Ma tikintlasojtlakaj nochi maseualmej
KEMA Jesús kinmachtik itokilijkauaj ma tlajtolmoyauakaj, ya kuali kimajtoya amo nochi kinekiskiaj kintlakakilisej (Luc. 10:3, 5, 6). Kema titlajtolmoyauaj, tikinpantiaj maseualmej katli techkualankanankiliaj o kemantika kinekij techmakilisej. Nochi ni kichiua ouij ma tijmatikaj tikintlasojtlasej maseualmej.
Se akajya katli tetlasojtla kiita tlake kinpoloua sekinok uan tlake kuesoli kipiaj, kiyolkokoua tlen kinpano uan kineki kinpaleuis. Tlaj ayokmo titetlasojtlaskiaj, uajka ayokmo titlajtolmoyauaskiaj ika pakilistli uan ayokmo ueliskia tikinpaleuisej maseualmej. Uan tlaj tijchiuaj kampeka nojua titetlasojtlasej, techpaleuis nojua ma tiyolpaktokaj ipan tlajtolmoyaualistli. Eliskia kejuak se tlitl tlen tijyakatiliskiaj kuauitl uan kiampa nojua ma xauanto (1 Tes. 5:19).
¿Tlake techpaleuis nojua ma titetlasojtlakaj maske kemantika ouij tijmatisej? Ma tikitakaj kenijkatsa uelis tijchiuasej kej Jehová, Jesús uan apóstol Pablo.
MA TITETLASOJTLAKAJ KEJ JEHOVÁ
Maske ipan miak xiuitl tlen panotok tlauel kiistlakauijtokej Jehová, ya kiijiyouijtok nochi uan nojua kintlasojtla maseualmej maske “axkuajkualmej o axmotlaskamatij” (Luc. 6:35). Uan kiampa kinextia kema kipia iyolo ininuaya pampa “kineki nochi tlakamej ma momakixtikaj” (1 Tim. 2:3, 4). Maske amo kipaktia tlen amo kuali, ya tlauel kinpatiita maseualmej uan amo kineki yon se ma miki (2 Ped. 3:9).
Jehová kimati Satanás kinkajkayajtok miakej maseualmej katli amo kitekipanouaj (2 Cor. 4:3, 4). Sekij, kema nojua konemej, pejkej kinmachtiaj tlamantli tlen amo melauak tlen toTeotsij. Yeka, tlen kiyolmatij uan moiljuiaj kichiua amo ma kineltokakaj tlen Biblia tlamachtia. Jehová tlauel kineki kinpaleuis. ¿Kenijkatsa tijmatij nopa?
Ma tikilnamikikaj tlake panok ika Nínive. Maske tlauel kinpaktiyaya tlasisinijkayotl, Jehová kiiljuik Jonás: “¿Axtikita noja más ipati nochi nopa miak tlakamej ipan ni ueyi altepetl NÍnive uan moneki nikintlasojtlas? Nopano itstokej pano 120 mil tlen aya tleno kimachiliaj” (Jon. 4:11). Jehová kimajtoya nopa níniveeuanij amo kiixmatiyayaj. Yeka kintlasojtlak uan kititlanki Jonás ma kiniljuiti tlake kinekiyaya kinchiuilis.
Sanse kej Jehová, tojuantij nojkia tijpatiitaj maseualmej ininnemilis. Uelis tijchiuasej kej ya tlaj nojkia tijnekisej tikinpaleuisej ika nochi toyolo katli techtlakakiliaj, maske sekij nesi amo kema kitekipanosej toTeotsij.
MA TITETLASOJTLAKAJ KEJ JESÚS
Sanse kej iTata, Jesús nojkia kintlasojtlak maseualmej katli kinekiyayaj kiixmatisej toTeotsij. “Kema kinitak nochi nopa [miakej] tlakamej tlen ualajtoyaj kampa ya para ma kinpaleui, kintlasojtlak pampa nelia miak kuesoli kipixtoyaj hasta moiljuijkej ayok tleno ininpati. Itstoyaj keja borregojmej tlen axkipixkej inintlamokuitlauijka” (Mat. 9:36). Jesús amo san kiitayaya kej nesiyayaj nopa maseualmej. Ya kuali kimajtoya katli tlayakanayayaj ipan religión kinyolkokojtoyaj uan kinmachtijtoyaj tlen amo melauak. Uan maske kimajtoya miakej tlen nopa maseualmej kitlauelkauaskiaj kema kipiaskiaj tlaouijkayotl, ya nojua kinmachtik “miak tlamantli” (Mar. 4:1-9).
Tlaj se maseuali amo kuali techtlakakilia, amo ma timoyolkokokaj
Maseualmej ininnemilis mopatla uan yeka uelis teipa kuali techtlakakilisej
Tlaj maseualmej kualanij kema tikinkamanaljuiaj, amo kinamiki san ya nopa tikitasej, nojkia moneki kuali timoiljuisej tlake kinpano o kenke kiampa technankiliaj. Uelis sekij amo kinekij kimatisej tlen Biblia tlamachtia pampa kiitstokej kenijkatsa tlauel amo kuali monejnemiltiaj katli kiijtouaj kitokiliaj Cristo. Sekinok uelis kiniljuijtokej tlamantli tlen amo melauak tlen tojuantij. Uan sekij uelis majmauij uan moiljuiaj tlaj techtlakakilisej, ininkalnechkauaj o ininuikaljuaj kinpinajtisej.
Sekij maseualmej amo kuali techtlakakiliaj pampa kinpanotok se keski tlamantli tlen amo kuali. Se misionera katli itoka Kim, kiijtoua: “Kanajya, kampa titlajtolmoyauaj, onkak se tlauilankayotl uan maseualmej kipolojkej nochi tlen kipixtoyaj. Inijuantij amo motemachiaj teipa kuali itstosej. Tlauel mokuesouaj uan amo motemachiaj ipan sekinok. Miakpa tikinpantiaj maseualmej katli amo kinpaktia ma titlajtolmoyauakaj. Se tonali kinekiyayaj nechchiuilisej tlen amo kuali kema nitlajtolmoyauayaya”.
¿Tlake kipaleuia Kim nojua ma kintlasojtla maseualmej? Ya kiijtoua: “Kema maseualmej amo kuali nechtlakakiliaj, nijchiua kampeka nikilnamikis tlen kiijtoua Proverbios 19:11: ‘Se tlakatl tlen tlamachilia axyolkentsi’. Kema nimoiljuia tlake kinpanotok nopa maseualmej nechpaleuia nojua ma nikintlasojtla. Uan nojkia nimoiljuia ipan maseualmej katli kena kuali techtlakakiliaj, pampa nopaya itstokej maseualmej katli tikinpaxalouaj”.
Nojkia kualtiaskia timoiljuisej kenijkatsa titlanankiliskiaj tlaj nojkia techpanoskia o timoiljuiskiaj kej nopa maseualmej. Tlaj miakpa techiljuijtoskiaj tlamantli tlen amo melauak tlen Jehová itlajtoltemakauaj, uelis nojkia amo kuali titlanankiliskiaj uan monekiskia ma techtlasojtlakaj. Jesús kiijtok: “Xikinchiuilikaj sekinok, iuikal keja inkinekij sekinok ma inmechchiuilikaj”. Tlaj tikilnamikisej ni tlamantli, techpaleuis ma tikintlasojtlakaj maseualmej maske kemantika ouij tijmatisej (Mat. 7:12).
MA TITETLASOJTLAKAJ KEJ PABLO
Pablo nojkia kintlasojtlak maseualmej maske kemantika kichiuilijkej tlen amo kuali. ¿Kenke kintlasojtlak? Pampa amo kema kiilkajki kenijkatsa eliyaya achtouia. Ya kiijtok: “Achtouia nikauilmatiyaya itoka Cristo [...,] nikintlaijiyouiltiyaya itlakauaj uan nelia nimosisiniyaya. Pero yonke keja nopa nielki, toTeko nechtlasojtlak pampa aya nijneltokayaya uan axnijmachiliyaya tlen nijchiuayaya” (1 Tim. 1:13). Kuali kimajtoya Jehová uan Jesús kitlasojtlakej. Uelis kema kiitayaya tlen sekinok kichiuayayaj, kiilnamikiyaya tlen ya kichiuayaya.
Kemantika, Pablo kinpantiyaya maseualmej katli kineltokayayaj ika nochi ininyolo tlamantli tlen amo melauak. ¿Tlake kichiuayaya? Hechos 17:16 kiijtoua se tonali, kema itstoya ipan altepetl Atenas, “nelia mokuesok” pampa nochi maseualmej kinueyichiuayayaj tlaixkopinkayomej uan teotsitsij. Tlen kiyolmatki kichijki nojua kuali ma tlajtolmoyaua (Hech. 17:22, 23). Pablo kuali kiitayaya kenijkatsa eliyayaj maseualmej, kiampa kimatiyaya kenijkatsa kinpaleuis ma momakixtikaj (1 Cor. 9:20-23).
Kema tijpantisej se akajya katli amo kuali techtlakakilia o kineltoka tlen amo melauak, uelis tijchiuasej sanse kej Pablo. Ma tijtekiuikaj tlen tijmajtokej tlen nopa maseuali uan kiampa tijpaleuisej ma kimati “nopa kuali tlajtoli” (Is. 52:7). Se tosiuaikni katli itoka Dorothy kiijtoua: “Kampa titlajtolmoyauaj, maseualmej kinmachtijtokej toTeotsij tlauel chikauak tetlajtolsenkaua. Achtoui nikiniljuia tlauel kuali pampa tlaneltokaj ipan toTeotsij, uan teipa nikinmachtia ika Biblia kenijkatsa Jehová tlauel teiknelia uan nochi tlen kiijtojtok kichiuas teipa”.
“XIJTLANIKAJ TLEN AXKUALI IKA TLEN KUALI”
Kej panotias itlamia tonali, maseualmej nojua amo kinekisej techtlakakilisej (2 Tim. 3:1, 13). Maske panos ni, kinamiki nojua ma titetlasojtlakaj uan ma tiyolpaktokaj kema titlajtolmoyauaj. Jehová techpaleuia ma tijtlanikaj “tlen axkuali ika tlen kuali” (Rom. 12:21). Se precursora katli itoka Jessica kiijtoua: “Nikinpantia maseualmej katli tlauel moueyimatij. Inijuantij techkualankaitaj uan amo kinpaktia tlen tijmoyauaj. Nopa ueliskia techkualankamakas. Kema peua nijkamanaljuia se akajya, ipan noyolo nikiljuia Jehová ma nechpaleui nikitas nopa maseuali kej ya kiita. Kiampa ayokmo nimosentlalia ipan tlen nijyolmati uan nimoiljuia kenijkatsa uelis nijpaleuis”.
Nojua tikintemouaj maseualmej katli kinekij kiixmatisej toTeotsij
Teipa, sekij uelis kuali techtlakakilisej uan kinekisej kiixmatisej toTeotsij
Nojkia moneki timoiljuisej kenijkatsa tikinyolchikauasej toikniuaj katli ininuaya titlajtolmoyauaj. Jessica kiijtoua: “Kema se tlen tojuantij kipano tlen amo kuali, nijchiua kampeka amo nimoiljuijtos ipan tlen panok. Ayokmo nikamanalti tlen nopa tlamantli uan nikijtoua san tlen uelis teyolchikauas, kej kema nikijtoua tlajtolmoyaualistli tlauel tepaleuia maske sekij amo kuali techtlakakiliaj”.
Jehová kuali kimati nochi tlaouijkayotl tlen tikixnamikij ipan tlajtolmoyaualistli, uan temachtli tijmatij tlauel yolpaki kema kiita titetlasojtlaj kej ya (Luc. 6:36). Uan nojkia tijmatij Jehová amo nochipa kintlasojtlatos maseualmej. Ya kimati ipan tlake tonali kintsontlamiltis maseualmej katli amo kualmej. Uan pampa ayamo asi nopa tonali, nojua tlauel moneki titlajtolmoyajtosej (2 Tim. 4:2). Yeka, nojua ma tijchijtokaj toteki ika pakilistli uan ma tikintlasojtlakaj nochi maseualmej.
