1. ¿Kenijkatsa tlatekipanouaj toTeotsij itekipanojkauaj?

UEJKAJKIA, Biblia kiijtok toTeotsij itekipanojkauaj tlatekipanoskiaj ika nochi ininyolo uan kichiuaskiaj kej Jesús (Sal. 110:3). Uan ipan ni tonali, tikitaj nelnelia moaxitia tlen kiijtok nopa tlajtolpanextili. Sejse xiuitl, toTeotsij itekipanojkauaj tlajtolmoyauaj tlauel miak horas uan amo tlainamaj. Nojkia, kikixtiaj tonali uan kiampa kinpaleuisej ininikniuaj ika se keski tlamantli, kinyolchikauasej uan kinpaleuisej nojua kuali ma tlaneltokakaj. Ueuejtlakamej uan tlapaleuianij tlauel motekiuiaj pampa kikualchijchiuaj tlamachtili tlen kipanoltiaj ipan tlanechikoli, uan nojkia kinpaxalouaj toikniuaj. ¿Kenke kichiuaj nochi ni tlamantli? Pampa tlauel kiikneliaj Jehová uan maseualmej (Mat. 22:37-39).

2. Kej kiijtoua Romanos 15:1-3, ¿tlake uelis tijyekosej ika tlen Jesús kichijki?

² Jesús nochipa kiachtouitlalik kinpaleuis sekinok, uan itokilijkauaj nojkia kichiuaj kampeka kichiuasej kej ya (xijpoua Romanos 15: 1-3). Tlaj nojkia kiampa tijchiuasej, tlauel techpaleuis. Jesús kiijtok: “Más pakilistli kiselia tlen temaka se tlenijki, uan axkeja tlen kiselia” (Hech. 20:35).

3. ¿Tlake tikitasej ipan ni tlamachtili?

³ Ipan ni tlamachtili tikitasej kenijkatsa Jesús kinpaleuik sekinok, uan tikitasej kenijkatsa nojkia uelis kiampa tijchiuasej. Nojkia, tikitasej tlake uelis techpaleuis uan kiampa tijchiuasej kampeka tikinpaleuisej sekinok.

4. ¿Kenijkatsa kinextik Jesús nochipa kiachtouitlaliyaya kinpaleuis sekinok?

⁴Jesús kinpaleuik sekinok maske tlauel siajtoya. Ma timoiljuikaj tlake kichijki kema maseualmej yajkej kiitatoj kema itstoya tlamimiltipa tlen se tepetl, uelis nechka Capernaúm. Jesús seyoual momaijtojtoya, yeka uelis tlauel siajtoya. Maske kiampa itstoya, kema kinitak nochi nopa maseualmej, kintlasojtlak katli eliyayaj teikneltsitsij uan katli mokokouayayaj. Ya amo san kinchikajki, nojkia kiixtonki se yejyektsi tlamachtili tlen amo kema kipanoltijtoya, uan ipan ni tonali tikixmatij kej Sermón del Monte (Luc. 6:12-20).

5. ¿Kenijkatsa tetajmej kichiuaj kej Jesús kema tlauel siajtokej?

⁵Katli kinyakanaj ininchampoyouaj nojkia kichiuaj kej Jesús. Ma timoiljuikaj se tetaj asi ichaj tlauel siajtok pampa se tonal yajki tekiti. Ipan nopa youali, moneki momachtis ininuaya ichampoyouaj, yeka moiljuia momachtisej seyok tonali. Teipa, kiiljuia Jehová ma kipaleui, uan ya kitlakakilia tlen kiiljuia uan kipaleuia ma momachti ininuaya ichampoyouaj, kej kichijtokej sejse semana. Ipan nopa youali ikoneuaj kiitakej inintatauaj tlauel kipatiitaj momachtisej.

6. Xikijto kema Jesús monejki kinpaleuis sekinok maske kinekiyaya itstos iselti.

⁶Jesús nochipa kichijki kampeka itstos ininuaya sekinok. Ma timoiljuikaj ipan ni tlamantli: Jesús tlauel mokuesouayaya pampa kimatki iuampo Juan teAtsonpoliuiltijketl kimiktijtoya. Biblia kiijtoua: “Kema Jesús kikajki para ya mijki Juan, kiski nepa kampa itstoya, uan yajki iselti ipan kuakanaua hasta sejkoyok kampa tlatsitsika” (Mat. 14:10-13). Jesús uelis kinekiyaya itstos iselti. Se keskij maseualmej kinekij itstosej ininselti kema miki katli kiikneliaj. Maske Jesús nojkia kiampa kinekiyaya kichiuas, amo uelki pampa kichixtoyaj tlauel miakej maseualmej kampa asiskia. ¿Tlake kichijki? Ya moiljuik ipan nochi nopa tlamantli tlen kinpolouayaya maseualmej uan “kintlasojtlak”. Jesús kiitak monekiyaya  nima kinpaleuis uan kiampa nojua kuali tlaneltokaskiaj. Yeka, “pejki kinmachtia miak tlamantli” (Mar. 6:31-34; Luc. 9:10, 11).

7, 8. Xikijto kenijkatsa ueuejtlakamej kichiuaj kej Jesús kema kinpaleuiaj toikniuaj.

⁷¿Kenijkatsa ueuejtlakamej teikneliaj kej Jesús? Nochi tlauel tijpatiitaj tlen kichiuaj ueuejtlakamej. Tojuantij amo nochi tijmatij tlen inijuantij kichiuaj. Se neskayotl, kema se toikni mokokoua, ueuejtlakamej Katli kamanaltij ininuaya tepajtianij, nima kipaleuiaj katli mokokoua maske kemantika tlajkoyoual. Ueuejtlakamej uan ininchampoyouaj tlauel teikneliaj, yeka kichiuaj kampeka kinpaleuisej toikniuaj.

⁸ Ueuejtlakamej nojkia tlapaleuiaj kema kichijchiuaj kampa timosentiliaj o sekinok kali kampa titlaueyichiuaj, uan nojkia tlapaleuiaj kema se tlenijki tetlasojsoljuilia. Nojkia, tlauel motekiuiaj pampa tlamachtiaj, kinpaleuiaj uan kinyolchikauaj toikniuaj tlen tlanechikoli. Tlauel tikintlaskamatij ueuejtlakamej uan ininchampoyouaj. Tijnekij Jehová nojua ma kinpaleuijto, pampa kichiuaj se kuali tekitl. Maske kiampa tlatekipanouaj, nojkia moneki kichiuasej kampeka kinpaleuisej ininchampoyouaj nojua kuali ma tlaneltokakaj, uan amo san kinpaleuisej toikniuaj.

9. Kej kiijtoua Filipenses 2:4, 5, ¿kenijkatsa kinamiki moiljuisej Cristo itokilijkauaj?

⁹ (Xijpoua Filipenses 2:4, 5). Maske amo titlatekipanouaj kej ueuejtlakamej,  nojkia uelis titlapaleuisej kej Jesús. Biblia kiijtoua ya mochijki “keja se tlatekipanojketl” (Filip. 2:7). ¿Tlake techmachtia tlen kiijtoua ni texto? Se tlatekipanojketl nochipa kichiua kampeka kiyolpakiltis katli kitekipanoua. Tojuantij tikintekipanouaj Jehová uan nojkia toikniuaj, yeka tijnekij nochipa tlauel kuali tikinpaleuisej. ¿Kenijkatsa uelis tijchiuasej? Ma tikitakaj se keski tlamantli.

10. ¿Tlake uelis timotlatsintokisej?

¹⁰Xikita kenijkatsa tieli. Ximotlatsintoki: “¿Nijchiua kampeka nikinpaleuis sekinok? ¿Tlake nijchiuaskia tlaj nechiljuiskiaj ma nijpaxalo se toikni katli ya ueyi kampa kimokuitlauiaj o ma nijuika se tosiuaikni katli ya ueyi ipan tlanechikoli? ¿Nima nikijtoua nitlapaleuis kema tlachpanaj kampa mochiua uejueyi tlanechikoli o kema mokualchijchiua se keski tlamantli ipan kali kampa timosentiliaj?”. Kema tijmaktilijkej tonemilis Jehová tikiljuijkej tijtekiuisej nochi tlen tijpixtokej, kej totomij uan tonali. Yeka, kema tikinpaleuiaj sekinok uan tijchiuaj ika nochi toyolo, Jehová tlauel yolpaki. Uan, ¿tlake uelis tijchiuasej tlaj tikitaj nojua moneki tijpatlasej se keski tlamantli?

11. ¿Kenijkatsa tlamaijtoli uelis techpaleuis tijnekisej titlapaleuisej?

¹¹Ximomaijto ika nochi moyolo. Tlaj tikitaj nojua moneki tijpatlasej se keski tlamantli uan amo tijnekij tijchiuasej, ma tikiljuikaj Jehová ika nochi toyolo ma techpaleui. Ma tikiljuikaj nochi tlen tijyolmatij, ma techpaleui tijnekisej tijchiuasej se tlenijki uan ma techmaka chikaualistli (Filip. 2:13).

12. ¿Kenijkatsa uelis tlapaleuisej telpokamej katli ya moatsonpoliuiltijtokej?

¹² Tlaj tieli se telpokatl uan ya timoatsonpoliuiltijtok, xikiljui Jehová ma mitspaleui nojua tijnekis tijchiuas sekinok tekitl ipan tlanechikoli. Ipan se keski tlanechikoli, itstokej miakej ueuejtlakamej uan san se keskij tlapaleuianij, uan sekij tlen nopa tlapaleuianij ya uejueyij. Nojua tlauel miakej maseualmej mochiuaj Jehová itekipanojkauaj, yeka nojua tlauel moneki telpokamej ma kinpaleuikaj ueuejtlakamej ipan tekitl tlen kichiuaj ipan tlanechikoli, uan kiampa kinpaleuisej sekinok. Tlaj tijchiua kampeka titlapaleuis kampa moneki, tlauel tiyolpakis pampa tijchiuas tlen Jehová kineki, kuali mitsitasej sekinok uan kuali tijyolmatis.

13, 14. ¿Tlake uelis tijchiuasej uan kiampa tikinpaleuisej toikniuaj? (Xikita tlaixkopinkayotl ipan ipantsajka).

¹³Xikita tlake kinpoloua sekinok. Apóstol Pablo kiijtok ni tlamantli ipan amatlajkuiloli Hebreos: “Amo xikilkauakaj para xijchiuakaj tlen kuali. Xikinpaleuikaj sekinok tlen axtleno kipiaj, pampa ya nopa kikualita toTeko keja eliskia se tlakajkaualistli” (Heb. 13:16). Tlen kiijtok tlauel tlapaleuik. Kema panok se keski xiuitl, katli itstoyaj Judea monejki kikajteuasej ininchaj, tlen kinamakayayaj, ininchampoyouaj katli amo eliyayaj Cristo itokilijkauaj, uan kiampa choloskiaj ipan tepetinij (Mat. 24:16). Yeka, ipan nopa tonali tlauel monekiyaya mosentikapaleuisej. Tlaj inijuantij ipa kichijtoyaj tlen Pablo kintlajtolmakatoya, uajka amo ouij momatiskiaj kampa itstoskiaj.

¹⁴ Uelis toikniuaj amo nochipa techiljuisej tlake kinpoloua. Ma timoiljuikaj  ipan ni tlamantli: Tlaj se toikni ayokmo kipia isiua, ¿moneki se akajya ma kitlakualchiuili, ma kiuika ipan carro kampa moneki o ma kipaleuikaj ichaj ika se keski tlamantli? Uelis nopa toikni amo kiijtoua tlen kipoloua pampa amo kineki kinkuatotonis sekinok. Amo kinamiki timoiljuisej itstokej sekinok katli kipaleuisej o timoiljuisej ya nochipa techiljuis tlen kipoloua. Yeka, ma timotlatsintokikaj: “Tlaj na kiampa nechpanoskia, ¿kenijkatsa nijnekiskia ma nechpaleuikaj?”.

15. ¿Tlake moneki tijchiuasej tlaj tijnekij tikinpaleuisej sekinok?

¹⁵Xijkixti tonali tikinpaleuis sekinok. Uelis ipan totlanechikol itstokej toikniuaj uan tosiuaikniuaj katli tlauel kinpaktia kinpaleuisej sekinok. Inijuantij tlapaleuiaj ika nochi ininyolo, uan amo kiijtouaj tikinkuatotoniaj. Timotemachiaj toikniuaj nochipa techpaleuisej, uan tojuantij nojkia kiampa tijnekij tijchiuasej. Se ueuejtlakatl katli kipia 45 xiuitl, mosentlalijtok kichiuas kampeka kinpaleuis sekinok. Ya kiijtoua: “Maske maseualmej kimatiyayaj Jesús tlauel motekiuijtoya, inijuantij nochipa kinekiyayaj itstosej iuaya uan nochipa kiiljuiyayaj ma kinpaleui, pampa motemachiyayaj nelia kiampa kichiuaskia. Nechpaktiskia nielis kej Jesús uan ma nechitakaj kej se akajya katli kineki tlapaleuis, teiknelia uan nochipa kiita tlen kinpoloua sekinok”.

16. ¿Kenijkatsa techpaleuia Salmo 119:59, 60 ma tijchiuakaj kej Jesús kichijki?

¹⁶ Amo ma timotekipachokaj tlaj amo tijchiuaj sanse kej Jesús (Sant. 3:2). Se katli momachtia tlajtsomas, uelis amo  nima kuali tlajtsomas kej katli kimachtia. Maske achtoui amo kuali kisas iteki, tlaj kichiuas kampeka kichiuas kej katli kimachtia, uelis teipa kichiuas yejyektsitsij yoyomitl. Tlaj tijnekij tijchiuasej kej Jesús, moneki tijchiuasej tlen tijyekouaj ipan Biblia kema timomachtiaj toselti uan tijchiuasej kampeka tijpatlasej se keski tlamantli (xijpoua Salmo 119:59, 60).

17, 18. ¿Kenijkatsa techpaleuis tlaj tijchiuasej kampeka tijchiuasej kej Jesús?

¹⁷ Tlaj titepaleuiaj, sekinok nojkia kiampa kinekisej kichiuasej. Se ueuejtlakatl katli itoka Tim, kiijtoua: “Ipan notlanechikol itstokej telpokamej katli kuali tlaneltokatokej uan tlatekipanouaj kej tlapaleuianij, kiampa kichiuaj pampa kinitakej sekinok tlauel tlapaleuiaj uan nojkia kiampa kinejkej kichiuasej. Tlauel kinekij kinpaleuisej toikniuaj, uan nopa tlauel kinpaleuia ueuejtlakamej”.

¹⁸ Maske maseualmej kinekij kichiuasej san tlen inijuantij kinekij, tojuantij amo kiampa tijchiuaj. Tlauel techpaktia tlen Jesús kichijki, uan nojkia kiampa tijnekij tijchiuasej. Uan maske amo nochi uelis tijchiuasej kej ya kichijki, kena uelis tijchiuasej kampeka (1 Ped. 2:21). Tlaj titepaleuisej kej Jesús, tiyolpakisej pampa tijmatisej Jehová kuali techita.