1. Ika se neskayotl, xikixtoma kenke moneki tijkauasej Jehová ma techyakana.

 XIMOILJUI timokuapolojtok ipan se ueyi kuatitlamitl, uan nopaya itstokej tlapialmej tlen mosisiniaj, onka xiuitl mauilili uan miakej piltlapialtsitsij. Nojkia, ueliskia timotepotlamis ika se tetl uan tiuetsis. Uelis tijnekiskia ma mitsyakana se akajya katli kuali kiixmati nopa kuatitlamitl. Ni Tlaltipaktli eli kej nopa kuatitlamitl. Onka miak tlamantli tlen uelis kichiuas ayokmo kuali ma titlaneltokakaj. Pero Jehová kuali techyakana, ya techiljuia tlake moneki tijchiuasej para amo techpanos tlen amo kuali. Kiampa uelis tiitstosej ipan Xochimili para nochipa.

2. ¿Kenijkatsa techyakana Jehová?

² ¿Kenijkatsa techyakana Jehová? Ya kitekiuia iTlajtol, pero nojkia kintekiuia tlakamej para ma techyakanakaj. Ma timoiljuikaj ipan ni tlamantli, nopa “tlatekipanojketl katli temachtli uan tlalnamiki” techmaka tlamachtili tlen techpaleuia kuali ma tijtlapejpenikaj tlen tijchiuasej (Mat. 24:45). Uan amo san inijuantij, Jehová nojkia kintekiuia toikniuaj katli techpaxalouaj chijchikuasej metstli uan ueuejtlakamej katli techyolchikauaj uan techpaleuiaj kema tikixnamikij tlaouijkayotl. Tlauel tijtlaskamatiliaj Jehová pampa kuali techyakana ipan ni tonali tlen tlauel ouij. Nopa techpaleuia nojua ma timouampojchijtokaj iuaya, uan nojua ma tinemikaj ipan nopa ojtli tlen techpaleuis ma tijpiakaj nemilistli para nochipa.

3. ¿Tlake tikitasej ipan ni tlamachtili?

³ Pero uelis kemantika tijmatisej ouij tijkauasej Jehová ma techyakana pampa kintekiuia tlakamej katli tlajtlakolejkej. Uelis amo techpaktia tlen techiljuiaj o uelis timoiljuisej  tlen techiljuiaj amo techpaleuis o amo kinamiki kiampa tijchiuasej. Yeka, uelis timoiljuisej tlen techiljuiaj amo eli tlen Jehová kineki ma tijchiuakaj. Kema kiampa techpanos, moneki más timotemachisej Jehová kiyakana itlanechikol, uan tlauel techpaleuis tlaj tijkauaj ma techyakana. Ipan ni tlamachtili tikitasej eyi tlamantli tlen techpaleuis kiampa ma tijchiuakaj: 1) Kej uejkajkia Jehová kinyakanki israeleuanij, 2) kej techyakana ipan ni tonali uan 3) kenijkatsa techpaleuia tlaj tijkauaj ma techyakana.

KEJ JEHOVÁ KINYAKANKI ISRAELEUANIJ

4, 5. ¿Kenijkatsa Jehová kinextik kitekiuiyaya Moisés uan kiampa kinyakanayaya israeleuanij? (Xikita tlaixkopinkayotl).

⁴ Jehová kitekimakak Moisés ma kinkixti israeleuanij tlen Egipto. Uan ika se keski tlamantli Jehová kinextik kitekiuiyaya Moisés uan kiampa kinyakanayaya israeluanij. Tonaya, kinyakanayaya ika se mixtli uan tlayoua kinyakanayaya ika se tlilelemektli (Éx. 13:21). Moisés kitokilik nopa mixtli uan nopa kipaleuik ya uan israeleuanij ma asikaj ipan ueyi atl Rojo. Uan kema egiptoeuanij nechka kinasiskiaj, israeleuanij tlauel majmajkej. Moiljuijkej Moisés tlauel mokuapolojtoya pampa kinuikatoya nopaya, pero amo kiampa eliyaya pampa Jehová kichijki Moisés nopaya ma kinuika (Éx. 14:2). Jehová kichijki se milagro uan kinmanauik (Éx. 14:26-28).

⁵ Moisés kitokilik nopa mixtli se 40 xiuitl, kiampa uelki kinyakanki israeleuanij ipan uaktok tlali. a Kemantika Jehová kichiuayaya nopa mixtli ma motlali iixko Moisés iyoyonkal, kiampa nochi ueliskia kiitasej (Éx. 33:7, 9, 10). Ipan nopa mixtli, Jehová kikamanaluiyaya Moisés, teipa Moisés kiniljuiyaya israeleuanij tlen Jehová kiiljuijtoya (Sal. 99:7). Kiampa israeleuanij kiitayayaj kenijkatsa Jehová kinyakanayaya ika Moisés.

6. ¿Kikajkej israeleuanij Jehová ma kinyakana? (Números 14:2, 10, 11).

⁶ Miakej israeleuanij amo kinejkej kineltokasej Jehová kitlapejpenijtoya Moisés para ma kinyakana (xijpoua Números 14:2, 10, 11). Jehová amo kinkauilik ma kalakikaj ipan nopa tlali tlen kitenkauilijtoya pampa miakpa amo kineltokakej Moisés (Núm.14:30).

7. ¿Ajkia inijuantij kikajkej Jehová ma kinyakana? (Números 14:24; nojkia xikita tlaixkopinkayotl).

⁷ Se keskij israeleuanij kena kikajkej Jehová ma kinyakana. Jehová kiijtok: “Caleb […] senkistok nechneltokatok” (xijpoua Números 14:24). Jehová kiteochijki uan kikauilik ma kitlapejpeni kanke kinekiyaya itstos ipan Canaán (Jos. 14:12-14). Israeleuanij tlen teipa tlakatkej nojkia kichijkej kej Caleb, uan kikajkej Jehová ma kinyakana. Inijuantij “kitlepanitakej Josué”, katli Jehová kitlapejpenijtoya ma kitekipatla Moisés (Jos. 4:14). Yeka, Jehová kinteochijki uan kinkauilik ma kalakikaj ipan nopa tlali tlen kintenkauilijtoya (Jos. 21:43, 44).

8. ¿Kenijkatsa Jehová kinyakanki itekipanojkauaj kema itstoyaj tlanauatianij? (Nojkia xikita tlaixkopinkayotl).

⁸ Se keski xiuitl teipa, Jehová kintlalik tetlajtolsenkauanij para ma kinyakanakaj israeleuanij. Teipa, kema itstoyaj tlanauatianij kintekimakak teokamanalouanij. Tlanauatianij katli amo kitlauelkajkej toTeotsij kichijkej tlen kiniljuiyayaj teokamanalouanij. Kiampa kichijki tlanauatijketl David, katli amo moueyimatki kema teokamanalojketl Natán kitlajtolmakak (2 Sam. 12:7, 13; 1 Crón. 17:3, 4). Tlanauatijketl Josafat (o Jehosafat)  kitlakakilik tlen kiiljuik teokamanalojketl Jahaziel uan kinpaleuik israeleuanij ma kinneltokakaj toTeotsij iteokamanalojkauaj (2 Crón. 20:14, 15, 20). Uan ipan se ueyi tlaijiyouilistli, Ezequías kiiljuik Isaías ma kipaleui (Is. 37:1-6). Kema tlanauatianij kikauayayaj Jehová ma kinyakana, ya kinteochiuayaya uan kinmanauiyaya (2 Crón. 20:29, 30; 32:22). Nima nesiyaya Jehová kintekiuiyaya teokamanalouanij uan kiampa kiyakanayaya ialtepe. Pero miakej tlanauatianij uan israeleuanij amo kinejkej kitlakakilisej Jehová (Jer. 35:12-15).

KEJ JEHOVÁ KINYAKANKI CRISTO ITOKILIJKAUAJ TLEN ACHTOUI SIGLO

9. ¿Kenijkatsa Jehová kinyakanki itekipanojkauaj ipan achtoui siglo? (Nojkia xikita tlaixkopinkayotl).

⁹ Ipan achtoui siglo, Jehová kipeualtik nopa achtoui tlanechikoli. ¿Kenijkatsa kiyakanki ipan nopa tonali? Kitekimakak Jesús ma kiyakana itlanechikol (Efes. 5:23). Pero Jesús amo kiniljuiyaya sejse tlake monekiyaya kichiuasej. Ya kintekiuik apóstoles uan ueuejtlakamej tlen Jerusalén para kinyakanas itekipanojkauaj (Hech. 15:1, 2). Uan ipan sejse tlanechikoli kintekimakakej ueuejtlakamej para ma kinyakanakaj toikniuaj (1 Tes. 5:12; Tito 1:5).

10. 1) ¿Tlake kichijkej toikniuaj tlen achtoui siglo kema kiniljuijkej tlake kichiuaskiaj? (Hechos 15:30, 31). 2) ¿Kenke se keskij amo kinneltokakej katli Jehová kintemakatoya ma kinyakanakaj? (Nojkia xikita recuadro “ ¿Kenke sekij amo kineltokaj Jehová kiyakana itlanechikol ika se keskij tlakamej?”).

¹⁰ ¿Kikajkej ma kinyakanakaj Cristo itokilijkauaj tlen achtoui siglo? Miakej kena tlaneltokakej ika nochi iniyolo. Biblia kiijtoua: “Tlauel yolpajkej pampa kinyolchijkaki tlen nopaya ijkuilijtoya” (xijpoua Hechos 15:30, 31). Uan ipan ni tonali, ¿kenijkatsa Jehová kiyakana itlanechikol?

KEJ JEHOVÁ TECHYAKANA IPAN NI TONALI

11. Xikijto kenijkatsa Jehová kinyakantok toikniuaj katli techyakanaj ipan ni tonali.

¹¹ Ipan ni tonali Jehová nojua kinyakana itekipanojkauaj ika iTlajtol uan ika Jesús, katli kiyakana tlanechikoli. ¿Tikitstokej kenijkatsa nojua techyakantok ika toikniuaj? Kena. Ma timoiljuikaj tlen panok ipan itlamia siglo diecinueve. Charles Russell uan  iuampoyouaj kikuamachilijkej ipan 1914, panoskia tlen tlauel ipati (Dan. 4: 25, 26). ¿Kenke kiampa kiijtojkej? Pampa momachtijkej tlajtolpanextili tlen uala ipan Biblia uan Jehová kinyakanki kema momachtijkej. Tlen panok ipan 1914 kinextik toTeotsij iTlanauatijkayo pejtoya tekichiua. Ipan nopa xiuitl pejki nopa Achtoui Ueyi Tlauilankayotl, onkak uejueyi kokolistli, mojmolinik tlali uan onkak mayantli (Luc. 21:10, 11). Neski kenijkatsa Jehová kintekiuik nopa toikniuaj uan kiampa kinpaleuik itekipanojkauaj.

12, 13. ¿Tlake kichijkej toikniuaj kema mochijtoya nopa Ompa Ueyi Tlauilankayotl pampa kinekiyayaj más tlajtolmoyauasej uan tlamachtisej?

¹² Nojkia ma timoiljuikaj ipan tlen panok kema mochijtoya nopa Ompa Ueyi Tlauilankayotl. Kema toikniuaj Katli kinyakanaj Jehová itlajtoltemakauaj momachtijkej tlen kiijtoua Apocalipsis 17:8, kikuamachilijkej Armagedón amo asiskia kema tlamiskia nopa Ompa Ueyi Tlauilankayotl, uan nojua ueliskia tlajtolmoyauasej. Yeka Jehová itlanechikol moiljuik kichiuas se tlamantli tlen uelis sekinok moiljuiskiaj amo kinamikiyaya mochiuas ipan nopa tonali. Pejki kinmachtiaj toikniuaj ipan nopa Colegio Superior Bíblico de la Watchtower de Galaad, b kiampa kinkualchijchiuaskiaj misioneros para ma tlajtolmoyauatij uan ma tlamachtitij ipan sekinok altepemej. Maske nojua mochijtoya nopa ueyi tlauilankayotl, kintitlankej toikniuaj ipan sekinok altepemej. Nojkia, toikniuaj Katli kinyakanaj Jehová itlajtoltemakauaj kipeualtijkej nopa Curso en el Ministerio Teocrático, c ni kinpaleuiskia toikniuaj kuali ma tlamachtikaj. Nochi ni tlamantli kinkualchijchijki Jehová itekipanojkauaj para kuali ma kichiuakaj nopa tekitl tlen kichiuaskiaj.

¹³ Nochi tlen panok kinextia kenijkatsa Jehová kinyakanki itekipanojkauaj kema kiixnamijkej tlaouijkayotl. Kema tlanki nopa Ompa Ueyi Tlauilankayotl, toTeotsij itekipanojkauaj ueltok tlajtolmoyauaj ipan miak altepemej. Miakej maseualmej ueltok kiixmatij Jehová uan ipan ni tonali toikniuaj tlajtolmoyauaj ipan nochi Tlaltipaktli.

14. ¿Kenke timotemachia Jehová techyakana ika itlanechikol uan ika ueuejtlakamej? (Apocalipsis 2:1; nojkia xikita tlaixkopinkayotl).

 ¹⁴ Ipan ni tonali toikniuaj Katli kinyakanaj Jehová itlajtoltemakauaj, kikauaj ma kinyakana Jesús. Kichiuaj kampeka nochi tlen techiljuia ma mouika ika tlen Jehová uan Jesús moiljuiaj. Inijuantij techiljuiaj tlake moneki tijchiuasej ipan tlanechikoli ika toikniuaj tlen tepaxalouaj chijchikuasej metstli uan ueuejtlakamej. d Cristo kinyakana nochi ueuejtlakamej (xijpoua Apocalipsis 2:1). Inijuantij elij tlajtlakolejkej, yeka kemantika mokuapolouaj kej kinpanok Moisés, Josué uan apóstoles (Núm. 20:12; Jos. 9:14, 15; Rom. 3:23). Maske kiampa eli, tijmatij Jesús kiyakana nopa Tlatekipanojketl katli temachtli uan tlalnamiki uan nojkia kinyakana ueuejtlakamej. Uan nojua kiampa kichijtos “hasta kema tlamis tlen mochijtok ipan Tlaltipaktli” (Mat. 28:20). Nochi ni kichiua ma timotemachikaj Jehová kintekiuia toikniuaj uan kiampa techyakana.

TLAUEL TECHPALEUIA KEMA TIJKAUAJ JEHOVÁ MA TECHYAKANA

15, 16. ¿Tlake techmachtia tlen kichijkej se keskij toikniuaj?

¹⁵ Tlauel techpaleuis tlaj tijkauasej Jehová ma techyakana, kiampa kipanok Andy uan isiua, Robyn, inijuantij mosentlalijkej amo tlauel tlapijpiasej (xikita nopa ompa nota de estudio tlen Mateo 6:22 ipan Biblia de estudio). Nopa kinpaleuik ma tlapaleuikaj kampa mochijchiua kali kampa titlaueyichiuaj. Tosiuaikni Robyn kiijtoua: “Timokajtokej ipan kali kampa amo tlauel ueyi uan kemantika amo tijpiayayaj kanke titlakualchiuasej. Na tlauel nechpaktia nitlaixkopinas pero monejki nijnamakas nocámaras uan sekinok tlamantli tlen nijtekiuiyaya. Maske nimochokilik kema nijnamakak, nimosentlalijtoya nijchiuas kej Sara, isiua Abraham uan amo nimosentlalis ipan tlen nijkajtoya” (Heb. 11:15). ¿Yolpakij ika tlen kitlapejpenijkej kichiuasej? Robyn nojua kiijtoua: “Tlauel tiyolpakij pampa tijmatij tijmakaj Jehová nochi tlen tijpiaj. Kema tijtekipanouaj Jehová timoiljuiaj kiampa elis kema tiitstosej ipan yankuik Tlaltipaktli”. Uan, ¿tlake moiljuia Andy? Ya kiijtoua: “Tlauel  tiyolpakij pampa tijtekipanouaj Jehová ika nochi tlen tijpiaj”.

¹⁶ ¿Ipan tlake seyok tlamantli techpaleuia kema tijkauaj Jehová ma techyakana? Ma tikitakaj tlen kipanok tosiuaikni Marcia. Kema tlanki momachtia, mosentlalik tlatekipanos kej precursora (Mat. 6:33; Rom. 12:11). Ya kiijtoua: “Se universidad nechmakaskia se beca naui xiuitl, pero na nimosentlalijtoya nijtekipanos Jehová. Yeka, nijnejki nimomachtis ipan se escuela kampa nechmachtiskiaj nijchiuas se tekitl ika tlen ueliskia nimopanoltis uan nielis precursora. Tlauel kuali tlen nijtlapejpenik pampa nama ni eli precursora regular uan noteki nechpaleuia ma nitlapaleui se keski tonali ipan Betel, uan nama nijpia sekinok tekitl ipan Jehová itlanechikol”.

17. ¿Ipan tlake sekinok tlamantli techpaleuia kema tijkauaj Jehová ma techyakana? (Isaías 48:17, 18).

¹⁷ Jehová itlanechikol techiljuia se keski tlamantli tlen techpaleuia amo ma timosentlalikaj titlapijpiasej yon ipan sekinok tlamantli tlen ueliskia kichiuas ma tikixpanokaj Jehová. Kema tijchiuaj tlen Jehová techiljuia tlauel techpaleuia pampa tijpiaj kuali totlalnamikilis, uan amo tijchiuaj tlen uelis kichiuas ma titlaijiyouikaj (1 Tim. 6:9, 10). Uan nopa techpaleuia ma timosentlaliaj tijtekipanosej Jehová ika nochi toyolo. Nopa kichiua tlauel ma tiyolpakikaj uan ma tijpiakaj tlaseuilistli (xijpoua Isaías 48:17, 18).

18. ¿Kenke nochipa tijneki tijkauas Jehová ma mitsyakana?

¹⁸ Jehová nojua kintekiuijtos toikniuaj uan kiampa kiyakanas itlanechikol kema mochijtos nopa ueyi tlaijiyouilistli uan ipan nopa Mil Xiuitl kema Jesús tlanauatijtos (Sal. 45:16). Ipan nopa tonali, ¿nojua tijkauasej Jehová ma techyakana maske uelis amo tijchiuasej tlen tojuantij tijnekij? Tlaj nama tijchiuaj tlen techiljuiaj amo ouij tijmatisej kiampa tijchiuasej teipa. Yeka moneki ma tijkauakaj Jehová ma techyakanaj ika toikniuaj katli ya kintekimakatok ma techmokuitlauikaj (Is. 32:1, 2; Heb. 13:17). Tikitstokej uelis timotemachisej ipan Jehová katli techyakana, katli techpaleuia kuali ma titlaneltokakaj uan katli techpaleuis ma tiitstokaj nochipa ipan yankuik Tlaltipaktli.