1, 2. 1) ¿Tlake techmatiltijtok Jehová? 2) ¿Tlake kitenkajtok toTeotsij ipan Isaías 46:10, 11 uan 55:11?

MASKE Biblia peua ika se keski tlajtoli tlen amo ouij tijkuamachiliaj, nelia tlauel ipati tlen kiijtoua: “Kema pejki nochi tlen onka, toTeko Dios kichijki iluikaktli uan Tlaltipaktli” (Gén. 1:1). ToTeotsij kichijchijtok tlauel miak tlamantli, uan tojuantij tikixmatij san se keski. Amo kuali tijmatij kenijkatsa eltok nochi tlen onka ipan iluikaktli, kenijkatsa mochiua tlauili uan kenke ipan Tlaltipaktli nochi tlamantli uetsi uan amo tleno mokaua ajakatipa (Ecl. 3:11). Maske amo tijmatij nopa, Jehová techmatiltijtok tlake mosentlalijtok kichiuas ipan Tlaltipaktli uan kenijkatsa kineki ma itstokaj maseualmej. Ya kinchijchijki maseualmej kej ‘itlachialis’ uan kinekiyaya nochipa ma yolpaktokaj (Gén. 1:26). Maseualmej eliskiaj ikoneuaj uan ya ininTata.

² Pilamochtsi Génesis, capítulo 3, kiijtoua panok se tlamantli tlen kichijki ayokmo ma mochiua tlen toTeotsij mosentlalijtoya (Gén. 3:1-7). Maske kiampa panok, toTeotsij uelis  kisenkauas tlen ueli kuesoli uan amo aka uelis kitsakuilis tlen kineki kichiuas (Is. 46:10, 11; 55:11). Yeka, uelis timotemachisej Jehová kimati kema kichiuas tlen mosentlalijtok.

3. 1) ¿Tlake tlamachtili tlen tlauel ipati kichiua ma tijkuamachilikaj tlen Biblia tlamachtia? 2) ¿Kenke tikixtomasej nopa tlamachtili tlen tlauel ipati? 3) ¿Tlake tlajtlanili tijnankilisej?

³ Tojuantij tijmatij tlake mosentlalijtok toTeotsij kichiuas ipan Tlaltipaktli uan kenijkatsa kineki ma itstokaj maseualmej. Nojkia tijmatij kenijkatsa Jesús tlapaleuia ma moaxiti tlen toTeotsij mosentlalijtok. Ni tlamachtili tlen namantsi tikijtojkej nelia tlauel ipati, uan yeka kema tijpeualtijkej timomachtiaj Biblia, achtoui tijyekojkej nopa tlamachtili. Nama tijnekij tikinpaleuisej sekinok nojkia ma kikuamachilikaj. Ipan ni xiuitl uelis tijchiuasej nopa kema tikintlaneuisej maseualmej nojkia ma kiilnamikikaj Cristo imikilis (Luc. 22:19, 20). Tlaj inijuantij mosentilisej touaya, uelis kimatisej tlake mosentlalijtok toTeotsij. Yeka kualtiaskia timoiljuisej tlake tlajtlanili uelis tijtekiuisej uan kiampa tikinyololinisej ma mosentilikaj touaya ipan nopa tonali. Ipan ni tlamachtili tijnankilisej eyi tlajtlanili: ¿Tlake mosentlalijtok toTeotsij kichiuas ipan Tlaltipaktli uan kenijkatsa kineki ma itstokaj maseualmej? ¿Kenke amo mochijtok? Uan, ¿kenke tlauel monekiyaya Jesús ma temaka inemilis?

4. ¿Kenijkatsa nochi tlen onka kiueyichiua toTeotsij?

⁴ Tlen Jehová kichijchiua nelia tlauel kuali uan yejyektsi (Gén. 1:31; Jer. 10:12). Nochi nopa yejyektsitsij tlamantli tlen kichijchijtok, kitlalijtok kampa kinamiki. ¿Tlake techmachtia pampa kiampa kichijtok? Techmachtia nochi tlen Jehová kichijchijtok tlauel techpaleuia, maske sekij tlauel pilsiltsitsij o tlauel uejueyi. ¿Tlake tijyolmati kema timoiljuia kenijkatsa tekitij nopa piltlamantsitsij tlen tijpiaj ipan totlakayo, kema tikita se pilkonetsi o kema tikita Tonati? Nochi tojuantij ueli tikitaj yejyektsitsij tlamantli tlen onka pampa Jehová kiampa techchijchijki (xijpoua Salmo 19:1; 104:24).

5. ¿Tlake kichijtok Jehová pampa kineki nochi tlen kichijchijtok kuali ma elto uan ma tekiti kej kinamiki?

⁵ Kema Jehová kichijchijki nochi tlen onka, kiijtok tlake kinamikiyaya kichiuas sejse tlamantli tlen kichijchijki. Kitlalik se keski tlanauatili tlen kichiuaskia kuali ma elto uan kuali ma tekiti nochi tlen onka. Uan maseualmej nojkia kinmakak tlanauatili tlen kiijtoua kenijkatsa kinamiki monejnemiltisej (Sal. 19:7-9). Jehová kitlalik kampa kinamiki nochi tlen onka ipan iluikaktli uan ipan Tlaltipaktli, uan sejse tlen nopa tlamantli kimati tlake tekitl moneki kichiuas. Ma timoiljuikaj ipan se tlamantli tlen kichiua amo tleno ma elto ajakaixko ipan Tlaltipaktli, nopa tlamantli kiiljuiaj gravedad. Ni kichiua ipan iluikaktli ma elto se tlenijki tlen kiiljuiaj atmósfera. Nopa tlamantli kiyaualojtok Tlaltipaktli uan amo kema kitlalkauia, uan kichiua nochi ueyi atl ma elto kampa kinamiki. Tlaj nopa gravedad amo eltoskia, amo onkaskia nemilistli ipan Tlaltipaktli. Uajka, nochi tlen onka ipan iluikaktli uan ipan Tlaltipaktli kuali tekiti pampa Jehová kiampa kinchijchijtok, yeka kejuak kimatij tlake uelis kichiuasej uan tlake amo. Ni kinextia Jehová amo san tlapik kichijchijki Tlaltipaktli  uan nojkia amo san tlapik kinchijchijki maseualmej. Kema tikinkamanaljuisej sekinok, uelis tikinpaleuisej ma kiixmatikaj katli kichijchijki nochi tlen onka (Apoc. [Rev.] 4:11).

6, 7. ¿Tlake tlamantli kinmakak toTeotsij Adán uan Eva?

⁶ Jehová mosentlalijtoya maseualmej ma itstokaj nochipa ipan Tlaltipaktli (Gén. 1:28; Sal. 37:29). Pampa teiknelia, kinmakak Adán uan Eva miak tlamantli tlen tlauel kuali (xijpoua Santiago 1:17). Ma timoiljuikaj ipan ni tlamantli, Jehová kinkajki inijuantij ma kitlapejpenikaj tlake kichiuaskiaj, ma mouampojchiuakaj ininuaya sekinok, ma teiknelikaj uan kinmakak inintlalnamikilis. Jehová kinojnotski Adán uan kiiljuik kenijkatsa kichiuaskia tlen kuali. Nojkia kinextilik kenijkatsa momokuitlauiskia, uan kenijkatsa kinmokuitlauiskia tlapialmej uan Tlaltipaktli (Gén. 2:15-17, 19, 20). Jehová kichijki Adán uan Eva ma tlachiakaj, ma tlakakikaj, ma tlaijitskikaj, ma tlaijnekuikaj uan ma kimatikaj ajuiyak o uelik tlen kikuaskiaj. Kiampa tlauel kuali itstoskiaj ipan Xochimili. Jehová nojkia kinmakak miak tekitl. Adán uan Eva nochipa kiyekoskiaj kenijkatsa kichiuasej se tlenijki uan kiixmatiskiaj sekinok tlamantli.

⁷ ¿Tlake nojkia kinekiyaya toTeotsij ma mochiua? Jehová kichijki Adán uan Eva ma konepiakaj uan ininkoneuaj nojkia ueliskiaj konepiasej. Kiampa maseualmej itstoskiaj ipan nochi Tlaltipaktli. Jehová kinekiyaya tetajmej ma kiniknelikaj ininkoneuaj kej ya kiniknelijtoya Adán uan Eva. ToTeotsij kinmakak maseualmej ni Tlaltipaktli uan nochi tlamantli yejyektsitsij tlen onka, uan inijuantij ueliskiaj nochipa itstosej (Sal. 115:16).

8. ¿Kenke Jehová kinnauatik Adán uan Eva tlen ijkuilijtok ipan Génesis 2:16, 17?

⁸ ¿Kenke amo moaxitik tlen toTeotsij mosentlalijtoya? Jehová kinmakak Adán uan Eva se tlanauatili tlen kinextiskia onkayaya se keski tlamantli tlen amo kinamikiyaya kichiuasej. Kiijtok: “Uelis tijkuas itlajka tlen ueli kuauitl ipan ni xochimili, pero ne kuauitl tlen itoka ‘kuauitl tlen temachiltia tlen kuali uan tlen axkuali’, axtle. Amo xijkua itlajka, pampa ipan nopa tonal kema tijkuas itlajka, melauak timikis” (Gén. 2:16, 17). Inijuantij kuali kikuamachilijkej tlen kinnauatijtoyaj uan amo ouij kineltokaskiaj, pampa kampa itstoyaj onkayaya miak tlakualistli.

9, 10. 1) ¿Kenijkatsa Satanás kiistlakauik Jehová? 2) ¿Tlake kichijkej Adán uan Eva? (Xikita nopa achtoui tlaixkopinkayotl).

⁹ Ika se kouatl, Satanás kikajkayajki Eva uan kichijki amo ma kineltoka Jehová (xijpoua Génesis 3:1-5; Apoc. 12:9). Satanás kichijki ma moiljuikaj toTeotsij amo kinamikiyaya kiniljuis amo ma kikuakaj “itlajka niyon se kuauitl”. Kejuak kiniljuik: “¿Kenke inmojuantij amo uelis inkichiuasej nochi tlen inkinekij?”. Teipa kikajkayajki Eva kema kiiljuik: “Axneli, axinmikisej”. Uan kichijki ma moiljui amo kinamikiyaya kineltokas toTeotsij. Kiiljuik: “Kuali kimati Dios intla inkikuasej itlajka nopa kuauitl elis keja inmechtlapouilis inmoixtiyol uan inmotlalnamikilis”. Kiampa kiistlakauik Jehová uan kiijtok amo kinekiyaya Adán uan Eva ma kikuakaj nopa kuauitl itlajka tlen kichiuaskia tlauel ma tlalnamikikaj. Teipa, Satanás kiiljuik ni: “Inkimatisej tlen kuali uan tlen axkuali. Keja nopa inelisej keja ya”.

 ¹⁰ Adán uan Eva monekiyaya kitlapejpenisej tlake kichiuaskiaj. ¿Kineltokaskiaj toTeotsij, o kichiuaskiaj tlen kiniljuik nopa kouatl? Inijuantij amo kineltokakej toTeotsij uan ayokmo kinejkej ma eli ininTata. Kiampa kinextijkej kipaleuiyayaj Satanás. Kema tlaixpanokej, Jehová ayokmo kinmokuitlauik (Gén. 3:6-13).

11. ¿Kenke Jehová kintlatsakuiltik Adán uan Eva?

¹¹ Kema Adán uan Eva amo kineltokakej Jehová, ayokmo elkej xitlauakej. Nojkia mochijkej toTeotsij ininkualankaitaka pampa ya kikualankaita tlen amo kuali. Biblia kiijtoua toTeotsij ‘senkistok tlapajpaktik uan axkineki kiitas tlen axkuali’ (Hab. 1:13). Tlaj Jehová amo tleno kichijtoskia kema kiixpanokej, uajka nochi sekinok ayokmo kuali itstoskiaj. Uelis iluikaeuanij uan maseualmej ayokmo motemachiskiaj ipan tlen Jehová kiijtoskia. Yeka toTeotsij kichijki tlen kiijtojtoya pampa ya amo kema kiixpano tlen kiijtoua (Sal. 119:142). Maske Adán uan Eva ininselti kitlapejpeniyayaj tlake kichiuaskiaj, inijuantij tlaijiyouijkej pampa kiixpanokej Jehová. Teipa mijkej uan sampa mokuepkej tlali (Gén. 3:19).

12. ¿Tlake kinpanok Adán ikoneuaj?

¹² Kema Adán uan Eva kikuajkej nopa kuauitl itlajka, Jehová ayokmo kinitak kej ikoneuaj, yeka kinkixtik tlen nopa xochimili uan amo kinkajki ma tlakuepilikaj (Gén. 3:23, 24). Jehová kinkajki ma tlaijiyouikaj pampa kiixpanokej (xijpoua Deuteronomio 32:4, 5). Uan ayokmo uelkej kinextiaj ipan ininnemilis nopa kuajkuali tlamantli tlen Jehová kinextia. Ininkoneuaj nojkia ayokmo kuali itstoskiaj, pampa san kinpanoltilik tlajtlakoli uan mikilistli (Rom. 5:12). Uajka, pampa Adán uan Eva tlaixpanokej, ininkoneuaj ayokmo ueliskiaj itstosej nochipa. Kema tlakatkej, amo eliyayaj xitlauakej, yeka nochi katli tlakatiskiaj nojkia eliskiaj tlajtlakolejkej. Satanás kichijki Adán uan Eva ma kiixpanokaj toTeotsij, uan ipan ni tonali nojkia kiampa kineki ma tijchiuakaj (Juan 8:44).

13. ¿Tlake nojua kinekiyaya Jehová?

¹³ Maske Adán uan Eva kitlauelkajkej Jehová, ya nojua kiniknelik maseualmej. Kinekiyaya kuali ma mouikakaj iuaya uan amo ma mikikaj (2 Ped. 3:9). Yeka nimantsi kichijki tlen monekiyaya uan kiampa maseualmej ueliskiaj mouampojchiuasej iuaya. ¿Kenijkatsa kichijki tlaj ya amo kema kiixpano itlanauatiljuaj? Ma tikitakaj.

14. 1) Kej kiijtoua Juan 3:16, ¿tlake kichijki toTeotsij pampa kinejki techmakixtis tlen tlajtlakoli uan mikilistli? 2) ¿Tlake tlajtlanili uelis tikinpaleuisej maseualmej ma kinankilikaj?

¹⁴ (Xijpoua Juan 3:16). Maske nopa maseualmej katli tikintlaneuisej uelis kuali kitsontekontlalijtokej ni texto, ¿kimatij kenke Cristo imikilis uelis kichiuas ma tiitstokaj  nochipa? Uelis tikinpaleuisej ma kinankilikaj ni tlajtlanili kema tikintlaneuisej, kema tiitstosej ininuaya ipan nopa tonali kema moilnamiktos Cristo imikilis o kema sampa tikinpaxalosej. Tlaj kikuamachilisej kenijkatsa techpaleuia Cristo imikilis, kiitasej kenijkatsa Jehová tlauel tlalnamiki uan tlauel techiknelia. ¿Tlake tlamantli uelis tikinixtomilisej?

15. ¿Kenke Jesús amo elki sanse kej Adán?

¹⁵ Jehová temaktilik se tlakatl katli eliyaya xitlauak pampa kinejki techmakixtis. Nopa tlakatl monekiyaya amo kitlauelkauas Jehová, uan nojkia monekiyaya kinekis temakas inemilis (Rom. 5:17-19). Jehová kitlapejpenik Jesús, katli achtoui kichijchijki, uan kichijki ma tlakatiki ipan Tlaltipaktli (Juan 1:14). Kiampa Jesús eliskia xitlauak, kej Adán eliyaya. Ya amo kichijki kej Adán pampa nochipa kineltokak tlen kinauatijkej, kej monekiyaya kichiuas se tlakatl tlen xitlauak. Maske tlauel tlaijiyouik, nochipa kineltokak toTeotsij.

16. ¿Kenke tlauel ipati Jesús imikilis?

¹⁶ Pampa Jesús motemaktilik, uelis timomakixtisej tlen tlajtlakoli uan mikilistli. Kej Adán kinamikiyaya kichiuas, ya elki se tlakatl katli amo kema kitlauelkajki toTeotsij uan nochipa kineltokak (1 Tim. 2:6). Pampa motemaktilik, nama nochi tlakamej, siuamej uan konemej uelis motemachisej itstosej nochipa (Mat. 20:28). Uajka, Jesús imikilis nelia tlauel ipati, pampa kiampa moaxitis tlen toTeotsij mosentlalijtok (2 Cor. 1:19, 20).

17. ¿Kenijkatsa techpaleuia Cristo imikilis?

¹⁷ Jehová “tlaxtlajki” ika se tlamantli tlen tlauel ipati pampa kinejki techmakixtis  (1 Ped. 1:19). Ya kinextik tlauel techpatiita kema kikajki iKone, katli tlauel kiiknelia, ma temaktili inemilis (1 Juan 4:9, 10). Jesús kipatlak Adán uan yeka nama yaya elki kejuak totata (1 Cor. 15:45). Jesús imikilis kichiua ma timotemachikaj uelis tiitstosej nochipa uan nojkia sampa tielisej tlen Jehová ichampoyouaj. Teipa ayokmo tielisej titlajtlakolejkej, yeka Jehová amo kiixpanos itlanauatiljuaj kema techkauas ma tielikaj tlen ichampoyouaj. Nochi ni uelis mochiuas pampa Jesús motemaktilik. ¡Nelia tlauel kuali tiitstosej kema nochi katli amo tijtlauelkauaj toTeotsij tielisej tixitlauakej! Nochi katli itstosej ipan iluikaktli uan ipan Tlaltipaktli tielisej tlen Jehová ichampoyouaj, pampa nochi tielisej tiikoneuaj (Rom. 8:21).

18. ¿Kema Jehová “kipias nochi tlanauatili ika nochi tlen onka”?

¹⁸ Maske Adán uan Eva kitlauelkajkej Jehová, ya nojua kiniknelik maseualmej. Yeka temaktilik iKone pampa kinejki kinmakixtis. Maske titlajtlakolejkej, Satanás amo uelis techchiualtis ma tijtlauelkauakaj Jehová. Ika nopa tlaxtlauili tlen Jehová temakak, techpaleuis ma tielikaj tixitlauakej. ¡Nelia tlauel kuali kema nochi maseualmej katli tlaneltokasej ipan Jesús uelis itstosej nochipa! (Juan 6:40). ToTata Jehová, katli tlauel techiknelia uan tlalnamiki, kichiuas tlen mosentlalijtok uan kinpaleuis maseualmej ayokmo ma elikaj tlajtlakolejkej. Kiampa toTeotsij “kipias nochi tlanauatili ika nochi tlen onka” (1 Cor. 15:28).

19. 1) ¿Tlake tijchiuasej tlaj tijtlaskamatij Jesús imikilis? (Xikita nopa recuadro  “Nojua ma tikintemokaj katli kuali ininyolo”). 2) ¿Tlake tikixtomasej ipan nopa seyok tlamachtili?

¹⁹ Tlaj nelia tijtlaskamatij Jesús imikilis, uajka nojkia tikiniljuisej sekinok kenijkatsa techpaleuia. Maseualmej moneki kimatisej Jehová kineki ma tiitstokaj nochipa uan yeka temakak nopa tlaxtlauili. Nopa tlaxtlauili amo san kichiuas ma tiitstokaj nochipa, nojkia kinextis tlen Satanás kiijtok ipan Xochimili Edén amo nelia. Ni tikixtomasej ipan nopa seyok tlamachtili.