1. ¿Tlake kinamiki motlatsintokis se tosiuaikni tlaj kineki monamiktis?

NOCHI Cristo itokilijkauaj techyakana Jesús, katli amo tlajtlakole. Kema se tosiuaikni monamiktia nama iueue kiyakana, katli tlajtlakole, uan yeka uelis kemantika ouij kimati. Tlaj se tosiuaikni kineki monamiktis moneki motlatsintokis: “¿Kenijkatsa nijmati tlaj ni toikni nelia kuali nechyakanas? ¿Kiachtouitlalia kitekipanos Jehová? Tlaj amo, ¿nechpaleuis nojua ma nimouampojchijto iuaya Jehová?”. Nojkia, moneki motlatsintokis: “¿Tlake kuajkuali tlamantli tlen nijnextia nechpaleuis kema nimonamiktis? ¿Nijpia noyolo uan nechpaktia nitemakas tlen nijpia? ¿Kuali nimouampojchijtok iuaya Jehová?” (Ecl. 4:9, 12). Se tosiuaikni moneki kuali kitlapejpenis tlen kichiuas kema ayamo monamiktia, kiampa kema monamiktis itstos ika pakilistli.

2. ¿Tlake tikitasej ipan ni tlamachtili?

² Tlauel miakej tosiuaikniuaj kinextiaj se kuali neskayotl pampa kintlepanitaj ininueue. Tlauel tiyolpakij titlatekipanosej ininuaya uan yeka tikintlaskamatiliaj pampa amo tetlauelkauaj. Ipan ni tlamachtili tijnankilisej eyi tlajtlanili: 1) ¿Tlake tlamantli kiixnamikij tosiuaikniuaj katli monamiktijtokej? 2) ¿Kenke tosiuaikniuaj kikauaj ma kinyakana ininueue? 3) ¿Tlake uelis kiyekosej katli mosenkajtokej tlen Jesús, Abigail uan María, inana Jesús?

3. ¿Kenke nochi katli mosenkajtokej kipiaj tlaouijkayotl?

³ ToTeotsij kichijki se tlakatl uan se siuatl ma mosenkauakaj, uan ni eli se nemaktli. Maske kiampa kichijki, nochi titlajtlakolejkej (1 Juan 1:8). Yeka, Biblia kiijtoua katli mosenkajtokej “kipiasej más kuesoli” (1 Cor. 7:28). Ma tikitakaj se keski tlamantli tlen kiixnamiki se tosiuaikni katli monamiktijtok.

4. ¿Kenke se siuatl uelis moiljuis tlaj kitlepanitas iueue ayokmo kipatiitasej?

⁴ Kej kiiskaltijkej se siuatl uelis moiljuis ayokmo kipatiitasej tlaj kitlepanitas iueue. Marisol katli eua Estados Unidos kiijtoua: “Kampa nieua nochipa kiijtouayayaj nojkia tijpiaj tlanauatili kej tlakamej. Nijmati Jehová kitlalijtok se akajya katli techyakanas, uan tisiuamej nojkia tijpiaj se tekitl tlen Jehová techmakatok. Kemantika nijmati ouij nijchiuas tlen Jehová nechnauatia pampa maseualmej kiijtouaj amo kenijki tlaj amo nijtlepanitas noueue”.

5. ¿Tlake tlamantli tlen amo kinamiki moiljuiaj se keskij tlakamej tlen siuamej?

⁵ Nojkia, kemantika se siuatl uelis monamiktijtok iuaya se tlakatl katli moiljuia siuamej amo tlauel ininpati. Se tosiuaikni tlen Sudamérica katli itoka Ivón, kiijtoua: “Kampa nieua tlakamej achtoui tlakuaj uan teipa siuamej. Kema nojua siuapilmej kinmachtiaj ma tlakualchiuakaj uan ma tlachpanakaj, uan okichpilmej san kichiaj ininnana o ininsiuaikniuaj ma kintlamakakaj, uan kiniljuiaj inijuantij amo tleno ma kichiuakaj pampa ‘elij tlakamej’”. Seyok tosiuaikni tlen Asia katli itoka Yingling, kiijtoua: “Ipan tlajtoli chino maseualmej kiijtouaj se siuatl amo moneki tlauel tlalnamikis yon kimatis kichiuas miak tlamantli. Se siuatl san moneki kichiuas nochi tekitl tlen onka ipan ichaj uan amo kema kiiljuis iueue tlen moneki kichiuas”. Kema se toikni kichiua kej maseualmej moiljuiaj, kiixpano tlen Biblia kiijtoua, kichiua isiua amo ma yolpaki, amo kichiua kej Jesús uan kiyolkokoua Jehová (Efes. 5:28, 29; 1 Ped. 3:7).

6. ¿Tlake moneki kichiuasej siuamej uan kiampa kuali mouampojchiuasej iuaya Jehová?

⁶ Kej tikitakej ipan tlamachtili 5, Jehová kineki tlakamej ma kinpaleuikaj ininchampoyouaj kuali ma tlaneltokakaj, kuali ma kiyolmatikaj uan ma kinmakakaj tlen moneki (1 Tim. 5:8). Uan maske tosiuaikniuaj kipiaj miak tekitl, moneki kikauasej tonali uan kiampa momachtisej Biblia, moyoliljuisej ipan tlen kipouaj uan momaijtosej ika nochi ininyolo. Kemantika ouij kichiuasej pampa kipiaj miak tekitl. Maske uelis amo kipiaj miak tonali uan chikaualistli, tlauel ipati tlaj kiampa kichiuasej. ¿Kenke? Pampa Jehová kineki sejse itekipanojka kuali ma mouampojchijto iuaya (Hech. 17:27).

7. ¿Tlake kipaleuis se tosiuaikni kichiuas tlen Jehová kinauatia?

⁷ Se tosiuaikni moneki kichiuas kampeka kitlepanitas uan kineltokas iueue maske tlajtlakole. Uan tlaj kikuamachilia tlen Biblia kiijtoua, amo ouij kichiuas tlen Jehová kinauatia uan kikauas iueue ma kiyakana.

8. Kej kiijtoua Efesios 5:22-24, ¿kenke se tosiuaikni kikaua iueue ma kiyakana?

⁸ Se tosiuaikni kikaua iueue ma kiyakana pampa Jehová ya nopa kineki ma kichiua se siuatl katli monamiktijtok (xijpoua Efesios 5:22-24). Ya motemachia ipan iTata, Jehová, kimati nochi tlen kinauatia kichiua  pampa kiiknelia uan kineki kuali ma itsto (Deut. 6:24; 1 Juan 5:3).

9. ¿Tlake pano kema se tosiuaikni kikaua iueue ma kiyakana?

⁹ Maseualmej kiniljuiaj siuamej amo ma kichiuakaj tlen Jehová tlanauatia, uan tlaj kikauaj ininueue ma kinyakana uelis kichiuas amo ma kinpatiitakaj. Ma tikilnamikikaj, maseualmej katli kiampa kiijtouaj amo kimatij kenijkatsa eli toTeotsij katli tlauel teiknelia. Jehová amo kema kiniljuiskia siuamej ma kichiuakaj se tlamantli tlen kichiuaskia amo ma kinpatiitakaj. Kema se tosiuaikni kichiua tlen Jehová kinauatia, kinpaleuia ichampoyouaj ma itstokaj ika tlaseuilistli (Sal. 119:165). Yeka, kema kiampa kichiua, iueue, ikoneuaj uan ya kuali itstokej.

10. ¿Tlake tijyekouaj tlen Carol kiijtok?

¹⁰ Kema se tosiuaikni kikaua iueue ma kiyakana, maske tlajtlakole, kinextia kiiknelia uan kitlepanita Jehová, katli kitlalik nopa tlanauatili. Carol, katli eua Sudamérica, kiijtoua: “Nijmati noueue nojkia mokuapoloua, uan kej nijnankilis kinextis tlaj nelia nijpatiita nimouampojchijtos iuaya Jehová. Yeka, nojua nijchiua kampeka nijtlepanitas noueue pampa nijneki nijchiuas tlen Jehová kipaktia”.

11. 1) ¿Tlake kipaleuia Aneese ma tetlapojpoljui ika nochi iyolo? 2) ¿Tlake tijyekouaj ika tlen kichiua?

¹¹ Tlaj se tosiuaikni kimati kejuak iueue amo kitekipachoua tlen kipano uan tlen kiyolmati, uelis ouij kimatis kitlepanitas uan kikauas ma kiyakana. Ma tikitakaj tlake kichiua tosiuaikni Aneese, ya kiijtoua: “Nijchiua kampeka amo nima nikualanis pampa nikilnamiki nochi timokuapolouaj. Yeka kej Jehová, nijchiua kampeka nijtlapojpoljuis ika nochi noyolo. Kema kiampa nijchiua, kuali nijyolmati” (Sal. 86:5). Yeka, kema se tosiuaikni nima tetlapojpoljuia, amo ouij kimati kitlepanitas iueue, katli kiyakana.

12. ¿Tlake neskayotl tijpantiaj ipan Biblia?

¹² Uelis se keskij maseualmej moiljuiaj tlaj se siuatl kikaua iueue ma kiyakana, ayokmo kipatiitasej. ¡Nopa amo nelia! Ipan Biblia eltok miak neskayotl tlen toTeotsij itekipanojkauaj  katli kikajkej ma kinyakanakaj, maske kiampa kichijkej inijuantij tlauel kinpatiitakej. Ma tikitakaj tlake uelis tijyekosej tlen Jesús, Abigail uan María.

13. Xikixtoma kenke Jesús kikaua Jehová ma kiyakana.

¹³ Jesús kitlepanita Jehová itlanauatiljuaj, uan amo kichiua pampa amo tlalnamiki o amo ueli kichiua miak tlamantli. Ma tikilnamikikaj, Jesús tlauel tlalnamiki, yeka tlauel kuali tlamachtik uan amo ouij kej kichijki (Juan 7:45, 46). Jehová motemachiyaya ipan tlen Jesús kimatiyaya kichiuas, yeka kikajki ma tekiti iuaya kema kichijchijki Tlaltipaktli (Prov. 8:30 TNM; Heb. 1:2-4). Uan kema moyolkuik, Jehová kimakak “nochi tlanauatili ipan iluikak uan ipan Tlaltipaktli” (Mat. 28:18). Jesús nojua kikaua iTata ma kiyakana maske kimati kichiuas miak tlamantli, uan kichiua pampa tlauel kiiknelia (Juan 14:31).

14. 1) ¿Tlake kiyekouaj tlakamej tlen Jehová? 2) ¿Tlake kiyekouaj tlen kiijtoua Proverbios 31?

¹⁴ ¿Tlake kiyekouaj katli mosiuajtijtokej? Jehová amo kinmakak tlakamej tlanauatili pampa moiljuik siuamej amo tlauel ininpati kej inijuantij. Tijmatij ni pampa kintlapejpenijtok siuamej uan tlakamej ma tlanauatikaj iuaya Jesús (Gál. 3:26-29). Jehová motemachia ipan Jesús, yeka kimakatok tlanauatili. Se tlakatl katli kichiua kej Jehová, kimaka isiua se kentsi tlanauatili. Ipan Biblia kiijtoua se siuatl katli tlalnamiki uelis kichiuas miak tlamantli, kej kinmokuitlauis ichampoyouaj, tlakouas o tlanamakas (xijpoua Proverbios 31:15, 16, 18). Se siuatl amo eli se tlatekipanojketl katli amo ueli kiijtoua yon se tlamantli. Iueue motemachia ipan ya uan kipatiita tlen kiijtoua (xijpoua Proverbios 31:11, 26, 27). Se siuatl tlauel yolpakis uan kikauas iueue ma kiyakana tlaj iueue kitlepanita.

15. ¿Tlake kiyekouaj siuamej tlen Jesús?

¹⁵ ¿Tlake kiyekouaj katli monamiktijtokej? Maske Jesús kichijtok miak tlamantli, ya amo moiljuia amo ipati san pampa kikaua Jehová ma kiyakana (1 Cor. 15:28; Juan 6:38). Nojkia, kema se siuatl kichiua kej Jesús, amo moiljuia ayokmo kipatiitasej tlaj kikauas iueue ma kiyakana. Ya kipaleuia iueue pampa kiiknelia, uan nojkia kichiua pampa tlauel kiiknelia uan kitlepanita Jehová.

16. Kej kiijtoua 1 Samuel 25:3, 23-28, ¿tlake kiixnamijki Abigail? (Xikita tlaixkopinkayotl ipan ipantsajka).

¹⁶ Iueue Abigail eliyaya Nabal, katli tlauel moueyimatiyaya, san ya mopatiitayaya uan amo tetlaskamatiyaya. Maske kiampa eliyaya, Abigail amo kema moiljuik kikauas iueue. Ueltoskia amo tleno kiijtos uan kikauas David uan itlateuijkauaj ma kimiktikaj iueue. Ya amo kiampa kichijki pampa nima kiitak kenijkatsa uelis kinmanauis Nabal uan ichampoyouaj. Abigail kinextik amo majmauiyaya pampa ika tlatlepanitakayotl mokamanaljuik ika David ininixpa 400 itlateuijkauaj. Uan nojkia motlajtlakoltik, maske ya amo kichijtoya nopa kualantli (xijpoua 1 Samuel 25:3, 23-28). David nima kiitak Jehová kititlantoya nopa siuatl pampa kipaleuik amo ma momakuepa uan ma kimikti Nabal.

17. ¿Tlake uelis kiyekosej tlakamej tlen David uan Abigail?

¹⁷ ¿Tlake kiyekouaj katli mosiuajtijtokej? Abigail tlauel tlalnamikiyaya. Yeka, pampa David kichijki tlen kiiljuik, amo kinmiktik sekinok maseualmej katli amo tleno kichijtoyaj. Sanse kej David, se tlakatl katli tlalnamiki kuali kitlakakilis tlen isiua kiijtos kema monekis kitlapejpenis se tlamantli tlen tlauel ipati. Uelis tlen kiiljuis isiua kipaleuis amo kitlapejpenis se tlamantli tlen amo kinamiki.

18. ¿Tlake uelis kiyekosej tosiuaikniuaj tlen kichijki Abigail?

 ¹⁸ ¿Tlake kiyekouaj katli monamiktijtokej? Se siuatl katli kiiknelia uan kitlepanita Jehová uelis kinpaleuis ichampoyouaj maske iueue amo kitekipanoua Jehová. Ya amo kichiuas se keski tlamantli tlen kiixpanos toTeotsij itlanauatiljuaj uan kiampa kikauas iueue. Moneki kineltokas uan kitlepanitas, kiampa kipaleuis nojkia ma kiixmati Jehová (1 Ped. 3:1, 2). Maske iueue amo kiitas nochi tlen ya kichiua, moneki kiilnamikis Jehová tlauel kipatiita pampa amo kitlauelkajtok.

19. ¿Ipan tlake tlamantli se tosiuaikni amo kichiuas tlen iueue kiiljuis?

¹⁹ Se tosiuaikni amo kichiuas tlen iueue kiiljuia tlaj kinauatia ma kichiua se tlamantli tlen kiixpano toTeotsij itlanauatiljuaj. Uelis kiiljuia ma istlakati, ma tlachteki o ma kichiua se tlamantli tlen Jehová amo kipaktia. Nochi toTeotsij itekipanojkauaj, katli mosenkajtokej o amo, moneki san Jehová tlauel kitlepanitasej. Yeka, tlaj iueue se tosiuaikni kiiljuia ma kiixpano toTeotsij itlanauatiljuaj, moneki kiiljuis ika tlaiknelili uan ika tlatlepanitakayotl kenke amo kichiuas (Hech. 5:29).

20. ¿Kenke tikijtouaj María kuali mouampojchijtoya ika Jehová?

²⁰ María kuali mouampojchijtoya ika Jehová. Nojkia tlauel momachtiyaya iTlajtol, pampa kema mokamanaljuik iuaya Elisabet, inana Juan teAtsonpoliuiltijketl, kiijtok kipano 20 imiakpa tlen Escrituras Hebreas (Luc. 1:46-55). Nojkia, kema María nechka monamiktiskia iuaya José, nopa iluikaejketl amo kamanaltik achtoui iuaya José, ya kamanaltik iuaya María uan kiiljuik kipiaskia toTeotsij iKone (Luc. 1:26-33). Jehová kuali kiixmatiyaya María uan kimatiyaya kuali kimokuitlauiskia uan kiikneliskia iKone. Teipa, kema Jesús ya tlakuepilijtoya iluikak, María nojua kuali mouampojchijki ika Jehová (Hech. 1:14).

21. ¿Tlake kiyekouaj tlakamej tlen kichijki María?

²¹ ¿Tlake kiyekouaj katli mosiuajtijtokej? Se tlakatl katli tlalnamiki yolpaki kema isiua  kuali kikuamachilia tlen Biblia kiijtoua, uan amo moiljuia kineki kinauatis. Se tlakatl kimati tlaj isiua kuali kikuamachilia tlen Biblia tetlajtolmaka, kinpaleuis kuali ma itstokaj. Uan maske isiua tlauel momachtijtok, nopa tlakatl moneki momachtis ininuaya ichampoyouaj uan kichiuas sekinok tlamantli tlen kinpaleuis kiueyichiuasej Jehová (Efes. 6:4).

22. ¿Tlake kiyekouaj tosiuaikniuaj tlen María?

²² ¿Tlake kiyekouaj katli monamiktijtokej? Maske se tosiuaikni moneki kikauas iueue ma kiyakana, ya nojkia moneki kichiuas kampeka kuali tlaneltokas (Gál. 6:5). Yeka, moneki kikauas tonali momachtis iselti uan moyoliljuis ipan tlen momachtia. Tlaj kiampa kichiuas kipaleuis nojua kiiknelis uan kitlepanitas Jehová, uan tlauel yolpakis pampa kikauas iueue ma kiyakana.

23. Kema se tosiuaikni kikaua ma kiyakana iueue, ¿kenijkatsa kinpaleuia ichampoyouaj uan tlanechikoli?

²³ Tosiuaikniuaj tlauel yolpakij kema kikauaj ininueue ma kinyakana pampa kiikneliaj Jehová, uan katli kiixpanoj nopa tlanauatili amo yolpakij. Nojkia, tlen tosiuaikniuaj kichiuaj kinpaleuia kuali ma itstokaj ininchampoyouaj, tlanechikoli uan nojkia kinpaleuia toikniuaj uan tosiuaikniuaj katli ayamo kipiaj miak ininxiui (Tito 2:3-5). Ipan ni tonali, itstokej miakej tosiuaikniuaj katli kitekipanouaj Jehová (Sal. 68:11). Ipan tlamachtili 7 tikitasej nochi tlakamej uan siuamej tijpiaj se tekitl ipan tlanechikoli.