YOMARA, Marcelo uan Hiver elij iknimej katli itstokej ipan se pilaltepetsi tlen Guatemala. Yomara pejki momachtia Biblia ininuaya toikniuaj, uan teipa iikniuaj nojkia momachtijkej. Maske momachtiyayaj, inijuantij kimatkej ouij pampa amo ueliyayaj kipouaj amatlajkuiloli ipan braille. Yeka toikni katli kinmachtiyaya, kinpouiliyaya párrafos uan textos.

Nojkia tlauel ouij kimatkej yasej tlanechikoli. Nopa kali kampa monechikouaj mokaua se 40 minutos uan inijuantij amo ueliyayaj yauij ininselti. Yeka toikniuaj mopatlayayaj uan kinuikayayaj tlanechikoli. Uan kema pejkej kipanoltiaj tlamachtili ipan semana, toikniuaj kinpaleuiyayaj ma kitsontekontlalikaj textos tlen kiijtoskiaj.

Ipan mayo 2019, toikniuaj pejkej kichiuaj tlanechikoli ipan ininaltepe uan nopaya itstoya se toikni iuaya isiua katli tlatekipanouayayaj kej precursores regulares. Maske toikniuaj amo kimatiyayaj braille, kinejkej kinmachtisej nopa eyij iknimej ma kipouakaj uan ma kiijkuilokaj. Nopa toikni iuaya isiua yajkej ipan se biblioteca pampa kinejkej momachtisej braille uan kenijkatsa tlamachtisej.

San se keski metstli nopa eyij iknimej ya ueliyayaj kipouaj braille uan nopa kinpaleuik nojua kuali ma tlaneltokakaj. a Nama Yomara, Marcelo uan Hiver tlatekipanouaj kej precursores regulares, uan Marcelo eli tlapaleuijketl. Sejse semana kichiuaj kampeka tlauel kitekipanosej Jehová ika miak pakilistli. Nopa kichiua nojkia tlauel ma tiyolpakikaj.

Ni eyij iknimej tlauel kitlaskamatij pampa toikniuaj kinpaleuijtokej uan kinikneliaj. Yomara kiijtoua: “Toikniuaj kinextijkej tlauel techikneliaj kema tikinixmatkej”. Uan Marcelo kiijtoua: “Tikinpiaj kuali touampoyouaj ipan tlanechikoli uan tijmatij itstokej toikniuaj ipan nochi Tlaltipaktli katli tlauel teikneliaj”. Yomara uan iikniuaj kichiaj nopa tonali kema Tlaltipaktli elis se yejyektsi xochimili (Sal. 37:10, 11; Is. 35:5).