1. ¿Kenijkatsa kiita Jehová tonemilis?

 XIMOILJUI se mouampo mitsmaka se kali. Maske ayokmo tlauel kuali, nojua tlauel patiyo. Nopa kichiuas xijpatiita uan ximokuitlaui. Kej nopa touampo, Jehová nojkia techmakatok se tlamantli tlauel ipati: tonemilis. Uan Jehová tlauel kipatiita yeka temaktilik iKone ma techmakixti (Juan 3:16).

2. Kej kiijtoua 2 Corintios 7:1, ¿tlake kineki Jehová ma tijchiuakaj?

² Jehová techmakatok tonemilis (Sal. 36:9). Ya nopa kinejki kiijtos apóstol Pablo kema kiijtok: “Ika itlapaleuil Toteko tiitstokej, tinejnemij uan tijchiuaj nochi tlen tijnekij” (Hech. 17:25, 28). Yeka uelis tikijtosej nemilistli eli se tlamantli tlen tlauel ipati tlen Jehová techmakatok. Nojkia techmakatok ika miak tlaiknelili tlen techpaleuis nojua ma tiyoltokaj (Hech. 14:15-17). Maske kuali techmokuitlauia, amo kichiuas uejueyi tlamantli uan kiampa amo timikisej. Ya kineki ma tijchiuakaj kampeka timomokuitlauisej uan kuali titlaneltokasej (xijpoua 2 Corintios 7:1). ¿Kenke moneki tijchiuasej kampeka amo timokokosej, tijmokuitlauisej tonemilis uan kenijkatsa moneki tijchiuasej?

3. ¿Kenke tijchiuaj kampeka timomokuitlauisej?

³ Tijchiuaj kampeka amo timokokosej pampa tijnekij kuali tijtekipanosej Jehová (Mar. 12:30). Tijnekij tonemilis “ma eli se tlakajkaualistli tlen yoltok uan tlen tlatsejtseloltik, pampa keja nopa kipaktia Toteko”. Yeka amo tijchiuaj se keski tlamantli tlen uelis techtlanauis (Rom. 12:1). Maske kemantika timokokouaj, tijchiuaj kampeka timomokuitlauisej uan kiampa tijnextisej tijtlaskamatiliaj Jehová pampa techmakatok tonemilis.

4. ¿Tlake kinekiyaya kichiuas tlanauatijketl David?

⁴ Tlanauatijketl David kipatiitayaya inemilis. Yeka kiijtok: “TOTEKO, intla tinechkauiliskia ma nimiki, tlachke tijtlaniskia [...]. Toteko, intla nimikis, nimokuepas tlali, uan tlali axuelis mitsueyichiuas” (Sal. 30:9). Ni kiijkuilok kema nechka mikiskia. Maske kiampa kipanoskia, ya kinekiyaya nochipa itstos uan kiueyichiuas Jehová. Uan tojuantij nojkia kiampa tijnekij tijchiuasej.

5. Maske ya tiuejueyij o timokokouaj, ¿tlake moneki nojua tijchiuasej?

⁵ Uelis ya tiuejueyij o timokokouaj, yeka ayokmo ueli tijchiuaj se keski tlamantli kej achtouia. Uan nopa uelis kichiuas ma timotekipachokaj uan ma timokuesokaj. Maske ayokmo tiitstokej kej achtouia, moneki nojua timomokuitlauijtosej. ¿Kenke moneki kiampa tijchiuasej? Pampa nojua uelis tijueyichiuasej Jehová sanse kej kichijki David. Tlauel techyolchikaua pampa tijmatij Jehová tlauel techiknelia uan techpatiita maske amo tixitlauakej (Mat. 10:29-31). Ya tlauel techiknelia, yeka kiijtojtok tlaj timikisej techyolkuis (Job 14:14, 15). Uajka pampa nojua tiyoltokej, ma tijchiuakaj kampeka timomokuitlauisej uan amo tijchiuasej tlen techtlanauis.

6. Kema tijkuasej o tikisej se tlenijki, ¿tlake kineki Jehová ma tijchiuakaj?

⁶ Maske Biblia amo kiijtoua sejse tlamantli tlen moneki tijkuasej, kena techiljuia kenijkatsa Jehová kiita tlen tijkuaj. Se neskayotl, ipan Eclesiastés 11:10 kiijtoua: “Xijuejkamajkaua [...] tlen axkuali tlen uelis mitskokos”. Se tlamantli tlen nojkia tetlanauia, eli kema tlauel titlakuaj o tlauel titlaij. Biblia kiijtoua ni tlamantli nojkia eli tlajtlakoli (Prov. 23:20). Yeka, moneki tikitasej keski imiaka tijkuasej o tikisej se tlenijki, pampa Jehová kineki ma timonauatikaj (1 Cor. 6:12; 9:25).

7. ¿Kenijkatsa uelis tijchiuasej tlen kiijtoua Proverbios 2:11 tlaj tijnekij kuali tiitstosej?

⁷ Tlaj tijnekij tijnextisej tijtlaskamatiliaj Jehová pampa techmakatok tonemilis, moneki kuali timoiljuisej tlake tijchiuasej (Sal. 119:99, 100; xijpoua Proverbios 2:11). Se neskayotl, uelis kuali timoiljuisej tlake tlamantli uelis tijkuasej. Tlaj tijmatij se tlakualistli techkokolismakas, uajka amo ma tijkuakaj maske tlauel techpaktia. Nojkia, tijmatij moneki kuali tikochisej, tijchiuasej ejercicio, amo tinemisej tisokiyojkej uan nojkia moneki amo tlasokiyojtos tochaj.

8. ¿Kenijkatsa kinextia Biblia Jehová kineki kuali ma timomokuitlauikaj?

⁸ Jehová kinmakak israeleuanij se keski tlanauatili uan kiampa amo kinpanoskia tlen amo kuali ipan ininchaj yon ipan ininteki (Éx. 21:28, 29; Deut. 22:8). Tlaj se maseuali  kimiktiyaya se akajya maske amo kinekiyaya, tlauel kitlatsakuiltiyayaj (Deut. 19:4, 5). Uan tlaj se akajya kimiktiyaya se pilkonetsi katli ayamo tlakatiyaya, nojkia kitlatsakuiltiyayaj maske amo kinekiyaya kiampa kichiuas (Éx. 21:22, 23). Biblia kiijtoua Jehová kineki tlauel ma timomokuitlauikaj uan kiampa amo tleno techpanos.

9. ¿Tlake uelis tijchiuasej uan kiampa amo techpanos tlen amo kuali? (Nojkia xikita tlaixkopinkayomej).

⁹ Uelis tijnextisej tijtlaskamatiliaj toTeotsij pampa techmakatok tonemilis tlaj timomokuitlauiaj ipan tochaj o kampa titekitij. Se neskayotl, tlaj tijpiaj se cuchillo, machete o tlen uelis kintlanauis konemej, kej cloro, xiuipajtli o kimichpajtli, moneki tijkauasej kampa amo kikuisej. Uan tlaj tijtepeuasej, moneki tijkauasej kampa amo techtlanauis yon kintlanauis sekinok. Nojkia moneki timomokuitlauisej kema tiitstokej nechka tlitl, kema tijmoloniaj se tlamantli o kema tijtekiuiaj se tlamantli tlen tekiti ika tlauili uan kuali tijtlachiliaj kanke tijkauaj. Nojkia amo tijnemiltiaj carro tlaj titlaikej, tlaj tikochisnekij, tlaj tikitokej  o tijtolojtokej se pajtli tlen uelis kichiuas amo kuali ma tijnemiltikaj, yon tijtlachilijtiauij tocelular.

10. ¿Tlake uelis tijchiuasej kema ayamo pano tlen amo kuali, uan kema ya tikixnamikij?

¹⁰ Amo uelis nochipa tijchiuasej amo ma techpano tlen amo kuali, kej kema tetlasojsoljuilia se tlenijki, kema momoyaua se kokolistli uan kema mochiua se tlauilankayotl. Maske panos ni tlamantli, kena uelis tijchiuasej tlen techpaleuis amo ma techpano tlen amo kuali. Uelis timokauasej tochaj kema tlanauatianij kiampa technauatisej, tinemisej kampa technauatisej o tijchiuasej tlen technauatiaj (Rom. 13:1, 5-7). Nojkia tlauel techpaleuis, tlaj tikajokuij atl, tlakualistli tlen amo nempoliui uan pajtli ipan se mochila kej tlanauatianij techiljuiaj.

11. Tlaj momoyajtok se kokolistli, ¿tlake uelis tijchiuasej?

¹¹ Uan, ¿tlake uelis tijchiuasej tlaj momoyajtok se kokolistli kampa tiitstokej? Moneki tijchiuasej tlen tlanauatianij techiljuiaj: timomajtekisej, amo tlauel timonejnechkauisej, timotentsakuasej uan amo tlauel tikisasej. Tlaj tijchiuasej nochi tlen technauatiaj, tijnextisej tijpatiitaj tonemilis tlen toTeotsij techmakatok.

12. ¿Kenijkatsa techpaleuia Proverbios 14:15 kema techmatiltiaj se tlenijki?

¹² Kema pano tlen amo kuali, sekij amo kiijtosej nochi tlen melauak, uelis touampoyouaj, katli tikinixmatij o ipan televisión kiijtosej san se keski tlamantli. Kema techiljuisej se tlenijki, moneki tikitasej kanke tekichiuanij uan tepajtianij kiijtouaj tlen melauak (xijpoua Proverbios 14:15). Nojkia tlauel techpaleuis, tlaj timonechikosej uan titlajtolmoyauasej kej technauatiaj Katli kinyakanaj Jehová itlajtoltemakauaj uan kali Betel, pampa inijuantij nochipa kinekij kuali techyakanasej uan kiijtouaj tlen melauak (Heb. 13:17). Tlaj tikinneltokasej, techpaleuis kuali ma tiitstokaj uan kuali ma itstokaj sekinok, uan kiampa kuali kinitasej Jehová itlajtoltemakauaj (1 Ped. 2:12).

13. Kema kinekisej techtlalilisej estli, ¿kenijkatsa uelis tijnextisej tijpatiitaj tonemilis tlen toTeotsij techmakatok?

¹³ Maseualmej kiitaj tojuantij tijtlepanitaj estli. Tojuantij tijtlepanitaj toTeotsij itlanauatiljuaj, yeka amo tijseliaj estli maske tepajtianij kiijtosej moneki techtlalilisej (Hech. 15:28, 29). Maske amo tijseliaj, amo kiijtosneki tijnekij timikisej. ¡Tojuantij techpaktia tiitstosej! Tijpatiitaj tonemilis pampa toTeotsij techmakatok, yeka tikintemouaj katli kuali tepajtiaj uan kiampa amo techtlalilisej estli.

14. ¿Tlake techpaleuis amo ma techtekikaj?

¹⁴ Tlaj tijchiuaj tlen kiijtoua kampa peua ni tlamachtili, techpaleuis amo tlauel timokokosej. Uan tlaj monekis techtekisej, tlaj achtouia tlauel timomokuitlauijkej, techpaleuis nima ma timochikauakaj. Nojkia, moneki tikitasej kuali ma elto tlen tijpiaj ipan tochaj o ipan toteki, uan timomokuitlauisej kema tijnemiltiaj carro, kiampa amo techpanos tlen amo kuali uan amo monekis techtekisej.

15. 1) ¿Kenke moneki nochipa tijnemiltisej uan tijyankuilisej nopa tarjeta DPA? (Nojkia xikita tlaixkopinkayomej). 2) Kej nesi ipan video, ¿tlake techpaleuis uan kiampa kuali tijmatisej kenijkatsa tijtekiuisej estli?

¹⁵ Nojkia uelis tijnextisej tijpatiitaj tonemilis kema tijtemitiaj nopa amatl kampa kiijtoua ika tlake tlamantli uelis techpajtisej  (nopa tarjeta kampa kiijtoua amo tijseliaj estli) uan tijnemiltisej nochipa. b Ni amatl kiijtoua tlake tlamantli kena tijseliaj tlen estli uan ika tlake tlamantli uelis techpajtisej. ¿Tijpixtok ni amatl? Tlaj moneki tijtemitis o tijyankuilis, nima xijchiua. Tlaj tikijkuilouaj kenijkatsa tijnekij ma techpajtikaj, amo tlauel timotonalpolosej kema tikiniljuisej tepajtianij uan nima techpajtisej. Nojkia, ni amatl techpaleuis amo ma techpajtikaj ika tlamantli tlen uelis techtlanauis. c

16. ¿Tlake uelis tijchiuas tlaj amo tijmati kenijkatsa tijtemitis nopa tarjeta DPA?

¹⁶ Maske nojua titelpokamej o amo timokokouaj, nochi uelis techpanos tlen amo kuali uan timokokosej kema amo tijchiaj (Ecl. 9:11). Yeka moneki nochipa tijpiasej nopa amatl DPA. Uan, ¿tlake uelis tijchiuasej tlaj amo tijmatij kenijkatsa tijtemitisej? Amo ximotekipacho. Ueuejtlakamej kuali kiixmatij nopa amatl uan uelis mitspaleuisej xijtemiti. San amo mitsiljuisej tlake xijtlapejpeni pampa nopa ta moneki tijchiuas (Gál. 6:4, 5). Inijuantij san mitspaleuisej xijkuamachili se keski tlamantli uan xikijkuilo.

17. ¿Kenijkatsa uelis tijnextisej titlalnamikij kema tijtlapejpeniaj kenijkatsa timopajtisej?

¹⁷ Kuali tijtlapejpenisej ika tlake techpajtisej tlaj timoyakanaj ika tlen Biblia kiijtoua (Hech. 24:16; 1 Tim. 3:9). Yeka kema tijtlapejpenisej se tlenijki o tikamanaltisej ininuaya sekinok, moneki tikilnamikisej tlen kiijtoua Filipenses 4:5: “Ma nochi tlakamej kiitakaj kejatsa inkichiuiliaj tlen kuali aki ueli tlakatl”. Tijnextisej titlalnamikij tlaj amo timosentlalisej san ipan tlen tojuantij tijnekij, yon tikinchiualtisej sekinok ma kitlapejpenikaj se tlenijki kej tojuantij tijchiuaj. Tikinikneliaj uan tikintlepanitaj toikniuaj maske amo kitlapejpeniaj sanse tlamantli kej tojuantij (Rom. 14:10-12).

18. ¿Kenijkatsa uelis tijnextisej tijpatiitaj tonemilis?

¹⁸ Kej tikijtojkej kampa peua ni tlamachtili, Jehová techmakatok tonemilis. Uelis tijnextisej tijpatiitaj tlaj timomokuitlauiaj uan tijueyichiuaj ika tlen tijpiaj (Apoc. 4:11). Maske timokokouaj uan tijpiaj kuesoli, Jehová amo kinekiyaya kiampa ma tiitstokaj. Yeka nechka kichiuas se yejyektsi Tlaltipaktli kampa ayokmo titlaijiyouisej yon timikisej (Apoc. 21:4). Uajka, ma tijpatiitakaj tonemilis, uan ika ma tijueyichiuakaj toTata Jehová.