenijkatsa kinpaleuia Cristo imikilis uan kiampa itstosej kema tekichijtos toTeotsij iTlanauatijkayo. Tojuantij tijnextiaj tijpaleuiaj ika nochi toyolo nopa tlanauatijkayotl kema titlajtolmoyauaj ipan nochi Tlaltipaktli, kiampa tikinpaleuiaj katli kintlapejpenijtokej ma kichiuakaj nopa tekitl tlen kinmakatokej (Mat. 24:14; 25:40).

9. ¿Kenke temachtli tijmatij mochiuas tlen toTeotsij mosentlalijtok?

⁹ ¿Uan tlake kinekiyaya kiijtos Jesús kema kiijtok: “Ma [mochiua] mopakilis”? Kema Jehová kiijtoua mochiuas o panos se tlenijki, temachtli kiampa panos (Is. 55:11). Maske Satanás tlaijixnamijki, Jehová amo kipatlatok tlen kiijtok kichiuas. ¿Tlake kinekiyaya kichiuas? Kinekiyaya Adán uan Eva ininkoneuaj, katli amo eliskiaj tlajtlakolejkej, ma kitemitikaj Tlaltipaktli (Gén. 1:28). Tlaj Adán uan Eva miktoskiaj uan amo kinpixtoskiaj ininkoneuaj, tlen Jehová mosentlalijtoya amo mochiuaskia. Yeka Jehová kinkajki ma konepiakaj. Uan Cristo imikilis kichiua nochi maseualmej katli tlaneltokasej ayokmo ma elikaj tlajtlakolejkej uan ma itstokaj nochipa. Jehová tlauel kiniknelia maseualmej uan kineki nochi ma tiitstokaj nochipa kej uejkajkia mosentlalijtoya.

10. ¿Kenijkatsa Jesús imikilis kinpaleuis maseualmej katli miktokej?

¹⁰ ¿Tlake kinpanos nopa miakej maseualmej katli miktokej uan amo kiixmatkej Jehová? ToTeotsij kineki maseualmej ma itstokaj, yeka kinyolkuis katli miktokej. Uan nopa uelis kichiuas pampa Jesús motemaktilik. Kema moyolkuisej uelis kiixmatisej Jehová uan kitekipanosej, kiampa uelis itstosej nochipa (Hech. 24:15). Jehová elis inintata nochi katli moyolkuisej pampa yaya temaka nemilistli (Sal. 36:9). Yeka kema momaijtok, Jesús kiijtok Jehová yaya ‘toTata tlen itstok nepa iluikak’ (Mat. 6:9). ToTeotsij kinauatijtok Jesús ma kinyolkui katli miktokej. Yeka Jesús kiijtok: “Na tlen nikinyolitia tlakamej tlen miktokej uan sampa nikinmaka yolistli” (Juan 6:40, 44; 11:25).

11. ¿Tlake kineki toTeotsij?

¹¹ Jesús nojkia kiijtok: “Ajkeya kichiua tlen toTeko Dios kineki, yajaya nikita keja noikni uan nonana” (Mar. 3:35). ToTeotsij kineki miakej maseualmej katli euaj ipan miak altepemej uan katli kamanaltij miak “tlajtoli” ma kiueyichiuakaj. Inijuantij motemachiaj ipan Jesús imikilis uan kinekij kineltokasej Jehová. Tlauel kiueyichiuaj toTeotsij uan kiijtouaj: “Ya techmakixtijkej ni Pilborregojtsi uan toTeko Dios tlen moseuia ipan iueyi silla tlen yejyektsi” (Apoc. 7:9, 10).

12. ¿Tlake techmachtia nopa tlamaijtoli tlen Jesús kichijki?

¹² Nopa tlamaijtoli tlen Jesús kichijki techmachtia miak tlamantli, pampa tikixmatij  Jehová uan tikitaj kenijkatsa kineki ma itstokaj maseualmej. Ma tikitakaj san se keski. Se: nochi moneki tijchiuasej kampeka tijueyichiuasej uan tijtlepanitasej toTeotsij itoka (Is. 8:13). Jesús imikilis techpaleuia ma timomakixtikaj uan nojkia kiueyichiua toTeotsij itoka. Uan tlauel kuali Jesús itoka pampa kiijtosneki “Jehová yaya toTlamakixtijka”. Ome: ika iTlanauatijkayo, Jehová kinteochiuas maseualmej katli kineltokaj pampa Jesús motemaktilik. Uan eyi: amo tleno uelis kichiuas amo ma moaxiti tlen Jehová mosentlalia kichiuas (Sal. 135:6; Is. 46:9, 10).

13. ¿Kenke timoatsonpoliuiltiaj?

¹³ Tojuantij tijnextiaj tijtlaskamatiliaj Jehová pampa temaktilik iKone kema tijmaktiliaj tonemilis uan timoatsonpoliuiltiaj. Kiampa tijnextiaj titlaneltokaj ipan Jesús imikilis uan tijnextiaj “tiiaxkauaj toTeko” (Rom. 14:8). Uan kema timoatsonpoliuiltiaj, “tijtlajtlaniaj toTeko ma techyolpajpaka” o ma techpaleui tijpiasej kuali totlalnamikilis (1 Ped. 3:21). Uan ika nopa tlaxtlauili tlen temakak, Jehová tlauel techteochiua. Temachtli tijmatij Jehová nelia techmakas nochi tlen techtenkauilijtok (Rom. 8:32).

14. ¿Kenke Jehová technauatia ma tikiniknelikaj sekinok?

¹⁴ Jehová nelia tlauel teiknelia, yeka kichiua miak tlamantli, uan kineki nochi katli kitekipanouaj nojkia ma kichiuakaj kej ya uan ma moiknelijtokaj (1 Juan 4:8-11). Kema tlauel tikinikneliaj maseualmej tijnextiaj tijnekij tielisej “ikoneuaj toTeko [to]Tata tlen itstok iluikak” (Mat. 5:43-48). Biblia kiijtoua moneki tikiknelisej Jehová, ya nopa tlanauatili tlen nelia tlauel ipati. Uan nopa seyok tlanauatili kiijtoua moneki tikiniknelisej sekinok (Mat. 22:37-40). Uelis tijnextisej tikinikneliaj maseualmej tlaj tikiniljuisej nopa kuali tlamachtili tlen toTeotsij iTlanauatijkayo. Tlaj tijneltokaj nopa tlanauatili uan tlauel tikinikneliaj toikniuaj, uan nojkia sekinok maseualmej, uajka nojua tlauel tikiknelisej Jehová (1 Juan 4:12, 20).

15. 1) ¿Tlake tlateochiualistli tijseliaj ipan ni tonali? 2) ¿Tlake tlateochiualistli tijselisej teipa?

¹⁵ Jehová techiljuia uelis techtlapojpoljuis totlajtlakoljuaj uan ayokmo kema kiilnamikis  tlaj titlaneltokaj ipan Jesús imikilis (xijpoua Hechos 3:19-21). Kej tikitakej, pampa temaktilik iKone, Jehová ueli kinselia se keskij maseualmej katli kintlapejpenijtok kej ikoneuaj uan kiampa itstotij ipan iluikak (Rom. 8:15-17). Uan kineki sekinok itekipanojkauaj ma itstokaj ipan Tlaltipaktli uan nojkia ma elikaj tlen ichampoyouaj. Kema ayokmo elisej tlajtlakolejkej, nojua monekis kinextisej tlaj nelia kineltokasej Jehová o amo. Tlaj amo kitlauelkauasej, uajka Jehová kinselis uan kinitas kej ikoneuaj (Rom. 8:20, 21; Apoc. 20:7-9). Jehová nochipa kiniknelis nochi ikoneuaj. Uan pampa iKone temaktilik inemilis, tojuantij nojua tijselijtosej miak tlateochiualistli (Heb. 9:12). Tlen Jehová techmakatok nelia tlauel kuali, uan amo aka uelis techkixtilis.

16. ¿Kenijkatsa techmakixtia Jesús imikilis?

¹⁶ Tlaj timoyolkuepaj, uelis tielisej tlen Jehová ichampoyouaj uan Diablo amo tleno uelis kichiuas. Jesús “motemaktilik san se uelta”, nopa kiijtosneki ayokmo moneki ma temakakaj seyok tlaxtlauili uan kiampa ma techmakixtikaj (Heb. 9:24-26). Adán techpanoltilik mikilistli, uan Jesús kichiuas ma tiitstokaj nochipa pampa motemaktilik. Imikilis uelis kinmakixtis nochi maseualmej uan uelis kinpaleuis ayokmo ma kimakasikaj mikilistli (Heb. 2:14, 15).

17. ¿Tlake tijyolmatij kema timoiljuiaj kenijkatsa Jehová tlauel techiknelia?

¹⁷ Uelis timotemachisej nochi tlen Jehová kitenkajtok nelia moaxitis. Uan kej se keski tlanauatili tlen kitlalijtok amo kema mopatla, ya nojkia amo kema mopatlas. Jehová amo kema techkajkayauas (Mal. 3:6). Uan amo san techmakas nemilistli, ipan ni tonali nojkia kinextia kenijkatsa tlauel techiknelia. “Tojuantij ya tikitstokej keja toTeko techiknelia uan ipan iteiknelijkayo tojuantij timotemachijtokej. ToTeko yajaya teiknelijkayotl” (1 Juan 4:16). Jehová nochipa kichiua tlen kitenkaua, yeka timotemachiaj Tlaltipaktli nelia mochiuas se yejyektsi xochimili. Uan nochi itekipanojkauaj katli itstosej ipan iluikaktli uan Tlaltipaktli kiueyichiuasej Jehová uan kiijtosej: “Ma tijpakilismakakaj uan ma tijueyichiuakaj toTeko Dios para nochipa uan axkema tlami. Ma tijnextilikaj nochi tlatlepanitakayotl, uan ma tijueyitlaskamati[kaj] para nochipa. San yajaya kipia nochi tlalnamikistli, uan nochi tekiuejkayotl, uan nochi chikaualistli, uan yajaya kipias para nochipa. Keja nopa ma eli” (Apoc. 7:12).